2. து³தியோ பரிச்சே²தோ³

சேதஸிகனித்³தே³ஸவண்ணனா

67. ஏத்தாவதா ச சித்தம் சேதஸிகம் ரூபம் நிப்³பா³னந்தி ஏவம் உத்³தி³ட்டே²ஸு சதூஸு த⁴ம்மேஸு சித்தம் தாவ ஜாதிபூ⁴மிஸம்பயோக³ப்பவத்தாகாராதி³வஸேன விபா⁴கே³ன நித்³தி³ஸித்வா இதா³னி தத³னந்தரம் உத்³தி³ட்டே² சேதஸிகத⁴ம்மே நித்³தி³ஸிதும் ‘‘சித்தானந்தரமுத்³தி³ட்டா²’’திஆதி³ ஆரத்³த⁴ம். விபா⁴ஜனந்தி ஜாதிபூ⁴மிஆதி³வஸேன விபா⁴க³ம், தேஸு தேஸு சித்தேஸு யதா²ரஹம் ஸம்பயோக³வஸேன விஸும் விஸும் பா⁴ஜனஞ்ச.

கதமே பன சேதஸிகா, யேஸம் விபா⁴ஜனம் வுச்சதீதி தே ஸஹ நிப்³ப³சனேன ஸரூபதோ த³ஸ்ஸேதும் ‘‘தத்த² சித்தஸம்பயுத்தா’’திஆதி³ வுத்தம். தத்த² ‘‘சித்தஸம்பயுத்தா’’தி இத³ம் சேதஸிகலக்க²ணத³ஸ்ஸனம். தேன யே சித்தேன ஸஹ ஸம்பயோக³லக்க²ணேன யுத்தா, தேயேவ சேதஸிகாதி த³ஸ்ஸேதி. கிம் பன தம் ஸம்பயோக³லக்க²ணந்தி? ஏகுப்பாத³ஏகனிரோத⁴ஏகவத்து²கஏகாரம்மணஸங்கா²தா பகாரா. ஸமம் பகாரேஹி யுத்தாதி ஹி ஸம்பயுத்தா. தத்த² யதி³ ஏகுப்பாத³தாமத்தேனேவ ச ஸம்பயுத்ததா அதி⁴ப்பேதா, ஸஹுப்பத்திகானம் ரூபாரூபத⁴ம்மானம் அஞ்ஞமஞ்ஞஸம்பயுத்ததா ஆபஜ்ஜேய்யாதி ஏகனிரோத⁴-க்³க³ஹணம். ஏவம்பி அவினிப்³போ⁴க³ரூபானம் அஞ்ஞமஞ்ஞஸம்பயுத்ததா ஆபஜ்ஜேய்யாதி ஏகவத்து²க-க்³க³ஹணம். ஏவம்பி ‘‘அவினிப்³போ⁴க³ரூபேஸு ஏகம் மஹாபூ⁴தம் ஸேஸமஹாபூ⁴தோபாதா³ரூபானம் நிஸ்ஸயபச்சயோ ஹோதீதி தஸ்மா தானி ஏகவத்து²கானீதி, சக்கா²தீ³னம் நிஸ்ஸயபூ⁴தானி வா பூ⁴தானி ஏகம் வத்து² ஏதேஸு நிஸ்ஸிதந்தி ஏகவத்து²கானீ’’தி கப்பேந்தஸ்ஸ தேஸம் ஸம்பயுத்ததாபத்தி ஸியாதி தன்னிவாரணத்த²ம் ஏகாரம்மண-க்³க³ஹணம்.

படிலோமதோ வா ‘‘ஏகாரம்மணா’’தி வுத்தே ஏகவீதி²யம் பஞ்சவிஞ்ஞாணஸம்படிச்ச²னாதீ³னம், நானாவீதி²யம் பரஸந்தானே ச ஏகஸ்மிம் ஆரம்மணே உப்பஜ்ஜமானானம் பி⁴ன்னவத்து²கானம் ஸம்பயுத்ததா ஆபஜ்ஜேய்யாதி ஏகவத்து²க-க்³க³ஹணம். ஏவம்பி மரணாஸன்னவீதி²யம் ஸம்படிச்ச²னஸந்தீரணாதீ³னம் ஸம்பயுத்ததா ஆபஜ்ஜேய்யாதி ஏகனிரோத⁴-க்³க³ஹணம். கிம் பன நானுப்பாதா³பி ஏவம் திவித⁴லக்க²ணா ஹோந்தி, அத² ஏகுப்பாதா³ ஏவாதி விசாரணாய ஏகுப்பாதா³ ஏவ ஏவம் திவித⁴லக்க²ணா ஹோந்தீதி த³ஸ்ஸனத்த²ம் ‘‘ஏகுப்பாதா³’’தி வுத்தம். இதி இமேஹி சதூஹி ஸம்பயோக³லக்க²ணேஹி யே சித்தஸம்பயுத்தா, தே சேதஸிகா நாமாதி ஏவம் சேதஸிகலக்க²ணம் ட²பிதம் ஹோதி. கத²ம் பனேதே சேதஸிகா நாமாதி ஆஹ ‘‘சித்தே ப⁴வா’’தி. ‘‘சேதஸி ப⁴வா சேதஸிகா’’தி வத்தப்³பே³ சித்த-ஸத்³த³ஸ்ஸபி சேதோ-ஸத்³தே³ன ஸஹ ஸமானத்த²தாய அத்த²மத்தம் த³ஸ்ஸேதும் ‘‘சித்தே ப⁴வா சேதஸிகா’’தி வுத்தம்.

நியதாதி நியதுப்பத்திகா, கருணாமுதி³தாத³யோ விய கதா³சி அனுப்பஜ்ஜித்வா யதா³ யதா³ தம் சித்தம் உப்பஜ்ஜதி, ததா³ ததா³வ தேன அவினிபு⁴த்தா ஹுத்வா ஜாயமானாதி அத்தோ². ஸரூபேன ஆக³தாதி ச²ந்தா³த³யோ விய ‘‘யே வா பன தஸ்மிம் ஸமயே அஞ்ஞேபி அத்தி² படிச்சஸமுப்பன்னா அரூபினோ த⁴ம்மா’’தி ஏவம் யேவாபனகவஸேன அனாக³ந்த்வா ‘‘ப²ஸ்ஸோ ஹோதி, வேத³னா ஹோதீ’’திஆதி³னா (த⁴. ஸ. 1) ஸரூபேனேவ பாளியம் ஆக³தா. யேவாபனாதி ஏவம் தே³ஸனா ஏதேஸந்தி யேவாபனகா. ஏகூனதிம்ஸ த⁴ம்மாதி கிச்சபே⁴த³ம் அனாமஸித்வா கேவலம் அஸம்பி⁴ன்னத⁴ம்மவஸேனேவ ஏகேனூனா திம்ஸ த⁴ம்மா. பாளியம் பன சித்தேன ஸஹ திம்ஸ த⁴ம்மே க³ஹேத்வா தேஸம் கிச்சபே⁴த³தோ க³ஹணேன ச²ப்பஞ்ஞாஸ த⁴ம்மா வுத்தா. ஸேய்யதி²த³ந்தி ஸரூபபுச்சா². ப²ஸ்ஸோ…பே… சித்துஜுகதாதி யதா²புச்சி²தானம் ஸரூபத³ஸ்ஸனம். இதி-ஸத்³தோ³ பரிஸமாபனே, நித³ஸ்ஸனே வா. புன தேத்திம்ஸ ஹோந்தீதி ஸம்ப³ந்தோ⁴. தேத்திம்ஸ ஹோந்தீதி தேயேவ ஏகூனதிம்ஸ த⁴ம்மாதி அதி⁴ப்பாயோ.

‘‘கதா³சி உப்பஜ்ஜந்தீ’’தி வுத்தம், தம் கத²ம் த³ட்ட²ப்³ப³ந்தி ஆஹ ‘‘இமேஸூ’’திஆதி³. கருணாமுதி³தாவஸேனாதி பட²மஸமன்னாஹாரதோ பட்டா²ய கோ³த்ரபு⁴பரியோஸானப்பவத்திதகருணாமுதி³தாபரிகம்மவஸேன. கருணாபுப்³ப³பா⁴கோ³தி கருணாய புப்³ப³பா⁴கோ³, பரிகம்மப்பனாவஸேன பவத்தகருணாபா⁴வனாய அப்பனாகோட்டா²ஸதோ புரிமகோட்டா²ஸோ, பட²மஸமன்னாஹாரதோ பட்டா²ய கோ³த்ரபு⁴பரியோஸானப்பவத்தபரிகம்மகோட்டா²ஸோ ஹுத்வாதி அத்தோ². ஏவம் ‘‘முதி³தாபுப்³ப³பா⁴கோ³’’தி ஏத்தா²பி. பா⁴க³-ஸத்³த³ஸ்ஸ த்³ரப்³யவுத்திதாய தப்புரிஸஸ்ஸ ச உத்தரபத³த்த²ப்பதா⁴னதாய ‘‘கருணாபுப்³ப³பா⁴கோ³’’திஆதி³னா புல்லிங்கே³ன வுத்தம். ஏத-ஸத்³த³ஸ்ஸ பன கு³ணவுத்திதாய கு³ணவிஸேஸவதி வத்தமானோ தஸ்ஸ லிங்க³வஸேன பரிணமதீதி கருணாமுதி³தாபேக்கா²ய ‘‘ஏதா’’தி இத்தி²லிங்க³வஸேன வுத்தந்தி. ந பனேகதோ உப்பஜ்ஜந்தி, கிஞ்சரஹி விஸும் விஸும்யேவாதி அத்தோ². தேனேவ ஹி ‘‘கருணாபுப்³ப³பா⁴கோ³ வா முதி³தாபுப்³ப³பா⁴கோ³ வா’’தி விகப்போ வுத்தோதி. கஸ்மா பனேதா த்³வே ஏகதோ நுப்பஜ்ஜந்தீதி? பி⁴ன்னாரம்மணத்தா. கருணா ஹி து³க்கி²தஸத்தே ஆரப்³ப⁴ தேஸம் து³க்கா²பனயனகாமதாவஸேன பவத்ததி, முதி³தா ஸுகி²தஸத்தே ஆரப்³ப⁴ தேஸம் ஸுகா²னுமோத³னவஸேன, தஸ்மா உபி⁴ன்னம்பி பி⁴ன்னவிஸயத்தா ந ஏகஸ்மிம் சித்தே உப்பத்தி ஸம்ப⁴வதீதி. மிச்சா²கம்மந்தாதீ³ஹீதி ஆதி³-ஸத்³தே³ன மிச்சா²வாசாமிச்சா²ஜீவானம் க³ஹணம். ஸம்மாகம்மந்தாதீ³னி பரிபூரேந்தீதி ஸம்மாகம்மந்தஸம்மாவாசாஸம்மாஆஜீவானி பரிபூரேந்தி. கோ விரதீதி தீஸு ஏகா விரதி உப்பஜ்ஜதி, ஸம்மாகம்மந்தம் பூரேந்தீ பட²மா, ஸம்மாவாசம் பூரேந்தீ து³தியா, ஸம்மாஆஜீவம் பூரேந்தீ ததியா விரதி உப்பஜ்ஜதீதி அத்தோ². கருணாமுதி³தாஹி ஸஹ ந உப்பஜ்ஜந்தி தாஸம் பஞ்ஞத்தாரம்மணத்தா, விரதியா ச ஏகந்தபரித்தாரம்மணத்தா. அஞ்ஞமஞ்ஞேன ச ந உப்பஜ்ஜந்தி அஞ்ஞமஞ்ஞஸ்ஸபி பி⁴ன்னவிஸயத்தா. மிச்சா²கம்மந்தாதீ³னஞ்ஹி ஆரம்மணானேவ யதா²க்கமம் ஸம்மாகம்மந்தாதீ³னம் ஆரம்மணானி ததோ விரதிபா⁴வதோ. ஏதேஸூதி இமேஸு பஞ்சஸு.

68. விரதீனம்பி ஸங்க³ஹணத்த²ம் ‘‘கருணாமுதி³தாதீ³ஸூ’’தி வத்தப்³பே³ கா³தா²ப³ந்த⁴ஸுக²த்த²ம் ஆதி³-ஸத்³த³லோபவஸேன ‘‘கருணாமுதி³தாஸூ’’தி வுத்தம். ஏவஞ்ச கத்வா வுத்தம் ‘‘ஏகேனா’’தி, இதரதா² ‘‘ஏகாயா’’தி வத்தப்³ப³ந்தி.

69-71. கிம் பனேத்த² காரணம், சதூஸு ப்³ரஹ்மவிஹாரேஸு த்³வே இத⁴ நித்³தி³ட்டா², ந இதராதி சோதே³ந்தோ ஆஹ ‘‘கஸ்மா பனா’’திஆதி³. உபேக்கா² ச ந உத்³த⁴டாதி ஸம்ப³ந்தோ⁴. நவஹி லோகுத்தரத⁴ம்மேஹி ஜனம் ரஞ்ஜேதீதி த⁴ம்மராஜா. தி³ட்ட²த⁴ம்மிகஸம்பராயிகத்தே²ஹி ஸதே³வகம் லோகம் அனுஸாஸதீதி ஸத்தா². அப்³யாபாதே³ன மேத்தா க³ஹிதா தஸ்ஸேவ ஹிதாகாரப்பவத்திகாலே மேத்தாபா⁴வூபக³மனதோ. தேனேவ ஹேஸ ‘‘மேத்தா மேத்தாயனா’’திஆதி³னா நித்³தி³ட்டோ². தத்ரமஜ்ஜ²த்ததாய உபேக்கா² க³ஹிதா தாயேவ ஸத்தேஸு மஜ்ஜ²த்தாகாரப்பவத்தாய உபேக்கா²ப்³ரஹ்மவிஹாரபா⁴வதோ. ஆதி³ச்சேன ஸஹ ஸமானகோ³த்ததாய, அரியஸாவகபா⁴வேன வா தஸ்ஸ ப⁴க³வதோ புத்ததாய ஆதி³ச்சோ ப³ந்து⁴ இமஸ்ஸ, ஆதி³ச்சஸ்ஸ வா ப³ந்தூ⁴தி ஆதி³ச்சப³ந்து⁴.

72. ராஸிந்தி ப²ஸ்ஸபஞ்சகாதி³ஸத்தரஸராஸிம். பட²மமஹாசித்துப்பாத³வஸேன ஹி –

‘‘ப²ஸ்ஸோ ஹோதி, வேத³னா ஹோதி, ஸஞ்ஞா ஹோதி, சேதனா ஹோதி, சித்தம் ஹோதி, விதக்கோ ஹோதி, விசாரோ ஹோதி, பீதி ஹோதி, ஸுக²ம் ஹோதி, சித்தஸ்ஸேகக்³க³தா ஹோதி, ஸத்³தி⁴ந்த்³ரியம் ஹோதி, வீரியிந்த்³ரியம் ஹோதி, ஸதிந்த்³ரியம் ஹோதி, ஸமாதி⁴ந்த்³ரியம் ஹோதி, பஞ்ஞிந்த்³ரியம் ஹோதி, மனிந்த்³ரியம் ஹோதி, ஸோமனஸ்ஸிந்த்³ரியம் ஹோதி, ஜீவிதிந்த்³ரியம் ஹோதி, ஸம்மாதி³ட்டி² ஹோதி, ஸம்மாஸங்கப்போ ஹோதி, ஸம்மாவாயாமோ ஹோதி, ஸம்மாஸதி ஹோதி, ஸம்மாஸமாதி⁴ ஹோதி, ஸத்³தா⁴ப³லம் ஹோதி, வீரியப³லம் ஹோதி, ஸதிப³லம் ஹோதி, ஸமாதி⁴ப³லம் ஹோதி, பஞ்ஞாப³லம் ஹோதி, ஹிரிப³லம் ஹோதி, ஓத்தப்பப³லம் ஹோதி, அலோபோ⁴ ஹோதி, அதோ³ஸோ ஹோதி, அமோஹோ ஹோதி, அனபி⁴ஜ்ஜா² ஹோதி, அப்³யாபாதோ³ ஹோதி, ஸம்மாதி³ட்டி² ஹோதி, ஹிரீ ஹோதி, ஓத்தப்பம் ஹோதி, காயபஸ்ஸத்³தி⁴ ஹோதி, சித்தபஸ்ஸத்³தி⁴ ஹோதி, காயலஹுதா ஹோதி, சித்தலஹுதா ஹோதி, காயமுது³தா ஹோதி, சித்தமுது³தா ஹோதி, காயகம்மஞ்ஞதா ஹோதி, சித்தகம்மஞ்ஞதா ஹோதி, காயபாகு³ஞ்ஞதா ஹோதி, சித்தபாகு³ஞ்ஞதா ஹோதி, காயுஜுகதா ஹோதி, சித்துஜுகதா ஹோதி, ஸதி ஹோதி, ஸம்பஜஞ்ஞம் ஹோதி, ஸமதோ² ஹோதி, விபஸ்ஸனா ஹோதி, பக்³கா³ஹோ ஹோதி, அவிக்கே²போ ஹோதீ’’தி (த⁴. ஸ. 1) –

ஏவம் த⁴ம்முத்³தா⁴ரம் கரோந்தேன ப⁴க³வதா ப²ஸ்ஸாத³யோ திம்ஸ த⁴ம்மே ச²ப்பஞ்ஞாஸ கத்வா ப²ஸ்ஸபஞ்சகராஸி ஜா²னபஞ்சகராஸி இந்த்³ரியட்ட²கராஸி மக்³க³பஞ்சகராஸி ப³லஸத்தகராஸி ஹேதுத்திகராஸி கம்மபத²திகராஸி லோகபாலது³கராஸி ச²யுக³ளது³கராஸி உபகாரது³கராஸி யுக³னந்த⁴து³கராஸி வீரியஸமத²து³கராஸீதி ஸத்தரஸன்னம் ராஸீனம் வஸேன விபா⁴கோ³ கதோ.

