3. ததியோ பரிச்சே²தோ³

சேதஸிகவிபா⁴க³னித்³தே³ஸவண்ணனா

89. நாமஸாமஞ்ஞதோயேவ த்³வேபஞ்ஞாஸாதி ப²ஸ்ஸாதி³னாமஸாமஞ்ஞேன த்³வீஹி அதி⁴கா பண்ணாஸ ஹோந்தி, ஸம்பயுத்தத⁴ம்மபே⁴த³தோ பன ஏகூனனவுதிசித்தஸம்பயுத்தோ ப²ஸ்ஸோ ஏகூனனவுதிவிதோ⁴தி ஏவமாதி³னா ப³ஹுவிதா⁴பி ஹோந்தீதி அத்தோ².

நனு ச ப²ஸ்ஸாத³யோ ஹேட்டா² பாளிக்கமேன த³ஸ்ஸிதா, இத⁴ பன கஸ்மா ந ததா² வுத்தாதி? ஏகேகஸபா⁴வவந்தானம் தம்தம்ஸாமஞ்ஞாபேக்கா²ய ஏகஸ்மிம் டா²னே நித்³தி³ஸிதுகாமத்தா. ப²ஸ்ஸாத³யோ ஹி மனக்காராவஸானா தேரஸ குஸலாகுஸலாப்³யாகதஸாமஞ்ஞதோ ஏகதோ வுத்தா, மஜ்ஜ²த்தாத³யோ முதி³தாவஸானா பஞ்சவீஸதி குஸலாப்³யாகதஸாமஞ்ஞதோ, லோபா⁴த³யோ பன அனோத்தப்பாவஸானா அகுஸலபா⁴வஸாமஞ்ஞதோதி ஏவம் தம்தம்ஸாமஞ்ஞாபேக்கா²ய ஸமானஸபா⁴வா த⁴ம்மா ஏகதோ வுத்தாதி.

90. ஏவம் ப²ஸ்ஸாத³யோ த⁴ம்மே உத்³தி³ஸித்வா இதா³னி ‘‘ஏத்தகேஸு அயம் த⁴ம்மோ ஸமுபலப்³ப⁴தீ’’தி சித்துப்பாதே³ஸு தேஸம் பயோக³ம் த³ஸ்ஸேதும் பட²மம் தாவ சித்தக³ணனம் த³ஸ்ஸேந்தோ ஆஹ ‘‘சதுபஞ்ஞாஸதா⁴’’திஆதி³. காமேதி காமாவசரேதி வுத்தம் ஹோதி. ஏவம் ‘‘ரூபே அரூபே’’தி ஏத்தா²பி. ஆஸவவிஸயத்தாபா⁴வதோ ந விஜ்ஜந்தி ஏதேஸு ஆஸவாதி அனாஸவா.

91-2. ஸமாஸதோதி வித்தா²ராபேக்கா²ய வுத்தம், ந இதோபி ஸமாஸஸ்ஸ அபா⁴வதோ. அதிஸங்கே²பதோ பன ஏகூனனவுதி சித்துப்பாதா³ ஹோந்தி. ஏதேஸூதி இமேஸு சித்துப்பாதே³ஸு. தேஸம் ப²ஸ்ஸாதீ³னம் த⁴ம்மானம் உப்பத்திம் ஏகேகம் உத்³த⁴ரித்வா சித்தசேதஸிகேஸு பி⁴க்கூ²னம் பாடவத்தா²ய பவக்கா²மீதி ஸம்ப³ந்தோ⁴. ஏககந்தி ஏகேகம், கா³தா²ப³ந்த⁴வஸேன ஏ-காரலோபோ.

93. சேதஸிகவிபா⁴க³ம் வத்துகாமோபி அவினிப்³போ⁴க³த⁴ம்மே த³ஸ்ஸேதும் சித்தேன ஸஹ ஏகதோ கத்வா ஆஹ ‘‘ப²ஸ்ஸபஞ்சக’’ந்தி. ஏகதோ உப்பாதோ³ ஏதேஸந்தி ஏகுப்பாதா³, ஸஹ கீ²யந்தீதி ஸஹக்க²யா, ஏகதோ உப்பஜ்ஜித்வா ஏகதோ நிருஜ்ஜ²னகாதி அத்தோ².

94. ஸப்³பே³ஸ்வேவ ஏகவீஸஸதேஸு சித்தேஸு ஸமுபலப்³ப⁴னதோ ஸப்³ப³ஸாதா⁴ரணா. கிஞ்சாபி அனந்தரகா³தா²ய சித்தேன ஸஹ ஏகுப்பாதா³தி³பா⁴வகத²னேனேவ இமேஸம் ஸப்³ப³ஸாதா⁴ரணதா வுத்தா, தத்த² பன ஏகுப்பாதா³தி³மத்தகத²னமேவ இச்சி²தம், ந ஸப்³ப³ஸாதா⁴ரணதா. வுத்தோபி வாயமத்தோ² தத்த² அபாகடத்தா புன பாகடம் கத்வா இத⁴ வுத்தோதி.

