4. சதுத்தோ² பரிச்சே²தோ³

ஏகவிதா⁴தி³னித்³தே³ஸவண்ணனா

128-30. விஜானனஸபா⁴வதோதி ஆரம்மணவிஜானனஸபா⁴வத்தா. நனு ச ஹேட்டா² ஸாரம்மணதோ ஏகவித⁴பா⁴வோ வுத்தோதி? ஸச்சம் வுத்தோ, ஸோ பன சேதஸிகானஞ்ச ஸாதா⁴ரணோதி இத⁴ தப்³பி³வஜ்ஜனத்த²ம் விஜானனலக்க²ணதாவ வுத்தா. ஸங்கே²பக³ணனவஸேன ச ஸஹேதுகானம் ஏகஸத்ததிவித⁴தா வுத்தா. ஹேதுவாதி³னாதி குஸலாகுஸலாப்³யாகதஹேதூனம் ப்³யாகரணகுஸலேன. அத² வா ‘‘யே த⁴ம்மா ஹேதுப்பப⁴வா, தேஸம் ஹேதும் ததா²க³தோ ஆஹா’’தி (அப. தே²ர 1.1.286; மஹாவ. 60) வசனதோ தம்தம்பச்சயுப்பன்னத⁴ம்மானம் தம்தம்பச்சயவாதி³னா.

131-4. ஸவத்து²காவத்து²கதோதி ஏகந்தேன ஸப்³ப³வத்து²னிஸ்ஸிதபா⁴வதோ சேவ தத³பா⁴வதோ ச. கேசி பன ஹத³யவத்து²வஸேன ஸவத்து²காவத்து²கதம் வண்ணேந்தி, தம் ந யுஜ்ஜதி ஸவத்து²கனித்³தே³ஸே ‘‘ஸப்³போ³ காமவிபாகோ’’தி பஸாத³னிஸ்ஸிதானம்பி ஸங்க³ஹிதத்தா. உப⁴யவஸேனாதி ஸவத்து²காவத்து²கவஸேன. கானிசி ஹி சித்தானி ஏகந்தேன ஸவத்து²கானி, கானிசி அவத்து²கானேவ, கானிசி உப⁴யஸபா⁴வானி. ததா² சேவ நித்³தி³ஸதி ‘‘ஸப்³போ³ காமவிபாகோ சா’’திஆதி³.

ஸப்³போ³ காமவிபாகோ சாதி ஸஹேதுகாஹேதுகபி⁴ன்னோ ஸப்³போ³ தேவீஸதிவிதோ⁴ காமாவசரவிபாகோ ச. ஆதி³மக்³கோ³தி ஸோதாபத்திமக்³கோ³. ஸோ ஹி ஸப்³ப³லோகுத்தரேஸு ஆதி³தோ உப்பஜ்ஜனதோ, அட்ட²ஸு அரியபுக்³க³லேஸு ஆதி³புக்³க³லஸ்ஸ ஸம்ப³ந்தீ⁴தி வா ‘‘ஆதி³மக்³கோ³’’தி வுச்சதி. வினா வத்து²ந்தி ஸகஸகவத்து²ம் வினா நுப்பஜ்ஜந்தி. தேனேவ ஹேதானி அரூபப⁴வே நுப்பஜ்ஜந்தி தத்த² வத்தூ²னம் அபா⁴வதோ. ‘‘நுப்பஜ்ஜந்தி வினா வத்து²’’ந்தி ச இத³ம் அந்தோபா⁴விதகாரணத்த²ம் கத்வா வுத்தம். தேன யஸ்மா வத்து²ம் வினா நுப்பஜ்ஜந்தி, தஸ்மா ஏகந்தேன ஸவத்து²காதி வுத்தம் ஹோதி.

ஏகந்தேன அவத்து²கா அரூபப⁴வேயேவ படிஸந்தா⁴தி³வஸேன பவத்தனதோ. கத²ம் பன ரூபஸன்னிஸ்ஸயேன வினா தத்த² அரூபம் பவத்ததி, கஸ்மா ந பவத்ததி பஞ்சவோகாரேதி? ததா² அத³ஸ்ஸனதோ. யதி³ ஏவம் கப³ளீகாராஹாரேனபி வினா ரூபதா⁴துயம் ரூபேன பவத்திதப்³ப³ம், கிம் காரணா? காமதா⁴துயம் ததா² அத³ஸ்ஸனதோ. அபி து யஸ்ஸ சித்தஸந்தானஸ்ஸ பவத்திகாரணம் ரூபே அவிக³ததண்ஹம், தஸ்ஸ ஸஹ ரூபேன பவத்தி. யஸ்ஸ பன நிப்³ப³த்திகாரணம் ரூபே விக³ததண்ஹம், தஸ்ஸ வினா ரூபேன பவத்தி காரணஸ்ஸ தம்விமுக²தாயாதி ரூபஸன்னிஸ்ஸயேன வினா தத்த² அரூபம் பவத்ததி. த்³வேசத்தாலீஸ ஸேஸானீதி மனோத்³வாராவஜ்ஜனம் குஸலகிரியாவஸேன ஸோளஸ காமாவசரானி, ததே²வ அட்ட² அரூபாவசரானி, பட²மமக்³க³வஜ்ஜானி ஸத்த லோகுத்தரானி, படிக⁴த்³வயவஜ்ஜிதத³ஸஅகுஸலானி சேதி த்³வேசத்தாலீஸ வுத்தாவஸேஸசித்தானி.