கத²ம்? ஏதேஸுபி சித்தம் தாவ ப²ஸ்ஸபஞ்சகம் பத்வா ‘‘சித்தம் ஹோதீ’’தி வுத்தம், இந்த்³ரியானி பத்வா ‘‘மனிந்த்³ரிய’’ந்தி. விதக்கோ ஜா²னங்கா³னி பத்வா ‘‘விதக்கோ ஹோதீ’’தி வுத்தோ, மக்³க³ங்கா³னி பத்வா ‘‘ஸம்மாஸங்கப்போ’’தி. ஸத்³தா⁴ இந்த்³ரியானி பத்வா ‘‘ஸத்³தி⁴ந்த்³ரியம் ஹோதீ’’தி வுத்தா, ப³லானி பத்வா ‘‘ஸத்³தா⁴ப³ல’’ந்தி. ஹிரீ ப³லானி பத்வா ‘‘ஹிரிப³லம் ஹோதீ’’தி வுத்தா, லோகபாலது³கம் பத்வா ‘‘ஹிரீ’’தி. ஓத்தப்பேபி ஏஸேவ நயோ. அலோபோ⁴ மூலம் பத்வா ‘‘அலோபோ⁴ ஹோதீ’’தி வுத்தோ, கம்மபத²ம் பத்வா ‘‘அனபி⁴ஜ்ஜா²’’தி. அதோ³ஸோ மூலம் பத்வா ‘‘அதோ³ஸோ ஹோதீ’’தி வுத்தோ, கம்மபத²ம் பத்வா ‘‘அப்³யாபாதோ³’’தி. இமே ஸத்த த்³வீஸு டா²னேஸு விப⁴த்தா. வேத³னா பன ப²ஸ்ஸபஞ்சகம் பத்வா ‘‘வேத³னா ஹோதீ’’தி வுத்தா, ஜா²னங்கா³னி பத்வா ‘‘ஸுக²’’ந்தி, இந்த்³ரியானி பத்வா ‘‘ஸோமனஸ்ஸிந்த்³ரிய’’ந்தி. ஏவமயம் ஏகோ த⁴ம்மோ தீஸு டா²னேஸு விப⁴த்தோ. வீரியம் பன இந்த்³ரியானி பத்வா ‘‘வீரியிந்த்³ரியம் ஹோதீ’’தி வுத்தம், மக்³க³ங்கா³னி பத்வா ‘‘ஸம்மாவாயாமோ’’தி, ப³லானி பத்வா ‘‘வீரியப³ல’’ந்தி, வீரியஸமத²ம் பத்வா ‘‘பக்³கா³ஹோ’’தி. ஸதிபி இந்த்³ரியானி பத்வா ‘‘ஸதிந்த்³ரியம் ஹோதீ’’தி வுத்தா, மக்³க³ங்கா³னி பத்வா ‘‘ஸம்மாஸதீ’’தி, ப³லானி பத்வா ‘‘ஸதிப³ல’’ந்தி, உபகாரது³கம் பத்வா ‘‘ஸதி ஹோதீ’’தி. ஏவம் இமே த்³வே த⁴ம்மா சதூஸு டா²னேஸு விப⁴த்தா. ஸமாதி⁴ பன ஜா²னங்கா³னி பத்வா ‘‘சித்தஸ்ஸேகக்³க³தா ஹோதீ’’தி வுத்தோ, இந்த்³ரியானி பத்வா ‘‘ஸமாதி⁴ந்த்³ரிய’’ந்தி, மக்³க³ங்கா³னி பத்வா ‘‘ஸம்மாஸமாதீ⁴’’தி, ப³லானி பத்வா ‘‘ஸமாதி⁴ப³ல’’ந்தி, யுக³னந்த⁴து³கம் பத்வா ‘‘ஸமதோ²’’தி, வீரியஸமத²ம் பத்வா ‘‘அவிக்கே²போ ஹோதீ’’தி. ஏவமயம் ஏகோ த⁴ம்மோ ச²ஸு டா²னேஸு விப⁴த்தோ. பஞ்ஞா பன இந்த்³ரியானி பத்வா ‘‘பஞ்ஞிந்த்³ரியம் ஹோதீ’’தி வுத்தா, மக்³க³ங்கா³னி பத்வா ‘‘ஸம்மாதி³ட்டீ²’’தி, ப³லானி பத்வா ‘‘பஞ்ஞாப³ல’’ந்தி, மூலானி பத்வா ‘‘அமோஹோ’’தி, கம்மபத²ம் பத்வா ‘‘ஸம்மாதி³ட்டீ²’’தி, உபகாரது³கம் பத்வா ‘‘ஸம்பஜஞ்ஞ’’ந்தி, யுக³னந்த⁴து³கம் பத்வா ‘‘விபஸ்ஸனா’’தி. ஏவமயம் ஏகோ த⁴ம்மோ ஸத்தஸு டா²னேஸு விப⁴த்தோதி ஏவமேதே த்³வாத³ஸ த⁴ம்மா இந்த்³ரியாதி³தம்தம்கிச்சவந்ததாய த்³விட்டா²னிகாதி³பே⁴தே³ன ஸத்தரஸஸு ராஸீஸு விப⁴த்தா. இதரே அட்டா²ரஸ கிச்சவஸேன பே⁴தா³பா⁴வதோ ஏகட்டா²னிகாயேவாதி இமேஸு ஸத்தரஸஸு ராஸீஸு யேவாபனகத⁴ம்மா ஏகராஸிம்பி ந ப⁴ஜந்தி தம்தம்கிச்சபா⁴வதோதி கத்வா வுத்தம் ‘‘ராஸிம் ப⁴ஜந்தி நா’’தி.

நனு சேதே கிஞ்சாபி ஸேஸராஸயோ ந ப⁴ஜந்தி தேஸம் ஸதி³ஸகிச்சஸங்க³ஹவஸேன டி²தத்தா. ப²ஸ்ஸபஞ்சகராஸி பன க²ந்த⁴ஸங்க³ஹவஸேனேவ ட²பிதோதி சேதனாய விய நேஸம் ஸங்கா²ரக்க²ந்த⁴ஸங்க³ஹதோ தத்த² ஸமவரோதோ⁴ யுத்தோதி? தம் ந, க²ந்த⁴ஸங்க³ஹவஸேன ட²பிதோபி ஹி ப²ஸ்ஸபஞ்சகராஸி ஸப்³ப³சித்தஸாதா⁴ரணத⁴ம்மே ஸங்க³ஹேத்வா ட²பிதோதி ச²ந்தா³தீ³னம் திண்ணம் பகிண்ணகவஸேன உப்பஜ்ஜமானானம் ஸப்³ப³சித்தஸாதா⁴ரணதாய அபா⁴வதோ, மனஸிகாரஸ்ஸ ச ஸதிபி ஸப்³ப³சித்தஸாதா⁴ரணத்தே நிப்பரியாயதோ ஸங்கா²ரக்க²ந்த⁴ஸங்க³ஹாபா⁴வதோ ந ஏதேஸம் ப²ஸ்ஸபஞ்சகராஸிப⁴ஜனம்பி யுத்தந்தி. கஸ்மா பன மனஸிகாரஸ்ஸ நிப்பரியாயதோ ஸங்கா²ரக்க²ந்த⁴ஸங்க³ஹாபா⁴வோதி? வுச்சதே – ட²பேத்வா சேதனம் ஸேஸத⁴ம்மானம் ஸகஸககிச்சேஸுபி பராதீ⁴னபா⁴வேன பவத்தனதோ அபி⁴ஸங்க²ரணலக்க²ணம் நிப்பரியாயதோ ந லப்³ப⁴தி. யதி³ லபே⁴ய்ய, சித்தேகக்³க³தாஜீவிதிந்த்³ரியானம் ஸப்³ப³சித்தஸாதா⁴ரணத்தா வேத³னாவிஞ்ஞாணானி விய தானி ப²ஸ்ஸபஞ்சகே வத்தப்³பா³னி ஸியும், ந பனேவம் வுத்தா, தஸ்மா ட²பேத்வா சேதனம் ஸேஸத⁴ம்மானம் அபி⁴ஸங்க²ரணலக்க²ணம் நிப்பரியாயதோ ந லப்³ப⁴தீதி ந தேஸம் நிப்பரியாயதோ க²ந்த⁴ஸங்க³ஹோ லப்³ப⁴தி. சேதனாயயேவ பன ஸகிச்சபரகிச்சஸாத⁴னவஸேன பவத்தனதோ நிப்பரியாயதோ அபி⁴ஸங்க²ரணலக்க²ணஸ்ஸ அத்தி²தாய க²ந்த⁴ஸங்க³ஹோ லப்³ப⁴தீதி. யதி³ ஏவம் கத²ம் ப²ஸ்ஸோ ப²ஸ்ஸபஞ்சகே வுத்தோதி? ‘‘ப²ஸ்ஸபச்சயா வேத³னா (விப⁴. 225), பு²ட்டோ² வேதே³தி, பு²ட்டோ² ஸஞ்ஜானாதீ’’திஆதி³வசனதோ (ஸம். நி. 4.93) வேத³னா ஸஞ்ஞா சேதனா விஞ்ஞாணந்தி இமேஸம் அரூபக்க²ந்தா⁴னம் உத்³தே³ஸட்டா²னே ட²த்வா தேஸம் பச்சயஸ்ஸபி உத்³தி³ஸிதுகாமதாய ப²ஸ்ஸோ தத்த² வுத்தோ. து³ப்³ப³லாதி ஸகவிஸயேபி பராயத்தபா⁴வேனேவ பவத்தனதோ து³ப்³ப³லா. அதி⁴மோக்கோ² ஹி ஸமாதி⁴ஸ்ஸ பரிப்³யத்தபா⁴வே பரிப்³யத்தபா⁴வதோ ஸமாதா⁴யத்தவுத்தி, மனஸிகாரோபி சேதனாய பரிப்³யத்தபா⁴வதோ சேதனாயத்தவுத்தீதி பராயத்தாவ தே ஹோந்தி.

73. மனஸீ ச காரோதி மனஸிகாரோ ச. மனஸிகாரஸத்³த³ஸ்ஸ ஹி அத்த²மத்தஸந்த³ஸ்ஸனவஸேன கா³தா²ப³ந்த⁴ஸுக²த்த²ம் அஸமாஸனித்³தே³ஸோ, தீ³க⁴கரணம், மஜ்ஜே² ச ச-ஸத்³த³வசனந்தி. தேன முனிவரேனாதி ஸம்ப³ந்தோ⁴.

74-80. பட²மாபி⁴னிபாதத்தாதி ஆரம்மணே பு²ஸனவஸேன பட²மமேவ அபி⁴னிபதனதோ. ஸப்³பே³பி சேதஸிகா சித்தாயத்தா சித்தகிரியபா⁴வேன வுச்சந்தீதி ‘‘சித்தஸ்ஸா’’தி வுத்தம். கிராதி அருசிஸூசனம். ஏவம் மஹாஸம்கி⁴கமதம் த³ஸ்ஸேத்வா இதா³னி தமேவ வித்தா²ரேதும் ‘‘பு²ஸித்வா பனா’’திஆதி³ வுத்தம். மஹாஸம்கி⁴கா ஹி ‘‘பட²மம் ப²ஸ்ஸோ ஆரம்மணம் பு²ஸதி, அத² தேன பு²ட்ட²ம் து³தியம் வேத³னா வேதி³யதி, ஏவம் ஏதேஹி பு²ட்ட²வேதி³தம் ததியம் ஸஞ்ஞா ஸஞ்ஜானாதி, தேஹி பன பு²ட்ட²வேதி³தஸஞ்ஞாதே சதுத்த²ம் சேதனாய ஸம்பயுத்தத⁴ம்மே அபி⁴ஸந்த³ஹதீ’’திஆதி³னா வத³ந்தி. ப³லவபச்சயத்தாதி யதா² பாஸாத³ம் பத்வா த²ம்பா⁴ ஸேஸத³ப்³ப³ஸம்பா⁴ரானம் ப³லவபச்சயா, ஏவமேஸ யஸ்மா ஸேஸஸம்பயுத்தானம் ப³லவபச்சயோ, தஸ்மாதி அத்தோ². தஸ்மாதி ஹேதுனிக³மனம்.

ஸஹேவ சாதி ச-ஸத்³தோ³ அட்டா²னப்பயுத்தோ, ஸோ ‘‘சித்தஜான’’ந்தி இமஸ்ஸ அனந்தரம் த³ட்ட²ப்³போ³. கஸ்மா? சித்தானம், சித்தஜானஞ்ச ஏகுப்பாதா³தி³பா⁴வேன ஸஹேவ பவத்திதோதி ஏவமேத்த² பத³ஸம்ப³ந்தோ⁴ வேதி³தப்³போ³. இத³ந்தி இத³ம் யதா²வுத்தவிதா⁴னம், ஏவம் ‘‘பட²மாபி⁴னிபாதத்தா’’தி காரணம் பரிஹரித்வா இதா³னி ‘‘ப³லவபச்சயத்தா’’தி இத³ம் பரிஹரந்தோ ஆஹ ‘‘ப³லவ…பே… தி³ஸ்ஸதீ’’தி. ச-ஸத்³தோ³ அவதா⁴ரணே, நேவ தி³ஸ்ஸதீதி அத்தோ². ஸேஸத⁴ம்மானம்பி ஹி ஸஹஜாதபச்சயபா⁴வஸ்ஸ ஸாதா⁴ரணத்தா தஸ்ஸேவ ப³லவபச்சயபா⁴வே ந கிஞ்சி காரணம் தி³ஸ்ஸதீதி. யதி³ ஸப்³ப³மித³மகாரணம், கத²ஞ்சரஹி ப²ஸ்ஸோ பட²மம் வுத்தோதி ஆஹ ‘‘தே³ஸனாக்கமதோ’’திஆதி³. ‘‘வேத³னா ஹோதி, ப²ஸ்ஸோ ஹோதி, ஸஞ்ஞா ஹோதி, ப²ஸ்ஸோ ஹோதி, சேதனா ஹோதி, ப²ஸ்ஸோ ஹோதி, சித்தம் ஹோதி, ப²ஸ்ஸோ ஹோதி, வேத³னா ஹோதி, ஸஞ்ஞா ஹோதி, சேதனா ஹோதி, விதக்கோ ஹோதீ’’திஆதீ³ஹி ஆஹரிதும்பி வட்டேய்ய, தே³ஸனாவாரேன பன ப²ஸ்ஸோவ பட²மம் வுத்தோதி வேதி³தப்³போ³. யதா² சேத்த², ஏவம் ஸேஸத⁴ம்மேஸுபி புப்³பா³பரக்கமோ நாம ந பரியேஸிதப்³போ³. வசனத்த²லக்க²ணாதீ³ஹீதி வசனத்த²தோ ச லக்க²ணாதி³தோ ச.

பு²ஸதீதி கத்துனித்³தே³ஸோ. தத்த² காரணம் ஹேட்டா² வுத்தமேவ, பு²ஸந்தி ஏதேன வாதி ப²ஸ்ஸோ. ஸம்பயுத்தத⁴ம்மா ஹி ஆரம்மணே பவத்தமானா தம் பு²ஸனலக்க²ணேன ப²ஸ்ஸேன பு²ஸந்தா விய ஹோந்தி, ஆரம்மணபு²ஸனமத்தம் வா ப²ஸ்ஸோதிபி ஸாத⁴னத்தயம்பி யுஜ்ஜதேவ. பு²ஸனம் லக்க²ணமேதஸ்ஸாதி பு²ஸனலக்க²ணோ, வேத³னாய பச்சயபா⁴வட்டே²ன ஆரம்மணபு²ஸனலக்க²ணோதி அத்தோ². ஸம்க⁴ட்டனரஸோதி மனோத்³வாரே சித்தாரம்மணானம் ஸம்க⁴ட்டனதோ ஸம்க⁴ட்டனகிச்சோ. அயஞ்ஹி ஆரம்மணே அனல்லீயமானோபி ரூபம் விய சக்கு²ம், ஸத்³தோ³ விய ச ஸோதம் சித்தமாரம்மணஞ்ச க⁴ட்டேதி. பஞ்சத்³வாரேஸு வா வத்தா²ரம்மணஸம்க⁴ட்டனேன ஸம்பஜ்ஜதீதி ஸம்க⁴ட்டனஸம்பத்திகோ ப²ஸ்ஸோ ‘‘ஸம்க⁴ட்டனரஸோ’’தி வுத்தோ. யதா² ‘‘த்³வே பாணீ வஜ்ஜேய்யு’’ந்திஆதீ³ஸு பாணிம்ஹி க⁴ட்டனம் தப்³பி³ஸேஸபூ⁴தா ரூபத⁴ம்மா, ஏவம் சித்தஸ்ஸ ஆரம்மணே ஸம்க⁴ட்டனம் தப்³பி³ஸேஸபூ⁴தோ ஏகோ சேதஸிகத⁴ம்மோ த³ட்ட²ப்³போ³. திண்ணம் ஸன்னிபாதஸங்கா²தஸ்ஸ அத்தனோ காரணஸ்ஸ வஸேன பவேதி³தத்தா ஸன்னிபாதபச்சுபட்டா²னோ. ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணம், திண்ணம் ஸங்க³தி ப²ஸ்ஸோ’’தி (ம. நி. 1.204, 400; 3.421, 425; ஸம். நி 2.4.60; கதா². 465) ஹி வசனதோ சக்கு²ரூபவிஞ்ஞாணாதீ³னம் திண்ணம் ஸன்னிபாதவஸேன க³ஹேதப்³ப³தாய உபட்டா²னதோ ஸன்னிபாதஸங்கா²தஸ்ஸ காரணஸ்ஸ வஸேன உபட்டா²னமஸ்ஸாதி உபட்டா²னட்டே²ன பச்சுபட்டா²னேன ஸன்னிபாதபச்சுபட்டா²னதா வுத்தா. ‘‘ப²ஸ்ஸபச்சயா வேத³னா’’தி (விப⁴. 225) வசனதோ வேத³னா ப²லமஸ்ஸாதி வேத³னாபச்சுபட்டா²னோ. தஜ்ஜஸமன்னாஹாரேன சேவ இந்த்³ரியேன ச பரிக்க²தே விஸயே அனந்தராயேனேவ உப்பஜ்ஜனதோ ஆபாத²க³தவிஸயபத³ட்டா²னோ. அயஞ்ஹி தஸ்ஸ ப²ஸ்ஸஸ்ஸ காரணபூ⁴தோ தத³னுரூபபூ⁴தோ ஸமன்னாஹாரோதி தஜ்ஜஸமன்னாஹாரஸங்கா²தேன ஆவஜ்ஜனேன சேவ சக்கா²தி³இந்த்³ரியேன ச யதா²க்கமம் ஆரம்மணகரணதத³பி⁴முக²பா⁴வவஸேன பரிக்க²தே அபி⁴ஸங்கா²தே ஆபாத²க³தேயேவ விஸயே ஏகந்தேன உப்பஜ்ஜனதோ ஆபாத²க³தோ விஸயோ பத³ட்டா²னம் ஆஸன்னகாரணம் இமஸ்ஸாதி ஆபாத²க³தவிஸயபத³ட்டா²னோ.

நனு சாயம் த⁴ம்மோ சேதஸிகோ, ஸ்வாயம் அரூபத⁴ம்மோ ஸமானோ கத²ம் பு²ஸனலக்க²ணோ ஹோதீதி அந்தோலீனசோத³னம் மனஸி கத்வா தஸ்ஸா ஸோத⁴னத்த²ம் ‘‘அரூபத⁴ம்மோபி ஸமானோ’’திஆதி³ வுத்தம். தத்த² ‘‘பு²ஸனாகாரேனேவ பவத்ததீ’’தி இமினா அரூபஸ்ஸாபி ஸதோ தஸ்ஸ த⁴ம்மஸ்ஸ அயம் ஸபா⁴வோதி த³ஸ்ஸேதி. ஸா ச தஸ்ஸ பு²ஸனாகாரப்பவத்தி அம்பி³லம் அம்ப³பக்காதி³ம் கா²த³ந்தம் பஸ்ஸந்தஸ்ஸ பரஸ்ஸ கே²ளுப்பத்திபரம் பா³தி⁴யமானம் தி³ஸ்வா த³யாலுகஸ்ஸ ஸரீரகம்பனம், ருக்க²ஸாக²க்³கே³ து³ட்டி²தம் புரிஸம் தி³ஸ்வா பூ⁴மியம் டி²தஸ்ஸ புரிஸஸ்ஸ ஜங்க⁴சலனம், பிஸாசாதி³பா⁴யிதப்³ப³ம் தி³ஸ்வா ஊருபத்த²ம்போ⁴தி ஏவமாதி³ விய த³ட்ட²ப்³பா³. ஸோதி ஸோ யதா²வுத்தலக்க²ணாதி³கோ ப²ஸ்ஸோ.