95-100. த்³விபஞ்சவிஞ்ஞாணவஜ்ஜிதசதுசத்தாலீஸகாமாவசரசித்தேஸு, லோகியலோகுத்தரவஸேன ஏகாத³ஸஸு பட²மஜ்ஜா²னிகசித்தேஸு சாதி பஞ்சபஞ்ஞாஸசித்தேஸு விதக்கஸ்ஸ தே³ஸிதத்தா ஆஹ ‘‘விதக்கோ…பே… ஸமுதீ³ரிதோ’’தி. விசாரோ பஞ்சபஞ்ஞாஸஸவிதக்கசித்தேஸு சேவ ஏகாத³ஸஸு து³தியஜ்ஜா²னிகசித்தேஸு சாதி ச²ஸட்டி²சித்தேஸு உப்பஜ்ஜதீதி ஆஹ ‘‘சாரோ…பே… ஜாயதே’’தி.

ஏகபஞ்ஞாஸசித்தேஸு பீதீதி காயவிஞ்ஞாணவஜ்ஜிதேஸு அட்டா²ரஸஸு ஸோமனஸ்ஸஸஹக³தகாமாவசரசித்தேஸு சேவ சதுத்த²பஞ்சமஜ்ஜா²னவஜ்ஜிததேத்திம்ஸரூபஜ்ஜா²னிகசித்தேஸு சாதி ஏகபஞ்ஞாஸசித்தேஸு பீதி ஜாயதி. தேஸட்டி²யா ஸுக²ந்தி ஏகபண்ணாஸஸப்பீதிகசித்தேஸு சேவ ஏகாத³ஸஸு சதுத்த²ஜ்ஜா²னிகசித்தேஸு, குஸலவிபாககாயவிஞ்ஞாணே சாதி தேஸட்டி²யா சித்தேஸு ஸுக²ம் ஜாயதி. தேஸட்டி²ஸுக²ஸஹக³தசித்தானி சேவ தீணி ச து³க்க²ஸஹக³தானீதி ச²ஸட்டி²சித்தே வஜ்ஜேத்வா அவஸேஸபஞ்சபண்ணாஸசித்தேஸு உபேக்கா² உப்பஜ்ஜதீதி ஆஹ ‘‘உபேக்கா² பஞ்சபஞ்ஞாஸசித்தேஸூ’’தி. து³க்க²ம் தீஸூதி த்³வீஸு படிக⁴சித்தேஸு சேவ அகுஸலவிபாககாயவிஞ்ஞாணே சாதி தீஸு சித்தேஸு து³க்க²ம் ஜாயதி. ஹோதி…பே… ஸோமனஸ்ஸிந்த்³ரியந்தி தேஸட்டி²யா ஸுக²ஸஹக³தசித்தேஸு ஏகமேவ காயவிஞ்ஞாணம் அபனேத்வா அவஸேஸேஸு ஸோமனஸ்ஸிந்த்³ரியம் ஹோதி. அகுஸலவிபாககாயவிஞ்ஞாணவஸேன ஏகமேவ து³க்கி²ந்த்³ரியஸஹக³தம், ததா² குஸலவிபாககாயவிஞ்ஞாணமேவ ஸுகி²ந்த்³ரியஸம்பயுத்தந்தி ஆஹ ‘‘து³க்கி²ந்த்³ரியம்…பே… ஸுகி²ந்த்³ரிய’’ந்தி.

அஹேதுகவிபாககிரியாமனோதா⁴துவஜ்ஜிதேஸு மஜ்ஜி²மக³ணனாய பஞ்சாதி⁴கஸதபரிமிதேஸு குஸலாகுஸலவிபாககிரியாசித்தேஸு வீரியம் தே³ஸிதந்தி ஆஹ ‘‘பஞ்சுத்தர…பே… ஆஹா’’தி. தி³ட்ட²த⁴ம்மிகஸம்பராயிகத்தே²ஸு ஸத்தே வினேதி, விக³தோ வா நாயகோ இமஸ்ஸ, விஸிட்டோ² வா ஸப்³ப³லோகஸ்ஸ நாயகோ ஸாமி, விஸேஸேன வா வினேய்யஸத்தே நிப்³பா³னபுரம் நேதீதி வினாயகோ. ஸமாதி⁴ந்த்³ரியம் விசிகிச்சா²வஜ்ஜிதவீரியஸஹக³தசித்தேஸு வுத்தந்தி ஆஹ ‘‘சதுத்தரஸதே’’திஆதி³.