135-7. ரூபாதீ³ஸு ஏகேகமேவ ஆரம்மணம் இமஸ்ஸாதி ஏகேகாரம்மணம். தஸ்ஸ தஸ்ஸ ஆரம்மணஸ்ஸ ஆபாத²க³தகாலே தம்தம்விஜானனவஸேன பஞ்சபி ஆரம்மணானி இமஸ்ஸாதி பஞ்சாரம்மணம். ஏவம்பீதி ந கேவலம் ஸவத்து²காதி³வஸேனேவ, அத² கோ² ஏகேகாரம்மணாதி³தோபி. அபி⁴ஞ்ஞாவஜ்ஜிதானம் ஸப்³ப³மஹக்³க³தானம்பி த⁴ம்மாரம்மணபா⁴வேன ஏகாரம்மணத்தா ஆஹ ‘‘ஸப்³ப³ம் மஹக்³க³த’’ந்தி. பண்ணத்தாரம்மணதோ ஏகாரம்மணந்தி கேசி. தம் அரூபாவசரது³தியசதுத்த²ஜ்ஜா²னானி பத்வா ந யுஜ்ஜதி தேஸம் மஹக்³க³தாரம்மணத்தா. அபி⁴ஞ்ஞாத்³வயஸ்ஸ ச²ளாரம்மணிகபா⁴வேன, தஸ்ஸ ச ரூபாவசரபஞ்சமஜ்ஜா²னதோ அபி⁴ன்னத்தா தம் பஹாய ‘‘தேசத்தாலீஸா’’தி வுத்தம்.

141. புஞ்ஞவிபாககிரியதோ காமே த்³வாத³ஸாதி ஸம்ப³ந்தோ⁴. தா⁴தி நிபாதமத்தம். புஞ்ஞவிபாகக்ரியதோதி ஞாணவிப்பயுத்தகுஸலவிபாககிரியதோ.

143-9. இரியாய காயிகாய கிரியாய பவத்திபத²பா⁴வதோ இரியாபதோ², க³மனாதி³. அத்த²தோ தத³வத்தா² ரூபப்பவத்தி. காமஞ்சேத்த² ரூபவினிமுத்தோ இரியாபதோ², விஞ்ஞத்தி வா நத்தி², ததா²பி ஸப்³ப³ம் ரூபஸமுட்டா²பகசித்தம் இரியாபது²பத்த²ம்ப⁴கம், விஞ்ஞத்திவிகாருப்பாத³னஞ்ச ஹோதி. யம் பன சித்தம் விஞ்ஞத்திஜனகம், தம் ஏகம்ஸதோ இதரத்³வயஸ்ஸ ஜனகம் அவினாபா⁴வதோ, ததா² இரியாபது²பத்த²ம்ப⁴கம் ரூபஸ்ஸாதி இமஸ்ஸ விஸேஸஸ்ஸ த³ஸ்ஸனத்த²ம் ‘‘ரூபீரியாபத²விஞ்ஞத்தி-ஜனகாஜனகாதி³தோ’’தி இரியாபத²விஞ்ஞத்தீனம் விஸும் க³ஹணம். ஜனகாஜனகாதி³தோதி திண்ணம்பி ஜனகதோ, கஸ்ஸசிபி அஜனகதோ, த்³வின்னம் ஏகஸ்ஸ ச ஜனகதோ. கானிசி ஹி சித்தானி ரூபம் ஸமுட்டா²பேந்தி, இரியாபத²ம் கப்பேந்தி, விஞ்ஞத்திம் ஜனயந்தி. கானிசி ரூபம் ஸமுட்டா²பேந்தி, இரியாபத²ம் கப்பேந்தி, விஞ்ஞத்திம் ந ஜனயந்தி. கானிசி ரூபமேவ ஸமுட்டா²பேந்தி, இதரத்³வயம் ந கரோந்தி. கானிசி தீணி ந கரோந்தேவ. ததா² சேவ த³ஸ்ஸேதி ‘‘த்³வாத³ஸாகுஸலா’’திஆதி³. ஏவஞ்சாபி ஹி தம் சித்தந்தி ந கேவலம் அஹேதுகாதி³தோவ, ஏவம் ரூபாதி³ஜனகாதி³தோபி தம் சதுப்³பி³த⁴ம். ‘‘ஏவஞ்சாதி³ம்ஹி த’’ந்திபி லிக²ந்தி. தஸ்ஸ பன ஆதி³ம்ஹி நிக்கி²த்தம் சித்தம் ஏவஞ்ச சதுப்³பி³த⁴ந்தி அத்த²ம் வத³ந்தி. தத்தா²தி தேஸு ரூபஜனகாதீ³ஸு. த³ஸ கிரியாதி மனோதா⁴துவஜ்ஜா த³ஸ கிரியா.