ஸுந்த³ரந்தி ஸுக²வேத³னாஸம்பயுத்தத்தா பஸத்த²ம். மனோதி விஞ்ஞாணம். ஸுமனஸ்ஸ பா⁴வோதி ஸுமனஸங்கா²தஸ்ஸ விஞ்ஞாணஸ்ஸ பா⁴வோ. ய்வாயம் ஸத்³த³ப்பவத்தினிப³ந்த⁴னோ அத்தோ², ஸோ ஸோமனஸ்ஸம். ஸோமனஸ்ஸவேத³னாஸம்பயுத்தத்தா ஹி ஸுமன-ஸத்³தோ³ தஸ்மிம் விஞ்ஞாணே பவத்ததி. வேதே³ன அனுப⁴வனாகாரேன அயிதம் பவத்தம் வேத³யிதம், தம் லக்க²ணமஸ்ஸாதி வேத³யிதலக்க²ணா. இட்ட²ஸ்ஸ இட்டா²காரதோவ அனுப⁴வனம் கிச்சமஸ்ஸாதி இட்டா²காரானுப⁴வனரஸா. ஸா ஹி ஸபா⁴வதோ இட்ட²மாரம்மணம் இட்ட²வஸேன, இதரஞ்ச இட்டா²காரேனேவ அனுப⁴வதி, தத்த² இட்டா²காரானுப⁴வனம் குஸலாகுஸலசித்தஸம்பயுத்தவேத³னாய லப்³ப⁴தி தஸ்ஸா அனிட்ட²ஸ்ஸபி கப்பனாவஸேன இட்டா²காரேன க³ஹணதோ, ஸபா⁴வதோ பன இட்டா²னுப⁴வனம் அப்³யாகதசித்தஸம்பயுத்தாயபி லப்³ப⁴தி தஸ்ஸா விபல்லாஸக்³கா³ஹாபா⁴வதோ. ‘‘ராஜா விய ஸுபோ⁴ஜனரஸ’’ந்தி இமினா இமம் தீ³பேதி – ப²ஸ்ஸஸ்ஸ பு²ஸனமத்தமேவ ஹோதி, ஸஞ்ஞாய ஸஞ்ஜானனமத்தமேவ, சேதனாய ஸஞ்சேதனாமத்தமேவ, விஞ்ஞாணஸ்ஸ விஜானனமத்தமேவ, ஏகம்ஸதோ பன இஸ்ஸரவதாய ஸாமிபா⁴வேன வேத³னாவ ஆரம்மணரஸம் அனுப⁴வதி, ராஜா விய ஸூத³காரேன ஸம்பாதி³தஸுபோ⁴ஜனரஸந்தி. அஸ்ஸாதீ³யதீதி அஸ்ஸாதோ³, ஸுக²வேத³னா. தேனாஹ ப⁴க³வா – ‘‘யம், பி⁴க்க²வே, பஞ்சுபாதா³னக்க²ந்தே⁴ படிச்ச உப்பஜ்ஜதி ஸுக²ம் ஸோமனஸ்ஸம், அயம் வுச்சதி, பி⁴க்க²வே, பஞ்சுபாதா³னக்க²ந்தே⁴ஸு அஸ்ஸாதோ³’’தி. சேதோஸன்னிஸ்ஸிதத்தா சேதஸி ப⁴வோ அஸ்ஸாதோ³தி சேதஸிகஅஸ்ஸாதோ³, ததா² பச்சுபட்டா²தீதி சேதஸிகஅஸ்ஸாத³பச்சுபட்டா²னா. பஸ்ஸத்³த⁴காயோ ஸுக²ம் வேதி³யதீதி ஆஹ ‘‘பஸ்ஸத்³தி⁴பத³ட்டா²னா’’தி. இத³ம் பன நிராமிஸஸோமனஸ்ஸவஸேன வேதி³தப்³ப³ம்.

நீலாதி³பே⁴த³ஸ்ஸ ஆரம்மணஸ்ஸ ஸஞ்ஜானனம் தமேவ ஸஞ்ஞம் கத்வா ஜானனம் லக்க²ணம் ஏதஸ்ஸாதி ஸஞ்ஜானனலக்க²ணா. பச்சாபி⁴ஞ்ஞாணகரணரஸாதி பதி அபி⁴ஞ்ஞாயதி ஏதேனாதி பச்சாபி⁴ஞ்ஞாணம், ததே³வேதந்தி புன பச்சாபி⁴ஞ்ஞாணனிமித்தம் ஸண்டா²னாதி³கோ ஆகாரோ, தஸ்ஸ கரணரஸோ கிச்சமஸ்ஸாதி பச்சாபி⁴ஞ்ஞாணகரணரஸா. ஸா ஹி உப்பஜ்ஜமானா பச்சா² ஸஞ்ஜானனஸ்ஸ காரணபூ⁴தம் ஸண்டா²னாதி³கம் ஆகாரம் க³ஹேத்வா உப்பஜ்ஜதீதி. இத³ஞ்ச நிமித்தகாரிகாய நிமித்தேன ஸஞ்ஜானந்தியா ச ஸப்³பா³ய ஸமானஸஞ்ஞாய யோஜேதப்³ப³ம். நிமித்தேன ஸஞ்ஜானந்தீபி ஹி புன அபராய ஸஞ்ஞாய ச ஸஞ்ஜானனஸ்ஸ நிமித்தம் கரோதீதி. தஞ்ச குஸலாகுஸலகிரியாஜவனஸஞ்ஞம் து⁴ரம் கத்வா வேதி³தப்³ப³ம். தம் பனேதம் அபி⁴ஞ்ஞாணகரணம் கத²ம் த³ட்ட²ப்³ப³ந்தி ஆஹ ‘‘வட்³ட⁴கிஸ்ஸ அபி⁴ஞ்ஞாணகரணமிவா’’தி. யதா² வட்³ட⁴கிஸ்ஸ தா³ரூஸு ‘‘இத³ம் உத்³த⁴ம், இத³ம் அதோ⁴’’தி ஏவம் பச்சா² ஸஞ்ஜானனபச்சயபூ⁴தஸ்ஸ ஸஞ்ஞாணஸ்ஸ கரணம், ஏவமஸ்ஸா புன ஸஞ்ஜானனபச்சயனிமித்தகரணந்தி வுத்தம் ஹோதி. ஹத்தி²த³ஸ்ஸகஅந்தோ⁴ விய ‘‘இத³மேவ ஸச்ச’’ந்தி ஸஞ்ஞாய யதா²க³ஹிதனிமித்தவஸேன அபி⁴னிவேஸகரணதோ யதா²…பே… பச்சுபட்டா²னா. ஏதேன ஸஞ்ஞாய ஆகாரக்³க³ஹணம் கத்வா டி²தஸ்ஸ தி³ட்டி²ஆதீ³னம் உப்பஜ்ஜனதோ அகுஸலஸஞ்ஞாய அனுரூபவஸேன ப²லபச்சுபட்டா²னம் த³ஸ்ஸிதம் ஹோதி. அத² வா அபி⁴னிவேஸகரணந்தி ‘‘இத³மேவ ஸச்ச’’ந்தி ஸஞ்ஞாபி⁴னிவேஸமத்தமேவ, தஸ்மா உபபரிக்கா²பா⁴வேன யதா²க³ஹிதனிமித்தவஸேன அபி⁴னிவேஸாகாரேன உபட்டா²னதோ ஆகாரபச்சுபட்டா²னம் வுத்தம். திணபுரிஸகேஸு மிக³போதகானம் ‘‘புரிஸா’’தி உப்பன்னஸஞ்ஞா விய அவிகப்பஸபா⁴வத்தா யதா²உபட்டி²தவிஸயபத³ட்டா²னா. ஏத்த² ச ஞாணவிப்பயுத்தஸஞ்ஞாய ஆகாரக்³க³ஹணவஸேன உப்பஜ்ஜனகாலே சித்தம் அப்³போ³ஹாரிகம் ஸஞ்ஞானுக³திகம் ஹோதி. ஞாணஸம்பயுத்தே சித்தே பன ஸஸம்பா⁴ரபத²வியா அனுக³தா ஸேஸதா⁴துயோ விய ஸஞ்ஞாசித்தஞ்ச அப்³போ³ஹாரிகம் ஞாணானுக³திகம் ஹோதி.

அபி⁴ஸந்த³ஹதீதி பப³ந்த⁴தி பவத்தேதி, ‘‘க³ண்ஹத² க³ண்ஹதா²’’தி வத³ந்தீ விய ஸம்பயுத்தத⁴ம்மே ஆரம்மணே பயோஜேதி, ஸகஸககிச்சே ச பட்ட²பேதீதி அத்தோ². சேதயிதலக்க²ணாதி நித்³தோ³க்கந்தஸ்ஸ பபு³த்³த⁴க்க²ணே ஸம்ப⁴மப்பவத்தி விய சேதஸோ உஸ்ஸாஹதாவ லக்க²ணா. அத² வா ‘‘அபி⁴ஸந்த³ஹதீ’’தி வுத்தத்தா பயோஜனலக்க²ணாத்வேவ அத்தோ². ஆயூஹனரஸாதி சேதஸிகஇரியனரஸா, பயோக³ரஸாதி வுத்தம் ஹோதி. குஸலாகுஸலகிரியாஜவனஸம்பயுத்தாயயேவ பனேதம் லப்³ப⁴தி. ஸம்வித³ஹனபச்சுபட்டா²னாதி ‘‘த்வம் இத³ம் கரோஹீ’’தி விசாரேந்தீ விய ஹோதீதி விசாரணபச்சுபட்டா²னா. ஏதாய ஹி பவத்தமானாய ஸப்³பே³பி ஸம்பயுத்தத⁴ம்மா யதா² ஸகிச்சபஸுதா ஹோந்தி, தேனேவ ஹேஸா ஸகிச்சபரகிச்சஸாதி⁴கா வுத்தா. ஜேட்ட²ஸிஸ்ஸோ பரே ஸஜ்ஜா²யனே உய்யோஜேந்தோ ஸயம்பி ஸஜ்ஜா²யதி. தஸ்மிஞ்ஹி ஸஜ்ஜா²யிதும் ஆரத்³தே⁴ ஸேஸஸிஸ்ஸாபி ஸஜ்ஜா²யந்தி. மஹாவட்³ட⁴கிஸ்மிம்பி வட்³ட⁴கிகம்மம் காதும் ஆரத்³தே⁴ இதரேபி கரோந்தி யேவாதி ஆஹ ‘‘ஜேட்ட²ஸிஸ்ஸமஹாவட்³ட⁴கிஆத³யோ வியா’’தி. ஆதி³-ஸத்³தே³ன ஜேட்ட²ந்தேவாஸிகாதீ³னம் க³ஹணம்.

யதா²பச்சயம் பவத்தமானானம் த⁴ம்மானம் நத்தி² காசி வஸவத்திதாதி வஸவத்திபா⁴வனிவாரணத்த²ம் ‘‘விதக்கனம் விதக்கோ’’தி வுத்தம். ஊஹனம் ஆரம்மணஸ்ஸ பரிகப்பனம், தஸ்மிம் அபி⁴னிரோபனந்தி வா வுத்தம் ஹோதி. யஸ்மா சித்தம் விதக்கப³லேன ஆரம்மணம் அபி⁴ருள்ஹம் விய ஹோதி, தஸ்மா வுத்தம் ‘‘ஆரம்மணே சித்தஸ்ஸ அபி⁴னிரோபனலக்க²ணோ’’தி. யதா² ஹி கோசி கா³மவாஸீ புரிஸோ ராஜவல்லப⁴ம், தம்ஸம்ப³ந்தி⁴னம் மித்தம் வா நிஸ்ஸாய ராஜகே³ஹம் ஆரோஹதி அனுபவிஸதி, ஏவம் விதக்கம் நிஸ்ஸாய சித்தம் ஆரம்மணம் ஆரோஹதி. யதி³ ஏவம் கத²ம் அவிதக்கசித்தம் ஆரம்மணம் ஆரோஹதி, ந ஹி த்³விபஞ்சவிஞ்ஞாணது³தியஜ்ஜா²னாதி³கே விதக்கோ உபலப்³ப⁴தி, யஸ்ஸ ப³லேன தம் ஆரம்மணம் ஆரோஹதி, தஸ்மா ஸபா⁴வதோ பா⁴வனாப³லேன தத்த² அனுப்பஜ்ஜனகோ? ஸச்சம், தம்பி விதக்கப³லேன ஆரோஹதி. யதா² ஹி ஸோ புரிஸோ பரிசயேன தேன வினாபி நிராஸங்கோ ராஜகே³ஹம் பவிஸதி, ஏவம் பரிசயேன விதக்கேன வினாபி அவிதக்கசித்தம் ஆரம்மணம் ஆரோஹதி. பரிசயோதி சேத்த² ஸந்தானே அபி⁴ண்ஹம் பவத்தசித்தபா⁴வனாஸங்கா²தோ பரிசயோ. விதக்கஸ்ஸ ஹி ஸந்தானே அபி⁴ண்ஹம் பவத்தஸ்ஸ வஸேன சித்தஸ்ஸ ஆரம்மணாபி⁴ரோஹனம் சிரபரிசிதம், தேன தம் சித்தம் கதா³சி விதக்கேன வினாபி தத்த² வத்ததேவ. யதா² தம் ஞாணஸஹிதம் ஹுத்வா ஸம்மஸனவஸேன சிரபரிசிதம் கதா³சி ஞாணரஹிதம்பி ஸம்மஸனவஸேன பவத்ததி, யதா² வா கிலேஸஸஹிதம் ஹுத்வா பவத்தம் ஸப்³ப³ஸோ கிலேஸரஹிதம்பி பரிசயேன கிலேஸவாஸனாவஸேன பவத்ததி, ஏவம்ஸம்பத³மித³ம் த³ட்ட²ப்³ப³ம்.

அத² வா த்³விபஞ்சவிஞ்ஞாணம் அவிதக்கம்பி வத்தா²ரம்மணக⁴ட்டனஸ்ஸ ப³லவதாய, து³தியஜ்ஜா²னாதீ³னி ச ஹேட்டி²மஹேட்டி²மபா⁴வனாய ப³லவதாய ஆரம்மணம் ஆரோஹதீதி. ஆதி³தோ, அபி⁴முக²ம் வா ஹனனம் பஹரணமத்தம் ஆஹனனம், பரிதோ, பரிவத்தேத்வா வா ஹனனம் விஸேஸேன பஹரணம் பரியாஹனனம், தம் கிச்சமஸ்ஸாதி ஆஹனனபரியாஹனனரஸோ. ததா² ஹி தேன யோகா³வசரோ ஆரம்மணம் விதக்காஹதம் விதக்கபரியாஹதம் கரோதீதி வுச்சதி. ஆனயனம் சித்தஸ்ஸ ஆரம்மணே உபனயனம், ஆகட்³ட⁴னம் வா, ததா² ஹுத்வா பச்சுபட்டா²னமஸ்ஸாதி ஆனயனபச்சுபட்டா²னோ.

தேனாதி தேன விசாரேன கரணபூ⁴தேன, ஹேதுபூ⁴தேன வா சித்தம் ஆரம்மணே விசரதி அனுவிசரதி, அவிசாரசித்தஸ்ஸ பன அவிதக்கசித்தே வுத்தானுஸாரேன பவத்தி வேதி³தப்³பா³. விசரணம் அனுஸஞ்சரணம் அனுபரிக³மனம். ஸ்வாயம் விஸேஸோ ஸந்தானம்ஹி லப்³ப⁴மானோ ஜவனஸந்தானே பாகடோ ஹோதீதி த³ட்ட²ப்³போ³. ஏஸ நயோ ஸேஸேஸுபி. ஆரம்மணஸ்ஸ அனுமஜ்ஜனம் அனுமஸனம் பரிமஜ்ஜனமஸ்ஸ லக்க²ணந்தி ஆரம்மணானுமஜ்ஜனலக்க²ணோ. ததா² ஹி விசாரோ பரிமஜ்ஜனஹத்தோ² விய, ஸம்ஸரணஹத்தோ² வியாதி வுச்சதி. தத்தா²தி ஆரம்மணே. ஸஹஜாதானம் அனுயோஜனம் ஆரம்மணே அனுவிசரணஸங்கா²தஅனுமஜ்ஜனவஸேன வேதி³தப்³ப³ம். த⁴ம்மானஞ்ஹி ஸபா⁴வவினிமுத்தா காசி கிரியா நாம நத்தி². ததா²க³ஹேதப்³பா³காரோ போ³த⁴னேய்யஜனானுரோதே⁴ன பரமத்த²தோ ஏகஸபா⁴வோபி ஸபா⁴வத⁴ம்மோ பரியாயவசனேஹி விஸயஸமாரோபிதரூபேஹி ப³ஹூஹி பகாரேஹி பகாஸீயதி. ஏவஞ்ஹி ஸோ ஸுட்டு² பகாஸிதோ ஹோதீதி. அனுபப³ந்த⁴பச்சுபட்டா²னோதி ஆரம்மணே சித்தஸ்ஸ அவிச்சி²ன்னஸ்ஸ விய பவத்திபச்சுபட்டா²னோ. ததா² ஹி ஸோ அனுஸந்தா⁴னதாதி நித்³தி³ட்டோ².

ஏத்த² ச விசாரதோ ஓளாரிகட்டே²ன தஸ்ஸேவ புப்³ப³ங்க³மட்டே²ன பட²மக⁴ண்டாபி⁴ரவோ விய சேதஸோ பட²மாபி⁴னிபாதோ விதக்கோ, அனுரவோ விய அனுஸஞ்சரணம் விசாரோ. யதா² ஹி க⁴ண்டாபி⁴கா⁴தஜோ பட²மாபி⁴ரவோ அனுரவதோ ஓளாரிகோ, புப்³ப³ங்க³மோ ச ஹோதி, ஏவம் ஆரம்மணாபி⁴ரோபனட்டே²ன விதக்கோ ஓளாரிகோ, புப்³ப³ங்க³மோ விய ச ஹோதி. ததோ ஸுகு²மட்டே²ன அனுமஜ்ஜனஸபா⁴வேன ச க⁴ண்டானுரவோ விய அனுபப³ந்தோ⁴ விசாரோ. விப்பா²ரவா சேத்த² விதக்கோ சித்தஸ்ஸ பட²முப்பத்திகாலே சித்தஸ்ஸ பரிப்ப²ந்த³னபூ⁴தோ ஆகாஸே உப்பதிதுகாமஸ்ஸ ஸகுணஸ்ஸ பக்க²விக்கே²போ விய, பது³மாபி⁴முக²பாதோ விய ச க³ந்தா⁴னுப³ந்த⁴சேதஸோ ப⁴மரஸ்ஸ. ஸந்தவுத்தி விசாரோ சித்தஸ்ஸ நாதிபரிப்ப²ந்த³னபா⁴வோ, ஆகாஸே உப்பதிதஸ்ஸ ஸகுணஸ்ஸ பக்க²ப்பஸாரணம் விய, பது³மஸ்ஸ உபரிபா⁴கே³ பரிப்³ப⁴மனம் விய ச பது³மாபி⁴முக²பதிதஸ்ஸ ப⁴மரஸ்ஸ. ஆக³மட்ட²கதா²யம் பன விபரியாயேன ஆக³தம். ததா² ச வுத்தம் து³கனிபாதட்ட²கதா²யம் –

‘‘ஆகாஸே க³ச்ச²தோ மஹாஸகுணஸ்ஸ உபோ⁴ஹி பக்கே²ஹி வாதம் க³ஹேத்வா பக்கே² ஸன்னிஸீதா³பேத்வா க³மனம் விய ஆரம்மணே சேதஸோ அபி⁴னிரோபனபா⁴வேன பவத்தோ விதக்கோ, வாதக்³க³ஹணத்த²ம் பக்கே² ப²ந்தா³பயமானஸ்ஸ க³மனம் விய அனுமஜ்ஜனபா⁴வேன பவத்தோ விசாரோ’’தி.