அட்டா²ரஸ அஹேதுகசித்தானி, த்³வே ஏகஹேதுகசித்தானி ச வஜ்ஜேத்வா அவஸேஸஏகுத்தரஸதே சித்தே ச²ந்தோ³ உப்பஜ்ஜதீதி த³ஸ்ஸேதும் ‘‘ஸப்³பா³ஹேதுகசித்தானீ’’திஆதி³ வுத்தம். த³ஸ விஞ்ஞாணேதி குஸலாகுஸலவிபாகவஸேன த்³விகு³ணிதே சக்கா²தி³கே பஞ்சவிஞ்ஞாணே.

102-6. நியதா ந யேவாபனகா விய கதா³சீதி அத்தோ². கத²ம் பனேதே ஏகனவுதியா சித்தேஸ்வேவ ஜாயந்தீதி ஆஹ ‘‘அஹேதுகேஸூ’’திஆதி³. ஏகூனாஸீதியாதி த்³வாத³ஸ ஞாணஸம்பயுத்தகாமாவசரானி, பஞ்சத³ஸ ரூபாவசரானி, த்³வாத³ஸ அரூபாவசரானி, ஸமசத்தாலீஸ லோகுத்தரசித்தானீதி ஏவம் ஏகூனாஸீதியா திஹேதுகசித்தேஸு. அட்ட²வீஸதியா சித்தேதி ஸோளஸஸு காமாவசரகுஸலமஹாகிரியாஸு, த்³வாத³ஸஸு ச லோகியசதுத்த²ஜ்ஜா²னசித்தேஸு சாதி அட்ட²வீஸதிசித்தேஸு. ஸாட்ட²கே சத்தாலீஸவிதே⁴தி அட்ட²ஸஹிதே சத்தாலீஸவிதே⁴, அட்ட²சத்தாலீஸவிதே⁴தி வுத்தம் ஹோதி. ச² யுக³ளானீதி காயபஸ்ஸத்³தி⁴சித்தபஸ்ஸத்³தா⁴தீ³னி ச² யுக³ளானி. குஸலாப்³யாகதா சாதி குஸலசித்தஸம்பயோக³தோ குஸலா, அப்³யாகதசித்தஸம்பயோக³தோ அப்³யாகதாதி குஸலேனபகாஸனவிதா⁴னேஸு சே²கேன ஸத்து²னா பகாஸிதா தே³ஸிதாதி அத்தோ².

108-111. ஸம்ஸயோதி விசிகிச்சா². ஸா ஹி ஸம்ஸேதி ஸமந்ததோ ஸேதி, ‘‘ஏவம் நு கோ², நோ நு கோ²’’தி பரிஸப்பதீதி ஸம்ஸயோ. மஹந்தே ஸீலக்க²ந்தா⁴தி³கே ஏஸதி க³வேஸதீதி மஹேஸீ. தேன மஹேஸினா ஸம்மாஸம்பு³த்³தே⁴ன. அட்ட²ஸூதி அட்ட²லோப⁴ஸஹக³தசித்தேஸு. சதூஸூதி தேஸ்வேவ தி³ட்டி²ஸஹக³தசித்தேஸு. தி³ட்டி²வியுத்தேஸு சதூஸூதி ஸம்ப³ந்தோ⁴. த்³வீஸ்வேவாதி த்³வீஸு தோ³ஸமூலகசித்தேஸு. த்³வீஸு ஜாயந்தி நோ ஸஹாதி தோ³ஸமூலேஸ்வேவ த்³வீஸு ஜாயந்தி, ஸஹ பன ந உப்பஜ்ஜந்தி, உஸூயனகாலே இஸ்ஸா, மச்ச²ரணகாலே மச்சே²ரந்திஆதி³னா நானா ஹுத்வாவ உப்பஜ்ஜந்தி. பஞ்சஸூதி பஞ்சஸு ஸஸங்கா²ரிகசித்தேஸு.

112. சித்தஸ்ஸ சேதஸிகத்தாபா⁴வேபி குஸலாகுஸலாப்³யாகதத⁴ம்மானம் க³ணனட்டா²னதோ ‘‘மனோ’’தி சித்தம்பி வுத்தம்.