ஸமுட்டா²பேந்தி ரூபானீதி அத்தனோ உப்பாத³க்க²ணேயேவ அத்தனா ஜனேதப்³ப³ரூபானி ஸமுட்டா²பேந்தி. கப்பேந்தீதி ஸன்னாமேந்தி. யதா²பவத்தம் இரியாபத²ம் உபத்த²ம்பே⁴ந்தி. யதா² ஹி அந்தரந்தரா உப்பஜ்ஜமானேஹி வீதி²சித்தேஹி அப்³போ³கிண்ணே ப⁴வங்கே³ பவத்தமானே அங்கா³னி ஓஸீத³ந்தி, பவேத⁴ந்தா விய ஹோந்தி, ந ஏவம் த்³வத்திம்ஸவிதே⁴ஸு வக்க²மானேஸு ச ச²ப்³பீ³ஸதிவிதே⁴ஸு ஜாக³ரணசித்தேஸு பவத்தமானேஸு. ததா³ பன அங்கா³னி உபத்த²த்³தா⁴னி யதா²பவத்தஇரியாபத²பா⁴வேனேவ பவத்தந்தி. ஜனயந்தி ச விஞ்ஞத்திந்தி மனோத்³வாரே பவத்தா ஏவ விஞ்ஞத்திம் ஜனயந்தி, ந பன பஞ்சத்³வாரே பவத்தாதி த³ட்ட²ப்³ப³ம்.

த்³விபஞ்சவிஞ்ஞாணானம் ஜா²னங்க³யோகா³பா⁴வேன ரூபாஜனகத்தா ஆஹ ‘‘த்³வேபஞ்சவிஞ்ஞாணா’’தி. ஜா²னங்கா³னி ஹி சித்தேன ஸஹ ரூபஸமுட்டா²பகானி, தேஸம் அனுப³லப்பதா³யகானி மக்³க³ங்கா³தீ³னி தேஸு விஜ்ஜமானேஸு ஸவிஸேஸம் ரூபப்பவத்தித³ஸ்ஸனதோ. அரூபவிபாகா பன ரூபவிராக³பா⁴வனாய நிப்³ப³த்தத்தா ஹேதுனோ தம்விமுக²தாய ரூபம் ந ஸமுட்டா²பேந்தீதி ஆஹ ‘‘விபாகா ச அரூபிஸூ’’தி.

150. ஸப்³பே³ஸம் ஸந்தி⁴சித்தந்தி ஸப்³பே³ஸம் ஸத்தானம் படிஸந்தி⁴சித்தம். தஞ்ஹி வத்து²து³ப்³ப³லதாய, அப்பதிட்டி²ததாய, பச்சயவேகல்லதோ, ஆக³ந்துகதாய ச ரூபம் ந ஸமுட்டா²பேதி. ததா² ஹி படிஸந்தி⁴விஞ்ஞாணேன ஸஹஜாதம் வத்து² பச்சா²ஜாதபச்சயரஹிதம், ஆஹாராதீ³ஹி ச அனுபத்த²த்³த⁴ம் து³ப்³ப³லம், தஸ்ஸ ச து³ப்³ப³லத்தா தன்னிஸ்ஸிதவிஞ்ஞாணம்பி து³ப்³ப³லந்தி. யதா² ச பபாதே பதிதோ அஞ்ஞஸ்ஸ நிஸ்ஸயோ ப⁴விதும் ந ஸக்கோதி, ஏவம் தம்பி பி⁴ன்னஸந்ததியம் கம்மக்கி²த்ததாய பபாதே பதிதம் விய அப்பதிட்டி²தம் ந ரூபஸமுட்டா²பனே உஸ்ஸஹதி ச வத்து²னோ ச அத்தனா ஸஹ அபச்சா² அபுரே உப்பஜ்ஜமானத்தா புரேஜாதபச்சயஸ்ஸ அலாப⁴தோ. யதா² பன ஆக³ந்துகோ புரிஸோ அக³தபுப்³ப³ம் தே³ஸம் க³தோ அஞ்ஞேஸம் ‘‘ஏத² போ⁴ அந்தோகா³மே வோ அன்னபானக³ந்த⁴மாலாதீ³னி த³ஸ்ஸாமீ’’தி வத்தும் ந ஸக்கோதி அத்தனோ அவிஸயதாய, அப்பஹுதாய ச, ஏவமேவம் படிஸந்தி⁴சித்தம்பி ஆக³ந்துகந்தி. ஏவம் வத்து²து³ப்³ப³லதாதீ³ஹி காரணேஹி ரூபம் ந ஸமுட்டா²பேதி. அபிச ஆஹாரிந்த்³ரியாதி³வஸேன யேஹாகாரேஹி சித்தஸமுட்டா²னரூபானம் சித்தசேதஸிகா பச்சயா ஹோந்தி, தேஹி ஸப்³பே³ஹி படிஸந்தி⁴யம் சித்தசேதஸிகா ஸமதிம்ஸகம்மஜரூபானம் யதா²யோக³ம் பச்சயா ஹோந்தி. வுத்தஞ்ஹேதம் பட்டா²னே –