தம்பி அனுபப³ந்தே⁴ன பவத்தியம் யுஜ்ஜதி. ததா² ஹி உபசாரே, அப்பனாயம் வா ஸந்தானேன பவத்தியம் விதக்கோ நிச்சலோ ஹுத்வா ஆரம்மணம் அனுபவிஸித்வா விய பவத்ததி, ந பட²மாபி⁴னிபாதே விய பாகடோ ஹோதீதி.

பினயதீதி காயசித்தம் அப்பேதி, வட்³டே⁴தி வா. ஸம்பியாயனலக்க²ணாதி ஆரம்மணம் கல்லதோ க³ஹணலக்க²ணா. பீணனரஸாதி காயசித்தானம் பரிப்³ரூஹனகிச்சா. ப²ரணரஸாதி பணீதரூபேஹி காயஸ்ஸ ப்³யாபனரஸா, அத்தனா ஸம்பயுத்தசித்தஸமுட்டா²னேஹி ரூபேஹி ஸகலரூபகாயப்³யாபனம் கரோதீதி வுத்தம் ஹோதி. ந ஹி அஞ்ஞதா² இமிஸ்ஸா ப²ரணம் ஹோதி, த⁴ம்மானம் அப்³யாபாரதாய கேஸக்³க³மத்தம்பி ஸங்கமனாபா⁴வதோ. உத³க்³க³பா⁴வோ ஓத³க்³யம்.

ஏகம் ஆரம்மணம் அக்³க³மேதஸ்ஸாதி ஏகக்³க³ம், சித்தம், யேன பன த⁴ம்மேன யோக³தோ தம் ஏகக்³க³ம் நாம ஹோதி, ஸோ ஏகக்³க³பா⁴வோ. ஸோ பன சித்தஸ்ஸேவ ஹோதி, ந யஸ்ஸ கஸ்ஸசீதி ஆஹ ‘‘சித்தஸ்ஸ ஏகக்³க³பா⁴வோ’’தி, நிவாதே தீ³பஸிகா²ய டி²தி விய சித்தஸ்ஸ டி²தீதி வுத்தம் ஹோதி. விஸாரஸ்ஸ ப்³யக்³க³பா⁴வஸ்ஸ படிபக்கோ² ஸபா⁴வோ அவிஸாரோ, ந விஸாராபா⁴வமத்தம், தம் இமஸ்ஸ லக்க²ணந்தி ஆஹ ‘‘அவிஸாரலக்க²ணோ’’தி. அவிக்கே²போ ஸம்பயுத்தத⁴ம்மானம் அவிக்கி²த்ததா, அவிஸாராவிக்கே²பானம் ஸமாதா⁴னபா⁴வதோ அத்த²தோ விஸேஸாபா⁴வேபி ஸமுகே²ன, ஸம்பயுத்தமுகே²ன ச உப⁴யம் வுத்தந்தி த³ட்ட²ப்³ப³ம். அவூபஸமலக்க²ணஸ்ஸ விக்கே²பஸ்ஸ படிபக்க²தாய சித்தஸ்ஸ உபஸமனாகாரேன பச்சுபட்டா²தீதி உபஸமபச்சுபட்டா²னோ. விஸேஸதோதி யேபு⁴ய்யேன. ஸுக²விரஹிதோபி ஹி அத்தி² ஸமாதீ⁴தி ஸோ யேபு⁴ய்யேன ஸுக²பத³ட்டா²னோ ஹோதி. அத² வா விஸேஸதோதி அதிஸயேன. ‘‘ஸுகி²னோ சித்தம் ஸமாதி⁴யதீ’’தி (அ. நி. 11.11) வசனதோ ஹி ஸுக²ம் ஸமாதி⁴ஸ்ஸ விஸேஸகாரணம் ஸுக²விரஹிதஸ்ஸபி தது³பனிஸ்ஸயேனேவ ஸமிஜ்ஜ²னதோ.

ஸத்³த³ஹந்தி ஏதாயாதி கம்மப²லாதி³ஸத்³த³ஹனகிரியாய பவத்தமானானம் த⁴ம்மானம் தத்த² ஆதி⁴பச்சபா⁴வேன ஸத்³தா⁴ய பச்சயதம் த³ஸ்ஸேதி. தஸ்ஸா ஹி த⁴ம்மானம் ததா² பச்சயபா⁴வே ஸதி தம்ஸமங்கி³புக்³க³லோ ‘‘ஸத்³த³ஹதீ’’தி வோஹரீயதி. ஸத்³த³ஹனம் ஸத்³தே⁴ய்யவத்து²னோ பத்தியாயனம், தம் லக்க²ணமேதிஸ்ஸாதி ஸத்³த³ஹனலக்க²ணா. காலுஸியமலம் வித⁴மேத்வா ஸம்பயுத்தானம், புக்³க³லஸ்ஸேவ வா பஸாத³ம் அனாவிலபா⁴வகாரணம் கிச்சமேதிஸ்ஸாதி பஸாத³னரஸா. யதா² கத²ம் வியாதி ஆஹ ‘‘உத³கப்பஸாத³கமணி வியா’’தி. அகாலுஸியபச்சுபட்டா²னாதி அனாவிலபா⁴வபச்சுபட்டா²னா. ரதனத்தயம் கம்மம் கம்மப²லஞ்ச ஸத்³தே⁴ய்யவத்து², தம் இமிஸ்ஸா ஆஸன்னகாரணந்தி ஸத்³தே⁴ய்யவத்து²பத³ட்டா²னா. ந ஹி ஸத்³தா⁴ய அவத்து²பூ⁴தேஸு தித்தி²யாதீ³ஸு ஸா உப்பஜ்ஜதி. ஸா பனாயம் குஸலத⁴ம்மானம் ஆதா³னே ஹத்தோ² விய, ஸப்³ப³ஸம்பத்திஸம்பதா³னே வித்தம் விய, அமதகஸிப²லப²லனே பீ³ஜம் விய ச த³ட்ட²ப்³பா³. ‘‘ஸத்³தா⁴ஹத்தோ², மஹானாம, அரியஸாவகோ, ஸத்³தீ⁴த⁴ வித்தம் புரிஸஸ்ஸ ஸேட்ட²ம் (ஸம். நி. 1.246; ஸு. நி. 184), ஸத்³தா⁴ பீ³ஜம் தபோ வுட்டீ²’’திஆதி³வசனஞ்ஹேத்த² (ஸம். நி. 1.197; ஸு. நி. 77) ஸாத⁴கம்.

ஸரந்தி 237 ஏதாயாதி ஸரணகிரியாய பவத்தமானானம் த⁴ம்மானம் தத்த² ஆதி⁴பச்சபா⁴வேன ஸதியா பச்சயதம் த³ஸ்ஸேதி. தஸ்ஸா ஹி த⁴ம்மானம் ததா² பச்சயபா⁴வே ஸதி தம்ஸமங்கி³புக்³க³லோ ‘‘ஸரதீ’’தி வோஹரீயதி. உத³கே அலாபு³ விய பிலவித்வா க³ந்தும் அத³த்வா பாஸாணஸ்ஸ விய நிச்சலஸ்ஸ ஆரம்மணஸ்ஸ ட²பனம் அஸம்முட்ட²தாகரணம் அபிலாபனம், தம் லக்க²ணமஸ்ஸாதி அபிலாபனலக்க²ணா. ஸா ஹி ஆரம்மணே த³ள்ஹம் பதிட்டி²தத்தா ஏஸிகா விய வுச்சதி. ஸம்மோஸபச்சனீககிச்சம் அஸம்மோஸரஸோ, ந ஸம்மோஸாபா⁴வமத்தம். ‘‘ஸதாரக்கே²ன சேதஸா விஹரதீ’’தி (அ. நி. 10.20) வுத்தத்தா சேதோகு³ணரதனஹாரகானம் கிலேஸசோரானம் நிவாரணதோ ஆஹ ‘‘ஆரக்க²பச்சுபட்டா²னா’’தி. ததா² ஹேஸா சக்கு²த்³வாராதி³ரக்க²னதோ தோ³வாரிகோ வியாதி வுச்சதி. பட²மம் ஸஞ்ஞாய தி²ருப்பன்னபா⁴வே பச்சா² ஸதியா பதிட்டா²னபா⁴வதோ ஆஹ ‘‘தி²ரஸஞ்ஞாபத³ட்டா²னா’’தி. அத² ஸதிஸஞ்ஞானம் கிம் நானாகரணந்தி? ஸஞ்ஞா தாவ பட²மம் அக்³க³ஹிதனிமித்தம் ஸஞ்ஜானாதி, க³ஹிதனிமித்தே புன பச்சாபி⁴ஞ்ஞாணபச்சயனிமித்தம் கரோதி, பட²மம் அக்³க³ஹிதே பன ஸஞ்ஞாகிச்சம் அப்பதா⁴னம் ஹோதி, ஸதி பன பட²மம் அக்³க³ஹிதனிமித்தம்பி ஸரதி க³ஹிதனிமித்தம்பி, க³ஹிதனிமித்தே பன ஸதிகிச்சம் கு³ணபூ⁴தம் ஹோதீதி இத³மேவ தாஸம் நானத்தம்.

வீரபா⁴வோதி யேன வீரியேன வீரோ நாம ஹோதி, ஸோ த⁴ம்மோ. வீரானம் வா கம்மந்தி யேன கம்மேன வீரோ நாம ஹோதி, தம் வீரானம் கம்மம் நாம. வீரியம் பனஸ்ஸ ஸாத⁴கபா⁴வதோ ததா² வுத்தம். த⁴ம்மவினிமுத்தம் வா கிஞ்சி கம்மம் நத்தீ²தி வீரியமேவ கம்மபா⁴வேன வுத்தந்தி த³ட்ட²ப்³ப³ம். விதி⁴னா ஈரேதப்³ப³ம் பவத்தேதப்³ப³ந்தி வா வீரியம். உஸ்ஸாஹோ தம் தம் கிச்சம் ஸமாரம்போ⁴, பரக்கமோ வா. உபத்த²ம்ப⁴னம் பன ஸம்பயுத்தத⁴ம்மானம் கோஸஜ்ஜபக்கே² பதிதும் அத³த்வா தா⁴ரணம் அனுப³லப்பதா³னம். ஸம்பயுத்தத⁴ம்மானம் ஸம்ஸீத³னபா⁴வனிவாரகோ த⁴ம்மோ, ந ஸம்ஸீத³னாபா⁴வமத்தம், அஸம்ஸீத³னபா⁴வேன பச்சுபட்டா²தீதி அஸம்ஸீத³னபா⁴வபச்சுபட்டா²னம். ‘‘ஸம்விக்³கோ³ யோனிஸோ பத³ஹதீ’’தி (அ. நி. 4.113) வசனதோ ஸம்வேக³பத³ட்டா²னம். ஸம்வேகோ³தி சேத்த² ஸம்வேக³மயம் ஞாணம். அஸம்வேக³புப்³பி³காய பன குஸலகிரியாய வீரியாரம்ப⁴வத்து²பத³ட்டா²னம். தத்த² வீரியாரம்ப⁴வத்தூ²னி நாம –

‘‘மக்³கோ³ க³ந்தப்³போ³ ஹோதி, மக்³கோ³ க³தோ. கம்மம் காதப்³ப³ம் ஹோதி, கம்மம் கதம். அப்பமத்தகோ ஆபா³தோ⁴ உப்பன்னோ ஹோதி, கி³லானா வுட்டி²தோ ஹோதி, அசிரவுட்டி²தோ கே³லஞ்ஞா. கா³மம் வா நிக³மம் வா பிண்டா³ய சரந்தோ ந லப⁴தி, லூக²ஸ்ஸ வா பணீதஸ்ஸ வா போ⁴ஜனஸ்ஸ யாவத³த்த²ம் பாரிபூரிம் லப⁴தி…பே… பாரிபூரி’’ந்தி –

ஏவம் வுத்தானி ஏதானி அனுரூபபச்சவேக்க²ணஸஹிதானி அட்ட² வீரியாரம்ப⁴வத்தூ²னி, தம்மூலகானி வா பச்சவேக்க²ணானி. ஏத்த² ச விதக்கோ ஸம்பயுத்தத⁴ம்மே ஆரம்மணம் ஆரோபேதி. சேதனா தே தம்தம்கிச்சேஸு நியோஜேதி. வீரியம் பன தே ஸம்ஸீதி³தும் அத³த்வா உஸ்ஸாஹேதீதி அயம் விதக்கசேதனாவீரியானம் விஸேஸோ.

விஜானனலக்க²ணாதி விஸேஸேன ஜானனலக்க²ணா, யதா²ஸபா⁴வபடிவேத⁴லக்க²ணாதி அத்தோ². விஸயஸ்ஸ ஆரம்மணஸ்ஸ ஓபா⁴ஸனம் பகாஸனம் தப்படிச்சா²த³கஸம்மோஹந்த⁴காரஸ்ஸ வித⁴மனதோதி விஸயோபா⁴ஸனம், தம் கிச்சமஸ்ஸாதி விஸயோபா⁴ஸனரஸா. கத்த²சி விஸயே அஸம்முய்ஹனாகாரேன ஸம்மோஹபடிபக்க²தாய வா பச்சுபட்டா²னதோ ஸம்மோஹாபா⁴வஸ்ஸ பச்சுபட்டா²னதோ வா அஸம்மோஹபச்சுபட்டா²னா.

அத்தனா அனுபாலேதப்³பா³னம் ஸஹஜாதத⁴ம்மானம் அனுபாலனம் ஜீவிதஸ்ஸ ப்³யாபாரோ, தஞ்ச தேஸம் ஜீவனந்தி தம் தஸ்ஸ காரணபா⁴வம் புரக்க²த்வா வுத்தம் ‘‘ஜீவந்தி தேனா’’தி. ரூபாரூபஜீவிதிந்த்³ரியஸ்ஸ அனுரூபதோ லக்க²ணாதி³கம் த³ஸ்ஸேதும் ‘‘அத்தனா அவினிபு⁴த்தான’’ந்தி வுத்தம். ‘‘ஸம்பயுத்தான’’ந்தி ஹி வுச்சமானே ரூபத⁴ம்மானம் ஸம்பயோகா³பா⁴வதோ ரூபஜீவிதிந்த்³ரியஸ்ஸ ஸங்க³ஹோ ந ஸியா. ‘‘அவினிபு⁴த்தான’’ந்தி பன வுத்தத்தா யானி அவினிப்³போ⁴க³ரூபானி ரூபஜீவிதிந்த்³ரியேன ஸத்³தி⁴ம் அவினிபு⁴த்தானி அவிஸம்ஸட்டா²னி. யே ச அரூபத⁴ம்மா அரூபஜீவிதிந்த்³ரியேன ஸம்பயுத்தா, தேஸம் ஸப்³பே³ஸம் ஸங்க³ஹோ ஹோதீதி. பவத்தனரஸந்தி உப்பாத³தோ யாவ ப⁴ங்கா³ அனுபாலனதோ அந்தரா அனிவத்தனஸபா⁴வஸாத⁴னேன தேஸம் பவத்தனகிச்சம். கேசி பன ‘‘ரூபஜீவிதிந்த்³ரியம் தேஸம் டி²திக்க²ணதோ பட்டா²ய, அரூபஜீவிதிந்த்³ரியம் உப்பாத³தோ பட்டா²ய பவத்தியா பச்சயோ’’தி வத³ந்தி, தம் ந யுத்தம். பட்டா²னே ஹி ‘‘அப்³யாகதம் த⁴ம்மம் படிச்ச அஸஞ்ஞஸத்தானம் ஏகம் மஹாபூ⁴தம் படிச்ச இந்த்³ரியபச்சயம் கம்மபச்சயஸதி³ஸ’’ந்தி அஸஞ்ஞஸத்தானம் இந்த்³ரியபச்சயோ கம்மபச்சயஸதி³ஸம் கத்வா வுத்தோ, தஸ்மா ரூபஜீவிதிந்த்³ரியம்பி உப்பாத³தோ பட்டா²ய பச்சயோ ஹோதீதி த³ட்ட²ப்³ப³ம். உப்பாத³தோ யாவ ப⁴ங்கா³ ட²பனதோ ட²பனபச்சுபட்டா²னம். அனுபாலனவஸேன யாபயிதப்³பா³ பவத்தேதப்³பா³ த⁴ம்மா பத³ட்டா²னமஸ்ஸாதி யாபயிதப்³ப³த⁴ம்மபத³ட்டா²னம். யதி³ ஏவம் தேஸம் அனுபாலனாதி³ஸாத⁴கம், கத²ம் தேஸம் நிரோதோ⁴ ஹோதி. ஏவஞ்ஹி ஸப்³ப³காலம் டா²தப்³ப³ந்தி ஆஹ ‘‘ஸந்தேபி சா’’திஆதி³. அனுபாலனலக்க²ணாதி³ம்ஹீதி ஆதி³-ஸத்³தே³ன பவத்தனரஸாதி³மேவ ஸங்க³ண்ஹாதி. அத்தி²க்க²ணேயேவாதி அத்தனா அனுபாலேதப்³பா³னம், அத்தனோ வா அத்தி²க்க²ணேயேவ. உத³கந்தி தளாகக³தஜலம், த³ண்ட³க³தஜலம் வா. தத்த² தளாகக³தஉத³கஸ்ஸ க³ஹணே அத்தனா அனுபாலேதப்³ப³த⁴ம்மானம் அத்தி²க்க²ணே அனுபாலனம் ஸாதி⁴தம் ஹோதி, த³ண்ட³க³தஜலஸ்ஸ பன க³ஹணே அத்தனோ அத்தி²க்க²ணே அனுபாலனம். அத்தனா அனுப்பாதி³தத⁴ம்மே கத²ம் பாலேதீதி ஆஹ ‘‘தா⁴தி விய குமார’’ந்தி. யதி³ ஸேஸத⁴ம்மானம் பவத்திகாரணேன கேனசி ப⁴விதப்³ப³ம், ஜீவிதஸ்ஸ பன கிம் பவத்திகாரணந்தி ஆஹ ‘‘ஸயம்…பே… பவத்ததீ’’தி. யதா² கத²ம் வியாதி ஆஹ ‘‘நியாமகோ வியா’’தி. ஸோபி அத்தனா பவத்திதனாவாஸம்ப³ந்தே⁴ன பவத்ததி. யதி³ த⁴ம்மானம் பவத்தி ஜீவிதிந்த்³ரியபடிப³த்³த⁴ம், ப⁴ங்க³தோ உத்³த⁴ம்பி கிம் பன பவத்தேதீதி ஆஹ ‘‘ந ப⁴ங்க³தோ உத்³த⁴’’ந்தி. கஸ்மாதி ஆஹ ‘‘அத்தனோ ச பவத்தேதப்³பா³னஞ்ச அபா⁴வா’’தி. ப⁴ங்க³க்க²ணே பன கத²ந்தி ஆஹ ‘‘ந ப⁴ங்க³க்க²ணே ட²பேதீ’’தி.