114-5. ஏத்தாவதா சேதஸிகவிபா⁴க³ம் த³ஸ்ஸேத்வா இதா³னி ஏகேகஸ்மிம் சித்துப்பாதே³ லப்³ப⁴மானராஸீஸு அங்க³விபா⁴க³த³ஸ்ஸனத்த²ம் ‘‘ஏகூனதிம்ஸசித்தேஸூ’’திஆதி³ வுத்தம். நனு ச ப²ஸ்ஸபஞ்சமகராஸி ஸப்³ப³பட²மம் ஆக³தா, ஸா கஸ்மா ந வுத்தாதி? ஸப்³ப³ஸாதா⁴ரணபா⁴வதோ. ந ஹி ஸோ சித்துப்பாதோ³ அத்தி², யோ ப²ஸ்ஸபஞ்சமகவினிமுத்தோதி. ஏகாத³ஸ பட²மஜ்ஜா²னிகானி ஸோமனஸ்ஸஸஹக³தானி, த்³வாத³ஸ ஸஹேதுககாமாவசரானி, ததா² சத்தாரி அகுஸலானி, ஸுக²ஸந்தீரணஹஸிதுப்பாதா³னி த்³வேதி ஏகூனதிம்ஸசித்தேஸு பஞ்சங்கி³கம் ஜா²னம் பஞ்சகராஸிஸங்கா²தம் மதம். சது…பே… நித்³தி³ஸேதி ஏகாத³ஸ து³தியஜ்ஜா²னிகானி, குஸலவிபாககிரியாவஸேன த்³வாத³ஸ உபேக்கா²ஸஹக³தஸஹேதுககாமாவசரானி, உபேக்கா²தோ³மனஸ்ஸஸஹக³தானி அட்ட² அகுஸலானி, த்³விபஞ்சவிஞ்ஞாணவஜ்ஜிதஉபேக்கா²ஸஹக³தானி ச² அஹேதுகசித்தானி சாதி இமானி ஸத்ததிம்ஸ சித்தானி யதா²யோக³ம் சதூஹி ஜா²னங்கே³ஹி யுத்தானி. ஏத்த² ஹி ஏகாத³ஸ து³தியஜ்ஜா²னிகானி விசாரபீதிஸுக²ஸமாதீ⁴ஹி ஸஹக³தானி, இதரானி யதா²யோக³ம் உபேக்கா²தோ³மனஸ்ஸேஸு ஏகேகேன விதக்கவிசாரஸமாதீ⁴ஹீதி சதூஹி ஸம்பயுத்தானி.

ஏகாத³ஸவித⁴ந்தி ஏகாத³ஸவித⁴ம் ததியஜ்ஜா²னிகசித்தம் பீதிஸுக²சித்தேகக்³க³தாயோக³தோ திவங்கி³கமுதீ³ரிதம். சதுத்திம்ஸ…பே… முதீ³ரிதந்தி த்³வாத³ஸ அரூபாவசரசித்தானி, த்³வாவீஸதி சதுத்த²பஞ்சமஜ்ஜா²னிகானி ஸாஸவானாஸவானீதி சதுத்திம்ஸ சித்தானி யதா²யோக³ம் உபேக்கே²கக்³க³தாயோக³தோ, ஸுகே²கக்³க³தாயோக³தோ ச து³வங்கி³கமுதீ³ரிதம். சதுத்த²ஜ்ஜா²னிகானி ஹி ஏகாத³ஸ ஸுகே²கக்³க³தாஸஹிதானி, ஸேஸானி தேவீஸதி உபேக்கே²கக்³க³தாஸஹிதானி.

116. ஸபா⁴வேனாவிதக்கேஸூதி து³தியஜ்ஜா²னாத³யோ விய பா⁴வனாப³லேன வினா ஸபா⁴வேனேவ அவிதக்கேஸு த்³விபஞ்சவிஞ்ஞாணேஸு. தேஸு ஹி விஜ்ஜமானானிபி ஸேஸஜா²னங்கா³னி விதக்கவிரஹேன உபனிஜ்ஜா²னகிச்சேஸு அஸமத்தா²னி. தேனேவ ஹி அட்ட²கதா²யம்பி ‘‘விதக்கபச்சி²மகஞ்ஹி ஜா²னங்க³ம் நாமா’’தி வுத்தம். பா⁴வனாய அவிதக்கபா⁴வப்பத்தானி பன பா⁴வனாப³லேனேவ உபனிஜ்ஜா²னகிச்சேஸு படுதரா, தஸ்மா ஸபா⁴வேனாவிதக்கேஸு ஜா²னங்கா³னி ந உத்³த⁴ரேய்ய. ‘‘ந உத்³த⁴டா’’தி வா பாடோ², ந உத்³த⁴டானீதி அத்தோ².