‘‘படிஸந்தி⁴க்க²ணே விபாகாப்³யாகதா ஆஹாரா ஸம்பயுத்தானம் க²ந்தா⁴னம் கடத்தா ச ரூபானம் ஆஹாரபச்சயேன பச்சயோ’’திஆதி³ (பட்டா². 1.1.429).

தஸ்மா ஸமதிம்ஸகம்மஜரூபானி சித்தஸமுட்டா²னரூபானம் டா²னம் க³ஹேத்வா டி²தானீதி படிஸந்தி⁴சித்தம் ரூபம் ந ஸமுட்டா²பேதீதி வேதி³தப்³ப³ம்.

சுதிசித்தஞ்சாரஹதோதி ஏத்த² கீ²ணாஸவஸ்ஸ சுதிசித்தம் உபஸந்தவட்டமூலஸ்மிம் ஸந்தானே ஸாதிஸயம் ஸந்தவுத்திதாய ரூபம் ந ஸமுட்டா²பேதி, அனாகா³மிஆதீ³னம் தத³பா⁴வதோதி வத³ந்தி. டீகாகாரோ பன ஆனந்தா³சரியோ ப⁴ணதி –

‘‘காமாவசரானம் பச்சி²மசித்தஸ்ஸ உப்பாத³க்க²ணே யஸ்ஸ சித்தஸ்ஸ அனந்தரா காமாவசரானம் பச்சி²மசித்தம் உப்பஜ்ஜிஸ்ஸதி, ரூபாவசரே, அரூபாவசரே பச்சி²மப⁴விகானம், யே ச ரூபாவசரம், அரூபாவசரம் உபபஜ்ஜித்வா பரினிப்³பா³யிஸ்ஸந்தி, தேஸம் சவந்தானம், தேஸம் வசீஸங்கா²ரோ நிருஜ்ஜி²ஸ்ஸதி, நோ ச தேஸம் காயஸங்கா²ரோ நிருஜ்ஜி²ஸ்ஸதீதி வசனதோ அஞ்ஞேஸம்பி சுதிசித்தம் ரூபம் ந ஸமுட்டா²பேதீ’’தி.