யஸ்மா பன லோப⁴படிபக்கோ² அலோபோ⁴ ஹோதி, யே த⁴ம்மா தேன ஸம்பயுத்தா, தம்ஸமங்கி³னோ வா ஸத்தா, தே ந லுப்³ப⁴ந்தி, ஸயம்பி கதா³சி ந லுப்³ப⁴தேவ, அத்த²தோ வா அலுப்³ப⁴னாகாரோ ஏவ ச ஸோ ஹோதி, தஸ்மா வுத்தம் ‘‘ந லுப்³ப⁴ந்தி தேனா’’திஆதி³. ஏஸ நயோ ‘‘ந து³ஸ்ஸந்தி தேனா’’திஆதீ³ஸுபி. அலக்³க³பா⁴வோ ஆரம்மணம் நிஸ்ஸாய பவத்தந்தஸ்ஸபி தத்த² அனாஸத்ததா. தேனாஹ ‘‘கமலத³லே ஜலபி³ந்து³ வியா’’தி. அபரிக்³க³ஹோ கஸ்ஸசி வத்து²னோ மமத்தவஸேன அஸங்க³ஹோ. முத்தபி⁴க்கு² வியாதி கீ²ணாஸவபி⁴க்கு² விய. ஸோ ஹி முத்தராக³த்தா கத்த²சி மமாயனரஹிதோ ஹோதி. அனல்லீனோ பா⁴வோ அதி⁴ப்பாயோ ஏதஸ்ஸாதி அனல்லீனபா⁴வோ. ஏவஞ்ஹி ‘‘அஸுசிம்ஹி பதிதபுரிஸோ வியா’’தி உபமாய ஸமேதி. யதா² ஹி தஸ்ஸ புரிஸஸ்ஸ ஸதிபி காயேன அல்லீயனே பா⁴வோ அனல்லீனோ, ஏவம் அலோபோ⁴பி ஆரம்மணகரணவஸேன க³ஹிதேபி ஆரம்மணே அலக்³க³பா⁴வேன அனல்லீனபா⁴வோ அனல்லீனாகாரோயேவ பவத்ததி. ஏவம்ஸபா⁴வோ ஹி ஸோ த⁴ம்மோதி.

சண்டி³கஸ்ஸ பா⁴வோ சண்டி³க்கம், ப²ருஸபா⁴வோ, அத்த²தோ பன கோபோயேவ, தப்படிபக்கோ² அப²ருஸபா⁴வோ அசண்டி³க்கம். அவிரோதோ⁴ அவிக்³க³ஹோ அப்படிபக்கோ² ஸபா⁴வோ. ஆகா⁴தவினயனரஸோதி ஏத்த² ஆகா⁴தோ நாம பரஸ்ஸ அத்தானம், அத்தனோ பரம் உத்³தி³ஸ்ஸ, பரஸ்ஸேவ ச பரம் உத்³தி³ஸ்ஸ பவத்தோ உபனாஹோ ப³லவகோபோ. தஸ்ஸ வினயனரஸோ அபனயனரஸோ. ஸோம்மபா⁴வோ மஜ்ஜனவஸேன ஹிலாத³னியதா ஸீதலபா⁴வோ. தேனாஹ ‘‘புண்ணசந்தோ³ வியா’’தி.

காயது³ச்சரீதாதீ³ஹீதி ஹேதும்ஹி கரணவசனம். ஹிரீயதி லஜ்ஜனாகாரேன ஜிகு³ச்சி²யதி. தேஹியேவாதி காயது³ச்சரிதாதீ³ஹியேவ. ஓத்தப்பதீதி உப்³பி³ஜ்ஜதி. ஹிரீ பாபே கூ³தே² விய பஸ்ஸந்தீ ஜிகு³ச்ச²தீதி ஆஹ ‘‘பாபதோ ஜிகு³ச்ச²னலக்க²ணா ஹிரீ’’தி. ஓத்தப்பம் தே உண்ஹம் விய பஸ்ஸந்தம் ததோ உத்தஸதீதி வுத்தம் ‘‘உத்தாஸலக்க²ணம் ஓத்தப்ப’’ந்தி. உபோ⁴பி பாபானம் அகரணரஸாதி லஜ்ஜனாகாரேன பாபானம் அகரணரஸா ஹிரீ, உத்தாஸாகாரேன ஓத்தப்பம். பாபதோ ஸங்கோசனபச்சுபட்டா²னாதி வுத்தப்பகாரேனேவ பாபதோ ஸங்கோசனாகாரேன பச்சுபட்டா²னா. அத்தகா³ரவபரகா³ரவபத³ட்டா²னாதி அத்தகா³ரவபத³ட்டா²னா ஹிரீ அஜ்ஜ²த்தஸமுட்டா²னதாய, அத்தாதி⁴பதிதாய ச. பரகா³ரவபத³ட்டா²னம் ஓத்தப்பம் ப³ஹித்³தா⁴ஸமுட்டா²னதாய, லோகாதி⁴பதிதாய ச. அத்தானஞ்ஹி க³ரும் கத்வா ஹிரியா பாபம் பஜஹதி குலவதூ⁴ விய. பரம் க³ரும் கத்வா ஓத்தப்பேன பாபம் பஜஹதி வேஸியா விய. அஜ்ஜ²த்தஸமுட்டா²னாதி³தா ச நேஸம் தத்த² தத்த² பாகடபா⁴வேன வேதி³தப்³பா³, ந பன தேஸம் கதா³சி அஞ்ஞமஞ்ஞவியோக³தோ. ந ஹி லஜ்ஜனம் நிப்³ப⁴யம் வா பாபப⁴யம் வா அலஜ்ஜனம் அத்தீ²தி. ஹிரியா ப³லவபா⁴வே பன ஓத்தப்பம் அப்³போ³ஹாரிகம் ஹோதி, ஓத்தப்பஸ்ஸ ப³லவபா⁴வே ஹிரீ அப்³போ³ஹாரிகா. இமே ச த்³வே த⁴ம்மா ‘‘லோகபாலா’’தி வுச்சந்தி. யதா²ஹ –

‘‘த்³வேமே, பி⁴க்க²வே, ஸுக்கா த⁴ம்மா லோகம் பாலேந்தி. கதமே த்³வே? ஹிரீ ச ஓத்தப்பஞ்ச, இமே கோ², பி⁴க்க²வே, த்³வே ஸுக்கா த⁴ம்மா லோகம் ந பாலேய்யும், நயித⁴ பஞ்ஞாயேத² ‘மாதா’தி வா ‘மாதுச்சா²’தி வா ‘மாதுலானீ’தி வா’’திஆதி³ (அ. நி. 2.9).

பஸ்ஸம்ப⁴னம் த³ரத²வூபஸமோ, காய-ஸத்³தோ³ ஸமூஹவசனோ. ஸோ சேத்த² வேத³னாதி³க்க²ந்த⁴த்தயம். வத்திச்சா²வஸேன ஹி ஸத்³தோ³ விஸிட்ட²வுத்தி ஹோதீதி ஆஹ ‘‘காயோதி சேத்தா²’’திஆதி³. வேத³னாத³யோதி வேத³னாக்க²ந்தோ⁴ ஸஞ்ஞாக்க²ந்தோ⁴ ஸங்கா²ரக்க²ந்தோ⁴தி தயோ க²ந்தா⁴. ததா² ச வுத்தம் தத்த² ‘‘கதமா தஸ்மிம் ஸமயே காயபஸ்ஸத்³தி⁴ ஹோதி, யா தஸ்மிம் ஸமயே வேத³னாக்க²ந்த⁴ஸ்ஸா’’திஆதி³ (த⁴. ஸ. 40). த³ரதோ² ஸாரம்போ⁴ தோ³மனஸ்ஸபச்சயானம் உத்³த⁴ச்சாதீ³னம் கிலேஸானம், ததா² பவத்தானம் வா சதுன்னம் க²ந்தா⁴னமேதம் அதி⁴வசனம். தஸ்ஸ வூபஸமம் லக்க²ணமஸ்ஸாதி காயசித்தத³ரத²வூபஸமலக்க²ணா. காயசித்த…பே… ரஸாதி யதா²வுத்தானமேவ படிபக்க²த⁴ம்மானம் அபி⁴ப⁴வனரஸா. த³ரத²னிம்மத்³த³னேன பரிளாஹபரிப்ப²ந்த³னவிரஹிதோ ஸீதிபா⁴வோ அபரிப்ப²ந்த³னஸீதிபா⁴வோ. அவூபஸமோ பரிப்ப²ந்த³னம் அஸந்தவுத்திதா. உத்³த⁴ச்சாதி³கிலேஸாதி உத்³த⁴ச்சப்பதா⁴னா உத்³த⁴ச்சாதி⁴கசித்துப்பாத³ஸம்பயுத்தா கிலேஸா. தேபி ஹி உத்³த⁴ச்சவஸேன அவூபஸமகரா. உத்³த⁴ச்சம் வா ஆதி³ம் கத்வா ஸப்³பே³யேவ கிலேஸா உத்³த⁴ச்சாதி³கிலேஸா. ஏவம் ஸேஸேஸுபி.

க³ருபா⁴வோ த³ந்த⁴தா, தி²னமித்³தா⁴தி⁴கானம் ததா² பவத்தானம் வா சதுன்னம் க²ந்தா⁴னமேதம் அதி⁴வசனம். த³ந்த⁴தாய படிபக்கோ² அத³ந்த⁴தா அக³ருபா⁴வோ.

த²த்³த⁴பா⁴வோ த²ம்போ⁴. தி³ட்டி²மானாதி⁴கானம், தப்பதா⁴னானம் வா சதுன்னம் க²ந்தா⁴னம் ஏதம் நாமம். த²த்³த⁴பா⁴வனிம்மத்³த³னதோயேவ கத்த²சி ஆரம்மணே அப்படிஹதாகாரேன பச்சுபட்ட²ந்தி, ஸம்பயுத்தானம் வா தத்த² அப்படிகா⁴தம் பச்சுபட்டா²பேந்தீதி அப்படிகா⁴தபச்சுபட்டா²னா.

கம்மனி ஸாது⁴ கம்மஞ்ஞம், ந கம்மஞ்ஞம் அகம்மஞ்ஞம், தஸ்ஸ பா⁴வோ அகம்மஞ்ஞபா⁴வோ, தா³னஸீலாதி³புஞ்ஞகிரியாய அஸமத்த²தா. அத்த²தோ காமச்ச²ந்தா³தி³ஸம்கிலேஸத⁴ம்மா, தப்பதா⁴னா வா சத்தாரோ அகுஸலக்க²ந்தா⁴. அகம்மஞ்ஞபா⁴வனிம்மத்³த³னேனேவ ஸம்பன்னாகாரேன ஆரம்மணஸ்ஸ க³ஹணம் ஆரம்மணகரணஸம்பத்தி. வுத்தாவஸேஸா காமச்ச²ந்தா³த³யோ, ததே³கட்டா² ச ஸம்கிலேஸத⁴ம்மா ஸேஸனீவரணாத³யோ. இமா பன த்³வே வினிப³ந்த⁴னிம்மத்³த³னேன பஸாத³னீயவத்தூ²ஸு பஸாதா³வஹா, ஹிதகிரியாஸு வினியோக³க்க²மபா⁴வாவஹா ஸுவண்ணவிஸுத்³தி⁴ வியாதி த³ட்ட²ப்³பா³.

கே³லஞ்ஞம் அஸ்ஸத்³தி⁴யாத³யோ, ததே³கட்டா² ச பாபத⁴ம்மா, தப்படிபக்கோ² அகே³லஞ்ஞபா⁴வோ லக்க²ணம் ஏதாஸந்தி அகே³லஞ்ஞபா⁴வலக்க²ணா. கே³லஞ்ஞனிம்மத்³த³னேனேவ நத்தி² ஏதாஸம் ஆதீ³னவோ தோ³ஸோ உபத்³த³வோ வா, ந வா ஏதா ஆதீ³னம் கபணம் வந்தி பவத்தந்தீதி நிராதீ³னவா, தேனாகாரேன பச்சுபட்ட²ந்தி, தம் வா ஸம்பயுத்தேஸு பச்சுபட்டா²பேந்தீதி நிராதீ³னவபச்சுபட்டா²னா.

காயஸம்ப³ந்தீ⁴, சித்தஸம்ப³ந்தீ⁴ ச உஜுபா⁴வோதி லக்கி²தப்³ப³தாய காயசித்தானம் அஜ்ஜவலக்க²ணா. காயசித்தானம் நங்க³லஸீஸசந்த³கோடிகோ³முத்தவங்கதாஸங்கா²தானம் குடிலபா⁴வானம் அத்த²தோ மாயாஸாடே²ய்யாதி³பூ⁴தானம் நிம்மத்³த³னதோ காயசித்தானம் குடிலபா⁴வனிம்மத்³த³னரஸா. ததோயேவ ஸப்³ப³தா²பி அஜிம்ஹபா⁴வேன பச்சுபட்ட²ந்தி, ஸம்பயுத்தானம் வா அஜிம்ஹதம் பச்சுபட்டா²பேந்தீதி அஜிம்ஹதாபச்சுபட்டா²னா.

நனு ச காயபஸ்ஸத்³தி⁴ஆதீ³னம் த்³வின்னம் த்³வின்னம் த⁴ம்மானம் ஏகேகபடிபக்க²த்தா த³ரத²னிம்மத்³த³னாதி³கிச்சம் ஏகேகமேவ கரோதி. கஸ்மா பன த்³வே த்³வே த⁴ம்மா வுத்தாதி? ந கோ² பனேவம் சிந்திதப்³ப³ம் ப⁴க³வதாபி ததே²வ தே³ஸிதத்தா. கஸ்மா பன ப⁴க³வதா ததா² தே³ஸிதா? ஸபா⁴வத⁴ம்மபா⁴வதோ. ந ஹி ப⁴க³வதா புப்³பே³ அவிஜ்ஜமானா ஏதே த⁴ம்மா தே³ஸனாவஸேன உப்பாதி³தா, அத² கோ² ஸபா⁴வதோ விஜ்ஜமானாயேவ ஸயம்பு⁴ஞாணேன ஸம்மா ஸச்சி²கத்வா யதா²ஸபா⁴வா தே³ஸிதா, தஸ்மா கத²மேத்த² ப⁴க³வதா ஸபா⁴வதோ விஜ்ஜமானஸ்ஸ ஹாபனம் காதும் ஸக்கா. ஸபா⁴வதோ விஜ்ஜமானதாய சேத்த² ப⁴க³வதோ வசனமேவ பமாணம். ந ஹி ப⁴க³வா யதா²த⁴ம்மஸாஸனாதி⁴காரே அயதா²த⁴ம்மம் கதே²ய்யாதி, யஸ்ஸ பன விஜ்ஜமானஸ்ஸாபி அகத²னம், தம் அஞ்ஞஹேதுகம். ந சேத்த² தாதி³ஸோ ஹேது உபலப்³ப⁴தி, யேன இமேஸு ஏகேகத⁴ம்மஸ்ஸ அகத²னந்தி. யதா² பன த்³வின்னம் புரிஸானம் ஏகோயேவ வேரிகோ ஹோதி, தஸ்ஸ தே புரிஸா ஓதாரம் தி³ஸ்வா ஏகதோ ஹுத்வாவ ஹனந்தி, ஏவமேவ த்³வே த்³வே த⁴ம்மா ஏகதோ ஹுத்வா ஏகம் படிபக்க²த⁴ம்மம் ஹனந்தி, யதா² ச பனேதே விஸும் தி³ஸ்வாபி தம் வேரிம் ஹனந்தி, ந ஏவமேதே தம் விஸும் ஹனந்தி தேஸம் அஞ்ஞமஞ்ஞம் அவினாபா⁴வதோதி, தஸ்மா ஏதே படிபக்க²த⁴ம்மானம் ஏகேகபா⁴வேபி த்³வே த்³வேயேவ வுத்தாதி, அபிச சித்தபஸ்ஸத்³தி⁴ஆதீ³ஹி சித்தமேவ பஸ்ஸத்³தி⁴ லஹு முது³ கம்மஞ்ஞம் பகு³ணம் உஜுஞ்ச ஹோதி. காயபஸ்ஸத்³தி⁴ஆதீ³ஹி பன ரூபகாயோபீதி தத³த்த²த³ஸ்ஸனத்த²ம் ப⁴க³வதா ஏத்தே²வ து³வித⁴தா வுத்தா, ந ஸமாதி⁴ஆதீ³ஸு.

ச²ந்த³னம் ச²ந்தோ³, ஆரம்மணேன அத்தி²கதா. ‘‘ச²ந்தோ³ காமோ’’திஆதீ³ஸு (மஹானி. 1) பன தண்ஹாபி ச²ந்தோ³தி வுச்சதி. ‘‘ச²ந்த³ம் ஜனேதி வாயமதீ’’திஆதீ³ஸு வீரியம்பீதி ததோ நிவத்தனத்த²ம் வுத்தம் ‘‘கத்துகம்யதாயேதம் அதி⁴வசன’’ந்தி. கத்துகம்யதா வுச்சதி கரணிச்சா². சேதஸிகஸ்ஸ த⁴ம்மஸ்ஸ ஸாரம்மணத்தா கரணிச்சா² நாம ஆரம்மணஸ்ஸ ஆலம்பி³துகாமதாமுகே²னேவ ஹோதீதி ஆரம்மணகரணிச்சா²லக்க²ணோ ச²ந்தோ³ ‘‘கத்துகம்யதாலக்க²ணோ’’தி வுத்தோ. தேனேவாஹ ‘‘ஆரம்மணபரியேஸனரஸோ, ஆரம்மணேன அத்தி²கதாபச்சுபட்டா²னோ’’தி ச. யத³க்³கே³ன பனாயம் அத்தனோ ஆரம்மணபரியேஸனரஸோ, தத³க்³கே³ன ஸம்பயுத்தத⁴ம்மானம்பி ஹோதியேவ ஏகாரம்மணதாய. தேன தேஸம் ஆரம்மணக்³க³ஹணே சேதஸோ ஹத்த²ப்பஸாரணம் வியாதி வுச்சதி. கத²ம் பன தா³னவத்து²விஸ்ஸஜ்ஜனவஸேன பவத்தமானசேதனாஸம்பயுத்தோ ச²ந்தோ³ ஆரம்மணேன அத்தி²கோ ஹோதீதி? நனு அவோசும்ஹா ‘‘ஆரம்மணகரணிச்சா²லக்க²ணோ’’தி, தஸ்மா ஸங்கா³மக³தஇஸ்ஸாஸஸ்ஸ கி²பிதப்³ப³உஸூனம் க³ஹணே அத்தி²கதா விய தா³னவத்து²விஸ்ஸஜ்ஜனவஸேன பவத்தச்ச²ந்தோ³பி விஸ்ஸஜ்ஜிதப்³பே³ன தேன அத்தி²கோயேவாதி. ஸ்வாயம் குஸலேஸு உப்பன்னோ குஸலச்ச²ந்தோ³ நாம ஹோதி யோனிஸோமனஸிகாரஸமுட்டா²னத்தா. தப்³பி³பரீததோ பன அகுஸலேஸு உப்பன்னோ அகுஸலச்ச²ந்தோ³.