யதி³ ஏவம் கஸ்மா த்³விபஞ்சவிஞ்ஞாணேஸு ஸரூபேனேவ சித்தேகக்³க³தா வுத்தா, நனு தஸ்ஸா விதக்கவிரஹேன ஜா²னங்க³கிச்சே அஸமத்த²தாய ராஸிப⁴ஜனாபா⁴வதோ யேவாபனகவஸேன வசனம் யுத்தந்தி? வுச்சதே – குஸலாகுஸலேஸு அவிஜ்ஜமானத⁴ம்மஸ்ஸ விபாகேஸுபி அனுபலப்³ப⁴னதோ ஜா²னங்க³கிச்சஸ்ஸ அகரணேபி குஸலாகுஸலேஸு தே³ஸிதனியாமேனேவ ஸரூபேன இதா⁴பி வுத்தா. ஹோது தாவ ஏதம், ஜா²னராஸியம் வேத³னா கஸ்மா வுத்தா. ஸா ஹி ஸப்³ப³சித்தஸாதா⁴ரணபா⁴வதோ ப²ஸ்ஸபஞ்சகராஸிம்ஹி சேவ, உபேக்கா²தி³இந்த்³ரியபா⁴வதோ இந்த்³ரியராஸிம்ஹியேவ வத்தப்³பா³, ந இதரத்த² தத³பா⁴வதோதி? ஸச்சம், வேத³னா பன ஸப்³ப³வேத³னானம் ஸாமஞ்ஞஸபா⁴வேன ப²ஸ்ஸபஞ்சகே ஆக³தவேத³னா ச அபரேன விஸேஸவசனேன தத்த² நித்³தி³ட்டா², ந தத்த² அந்தோகரணத்த²ம். தேனேவ ஹி த⁴ம்மஸங்க³ணியம் த்³விபஞ்சவிஞ்ஞாணேஸு ஸங்க³ஹவாரே ஜா²னங்க³ராஸி ந உத்³த⁴டாதி ரூபதா⁴துயம் திண்ணம் மஹாபூ⁴தானம் அப்படிக⁴பா⁴வேபி காமதா⁴துயம் ஸப்படிக⁴மஹாபூ⁴தேஹி ஸமானபா⁴வதோ தத்தா²பி ஸப்படிக⁴பா⁴வோ விய த்³விபஞ்சவிஞ்ஞாணேஸு வேத³னாசித்தேகக்³க³தானம் விதக்கவியோகே³ன ஜா²னகிச்சாகரணேபி ஸவிதக்கசித்தேஸு ஜா²னசித்தஸமங்கீ³வேத³னாதீ³ஹி ஸமானத்தா ஜா²னங்க³பா⁴வேன வசனம் நாம யுத்தம். தேனேவ ச நாமரூபஸமாஸே ‘‘ப²ஸ்ஸபஞ்சகராஸிஜா²னது³கராஸிஇந்த்³ரியத்திகராஸீ’’தி வுத்தந்தி. அத² வா கிம் ஏதாய யுத்திசிந்தாய, த⁴ம்மஸபா⁴வவேதி³னா ததா²க³தேன த⁴ம்மஸபா⁴வம் அவிரஜ்ஜி²த்வா தே³ஸிதந்தி ந ஏத்த² அனுயோகோ³ காதப்³போ³தி. அஹேதுகசித்தானம் ஆரம்மணே ஸுப்பதிட்டி²ததாபா⁴வேன அனிய்யானிகத்தா வுத்தம் ‘‘ஸப்³பா³…பே… ந உத்³த⁴ரே’’தி. வுத்தஞ்ஹேதம் அட்ட²கதா²யம்பி ‘‘ஹேதுபச்சி²மகோ மக்³கோ³’’தி.

117. தீணி ஸோளஸசித்தேஸூதி பன்னரஸஸு அஹேதுகவிபாகசித்தேஸு சேவ கிரியாமனோதா⁴தும்ஹி சாதி ஸோளஸஸு சித்தேஸு. மனிந்த்³ரியம் ஜீவிதிந்த்³ரியம் வேத³னிந்த்³ரியேஸு லப்³ப⁴மானமேகந்தி தீணிந்த்³ரியானி ஹோந்தி. இமேஸுபி குஸலவிபாககாயவிஞ்ஞாணதா⁴துயம் மனிந்த்³ரியஸுகி²ந்த்³ரியஜீவிதிந்த்³ரியவஸேன தீணிந்த்³ரியானி, அகுஸலவிபாககாயவிஞ்ஞாணதா⁴துயம் து³க்கி²ந்த்³ரியேன ஸஹ தீணி, ஸுக²ஸந்தீரணே ஸோமனஸ்ஸிந்த்³ரியேன ஸஹ தீணி, அவஸேஸதேரஸசித்தேஸு உபேக்கி²ந்த்³ரியேன ஸஹ தீணீதி. ஏத்த² சித்தந்தி ஸஸம்பயுத்தத⁴ம்மஸ்ஸ சித்துப்பாத³ஸ்ஸ அதி⁴ப்பேதத்தா மனிந்த்³ரியஸ்ஸாபி ஆதா⁴ரபா⁴வோ யுஜ்ஜேய்ய. இதரதா² ஹி மனிந்த்³ரியந்தி சித்தஸ்ஸேவ க³ஹணே தஸ்ஸ அத்தனோ ச ஆதா⁴ரபா⁴வோ ந யுஜ்ஜதீதி. ஏகஸ்மிம் பன சத்தாரீதி ஏகஸ்மிம் விசிகிச்சா²ஸஹக³தே வீரியிந்த்³ரியமனிந்த்³ரியஜீவிதிந்த்³ரியஉபேக்கி²ந்த்³ரியவஸேன சத்தாரி. பஞ்ச தேரஸஸூதி ட²பேத்வா விசிகிச்சா²ஸஹக³தம் அவஸேஸானி ஏகாத³ஸ அகுஸலசித்தானி, கிரியாஹேதுகமனோவிஞ்ஞாணதா⁴துத்³வயந்தி தேரஸஸு சித்தேஸு வீரியிந்த்³ரியாதீ³னி தீணி, ஸமாதி⁴ந்த்³ரியம், வேத³னிந்த்³ரியேஸு லப்³ப⁴மானம் ஏகந்தி பஞ்சிந்த்³ரியானி. ஏத்த² ஹி த்³வீஸு தோ³ஸமூலேஸு வீரியிந்த்³ரியஸமாதி⁴ந்த்³ரியமனிந்த்³ரியஜீவிதிந்த்³ரியதோ³மனஸ்ஸிந்த்³ரியவஸேன பஞ்ச, பஞ்சஸு ஸோமனஸ்ஸஸஹக³தேஸு புரிமானி சத்தாரி ஸோமனஸ்ஸிந்த்³ரியேன ஸத்³தி⁴ம் பஞ்ச, ஸேஸேஸு உபேக்கி²ந்த்³ரியேன ஸத்³தி⁴ம் பஞ்ச ஹோந்தி.