ஆசரியஸ்ஸ ஹி அயமதி⁴ப்பாயோ – ‘‘காமாவசரானம் பச்சி²மசித்தஸ்ஸா’’தி ஏதேன அவிஸேஸேன காமாவசரஸத்தானம் சுதிசித்தஸ்ஸ, ‘‘யே ச ரூபாவசரம்…பே… நிருஜ்ஜி²ஸ்ஸதீ’’தி இமினா காமப⁴வதோ சவித்வா ரூபாரூபப⁴வூபபஜ்ஜனகானம் காமாவசரசுதிசித்தஸ்ஸாபி உப்பாத³க்க²ணதோ உத்³த⁴ம் வசீஸங்கா²ரஸ்ஸ நிரோத⁴ம் வத்வா காயஸங்கா²ரஸ்ஸ தத³பா⁴வவசனதோ சுதிசித்தஸ்ஸ காயஸங்கா²ராஸமுட்டா²பனம் ஸித்³த⁴ம். யத³க்³கே³ன ச தம் காயஸங்கா²ரம் ந ஸமுட்டா²பேதி, தத³க்³கே³ன தம் ஸேஸரூபம்பி ந ஜனேதி. ந ஹி ரூபஸமுட்டா²பகஸ்ஸ க³ப்³ப⁴க³ததாதி³விப³ந்தா⁴பா⁴வே காயஸங்கா²ராஸமுட்டா²பனே காரணம் அத்தி². ந ச யுத்தம் சுதிதோ உத்³த⁴ம் சித்தஸமுட்டா²னஞ்சஸ்ஸ ரூபம் பவத்ததீதி, நாபி ‘‘சுதிசித்தம் ரூபம் ஸமுட்டா²பேதீ’’தி பாளி அத்தி², ந சாபி வட்டமூலானுபஸமோ சுதிசித்தஸ்ஸ ரூபுப்பாத³னே காரணம் சுதிசித்தேன ந உப்பன்னானம்பி ததோ புரிமதரேஹி உப்பன்னானம் விய ப⁴வந்தரே அனுப்பஜ்ஜனதோ, தஸ்மா ஸப்³பே³ஸம்பி சுதிசித்தம் ரூபம் ந ஸமுட்டா²பேதீதி. யதி³ காயஸங்கா²ரஸமுட்டா²பனமேவ ரூபஜனனாரஹபா⁴வம் ஸாதே⁴தி, ததா³ சதுத்த²ஜ்ஜா²னே கத²ந்தி? நாயம் தோ³ஸோ, தஸ்ஸ பா⁴வனாப³லேன ஸாதிஸயம் ஸந்தவுத்திதாய காயஸங்கா²ராஸமுட்டா²பனேபி மரணாஸன்னசித்தானம் விய பரிது³ப்³ப³லத்தாபா⁴வதோ ரூபஸமுட்டா²பனே விப³ந்தோ⁴ நத்தீ²தி. குதோ பன பட்டா²ய சித்தஜரூபம் நுப்பஜ்ஜதீதி? யதோ பட்டா²ய காயஸங்கா²ரே நுப்பஜ்ஜதி. கதா³ ச காயஸங்கா²ரோ நுப்பஜ்ஜதீதி? சுதிதோ புப்³பே³ த்³வத்திம்ஸமசித்தக்க²ணதோ பட்டா²ய நுப்பஜ்ஜதி, தேத்திம்ஸமசித்தக்க²ணே உப்பன்னம் பச்சி²மஸோளஸகதோ புரேதரமேவ நிருஜ்ஜ²தீதி வத³ந்தி. ‘‘யஸ்ஸ காயஸங்கா²ரோ ந நிருஜ்ஜ²தி, தஸ்ஸ சித்தஸங்கா²ரோ ந நிருஜ்ஜி²ஸ்ஸதீ’’தி (யம. 2.ஸங்கா²ரயமக.113) பஞ்ஹே ‘‘பச்சி²மசித்தஸ்ஸ ப⁴ங்க³க்க²ணே தேஸம் காயஸங்கா²ரோ ச ந நிருஜ்ஜ²தி, சித்தஸங்கா²ரோ ச ந நிருஜ்ஜி²ஸ்ஸதீ’’தி பச்சி²மசித்தஸ்ஸேவ வஜ்ஜிதத்தா சுதிதோ து³தியததியசித்தேனாபி ஸஹ நிருஜ்ஜ²தீதி அபரே. யஸ்ஸ சித்தஸ்ஸ அனந்தரா காமாவசரானம் பச்சி²மசித்தம் உப்பஜ்ஜதீதி ஏத்த² ‘‘யஸ்ஸா’’தி காமாவசரசுதிசித்தஸ்ஸ அனந்தரபச்சயபூ⁴தம் சித்தம் ஸந்தா⁴ய வுத்தந்தி தஸ்ஸ உப்பாத³தோபி உத்³த⁴ம் காயஸங்கா²ராபா⁴வவசனேன ஹேட்டி²மகோடியா சுதிதோ ததியசித்தேனேவ ஸஹ நிருஜ்ஜ²தி. து³தியசித்தம் ந பாபுணாதீதி ஏகே.

151-7. ஏகம் த்³வே தீணி சத்தாரி டா²னானி இமஸ்ஸாதி ஏகத்³விதிசதுட்டா²னம், ஏகத்³விதிசதுட்டா²னத்தாதி அத்தோ². டா²னந்தி ச இத⁴ கிச்சமதி⁴ப்பேதம். தஞ்ஹி திட்ட²ந்தி ஏத்த² த⁴ம்மா அவட்டி²தா விய ஹோந்தீதி ‘‘டா²ன’’ந்தி வுச்சதி. மம்ஸசக்கு²தி³ப்³ப³சக்கு²ஞாணசக்கு²பு³த்³த⁴சக்கு²ஸமந்தசக்கு²வஸேன பஞ்ச நிம்மலானி லோசனானி இமஸ்ஸாதி பஞ்சனிம்மலலோசனோ.

நிப்பபஞ்சேனாதி ராகா³தி³பபஞ்சரஹிதேன. ராகா³த³யோ ஹி ஸம்ஸாரே பபஞ்சனதோ ‘‘பபஞ்சா’’தி வுச்சந்தி.

ஆவஜ்ஜனே படிச்ச²னே டா²னே மனோதா⁴துத்திகந்தி ஸம்ப³ந்தோ⁴, கிரியாமனோதா⁴து ஆவஜ்ஜனட்டா²னே, விபாகத்³வயம் ஸம்படிச்ச²னட்டா²னேதி அத்தோ².

‘‘ஸோமனஸ்ஸயுத்தஸந்தீரணம் பஞ்சத்³வாரே ஸந்தீரணம் ஸியா’’தி வத்தப்³பே³ ‘‘ஸந்தீரண’’ந்தி அதி⁴காரதோவ லப்³ப⁴தீதி கா³தா²ப³ந்த⁴ஸுக²த்த²ம் ‘‘ஸோமனஸ்ஸயுத’’ந்தி ஏத்தகமேவ வுத்தம்.