அதி⁴முச்சனம் ஆரம்மணே ஸன்னிட்டா²னவஸேன வேதி³தப்³ப³ம், ந பஸாத³னவஸேன. தேனாஹ ‘‘ஸன்னிட்டா²னலக்க²ணோ’’தி. யதா² ததா² ஹி ஆரம்மணே நிச்ச²யனம் அதி⁴முச்சனம் அனதி⁴முச்சந்தஸ்ஸ பாணாதிபாதாதீ³ஸு, தா³னாதீ³ஸு வா பவத்தியா அபா⁴வதோ, ஸத்³தா⁴ பன பஸாத³னீயேஸு பஸாதா³தி⁴மோக்கோ²தி அயமேதேஸம் விஸேஸோ. வோட்ட²ப்³ப³னம் பன யதா² ஸந்தீரிதே அத்தே² நிச்ச²யனாகாரேன பவத்தித்வா பரதோ பவத்தமானானம் ததா² பவத்தியா பச்சயோ ஹோதி. யதி³ ஏவம் விசிகிச்சா²ஸம்பயுத்தேஸு த⁴ம்மேஸு கத²ந்தி? தேஸம்பி ஏகம்ஸேனேவ ஸம்ஸப்பனாகாரஸ்ஸ பச்சயதாய த³ட்ட²ப்³ப³ம், தா³ரகஸ்ஸ விய இதோ சிதோ ச ஸம்ஸப்பனஸ்ஸ ‘‘கரிஸ்ஸாமி, ந கரிஸ்ஸாமீ’’தி அனிச்ச²யஸ்ஸ படிபக்க²கிரியா அஸம்ஸப்பனம். யேஸு சித்துப்பாதே³ஸு அயம் ஸன்னிட்டா²னலக்க²ணோ அதி⁴மோக்கோ², தேஸம் ஆரம்மணத⁴ம்மோயேவ ஸன்னிட்டா²தப்³ப³த்தா ஸன்னிட்டே²ய்யத⁴ம்மோ. ஸோ பத³ட்டா²னமஸ்ஸாதி ஸன்னிட்டே²ய்யத⁴ம்மபத³ட்டா²னோ. இந்த³கி²லோதி ஏஸிகாத²ம்போ⁴ வுச்சதி.

தேஸு தேஸு த⁴ம்மேஸூதி யேஸு த⁴ம்மேஸு ஸயம் உப்பன்னா, தேஸு அத்தனா ஸம்பயுத்தேஸு சித்தசேதஸிகத⁴ம்மேஸு. அனாரம்மணத்தேபி ஹி தேஸு ஸமப்பவத்தேஸு உதா³ஸீனபா⁴வோ ‘‘தத்ரமஜ்ஜ²த்ததா’’தி வுச்சதி. ஸமம் அவிஸமம் வாஹிதம் அத்தனா பவத்திதஸம்பயுத்தானம் வா யதா²ஸககிச்சேஸு பவத்தனம் லக்க²ணமேதிஸ்ஸாதி ஸமவாஹிதலக்க²ணா. தத்த² ஸமம் ஹுத்வா பவத்தனலக்க²ணாதி அத்தே² அபக்க²பதிதபா⁴வோ வுத்தோ ஹோதி, அவிஸமம் கத்வா பவத்தனலக்க²ணாதி அத்தே² ஊனாதி⁴கதானிவாரணம். உதா³ஸீனபா⁴வேன பவத்தமானாபி ஹி ஏஸா ஸம்பயுத்தத⁴ம்மே ஸமம் கத்வா யதா²ஸககிச்சேஸு பவத்தேதி, யதா² ராஜா துண்ஹீ நிஸின்னோபி அதி⁴கரணத⁴ம்மட்டே² யதா²ஸககிச்சேஸு ஸமம் அப்பமத்தே பவத்தேதி. அலீனானுத்³த⁴தப்பவத்திபச்சயானம் த⁴ம்மானம் ஊனாதி⁴கதாய லீனுத்³த⁴தபா⁴வஸ்ஸ நிவாரணகிச்சாதி வுத்தம் ‘‘ஊனாதி⁴கதானிவாரணரஸா’’தி. யதி³ ஏவம் கத²ம் ஸஹஜாதாதி⁴பதீனம் அதி⁴பதிபா⁴வோ. ஆதி⁴பச்சஞ்ஹி தேஸம் கிச்சதோ அதி⁴கபா⁴வோதி? நாயம் தோ³ஸோ. தம்பி தஸ்ஸ கிச்சமேவ, யம் ஸஹஜாதத⁴ம்மானம் அதி⁴பதிபா⁴வே பவத்தாபனம். யதா² ஹி ரங்க³மண்ட³லம் க³தோ நடகாசரியோ தே தே நடகே யதா²ஸகம் அனுரூபம் பூ⁴மியம் யோஜேதி, ஏவமேஸாபி அத்தனா ஸம்பயுத்தத⁴ம்மேஸு அதி⁴பதிபா⁴வே டி²தே அதி⁴பதிபா⁴வே யோஜேதி, இந்த்³ரியத்தே டி²தே இந்த்³ரியத்தே, ந பன ஸகஸககிச்சதோ ஊனதம், அதி⁴கதம் வா பத்தும் தே³தீதி. ‘‘இத³ம் நிஹீனகிச்சம் ஹோது, இத³ம் அதிரேககிச்ச’’ந்தி ஏவம் பக்க²பாதவஸேன விய பவத்தி பக்க²பாதோ. தம் உபச்சி²ந்த³ந்தீ விய ஹோதீதி பக்க²பாதுபச்சே²த³னரஸா. ஸா சித்தசேதஸிகானம் அஜ்ஜு²பேக்க²னேன ஸமப்பவத்தேஸு ஆஜானீயேஸு ஸாரதி² விய த³ட்ட²ப்³பா³.

கிரியா காரோதி கார-ஸத்³த³ஸ்ஸ பா⁴வஸாத⁴னதம் ஆஹ. தேன காரோதி நாஞ்ஞம், கிரியாயேவாதி தீ³பிதம் ஹோதி. மனஸ்மிம் காரோதி மனஸி ஆரம்மணஸ்ஸ கரணம். யேன ஹி மனோ ஆரம்மணே கரீயதி ஆரம்மணேனஸ்ஸ ஸம்யோஜனதோ, ததோ ஏவ தேன ஆரம்மணம்பி மனஸி கரீயதீதி. மனஸிகாரோதி சேத்த² அலுத்தஸமாஸோ த³ட்ட²ப்³போ³. புரிமமனதோதி ப⁴வங்க³மனதோ. விஸதி³ஸம் மனந்தி வீதி²ஜவனமனம், தம் கரோதீதி மனஸிகாரோ, மனஸிகாரஸாமஞ்ஞேன வீதி²ஜவனபடிபாத³கே த³ஸ்ஸேதி. ஏத்த² பன உபயோக³த்த²பு⁴ம்மவசனே ஸமாஸோ த³ட்ட²ப்³போ³. ஸம்பயுத்தத⁴ம்மே ஆரம்மணாபி⁴முக²ம் ஸாரேந்தோ பயோஜேந்தோ விய ஹோதீதி மனஸிகாரோ ஸாரணலக்க²ணோதி வுத்தோ. ஸம்யோஜனரஸோதி பயோஜனரஸோ. விதக்கோ ஸம்பயுத்தானம் ஆரம்மணே அபி⁴னிரோபனஸபா⁴வத்தா ஆரம்மணே சித்தம் பக்கி²பந்தோ விய ஹோதி. சேதனா அத்தனோ ஆரம்மணம் க³ண்ஹந்தீ ஸம்பயுத்தேபி ஸகஸககிச்சம் காரேதீதி அத்தனா கரணேன ப³லம் நியோஜேந்தோ ப³லனாயகோ விய ஹோதி. மனஸிகாரோ ஸம்பயுத்தே ஆரம்மணே பயோஜேதீதி ஆஜானீயப்பயோஜனகஸாரதி² வியாதி அயமேதேஸம் விஸேஸோ.

ஆரம்மணாபி⁴முக²பா⁴வபச்சுபட்டா²னோதி ஆரம்மணே ஸம்யோஜனவஸேன தத³பி⁴முக²பா⁴வபச்சுபட்டா²னோ. ஏத்த² ஸதியா அப்பமுஸ்ஸனச்ச²ந்த³தா விஸயாபி⁴முக²பச்சுபட்டா²னதா, மனஸிகாரஸ்ஸ பன ஸம்யோஜனவஸேனாதி அயமேதேஸம் விஸேஸோ. ஆரம்மணபடிபாத³கஸ்ஸ ஸங்கா²ரக்க²ந்த⁴பரியாபன்னதாவசனம் இதரமனஸிகாரானம் விஞ்ஞாணக்க²ந்த⁴பரியாபன்னதம் த³ஸ்ஸேதி. மஹிஸாஸகா பன ‘‘ஆவஜ்ஜனஸ்ஸ விஞ்ஞாணபா⁴வே ஸப்³ப³ஞ்ஞுதஞ்ஞாணஸ்ஸ ஸப்³ப³விஸயதா பரிஹாயேய்ய, தஸ்மா தம் ஜவனஸம்பயுத்தஸங்கா²ரக்க²ந்த⁴பரியாபன்னமேவா’’தி வத³ந்தி. தேஸஞ்ஹி அயமதி⁴ப்பாயோ – யதி³ தம் விஸும் சித்தஸபா⁴வம் ஸியா, பச்சுப்பன்னசித்தம் ஆரம்மணம் கத்வா பவத்தஸ்ஸ தஸ்ஸ அனந்தரம் உப்பஜ்ஜமானஜவனானம் பச்சுப்பன்னாரம்மணதா ந ப⁴வேய்ய, அஞ்ஞத³த்து² அதீதாரம்மணதாவ ஸியா, ஏவஞ்ச ஸதி ஸப்³ப³ஞ்ஞுதஞ்ஞாணஸ்ஸாபி பச்சுப்பன்னசித்தாரம்மணதாய அபா⁴வதோ அஸப்³ப³விஸயதா ஆபஜ்ஜேய்ய, யத³க்³கே³ன ச தம் அஸப்³ப³விஸயம், தத³க்³கே³ன ஸாவரணம்பி ஹோதி யத்த² ந பவத்ததி, தத்த² ஆவரணஸம்ப⁴வதோ, தஸ்மாஸ்ஸ ஸகலலோகஸித்³தோ⁴ ஸப்³ப³ஞ்ஞுபா⁴வோ, அனாவரணபா⁴வோ ச பரிஹாயேத², ஜவனஸம்பயுத்தபா⁴வே பன ஸதி ஆவஜ்ஜனஸ்ஸ நாயம் இட்ட²விகா⁴தோ ஆபஜ்ஜதீதி. தயித³ம் தேஸமபி⁴னிவேஸமத்தம் ‘‘ஆவஜ்ஜனா குஸலானம் க²ந்தா⁴னம், அகுஸலானம் க²ந்தா⁴னம் அனந்தரபச்சயேன பச்சயோ’’தி (பட்டா². 1.1.417) வசனேன தஸ்ஸானந்தரம் குஸலாகுஸலுப்பத்தியா தீ³பிதத்தா. ஸப்³ப³ஞ்ஞுதஞ்ஞாணஸ்ஸ பன பச்சுப்பன்னசித்தாரம்மணபா⁴வோ ஏவம் வேதி³தப்³போ³ – அதீதாதி³வஸேன ஹி விபா⁴க³மகத்வா ‘‘இமஸ்ஸ சித்தம் ஜானாமீ’’தி பவத்தஸ்ஸ ஆவஜ்ஜனம் ஸாமஞ்ஞேன யம் கிஞ்சி அபி⁴முகீ²பூ⁴தம் சித்தமாவஜ்ஜதி, ததோ ஜவனானிபி அத்தனோ அத்தனோ அபி⁴முகீ²பூ⁴தம் சித்தமாரம்மணம் கத்வா பவத்தந்தி, ந சேத்த² ஜவனானம் பி⁴ன்னாரம்மணதா ஆஸங்கிதப்³பா³ சித்தஸாமஞ்ஞேன ஆரம்மணஸ்ஸ அபி⁴ன்னத்தா, தஸ்மா ஸப்³ப³ஞ்ஞுதஞ்ஞாணஸ்ஸ பச்சுப்பன்னசித்தாரம்மணதம் படிச்ச ந காசி விஹேஸா அனுப⁴விதப்³பா³தி. கிம் வா ஏதேன யுத்திவாதே³ன, நனு வுத்தம் ப⁴க³வதா – ‘‘அசிந்தேய்யோ பு³த்³த⁴விஸயோ’’தி (அ. நி. 4.77), தஸ்மா அபரிமிதபுஞ்ஞஸம்பா⁴ரேகப²லஸ்ஸ அசிந்தேய்யஸபா⁴வத்தா ஆவஜ்ஜனேன வினாபி விஸயக்³க³ஹணே விப³ந்த⁴னாபா⁴வதோ யத்த² கத்த²சி பவத்தி அப்படிஹதாயேவாதி. கேசி பனேத்த² ‘‘ஆவஜ்ஜனம் அனாக³தசித்தமாரம்மணம் கத்வா நிருஜ்ஜ²தி, ஜவனமேவ பன பச்சுப்பன்னமாரம்மணம் க³ண்ஹாதீ’’தி வத³ந்தி. யஸ்மா பன ‘‘அனாக³தாரம்மணா ஆவஜ்ஜனா பச்சுப்பன்னாரம்மணானம் க²ந்தா⁴னம் அனந்தரபச்சயேன பச்சயோ’’தி பாளி நத்தி², தஸ்மா தம் அப்பமாணம்.

கரோதீதி கருணா. கிம் கரோதி, கேஸம் கிம் நிமித்தந்தி ஆஹ ‘‘பரது³க்கே² ஸதி ஸாதூ⁴னம் ஹத³யகம்பன’’ந்தி. கம்பனந்தி ச பரேஸம் து³க்க²ம் தி³ஸ்வா தஸ்ஸ அஸஹனாகாரேன சித்தஸ்ஸ அஞ்ஞத²த்தம், ததி³த³ம் ஸப்புரிஸானம்யேவ ஹோதீதி ஆஹ ‘‘ஸாதூ⁴ன’’ந்தி. ஸப்புரிஸா ஹி அத்தஹிதபரஹிதஸாத⁴னேன ‘‘ஸாதூ⁴’’தி வுச்சந்தி. ‘‘கிணாதீ’’தி இமஸ்ஸ அத்த²மாஹ ‘‘வினாஸேதீ’’தி, அத³ஸ்ஸனம் க³மேதி அபனேதீதி அத்தோ². தேனாஹ ‘‘பரது³க்கா²பனயனாகாரப்பவத்திலக்க²ணா’’தி. பரேஸம் து³க்க²ஸ்ஸ அபனயனம் ஹோது வா, மா வா, ஸோ பரது³க்கா²பனயனாகாரோ, ததா²பவத்திலக்க²ணாதி பர…பே… லக்க²ணா. அபனேதுகாமதாய பரேஸம் து³க்க²ஸ்ஸ அஸஹனம் அனதி⁴வாஸனம் பரது³க்கா²ஸஹனம். ந விஹிம்ஸா அவிஹிம்ஸா, ஸத்தானம் அவிஹேட²னம், தம் பச்சுபட்டா²பேதி, விஹிம்ஸாய வா படிபக்க²பா⁴வேன பச்சுபட்டா²தீதி அவிஹிம்ஸாபச்சுபட்டா²னா.

பமோத³னலக்க²ணாதி பரஸம்பத்தியா பமோத³னலக்க²ணா. அனிஸ்ஸாயனரஸாதி இஸ்ஸாயனஸ்ஸ உஸூயனஸ்ஸ படிபக்க²பா⁴வகிச்சா. பந்தஸேனாஸனேஸு, அதி⁴குஸலத⁴ம்மேஸு ச அரமணம் அரதி. ஸா அத்த²தோ இஸ்ஸாதி⁴கம் தோ³மனஸ்ஸஸஹக³தம், தி²னமித்³தா⁴தி⁴கஞ்ச உத்³த⁴ச்சம். தத்த² புரிமம் பரஸம்பத்திவிஸயம், து³தியம் பந்தஸேனாஸனாதி³விஸயந்தி த³ட்ட²ப்³ப³ம். அரதியா விஹனனாகாரேன பச்சுபட்டா²தி, தஸ்ஸா விகா⁴தம் வா வூபஸமம் பச்சுபட்டா²பேதீதி அரதிவிகா⁴தபச்சுபட்டா²னா. ‘‘அனியதே இச்ச²ந்தீ’’தி இமினா சேதஸிகந்தரபா⁴வேன இச்ச²ந்தீதி த³ஸ்ஸேதி.

காயது³ச்சரிததோதி வத்து²வீதிக்கமஸங்கா²தது³ச்சரிததோ. காயது³ச்சரிதாதி³வத்தூ²னந்தி பரபாணபரத⁴னபரஇத்தி²ஆதீ³னம் காயது³ச்சரிதாதீ³னமாலம்ப³ணபூ⁴தானமேவ வத்தூ²னம். அவீதிக்கமலக்க²ணாதி அமத்³த³னலக்க²ணா. காயது³ச்சரிதாதி³வத்து²தோ ஸங்கோசனகிரியாபதே³ஸேன காயது³ச்சரிதாதி³தோயேவ ஸங்கோசனகிரியா வுத்தாதி த³ட்ட²ப்³ப³ம். ந ஹி விரதியோ து³ச்சரிதவத்து²னோ அகிரியபச்சுபட்டா²னா யுஜ்ஜந்தி, அத² கோ² து³ச்சரிதஸ்ஸேவ, விரதீனஞ்ச ஸோரச்சவஸேன ஸங்கோசனம், அகிரியா ச ஹிரோத்தப்பானம் ஜிகு³ச்சா²தி³வஸேனாதி அயமேதேஸம் விஸேஸோ. ஸத்³தா⁴…பே… பத³ட்டா²னாதி ஏத்த² ஸத்³தா⁴த³யோ ஸப்³பே³வ த⁴ம்மா காயஸுசரிதாதீ³னம் பத³ட்டா²னாதி ஏகே. அபரே பன ‘‘கம்மம் கம்மப²லம் ஸத்³த³ஹந்தஸ்ஸ காயது³ச்சரிதாதி³அகரணதோ, ஹிரோத்தப்பஸம்பன்னஸ்ஸ முஸாவாதா³தி³அகத²னதோ, அப்பிச்ச²ஸந்துட்டீ²ஸல்லேக²கு³ணஸமன்னாக³தஸ்ஸ மிச்சா²ஜீவவிவஜ்ஜனதோ ச ஸத்³தா⁴த³யோ திண்ணம் த⁴ம்மானம் யதா²க்கமேன பத³ட்டா²னா’’தி வத³ந்தி. கேசீதி அப⁴யகி³ரிவாஸினோ. இமாஸூதி இமாஸு தீஸு விரதீஸு. ஏகேகம் நியதம் விரதிமிச்ச²ந்தீதி அஞ்ஞம் ஏகம் சதுத்த²னியதவிரதிமிச்ச²ந்தி. அத² வா நித்³தா⁴ரணத்தே² பு⁴ம்மவஸேன இமாஸம் அந்தரே ஏகம் நியதம் விரதிமிச்ச²ந்தீதி அத்தோ². உப⁴யதா²பி பன தேஸம் இச்சா² ந யுஜ்ஜதி அபராய விரதியா த⁴ம்மஸேனாபதினாபி அதே³ஸிதத்தா, விஸயஸ்ஸ ச ஸதா³ ஸன்னிஹிதத்தாபா⁴வேன நியதாய ஏவ ஏகிஸ்ஸா அபா⁴வதோ. தேனேவ ஹி அப⁴யகி³ரிவாஸினோயேவ ச கேசி இமாஸம் திவித⁴த்தம் அனியதத்தமேவ ச இச்ச²ந்தி. வுத்தஞ்ஹி தேஹி –

‘‘கருணாமுதி³தா ஸம்மாவாசாகம்மந்தஆஜிவா;

யேபு⁴ய்யதோ அனியதா, ஹோந்தி கோ³சரபே⁴த³தோ’’தி. –

ஏத்த² பன ‘‘யேபு⁴ய்யதோ’’தி வசனம் லோகுத்தரசித்தேஸு ஸப்³ப³தா³ ஏகதோயேவ ச லப்³ப⁴மானதம் ஸந்தா⁴ய வுத்தம்.