118. ஸத்த த்³வாத³ஸசித்தேஸூதி த்³வாத³ஸஸு ஞாணவிப்பயுத்தசித்தேஸு ஸத்³தா⁴ஸதிஸமாதி⁴வீரியஜீவிதமனிந்த்³ரியானி ச வேத³னிந்த்³ரியேஸு லப்³ப⁴மானமேகந்தி ஸத்த இந்த்³ரியானி. தத்த² ஹி ச²ஸு ஸோமனஸ்ஸஸஹக³தேஸு ஸத்³தி⁴ந்த்³ரியாதீ³னி ச² ஸோமனஸ்ஸிந்த்³ரியேன ஸத்³தி⁴ம் ஸத்த, இதரேஸு ச²ஸு உபேக்கி²ந்த்³ரியேன ஸத்³தி⁴ம் ஸத்த ஹோந்தி. ஏகேனூனேஸு…பே… மனேஸு சாதி த்³வாத³ஸ ஞாணஸம்பயுத்தானி காமாவசரானி, ஸத்தவீஸதி லோகியஜ்ஜா²னசித்தானி சாதி ஏகூனசத்தாலீஸவிதே⁴ஸு லோகியசித்தேஸு புரிமானி ஸத்த, பஞ்ஞிந்த்³ரியஞ்சாதி அட்டே²வ இந்த்³ரியானி. ஏத்த² ஹி ஸோமனஸ்ஸஸஹக³தேஸு ச²ஸு காமாவசரேஸு, த்³வாத³ஸஸு ரூபாவசரசதுக்கஜ்ஜா²னேஸு சாதி அட்டா²ரஸசித்தேஸு ஸோமனஸ்ஸிந்த்³ரியேன, ஸேஸேஸு ச உபேக்கி²ந்த்³ரியேன ஸத்³தி⁴ம் யோஜேத்வா அட்டி²ந்த்³ரியானி வேதி³தப்³பா³னி.

119. சத்தாலீஸாய சித்தேஸு நவகந்தி ஸமசத்தாலீஸவிதே⁴ஸு லோகுத்தரசித்தேஸு புரிமானி அட்ட²இந்த்³ரியானி, அனஞ்ஞாதஞ்ஞஸ்ஸாமீதிந்த்³ரியம் அஞ்ஞிந்த்³ரியம் அஞ்ஞாதாவிந்த்³ரியந்தி இமேஸு லப்³ப⁴மானமேகந்தி இந்த்³ரியானம் நவகா. ஸோதாபத்திமக்³கே³ஸு ஹி அனஞ்ஞாதஞ்ஞஸ்ஸாமீதிந்த்³ரியம் லப்³ப⁴தி. ஸோதாபத்திப²லதோ பட்டா²ய அரஹத்தமக்³க³பரியோஸானேஸு தம் ந லப்³ப⁴தி. தஸ்ஸ டா²னே அஞ்ஞிந்த்³ரியம். அரஹத்தப²லே தம்பி ந லப்³ப⁴தி. தஸ்ஸ டா²னே அஞ்ஞாதாவிந்த்³ரியம் திட்ட²தீதி. ஏவந்தி ச²ஹி இந்த்³ரியேஹி ஸம்பயுத்தஸ்ஸ அபா⁴வதோ கத்த²சி தீணி, கத்த²சி சத்தாரி, கத்த²சி பஞ்ச, கத்த²சி ஸத்த, கத்த²சி அட்ட², கத்த²சி நவிந்த்³ரியானீதி ஏவம் ச²ஹி ஆகாரேஹி இந்த்³ரியயோகோ³பி, ந கேவலம் ஜா²னங்க³யோகோ³வ, அத² கோ² இந்த்³ரியேஹி ஸஹ சித்துப்பாதா³னம் ஸம்பயோகோ³பி வேதி³தப்³போ³தி.