ப³லவாரம்மணே ஸதீதி ததா³ரம்மணகிச்சஸ்ஸ ப³லவாரம்மணேயேவ லப்³ப⁴னதோ வுத்தம், ந இமஸ்ஸேவ ஆவேணிகபா⁴வேன ஸப்³பே³ஸம்பி ததா³ரம்மணானம் ப³லவாரம்மணேயேவ உப்பஜ்ஜனதோ. வோட்ட²ப்³ப³னந்தி கிரியாமனோவிஞ்ஞாணதா⁴துஸங்கா²தம் வோட்ட²ப்³ப³னகிச்சம் சித்தம்.

158-9. ஸப்³பே³ஸந்தி ஸப்³பே³ஸம் காமரூபாரூபப⁴விகஸத்தானம். இமினா இத³ம் த³ஸ்ஸேதி – பஞ்சத்³வாரேஸு வோட்ட²ப்³ப³னகிச்சம் கேஸஞ்சிதே³வ ஸத்தானம் அரூபப⁴வே ஸப்³ப³ஸோ பஞ்சத்³வாரிகசித்தப்பவத்தியா, ரூபப⁴வே ச த்³வாரத்தயப்பவத்தியா அபா⁴வதோ. மனோத்³வாரே ஆவஜ்ஜனகிச்சம் பன ஸப்³பே³ஸமேவ ஸசித்தகஸத்தானம் கரோதீதி. த்³விட்டா²னிகம் நாம ஹோதீதி யதா²வுத்தட்டா²னத்³வயவந்ததாய த்³விட்டா²னிகசித்தம் நாம ஹோதி. கேசி பன ‘‘ஸோமனஸ்ஸஸஹக³தஸந்தீரணம் காமஸுக³தியம் படிஸந்தி⁴ம் ஆகட்³ட⁴தி, தஸ்மா தம் பஞ்சட்டா²னிக’’ந்தி வத³ந்தி, தம் தேஸம் மதிமத்தம் பட்டா²னே ததா² அதீ³பிதத்தா. தத்த² ஹி –

‘‘உபேக்கா²ஸஹக³தம் த⁴ம்மம் படிச்ச உபேக்கா²ஸஹக³தோ த⁴ம்மோ உப்பஜ்ஜதி நஹேதுபச்சயா’’தி ஏத்த² (பட்டா². 2.7.8) ‘‘அஹேதுகம் உபேக்கா²ஸஹக³தம் ஏகம் க²ந்த⁴ம் படிச்ச தயோ க²ந்தா⁴, தயோ க²ந்தே⁴ படிச்ச ஏகோ க²ந்தோ⁴, த்³வே க²ந்தே⁴ படிச்ச த்³வே க²ந்தா⁴, அஹேதுகபடிஸந்தி⁴க்க²ணே உபேக்கா²ஸஹக³தம் ஏகம் க²ந்த⁴ம் படிச்ச தயோ க²ந்தா⁴, தயோ க²ந்தே⁴ படிச்ச ஏகோ க²ந்தோ⁴, த்³வே க²ந்தே⁴ படிச்ச த்³வே க²ந்தா⁴’’தி (பட்டா². 2.7.8) –

ஏவம் உபேக்கா²ஸஹக³த-பத³ஸ்ஸ பவத்திபடிஸந்தி⁴வஸேன படிச்சனயோ உத்³த⁴டோ. பீதிஸஹக³தஸுக²ஸஹக³த-பதா³னம் பன –

‘‘பீதிஸஹக³தம் த⁴ம்மம் படிச்ச பீதிஸஹக³தோ த⁴ம்மோ உப்பஜ்ஜதி நஹேதுபச்சயா. அஹேதுகம் பீதிஸஹக³தம் ஏகம் க²ந்த⁴ம் படிச்ச தயோ க²ந்தா⁴, தயோ க²ந்தே⁴ படிச்ச ஏகோ க²ந்தோ⁴, த்³வே க²ந்தே⁴ படிச்ச த்³வே க²ந்தா⁴. ஸுக²ஸஹக³தம் த⁴ம்மம் படிச்ச ஸுக²ஸஹக³தோ த⁴ம்மோ உப்பஜ்ஜதி நஹேதுபச்சயா. அஹேதுகம் ஸுக²ஸஹக³தம் ஏகம் க²ந்த⁴ம் படிச்ச தயோ க²ந்தா⁴, தயோ க²ந்தே⁴ படிச்ச ஏகோ க²ந்தோ⁴, த்³வே க²ந்தே⁴ படிச்ச த்³வே க²ந்தா⁴’’தி (பட்டா². 2.7.6) –

ஏவம் பவத்திவஸேனேவ உத்³த⁴டோ, ந ‘‘அஹேதுகபடிஸந்தி⁴க்க²ணே’’திஆதி³னா படிஸந்தி⁴வஸேன, தஸ்மா யதா²த⁴ம்மஸாஸனே அவசனம்பி அபா⁴வமேவ தீ³பேதீதி ந தஸ்ஸ படிஸந்தி⁴தா³னம் அத்தீ²தி த்³விட்டா²னிகதாவ வுத்தாதி. தே மஹக்³க³தவிபாகா நவாதி ஸம்ப³ந்தோ⁴.