து³தியசித்தேன ஸம்பயோக³ம் க³ச்ச²ந்தீதி ஸம்ப³ந்தோ⁴. யதா² சித்தம், ஏவம் தம்ஸம்பயுத்தத⁴ம்மாபீதி து³தியே ஸஸங்கா²ரா ஏவாதி ஆஹ ‘‘ஸஸங்கா²ரபா⁴வமத்தமேவ ஹேத்த² விஸேஸோ’’தி. ததா²தி யதா² ததியே, ததா² சதுத்தே²பி பீதியா ஸுக²பத³ட்டா²னத்தா. ஸுக²ஸ்ஸ சேத்த² அபா⁴வதோ ஆஹ ‘‘ட²பேத்வா பீதி’’ந்தி. நனு ச ‘‘கருணாமுதி³தா உபேக்கா²ஸஹக³தே ந ஸம்ப⁴வந்தீ’’தி வத³ந்தி, தஸ்மா யதா² பீதியா, ஏவம் தாஸம்பி படிக்கே²போ காதப்³போ³தி? ந காதப்³போ³, அப்பனாபத்திதோ புப்³பே³ கருணாமுதி³தானம் உபேக்கா²ஸஹக³தானம்பி ஸம்ப⁴வதோ. கருணாமுதி³தாபா⁴வனாகாலே ஹி அப்பனாவீதி²தோ புப்³பே³ உபேக்கா²ஸஹக³தசித்தேனாபி பரிகம்மம் ஹோதி, அப்பனாவீதி²யம் பன ஸோமனஸ்ஸஸஹக³தசித்தேனேவ ஏகாவஜ்ஜனவீதி²யா வேத³னாபரிவத்தனாபா⁴வதோ, தஸ்மா புப்³ப³பா⁴க³வஸேனேவ கருணாமுதி³தானம்பி உபேக்கா²ஸஹக³தேஸு ஸம்ப⁴வோ ஹோதீதி ஆசரியா. அபரே பன ஸப்³ப³தா³பி தாஸம் உபேக்கா²ஸஹக³தேஸு ஸம்ப⁴வம் ந இச்ச²ந்தி. ‘‘அவஸேஸா பஞ்சமேன ஸம்பயோக³ம் க³ச்ச²ந்தீ’’தி அவிஸேஸேன வுத்தத்தா இதா³னி விஸேஸத³ஸ்ஸனத்த²மாஹ ‘‘ஸோமனஸ்ஸட்டா²னே சா’’திஆதி³.

81. கருணாமுதி³தாத³யோதி கருணாமுதி³தா சேவ விரதித்தயஞ்ச. தேனாஹ ‘‘பஞ்சா’’தி.

ஏவம் காமாவசரகுஸலசித்தஸம்பயுத்தே த³ஸ்ஸேத்வா இதா³னி ரூபாவசரகுஸலசித்தஸம்பயுத்தத⁴ம்மே த³ஸ்ஸேதும் ‘‘அவஸேஸேஸு பனா’’திஆதி³மாஹ. தத்த² ட²பேத்வா விரதித்தயந்தி விரதித்தயம் வஜ்ஜேத்வா. கஸ்மா பனேத்த² விரதித்தயம் பரிச்சத்தந்தி? வுச்சதே – ஸுவிஸுத்³த⁴காயகம்மாதி³கஸ்ஸ சித்தஸமாதா⁴னவஸேன ரூபாரூபாவசரகுஸலப்பவத்தி, ந காயகம்மாதீ³னம் ஸோத⁴னவஸேன, நாபி து³ச்சரிதது³ராஜீவானம் ஸமுச்சி²ந்த³னவஸேன. ததா² ஹி நீவரணாதி³த⁴ம்மானம் அவத்த²த்தயம் ஹோதி வீதிக்கமாவத்தா² பரியுட்டா²னாவத்தா² அனுஸயாவத்தா²தி. தத்த² வீதிக்கமாவத்தா²ய படிபக்க²ம் காமாவசரகுஸலம் பரியுட்டா²னாவத்தா²ய ரூபாரூபாவசரம், அனுஸயாவத்தா²ய லோகுத்தரகுஸலம். து³ச்சரிதது³ராஜீவானம் பன ட²பேத்வா வீதிக்கமாவத்த²ம், அனுஸயாவத்த²ஞ்ச வீதிக்கமாவத்தா²ய விஸும் பரியுட்டா²னாவத்தா² ந உபலப்³ப⁴தி. யஸ்ஸா விபச்சனீகம் ரூபாரூபாவசரகுஸலம் ஸியா, தஸ்மா தம் நேவ காமாவசரகுஸலம் விய தேஸம் வீதிக்கமாவத்த²ம் ஸோதே⁴தி, ந ச லோகுத்தரம் விய அனுஸயாவத்த²ம் ஸமுச்சி²ந்த³தி, படிபஸ்ஸம்பே⁴தி வா. ஸீலவிஸுத்³தி⁴யம் ஸீலஸோத⁴னவஸேன காமாவசரகுஸலேனேவ விக³தவீதிக்கமஸ்ஸ பரிஸுத்³த⁴காயகம்மாதி³கஸ்ஸ யோகி³னோ சித்தஸமாதா⁴னவஸேன பவத்ததீதி மஹக்³க³தசித்துப்பாதே³ விரதீனம் அஸம்ப⁴வோயேவ. இமமேவ ஹி அத்த²ம் ஸாதே⁴தும் ‘‘விரதியோ பனா’’திஆதி³ ஆரத்³த⁴ம். தேத்திம்ஸ வா கருணாதி³ஜா²னவஸேன பவத்தனகாலே. ததோதி ததோ ததியே வுத்தசேதஸிகதோ. கருணாமுதி³தானம் அப்பனாபத்தானமேகந்தஸோமனஸ்ஸஸஹக³தத்தா ஆஹ ‘‘பஞ்சமேன…பே… கருணாமுதி³தாவஜ்ஜா’’தி.

ரூபாவசரபஞ்சமே வுத்தனயேனாதி திம்ஸேவாதி அதி⁴ப்பாயோ. யதி³ ஏவம் ரூபாவசரதோ கோ விஸேஸோதி ஆஹ ‘‘அரூபாவசரபா⁴வோவேத்த² விஸேஸோ’’தி, பஞ்சமே ரூபஸஞ்ஞாபா⁴வதோ ரூபாவசரபா⁴வோ, இத⁴ பன ரூபஸஞ்ஞாஸமதிக்கமேன பத்தப்³ப³த்தா அரூபாவசரபா⁴வோதி அயமேவஸ்ஸ ததோ விஸேஸோதி அத்தோ².

பட²மஜ்ஜா²னிகேதி பட²மஜ்ஜா²னவதி. மக்³க³சித்தேதி சதுப்³பி³தே⁴பி மக்³க³ஞாணே. து³தியஜ்ஜா²னிகாதி³பே⁴தே³தி து³தியததியசதுத்த²பஞ்சமஜ்ஜா²னிகே. வுத்தனயேனாதி ‘‘து³தியேன விதக்கவஜ்ஜா’’திஆதி³னா வுத்தனயேன. கிம் அவிஸேஸேனாதி சே, நோதி ஆஹ ‘‘கருணாமுதி³தான’’ந்திஆதி³. மக்³க³த⁴ம்மேஸு பாத³கஜ்ஜா²னாதி³வஸேன கதா³சி ஸம்மாஸங்கப்பவிரஹோ ஸியா, ந பன விரதிவிரஹோ, காயது³ச்சரிதாதீ³னம் ஸமுச்சி²ன்னவஸேனேவ அரியமக்³க³ஸ்ஸ பவத்தனதோதி ஆஹ ‘‘நியதவிரதிபா⁴வோ’’தி. லோகுத்தரபா⁴வோதி ச²ப்³பி³ஸுத்³தி⁴பரம்பராய பத்தப்³ப³த்தா லோகதோ உத்தரணபா⁴வோ.

ஏவம் குஸலசேதஸிகானம் ஸம்பயோக³வசனத்த²லக்க²ணாதீ³னி த³ஸ்ஸேத்வா இதா³னி அகுஸலசேதஸிகானி த³ஸ்ஸேதும் ‘‘அகுஸலா பனா’’திஆதி³ ஆரத்³த⁴ம். ச² யேவாபனகாதி கிஞ்சாபி பட²மே அனியதயேவாபனகா ந லப்³ப⁴ந்தி, அகுஸலேஸு பன லப்³ப⁴மானகயேவாபனத⁴ம்மே ஏகத்த² த³ஸ்ஸேதும் தேஸம்பி இதே⁴வ வசனம் த³ட்ட²ப்³ப³ம். ஏவஞ்ச கத்வா உபரி த⁴ம்மானம் உத்³தே³ஸானந்தரம் ‘‘ஏவம் யேவாபனா’’திஆதி³ வுத்தம். விசிகிச்சா²ஸஹக³தே ச²ந்தா³தி⁴மோக்கா²னம், உத்³த⁴ச்சஸஹக³தே ச²ந்த³ஸ்ஸ ச அபா⁴வதோ வுத்தம் ‘‘படிபாடியா த³ஸஸு சித்தேஸூ’’தி.

82. நித்³தி³ட்டா²தி நிஸ்ஸேஸேன த³ஸ்ஸிதா. ஹதா விஹதா வித்³த⁴ஸ்தா பாபா அபாயாதி³து³க்க²பாபனதோ ‘‘பாபா’’தி ஸங்கா²தா அகுஸலத⁴ம்மா யேன ஸோ ப⁴க³வா ஹதபாபோ, தேன. லாபோ⁴ அலாபோ⁴, யஸோ அயஸோ, நிந்தா³ பஸம்ஸா, ஸுக²ம் து³க்க²ந்தி இமேஸு அட்ட²ஸு லோகத⁴ம்மேஸு அகம்பனட்டே²ன தாதி³னா ஸம்மாஸம்பு³த்³தே⁴ன. ஸோ ஹி லாபா⁴தீ³ஸு யாதி³ஸோ, அலாபா⁴தீ³ஸுபி தாதி³ஸோயேவாதி ‘‘தாதீ³’’தி வுச்சதி.

ந ஹிரீயதீதி ந லஜ்ஜதி. அஹிரிகோதி புக்³க³லோ த⁴ம்மஸமூஹோ வா. ‘‘அஹிரிக்க’’ந்தி வத்தப்³பே³ ஏகஸ்ஸ க-காரஸ்ஸ லோபம் கத்வா ‘‘அஹிரிக’’ந்தி வுத்தம். ந ஓத்தப்பந்தி ஓத்தப்பஸ்ஸ படிபக்க²பூ⁴தம் த⁴ம்மமாஹ. அஜிகு³ச்ச²னம் அஹீளனம். அலஜ்ஜனம் அவிலா. அஜிகு³ச்ச²னலக்க²ணந்தி ஸபா⁴வவஸேன வுத்தம், அலஜ்ஜனலக்க²ணந்தி குஸலாப்³யாகதஸ்ஸ ஸாதா⁴ரணாய ஹிரியா படிபக்க²வஸேன. தேஹேவாதி காயது³ச்சரிதாதீ³ஹி ஏவ. அஸாரஜ்ஜனம் நிப்³ப⁴யதா. அனுத்தாஸோ அஸம்ப⁴மோ. ரஸாதீ³னி ஹிரிஓத்தப்பேஸு வுத்தபடிபக்க²வஸேன க³ஹேதப்³பா³னீதி ந தானி இத⁴ வுத்தானி. தேஸு ஹி அலஜ்ஜனாகாரேன பாபானம் கரணரஸம் அஹிரிகம். அனுத்தாஸாகாரேன அனோத்தப்பம். வுத்தப்பகாரேனேவ பாபதோ அஸங்கோசனபச்சுபட்டா²னானி. அத்தனி, பரேஸு ச அகா³ரவபத³ட்டா²னானி. கா³மஸூகரஸ்ஸ விய அஸுசிதோ கிலேஸாஸுசிதோ அஜிகு³ச்ச²னம் அஹிரிகேன ஹோதி. ஸலப⁴ஸ்ஸ விய அக்³கி³தோ பாபதோ அனுத்தாஸோ அனோத்தப்பேன ஹோதி. யதா²ஹு போராணா –

‘‘ஜிகு³ச்ச²தி நாஹிரிகோ, பாபா கூ³தா²வ ஸூகரோ;

ந பா⁴யதி அனோத்தப்போ, ஸலபோ⁴ விய பாவகா’’தி.

ஏத்த² ச யதா² ஹிரியா ப³லவபா⁴வே ஓத்தப்பம் அப்³போ³ஹாரிகம் ஹோதி, ஓத்தப்பஸ்ஸ ப³லவபா⁴வே ஹிரீ அப்³போ³ஹாரிகா, ஏவம் அஹிரிகஸ்ஸ ப³லவபா⁴வே அனோத்தப்பம் அப்³போ³ஹாரிகம், அனோத்தப்பஸ்ஸ ப³லவபா⁴வே அஹிரிகம் அப்³போ³ஹாரிகம் ஹோதீதி கேசி, தம் ந யுஜ்ஜதி. யதா² ஹி அஸுசினா அத்தானம் மக்கே²ந்தோ, ஸப்பமுகே² ஹத்த²ம் பவேஸேந்தோ பா³லதா³ரகோ தத்த² படிக்கூலபா⁴வஸ்ஸ, ஆதீ³னவஸ்ஸ ச அனுபபரிக்க²னதோ நேவ ஜிகு³ச்ச²தி, ந ச உத்தஸதி, ஏவமேவம் த⁴ம்மஸபா⁴வஸ்ஸ அஞ்ஞாணதோ மோஹோ பாபதோ நேவ ஜிகு³ச்ச²தி, ந உத்தஸதி, தஸ்மா தம்ஸம்பயுத்தசித்துப்பாதே³ உப⁴யம்பி ப³லவதரம் ஹோதீதி.

லுப்³ப⁴ந்தீதி அபி⁴கி³ஜ்ஜ²ந்தி, அல்லீயந்தீதி வுத்தம் ஹோதி. ஆரம்மணக்³க³ஹணலக்க²ணோதி ஏத்த² ஆரம்மணக்³க³ஹணம் நாம ‘‘மம இத³’’ந்தி தண்ஹாபி⁴னிவேஸவஸேன அபி⁴னிவிட்ட²ஸ்ஸ ஆரம்மணஸ்ஸ அவிஸ்ஸஜ்ஜனம், ந ஆரம்மணகரணமத்தம். அபி⁴ஸங்கோ³ அதிஸயவதாய ஆஸத்தியா து³ம்மோசனீயபா⁴வோ. அபரிச்சாகோ³ அவிஜஹனம். தேலஞ்ஜனராகோ³ வியாதி தோ⁴வித்வாபி பரிச்சஜிதும் அஸக்குணேய்யோ தேலமக்கி²தஅஞ்ஜனராகோ³ விய. ‘‘அஸ்ஸாதா³னுபஸ்ஸினோ தண்ஹா பவட்³ட⁴தீ’’தி வசனதோ வுத்தம் ‘‘அஸ்ஸாத³த³ஸ்ஸனபத³ட்டா²னோ’’தி. தத்த² அஸ்ஸாத³வஸேன த³ஸ்ஸனம் அஸ்ஸாத³த³ஸ்ஸனம். நனு ச அஸ்ஸாத³த³ஸ்ஸனம்பி அத்த²தோ லோபோ⁴யேவாதி கத²ம் ஸயம் அத்தனோ பத³ட்டா²னம் ஹோதீதி? ஸச்சம், பட²மம் நாதிப³லவலோப⁴வஸேன அஸ்ஸாத³த³ஸ்ஸனோ பச்சா² ப³லவலோபோ⁴ ஹோதீதி தஸ்ஸ தம்பத³ட்டா²னதா வுத்தா. தேனேவ ச ‘‘தண்ஹா பவட்³ட⁴தீ’’தி வுத்தம். அபரே பன ‘‘அஸ்ஸாதோ³ நாம ஸுக²வேத³னா, அஸ்ஸாத³த³ஸ்ஸனந்தி அஸ்ஸாத³தி³ட்டீ²’’தி வத³ந்தி. ஸுக²வேத³னாய வா காரணபூ⁴தம் ஸுப⁴னிமித்தம் அஸ்ஸாதோ³ நாம, அஸுபே⁴ ‘‘ஸுப⁴’’ந்தி பவத்தா தயோ விபல்லாஸா அஸ்ஸாத³த³ஸ்ஸனம் நாமாதி கேசி.

முய்ஹந்தீதி ந பு³ஜ்ஜ²ந்தி. த⁴ம்மஸபா⁴வஸ்ஸ யாதா²வதோ அத³ஸ்ஸனம் சித்தஸ்ஸ அந்த⁴பா⁴வோ. அஞ்ஞாணம் ஞாணபடிபக்கோ² த⁴ம்மோ. தத்த² புரிமலக்க²ணம் ஸபா⁴வவஸேன வுத்தம், இதரம் படிபக்க²வஸேன. அத² வா அஞ்ஞாணலக்க²ணோதி கிச்சவஸேன வுத்தம். ஸோ ஹி அஸம்படிவேத⁴ரஸோதி வுத்தோ. த⁴ம்மஸபா⁴வம் படிவிஜ்ஜி²தும் அஸமத்த²தா அஸம்படிவேதோ⁴. ஆரம்மணஸபா⁴வச்சா²த³னரஸோதி யதா² அஞ்ஞாணம், மோஹஸமங்கி³புக்³க³லோ வா ஆரம்மணஸபா⁴வம் படிவிஜ்ஜி²தும் ந லப⁴தி, மோஹஸ்ஸ ததா² பவத்தி ஆரம்மணஸபா⁴வச்சா²த³னம். ஏத்த² ச ஞாணம் ஆரம்மணம் யதா²ஸபா⁴வதோ ஜானாதி, தி³ட்டி² யதா²ஸபா⁴வம் விஜஹித்வா அயாதா²வதோ க³ண்ஹாதி, மோஹோ பன ந கத²ஞ்சி விஜானாதி. யதி³ ஏவம் ஆரம்மணக்³க³ஹணகாலோ கத²ம் ததா³ ஸோ ஆரம்மணம் ஜானாதேவாதி? ததா³பி ந ஜானாதி. யதா² பன ப²ஸ்ஸாத³யோ பு²ஸனாகாராதி³மத்தவஸேனேவ ஆரம்மணம் க³ண்ஹந்தி, ந ஜானனவஸேன, ஏவமயம் ஆரம்மணம் க³ஹேத்வா உப்பஜ்ஜமானோ படிச்சா²த³னாகாரேனேவ க³ண்ஹாதி, ந பன ஜானனாகாரேனாதி. யஸ்ஸ உப்பஜ்ஜதி, தஸ்ஸ அந்த⁴கரணம் அந்த⁴காரோ, ததா² பச்சுபட்டா²தி, தம் வா பச்சுபட்டா²பேதீதி அந்த⁴காரபச்சுபட்டா²னோ.