120-3. இதா³னி மக்³க³ங்க³ஸம்பயோக³ம் த³ஸ்ஸேந்தோ பட²மம் தாவ யேஸு சித்தேஸு மக்³க³ங்கா³னி ந லப்³ப⁴ந்தி, தானி த³ஸ்ஸேத்வா பச்சா² மக்³க³ங்க³யோக³சித்துப்பாதே³ த³ஸ்ஸேதும் ‘‘அமக்³க³ங்கா³னீ’’திஆதி³மாஹ. ஏத்தா²தி ஏதஸ்மிம் ஏகவீஸஸதப்பபே⁴தே³ சித்தஸ்மிம், இமஸ்மிம் மக்³க³ங்கா³தி⁴காரே வா. விஞ்ஞாணேஸு த்³விபஞ்சஸூதி ஸபா⁴வாவிதக்கேஸு சக்கா²தீ³ஸு த்³விபஞ்சவிஞ்ஞாணேஸு. கிஞ்சாபி ஹேட்டா² த்³விபஞ்சவிஞ்ஞாணேஸு ஜா²னங்கா³பா⁴வோ, அஹேதுகேஸு ச மக்³க³ங்கா³பா⁴வோ வுத்தோவ, அஜா²னங்கா³னி பன தத்த² அதி⁴காரவஸேன வுத்தானி, இத⁴ பஸங்கா³க³தவஸேன. அமக்³க³ங்கா³னி தத்த² பஸங்கா³க³தவஸேன, இத⁴ அதி⁴காரவஸேனாதி ந கோசி புனருத்திதோ³ஸோ.

ஏகந்தி விசிகிச்சா²ஸம்பயுத்தம் சித்தம். தஞ்ஹி மிச்சா²ஸங்கப்பமிச்சா²வாயாமயோக³தோ த்³வே மக்³க³ங்கா³னி ஏத்தா²தி து³மக்³க³ங்க³ம். திமக்³க³ங்கா³னி ஸத்தஸூதி சத்தாரி தி³ட்டி²விப்பயுத்தானி, த்³வே தோ³ஸமூலானி, உத்³த⁴ச்சஸஹக³தசித்தந்தி ஸத்தஸு மிச்சா²ஸங்கப்பமிச்சா²வாயாமமிச்சா²ஸமாதி⁴யோக³தோ திமக்³க³ங்கா³னி. சத்தாலீஸ…பே… சதுரங்கி³கோதி த்³வாத³ஸ ஞாணவிப்பயுத்தானி, சத்தாரி தி³ட்டி²ஸம்பயுத்தானி, பட²மஜ்ஜா²னிகவஜ்ஜானி சதுவீஸதி மஹக்³க³தசித்தானீதி சத்தாலீஸசித்தேஸு யோ மக்³கோ³ லப்³ப⁴தி, ஸோ யதா²யோக³ம் ஸம்மாஸங்கப்பஸம்மாவாயாமஸம்மாஸதிஸம்மாஸமாதி⁴யோக³தோ, மிச்சா²தி³ட்டி²மிச்சா²ஸங்கப்பமிச்சா²வாயாமமிச்சா²ஸமாதி⁴யோக³தோ, ஸம்மாதி³ட்டி²ஸம்மாவாயாமஸம்மாஸதிஸம்மாஸமாதி⁴யோக³தோ ச சதுரங்கி³கோ மதோ. தத்த² ஞாணவிப்பயுத்தேஸு த்³வாத³ஸஸு பட²மானி சத்தாரி, தி³ட்டி²ஸம்பயுத்தேஸு மஜ்ஜி²மானி, ஸேஸேஸு பச்சி²மானி லப்³ப⁴ந்தி.

பஞ்சத்³த³ஸஸு…பே… பஞ்சங்கி³கோதி த்³வாத³ஸஸு ஞாணஸம்பயுத்தகாமாவசரேஸு சேவ தீஸு லோகியபட²மஜ்ஜா²னிகேஸு சாதி பன்னரஸஸு சித்தேஸு ஸம்மாதி³ட்டி²ஸம்மாஸங்கப்பஸம்மாவாயாமஸம்மாஸதிஸம்மாஸமாதி⁴வஸேன பஞ்சங்கி³கோ மக்³கோ³. நனு ச ஸம்மாவாசாத³யோ காமாவசரேஸு லப்³ப⁴ந்தீதி? ஸச்சம் லப்³ப⁴ந்தி, பாடே² பன அனாக³தத்தா இத⁴ பரிச்சத்தாதி. த்³வத்திம்ஸசித்தேஸூதி பட²மஜ்ஜா²னிகவஜ்ஜேஸு த்³வத்திம்ஸலோகுத்தரசித்தேஸு. ஸத்தங்கி³கோதி அவிதக்கத்தா ஸம்மாஸங்கப்போ ந லப்³ப⁴தீதி தம் பரிச்சஜித்வா அவஸேஸஸத்தமக்³க³ங்க³வஸேன ஸத்தங்கி³கோ வுத்தோ.