162. ச²த்³வாரா ஏவ ச²த்³வாரிகா. அத² வா ச²த்³வாரிகேஸூதி ச²த்³வாரிகசித்தேஸூதி அத்தோ².

164-6. ‘‘பஞ்சகிச்ச’’ந்திஆதி³ யதா²வுத்தானமேவ நிக³மனம். ஸேஸந்தி அட்ட²ஸட்டி²வித⁴ம் சித்தம். ஏககிச்சயோக³தோ, ஏகம் கிச்சமஸ்ஸாதி வா ஏகம், ஏகமேவ ஏககம். ஸப்³ப³சித்தானம் கிச்சவஸேன நித்³தே³ஸட்டா²னேயேவ கிச்சானம் படிபாடிம்பி த³ஸ்ஸேதும் ‘‘ப⁴வங்கா³வஜ்ஜன’’ந்திஆதி³ வுத்தம். யதி³ ஏவம் படிஸந்தி⁴தோ பட்டா²ய சுதிபரியோஸானம் வத்தப்³ப³ந்தி? ஸச்சம், சுதிபடிஸந்தீ⁴னம் பன பாகடத்தா ததா² ந வுத்தம். ப⁴வஸ்ஸ ஹி படிஸந்தி⁴ ஆதி³, சுதி பரியோஸானந்தி பாகடமேவ, தஸ்மா பாகடட்டா²னம் பஹாய அபாகடட்டா²னதோ பட்டா²ய த³ஸ்ஸேதும் ப⁴வங்க³மேவ ஆதி³தோ வுத்தம். ததா³ரம்மணம் பன கிஞ்சாபி அபாகடம், அத² கோ² அனேகந்திகம் கிஸ்மிஞ்சி ப⁴வே கத்த²சி ஜவனவீதி²யம் அலப்³ப⁴னதோதி ஏகந்தலப்³ப⁴மானபரிதீ³பனத்த²ம் தம் ந வுத்தம். அத² வா ததா³ரம்மணசித்தம்பி யேபு⁴ய்யேன ப⁴வங்க³னாமம் லப்³ப⁴தீதி புரிமஜவனவீதி²யம் ததா³ரம்மணம் பச்சி²மஜவனவீதி²யா ஆவஜ்ஜனஸ்ஸ புரேசரபூ⁴தம் ப⁴வங்க³-க்³க³ஹணேனேவ ஸங்க³ஹிதந்தி விஸும் ந வுத்தம். கேசி பன ‘‘பஞ்சத்³வாரேஸு பவத்திவஸேன பஞ்சவித⁴தாய த³ஸ்ஸனத்த²ம் ‘ப⁴வங்கா³வஜ்ஜன’ந்திஆதி³ வுத்த’’ந்தி வத³ந்தி, தத்த² பன அப்பவத்தமானானம் கேஸஞ்சி ஸப்³பா⁴வதோ தம் ந யுஜ்ஜதி, ச²த்³வாரப்பவத்திவஸேன ச²ப்³பி³த⁴த்தனயத³ஸ்ஸனத்த²ந்தி வத்தும் வட்டதி. யதா² சேத்த² ‘‘ப⁴வங்கா³வஜ்ஜன’’ந்திஆதி³னா சக்கு²த்³வாரே வுத்தம், ஏவம் ஸோதத்³வாராதீ³ஸுபி த³ஸ்ஸனாதி³ம் அபனேத்வா ஸவனாதி³ம் பக்கி²பித்வா கிச்சப்பவத்தி யோஜேதப்³பா³. மனோத்³வாரே பன –

‘‘ப⁴வங்க³ம் பட²மம் ஹோதி, ததோ ஆவஜ்ஜனம் மதம்;

து³தியம் தமதிக்கம்ம, ஜவனம் ததியம் ஸியா’’தி. –

யோஜனா த³ட்ட²ப்³பா³. ச²ன்னம் விஞ்ஞாணானந்தி சக்கு²விஞ்ஞாணாதீ³னம் பஞ்சன்னம், மனோவிஞ்ஞாணஸ்ஸ ச. ஸத்தவிஞ்ஞாணதா⁴தூனந்தி சக்கு²விஞ்ஞாணதா⁴தாதீ³னம் பஞ்சன்னம், மனோதா⁴துமனோவிஞ்ஞாணதா⁴துத்³வயஸ்ஸாதி ஸத்தன்னம் விஞ்ஞாணதா⁴தூனம்.