யத்த² பன ஸம்மாஸங்கப்போ லப்³ப⁴தி, தத்த² தேன ஸஹ அட்ட²ங்கி³கோதி ஆஹ ‘‘மக்³கோ³ அட்ட²ஸூ’’திஆதி³. தத்த² அட்ட²ஸு சித்தேஸூதி பட²மஜ்ஜா²னிகேஸு அட்ட²ஸு லோகுத்தரசித்தேஸு. ஏவந்தி ச²ஹி மக்³க³ங்கே³ஹி ஸம்பயுத்தஸ்ஸ அபா⁴வதோ கத்த²சி த்³வே மக்³க³ங்கா³னி, கத்த²சி தீணி, கத்த²சி சத்தாரி, கத்த²சி பஞ்ச, கத்த²சி ஸத்த, கத்த²சி அட்டா²தி ஏவம் ச²ஹி பகாரேஹி.

124-6. இதா³னி ப³லஸம்பயோக³ம் த³ஸ்ஸேந்தோ ஆஹ ‘‘ப³லானி த்³வே’’திஆதி³. தத்த² வீரியப³லஸமாதி⁴ப³லவஸேன த்³வே ப³லானி கிரியாஹேதுகமனோவிஞ்ஞாணதா⁴துத்³வயே விப⁴ங்க³வாரே ஆக³தானி வீரியப³லஸமாதி⁴ப³லானி பச்சேகம் லப்³ப⁴ந்தீதி ‘‘த்³வே த்³விசித்தேஸூ’’தி வுத்தம். ஏகஸ்மிம் தீணீதி ஏகஸ்மிம் விசிகிச்சா²ஸஹக³தே வீரியப³லஅஹிரிகப³லஅனோத்தப்பப³லவஸேன தீணி ப³லானி. ஏகாத³ஸஸு சத்தாரீதி விசிகிச்சா²ஸஹக³தவஜ்ஜேஸு ஏகாத³ஸஸு அகுஸலசித்தேஸு ஸமாதி⁴ப³லஞ்சேவ புப்³பே³ வுத்தானி தீணீதி சத்தாரிப³லானி. ச² த்³வாத³ஸஸூதி த்³வாத³ஸஸு ஞாணவிப்பயுத்தசித்தேஸு ஸத்³தா⁴வீரியஸதிஸமாதி⁴ஹிரிஓத்தப்பவஸேன ச² ப³லானி.

ஏகூனாஸீதியா ஸத்தாதி த்³வாத³ஸஸு ஞாணஸம்பயுத்தகாமாவசரசித்தேஸு சேவ ஸத்தவீஸதிமஹக்³க³தசித்தேஸு ச சத்தாலீஸாய லோகுத்தரசித்தேஸு சாதி ஏகூனாஸீதிவிதே⁴ஸு சித்தேஸு ஸத்³தா⁴வீரியஸதிஸமாதி⁴பஞ்ஞாஹிரிஓத்தப்பவஸேன ஸத்த ப³லானி. ஸோளஸேவாப³லானீதி பஞ்சத³ஸ அஹேதுகவிபாகானி, கிரியாமனோதா⁴துஆவஜ்ஜனஞ்சாதி ஸோளஸ ப³லவிப்பயோக³தோ அப³லசித்தானி. ஏவந்தி பஞ்சஹி ப³லேஹி ஸம்பயுத்தஸ்ஸ அபா⁴வதோ கத்த²சி த்³வே, கத்த²சி தீணி, கத்த²சி சத்தாரி, கத்த²சி ச², கத்த²சி ஸத்தாதி பஞ்சஹி ஆகாரேஹி ஸப³லம், இமேஸு ஏகஸ்ஸாபி அபா⁴வதோ அப³லம்பி ச விஞ்ஞேய்யம், விஜானிதப்³ப³ந்தி அத்தோ². ஹேதுராஸிஆத³யோ வினிச்ச²யபா⁴வதோ ந வுத்தாதி வேதி³தப்³ப³ம். யேஸு சித்தேஸு யானி ஜா²னங்க³மக்³க³ங்க³ப³லிந்த்³ரியானி ஜாயந்தீதி ஸம்ப³ந்தோ⁴. கா³தா²ப³ந்த⁴ஸுக²த்த²ம் இந்த்³ரியானம் ஓஸானகரணம்.

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

சேதஸிகவிபா⁴க³னித்³தே³ஸவண்ணனா நிட்டி²தா.