169-71. பஞ்சாபி⁴ஞ்ஞாவிவஜ்ஜிதந்தி –

‘‘இத்³தி⁴வித⁴ம் தி³ப்³ப³ஸோதோ, பரசித்தவிஜானனா;

புப்³பே³னிவாஸானுஸ்ஸதி, தி³ப்³ப³சக்கூ²தி பஞ்சதா⁴’’தி. –

ஏவமாக³தாஹி பஞ்சஹி அபி⁴ஞ்ஞாஹி யுத்தேன ரூபாவசரபஞ்சமஜ்ஜா²னசித்தேன வஜ்ஜிதம். தி³ப்³ப³ஸோதாதீ³னம் ஏகேகாரம்மணத்தேபி பஞ்சன்னம்பி அபி⁴ஞ்ஞானம் ஏகஸ்ஸேவ சித்தஸ்ஸ அவத்தா²பே⁴த³பா⁴வதோ வுத்தம் ‘‘பஞ்சாபி⁴ஞ்ஞாவிவஜ்ஜித’’ந்தி. கேசி பன ‘‘இத⁴ ஏகந்தேன த⁴ம்மாரம்மணிகசித்தானமேவ வசனதோ பரசித்தவிஜானனம் வஜ்ஜேத்வா அனாக³தம்ஸஞாணேன ஸஹ பஞ்சாபி⁴ஞ்ஞானம் படிக்கே²போ’’தி வத³ந்தி.

த்³விபஞ்சவிஞ்ஞாணானம், மனோதா⁴துத்தயஸ்ஸ ச பரிச்சாகே³ன ஏகசத்தாலீஸ ஹோந்தீதி ஆஹ ‘‘சத்தாலீஸம் ததே²கக’’ந்தி. அபி⁴ஞ்ஞானி சாதி ச-ஸத்³தோ³ அட்டா²னப்பயுத்தோ, ஸோ ‘‘சத்தாலீஸம் ததே²கக’’ந்தி இமஸ்ஸானந்தரம் த³ட்ட²ப்³போ³, தேன பன அபி⁴ஞ்ஞாசித்தத்³வயம் ஸங்க³ண்ஹாதி. அத² வா அபி⁴ஞ்ஞா நாம ஹேட்டா² ஏகேகாரம்மணிகேஸு வுத்தஸ்ஸ பஞ்சமஜ்ஜா²னஸ்ஸேவ அவத்தா²விஸேஸோதி அபி⁴ஞ்ஞாசித்தானம் ச²ளாரம்மணிகேஸு அக்³க³ஹணந்தி த³ட்ட²ப்³ப³ம்.

172-3. திதா⁴ கத்வாதி திதா⁴ கரணஹேது. ஹேத்வத்தோ² ஹி அயம் த்வா-ஸத்³தோ³ யதா² ‘‘ஸீஹம் தி³ஸ்வா ப⁴யம் ச²ம்பி⁴தத்தம் உப்பஜ்ஜதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தீ’’தி. ‘‘புஞ்ஞாபுஞ்ஞவஸேனா’’திஆதி³னா ஜாதிபூ⁴மிஹேதுவேத³னாதி³வஸேன யாவ ச²ஸத்ததிவிதோ⁴ பே⁴தோ³, தாவ மனோவிஞ்ஞாணதா⁴தும் பி⁴ந்தி³த்வா தம்வஸேன சித்தவிபா⁴க³த³ஸ்ஸனத்த²ம் நயதா³னம் கதந்தி வேதி³தப்³ப³ம்.

175. திதா⁴ கத்வாதி பட²மம் விபாகத்³வயகிரியாபே⁴த³தோ, து³தியம் குஸலாகுஸலாதி³தோதி ஏவம் தா⁴துத்³வயம் பச்சேகம் திதா⁴ கத்வா.

180. பூ⁴மி…பே… விபா⁴வயேதி திம்ஸபூ⁴மீனம் நானத்தவஸேன பவத்திதோ திம்ஸவித⁴ம், தத்தே²வ திம்ஸபுக்³க³லானம் நானத்தவஸேன பவத்திதோ ச திம்ஸவித⁴ந்திஆதி³னா இத³ம் யதா²னித்³தி³ட்ட²சித்தம் ப³ஹுதா⁴ ஹோதீதி ச விபா⁴வேய்யாதி அத்தோ².

181. இதா⁴தி இமஸ்மிம் ஸாஸனே. ஹத்த²க³தாமலகா விய ஹோந்தீதி யதா² ஹத்த²க³தம் ஆமலகம் சக்கு²மதோ ஸுபாகடம் ஹோதி, ஏவமிமஸ்ஸ மதிமதோ பி⁴க்கு²னோ அபி⁴த⁴ம்மபிடகக³தா அத்தா² ஸுபாகடா ஹோந்தி, ஆவஜ்ஜிதாவஜ்ஜிதக்க²ணே ஸுவிஸதா³வ பஞ்ஞாயந்தீதி அத்தோ².

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

ஏகவிதா⁴தி³னித்³தே³ஸவண்ணனா நிட்டி²தா.