மிச்சா² பஸ்ஸந்தீதி த⁴ம்மஸபா⁴வஸ்ஸ விபரீதவஸேன அனிச்சாதி³ம் நிச்சாதி³வஸேன பஸ்ஸந்தி. அயோனிஸோ அபி⁴னிவேஸோ உப்பதா²பி⁴னிவேஸோ. த⁴ம்மஸபா⁴வம் அதிக்கமித்வா பரதோ நிச்சாதி³தோ வா பரப்பச்சயதோ வா ஆமஸனம் பராமாஸோ, விபரீதக்³கா³ஹவஸேன ‘‘இத³மேவ ஸச்சம், மோக⁴மஞ்ஞ’’ந்தி அபி⁴னிவேஸனம் மிச்சா²பி⁴னிவேஸோ. அரியானம் அத³ஸ்ஸனகாமதாதீ³தி ஆதி³-ஸத்³தே³ன ஸத்³த⁴ம்மஅஸோதுகாமதாதி³ம் ஸங்க³ண்ஹாதி.

யஸ்ஸ த⁴ம்மஸ்ஸ வஸேன உத்³த⁴தம் ஹோதி சித்தம், தம்ஸம்பயுத்தத⁴ம்மா வா, ஸோ த⁴ம்மோ உத்³த⁴ச்சம். தேனாஹ ‘‘உத்³த⁴தபா⁴வோ’’தி. அவூபஸமோதி அஸன்னிஸின்னபா⁴வோ. வாதா…பே… படாகாவியாதி யதா² படாகா யோத்தப³லேன த⁴ஜயட்டி²ம் அமுஞ்சந்தீபி வாதாபி⁴கா⁴தேன ஏத்த² அவட்டா²தும் ந ஸக்கோதி, ஏவமித³ம்பி அதி⁴மோக்க²ப³லேன ஆரம்மணம் அமுஞ்சந்தம்பி அயோனிஸோமனஸிகாரப³லேன ஆரம்மணே அசலம் அவட்டா²தும் ந ஸக்கோதீதி வாதப்பஹாரேனேவ சலத⁴ஜபடாகா விய அனவட்டா²னகிச்சம். ப⁴ந்தத்தம் பரிப்³ப⁴மனாகாரோ. உத்³த⁴ச்சஸ்ஸ ஸப்³பா³குஸலஸாதா⁴ரணத்தா, அஞ்ஞேஸஞ்ச அகுஸலஸாதா⁴ரணானம் விஸும் பத³ட்டா²னஸ்ஸ லப்³ப⁴மானத்தா வுத்தம் ‘‘அயோனிஸோ…பே… பத³ட்டா²ன’’ந்தி. யேனாகாரேன வா மனஸிகரோதோ உத்³த⁴ச்சம் உப்பஜ்ஜதி, தேனாகாரேன மனஸிகரணம் இத⁴ அயோனிஸோமனஸிகாரோ. அத² வா உத்³த⁴ச்சனிமித்தஸ்ஸ ஆரம்மணஸ்ஸ மனஸிகரணம் இத⁴ அயோனிஸோமனஸிகாரோ.

மஞ்ஞதீதி அபி⁴மஞ்ஞதி, அஹம்காரம் கரோதீதி அத்தோ². ஸேய்யாதி³வஸேன உச்சதோ நமனம் உண்ணதி. ஸம்பக்³க³ஹரஸோதி உண்ணதிவஸேனேவ அத்தனோ, ஸம்பயுத்தத⁴ம்மானம் வா ஸம்பக்³க³ண்ஹனகிச்சோ, ந வீரியம் விய தம்தம்கிச்சஸாத⁴னேன. அபி⁴பு⁴ஸ்ஸஹனவஸேன ஹீனஸ்ஸ அத்தானம் நீசம் கத்வா க³ஹணம்பி பக்³க³ண்ஹனவஸேனேவாதி வேதி³தப்³ப³ம். கேது…பே… பச்சுபட்டா²னோதி ஏத்த² கேது வுச்சதி அச்சுக்³க³தத⁴ஜோ, இத⁴ பன கேது வியாதி கேது, உளாரதமாதி³பா⁴வோ, தம் கேதுபா⁴வஸங்கா²தம் கேதும் கம்யதீதி கேதுகம்யம், யஸ்ஸ த⁴ம்மஸ்ஸ வஸேன தம் கேதுகம்யம், ஸோ கேதுகம்யதா. ‘‘அஹ’’ந்தி பவத்தனதோ மானஸ்ஸ தி³ட்டி²ஸதி³ஸீ பவத்ததீதி தி³ட்டி²மானா ஏகசித்துப்பாதே³ ந பவத்தந்தி, த்³வே கேஸரஸீஹா விய ஏககு³ஹாயம், தஸ்மா மானோ தி³ட்டி²விப்பயுத்தசித்தே ஸப்³ப³தா³ அனுப்பஜ்ஜமானோபி தி³ட்டி²ஸம்பயுத்தசித்தே நியமேன அனுப்பஜ்ஜனதோ தி³ட்டி²விப்பயுத்தலோப⁴பத³ட்டா²னோ. மானோ த⁴ம்மஸமூஹக்³க³ஹணே ப³லவம் ஹுத்வா அத்துக்கம்ஸனபா⁴வேன பவத்ததி, தி³ட்டி² ஏகேகத⁴ம்மம்பி நிச்சாதி³ஆகாரேன க³ண்ஹந்தீ பவத்ததி. அத்தஸினேஹஸன்னிஸ்ஸயோ வா மானோ, அத்தகிலமதா²னுயோக³ஸன்னிஸ்ஸயா தி³ட்டீ²தி அயமேதேஸம் விஸேஸோ.

இஸ்ஸதீதி உஸூயதி. தத்தே²வாதி பரஸம்பத்தீஸுயேவ. இஸ்ஸாவஸேன பரஸம்பத்தீஸு அதுஸ்ஸனதோ வுத்தம் ‘‘அனபி⁴ரதிரஸா’’தி. தேனேவேதம் வுச்சதி –

‘‘இஸ்ஸானலஸிகா² யேஸம், ஹத³யே ஜலதீத⁴ தே;

நேவ விந்த³ந்தி பாமோஜ்ஜம், ஸம்பு³த்³தா⁴தீ³ஹி ஸேவித’’ந்தி.

மச்ச²ரயோகே³ன மச்ச²ரினி பவத்தம் மச்ச²ர-ஸத்³த³ம் க³ஹேத்வா ஆஹ ‘‘மச்ச²ரபா⁴வோ மச்ச²ரிய’’ந்தி. நிருத்தினயேன பன ‘‘மா இத³ம் அச்ச²ரியம் அஞ்ஞேஸம் ஹோது, மய்ஹம்வ ஹோதூ’’தி மச்ச²ரியந்தி போராணா. நிகு³ஹணம் அத்தனோ ஸம்பத்தியா பரேஸம் அத³ஸ்ஸனம். ஸங்கோசனம் அத்தஸம்பத்தீனம் பரேஹி ஸாதா⁴ரணபா⁴வகரணஸ்ஸ அருச்சனாகாரேன படிகுடனம். ‘‘மா இத³ம் பரஸ்ஸ ஹோதூ’’தி பரேஸு படிஹனனவஸேன அத்தஸந்தகஸ்ஸ ஆரம்மணகரணதோ மச்சே²ரம் படிக⁴சித்தேஸ்வேவ லப்³ப⁴தீதி வத³ந்தி, தம் ந யுத்தம் ஏகஸ்ஸேவ த⁴ம்மஸ்ஸ அஞ்ஞத்த² படிஹஞ்ஞித்வா அஞ்ஞாரம்மணபா⁴வப்பஸங்க³தோ. பரேஹி ஸாதா⁴ரணபா⁴வே படிஹனனவஸேன பன தம் ஆரப்³ப⁴ பவத்தனதோ மச்சே²ரம் படிக⁴சித்தேஸு உப்பஜ்ஜதீதி யுத்தம். அத்தஸம்பத்தீதி ஆவாஸாதி³ஸம்பத்தி.

குச்சி²தம் கதந்தி ஏத்த² கதம்பி அகதம்பி க³ரஹிதப்³ப³த்தா குச்சி²தம் கதம் நாம ஹோதி. ஏவஞ்ஹி வத்தாரோ ஹோந்தி ‘‘யம் மயா ந கதம், தம் குகத’’ந்தி. ததா² ஹி வக்க²தி ‘‘கதாகதானுஸோசனரஸ’’ந்தி. ஏவம் கதாகதம் து³ச்சரிதம் ஸுசரிதம்பி குச்சி²தம் கதம் நாம. ஸுசரிதம்பி ஹி க³ரஹந்தஸ்ஸ குச்சி²தம் கதந்தி ஹோதி. யதா² பன பத²வீகஸிணாரம்மணம் ஜா²னம் பத²வீகஸிணம், ஏவம் குகதம் ஆரப்³ப⁴ விப்படிஸாரவஸேன பவத்தம் சித்தம் தம்ஸஹசரிததாய இத⁴ குகதந்தி க³ஹேதப்³ப³ம். அத² வா கதாகதம் ஆரப்³ப⁴ உப்பஜ்ஜனகவிப்படிஸாரசித்தம்யேவ க³ரஹிதப்³ப³தோ ‘‘குச்சி²தம் கதம் குகத’’ந்தி வுச்சதி. யஸ்ஸ த⁴ம்மஸ்ஸ வஸேன தம் சித்தம் குகதம் நாம ஹோதி, ஸோ த⁴ம்மோ குக்குச்சம். தேனாஹ ‘‘குகதம், தஸ்ஸ பா⁴வோ’’தி. பச்சா² அனுதப்பனம் விஹேட²னம் பச்சா²னுதாபோ. கதாகதானுஸோசனம் கதாகதஸ்ஸ ஸுசரிதது³ச்சரிதஸ்ஸ அனுஸோசனம், ‘‘அகதம் வத மே கல்யாண’’ந்திஆதி³னா அனுதப்பனம், ‘‘அகதம் மயா புப்³பே³ கல்யாணகம்மம், இதோ தா³னி பட்டா²ய கரோமீ’’தி பவத்தம் பன குஸலபக்கி²கம் வீரியமேவ, ந கதாகதானுஸோசனம், கதாகதாகாரவிஸிட்ட²ஸ்ஸ ஸுசரிதது³ச்சரிதஸ்ஸ அனுஸோசனவஸேன விரூபம் படிஸரணம் விப்படிஸாரோ. கதாகதானுஸோசனஞ்ஹி அவட்³டி⁴ஸம்பாத³னதோ விரூபம் படிஸரணம், தம் பராயத்ததாஹேதுதாய தா³ஸப்³யம் விய த³ட்ட²ப்³ப³ம். யதா² ஹி தா³ஸப்³யே ஸதி தா³ஸோ பராயத்தோ ஹோதி, ஏவம் குக்குச்சே ஸதி தம்ஸமங்கீ³புக்³க³லோ. ந ஹி ஸோ அத்தனோ த⁴ம்மதாய குஸலே பவத்திதும் ஸக்கோதி. அத² வா கதாகதகுஸலாகுஸலானுஸோசனவஸேன ஆயத்ததாய தது³ப⁴யவஸேன குக்குச்சேன தம்ஸமங்கீ³ ஹோதீதி தம் தா³ஸப்³யம் விய ஹோதி.

அனுஸ்ஸாஹனாவஸீத³னவஸேன ஸம்ஹதபா⁴வோ தி²னம், தேன யோக³தோ சித்தம் தி²னம், தஸ்ஸ பா⁴வோ தி²னதா. தேனாஹ ‘‘அனுஸ்ஸாஹஸம்ஹனனதா’’தி. அஸமத்த²தாவிகா⁴தவஸேன அகம்மஞ்ஞதா மித்³த⁴ம். தேனாஹ ‘‘அஸத்திவிகா⁴தோ’’தி. யஸ்மா மித்³த⁴வஸேனேவ தேன ஸம்பயுத்தத⁴ம்மா மேதி⁴தா விஹதஸாமத்தி²யா ஹோந்தி, தஸ்மா ‘‘மித்³த⁴தா மித்³த⁴’’ந்தி வுத்தம். ந விஜ்ஜதி உஸ்ஸாஹோ அஸ்ஸாதி அனுஸ்ஸாஹம், தப்³பா⁴வோபி அனுஸ்ஸாஹம். அனுஸ்ஸாஹஸங்கா²தோ ஸம்ஹனனபா⁴வோ அனுஸ்ஸாஹஸம்ஸீத³னதா, குஸீதபா⁴வோதி வுத்தம் ஹோதி. அஸத்திவிகா⁴தோதி யஸ்மா தம் மித்³த⁴ம் உப்பஜ்ஜமானமேவ ஸத்திவினாஸவஸேன உப்பஜ்ஜதி, தஸ்மா நத்தி² ஏதஸ்ஸ ஸத்தீதி தம் ஸம்பயுத்தசித்தம் அஸத்தி, தஸ்ஸ பா⁴வோபி, அஸத்தியேவ விகா⁴தோதி அஸத்திவிகா⁴தோ.

அனுஸ்ஸாஹனலக்க²ணந்தி உஸ்ஸாஹபடிபக்க²லக்க²ணம். வீரியஸ்ஸ வினோத³னம் கே²பனம் வீரியவினோத³னம். ஸம்பயுத்தத⁴ம்மானம் ஸம்ஸீத³னாகாரேன பச்சுபட்டா²தி, தேஸம் வா ஸம்ஸீத³னம் பச்சுபட்டா²பேதீதி ஸம்ஸீத³னபச்சுபட்டா²னம். அகம்மஞ்ஞதாலக்க²ணந்தி ஏத்த² காமம் தி²னம்பி அகம்மஞ்ஞதாஸபா⁴வமேவ, தம் பன சித்தஸ்ஸ அகம்மஞ்ஞம், மித்³த⁴ம் வேத³னாதி³க்க²ந்த⁴த்தயஸ்ஸாதி அயமேத்த² விஸேஸோ. ததா² ஹி பாளியம் ‘‘தத்த² கதமம் தி²னம்? யா சித்தஸ்ஸ அகல்லதா அகம்மஞ்ஞதா. கதமம் மித்³த⁴ம்? யா காயஸ்ஸ அகல்லதா அகம்மஞ்ஞதா’’தி (த⁴. ஸ. 1162) ச ஆதி³னா இமேஸம் நித்³தே³ஸோ பவத்தோ. ஓணஹனம் விஞ்ஞாணத்³வாரானம் பித³ஹனம், ஸம்பயுத்தானம் ப³ந்த⁴னம் வா. லீனதா லீனாகாரோ, ஆரம்மணக்³க³ஹணே ஸங்கோசோ. யஸ்மா தி²னேன சித்தஸ்ஸேவ ஸம்ஹனனம் ஹோதி, மித்³தே⁴ன பன வேத³னாதி³க்க²ந்த⁴த்தயஸ்ஸ விய ரூபகாயஸ்ஸபி, தஸ்மா தம் பசலாயிகானித்³த³ம் பச்சுபட்டா²பேதீதி பசலாயிகானித்³தா³பச்சுபட்டா²னந்திபி வட்டதி. போத்த²ரூபபடிச்சா²த³கபடோ விய ஆரம்மணஸபா⁴வாவச்சா²த³கோ மோஹோ. முகே² ப³ந்த⁴படோ விய ஸம்பயுத்தத⁴ம்மே பத்த²ரிதும் அதே³ந்தம் மித்³த⁴ந்தி அயமேதேஸம் விஸேஸோ.

ஸேஸாதி இத⁴ லக்க²ணாதி³வஸேன வுத்தாவஸேஸா ப²ஸ்ஸாத³யோ. குஸலேஸு வுத்தனயேனாதி லக்க²ணாதி³தோ வுத்தனயேன. ந கோசி ஏத்த² விஸேஸோ அத்தீ²தி சே, நோ நத்தீ²தி ஆஹ ‘‘ஏத்த² பனா’’திஆதி³, விதக்காதீ³னம் திண்ணம் யதா²க்கமம் மிச்சா²ஸங்கப்பாதி³னாமமத்தமேவ விஸேஸோதி அத்தோ². ஏகூனவீஸதீதி ட²பேத்வா மானாத³யோ ச² அனியதயேவாபனகே ஸேஸா ஸரூபேனாக³தா பன்னரஸ ச²ந்தா³த³யோ ச சத்தாரோ நியதயேவாபனகாதி இமே ஏகேன ஊனா வீஸதி சேதஸிகா. அனியதயேவாபனகானம் பன இத⁴ அலப⁴ந்தானம்பி ஏத்த² வசனே காரணம் வுத்தமேவ.

தி²னமித்³த⁴ஸ்ஸ அனியதபா⁴வோதி தி²னமித்³த⁴ஸ்ஸ அனியதஸ்ஸ இத⁴ உப்பஜ்ஜனகபா⁴வமாஹ, ந பன பட²மே நியதபா⁴வம் தத்த² ஸப்³ப³ஸோவ அனுப்பஜ்ஜனதோ. ந ஹி ஸபா⁴வதிகி²ணம் சித்தம் தி²னமித்³த⁴யோகீ³ ஹோதீதி. ததியே மானஸ்ஸ அனியதஸ்ஸ ஸம்ப⁴வேபி நியதத⁴ம்மே ஸந்தா⁴ய ‘‘அட்டா²ரஸா’’தி வுத்தம். தேனாஹ ‘‘மானோ பனேத்த² அனியதோ’’தி. தி³ட்டி²யா ஸஹ ந உப்பஜ்ஜதீதி ஏத்த² காரணம் வுத்தமேவ. சதுத்தே² அவஸேஸாதி அட்டா²ரஸேவ, பஞ்சமே ட²பேத்வா பீதிம் தி³ட்டி²யா ஸஹ அட்டா²ரஸேவ, ததா² ச²ட்டே²பி. ஸத்தமே பீதியா, தி³ட்டி²யா ச அபா⁴வதோ ஸத்தரஸ, ததா² அட்ட²மேபி.

ஏதேபி தயோதி ந கேவலம் கருணாமுதி³தா ஏவ, ஏதேபி தயோ ஏகதோ ந உப்பஜ்ஜந்தி அஞ்ஞமஞ்ஞம் விஸயபே⁴த³தோயேவ. ததா² ஹி இஸ்ஸா பரஸம்பத்திவிஸயா, மச்ச²ரியம் அத்தஸம்பத்தியா பரேஹி ஸாதா⁴ரணாபா⁴வவிஸயம், குக்குச்சம் கதாகதவிஸயந்தி, தஸ்மா யம் அப⁴யகி³ரிவாஸினோ வத³ந்தி ‘‘இஸ்ஸாமச்சே²ரம் யதி³ச்சா²வஸேன ஏகதோபி உப்பஜ்ஜதீ’’தி, ந தம் க³ஹேதப்³ப³ம்.

ஸபா⁴வதோ, பரிகப்பனதோ வா அனிட்ட²ஸ்ஸ ஆரம்மணஸ்ஸ அனிட்டா²காரம் வா ஆரம்மணஸ்ஸ அனுப⁴வனம் ஸம்பு⁴ஞ்ஜனம் அனிட்டா²ரம்மணானுப⁴வனம், தம் லக்க²ணமஸ்ஸாதி அனிட்டா²ரம்மணானுப⁴வனலக்க²ணம். தேனாஹ ‘‘அனிட்டா²காரஸம்போ⁴க³ரஸ’’ந்தி, யதா²பூ⁴தேன வா அயதா²பூ⁴தேன வா அனிட்டா²காரேன ஆரம்மணஸ்ஸ ஸம்பு⁴ஞ்ஜனரஸம், பச்சானுப⁴வனகிச்சந்தி அத்தோ². தித்தி²யாதீ³னஞ்ஹி ஸபா⁴வதோ இட்டே² பு³த்³தா⁴தி³ஆரம்மணேபி அனிட்டா²காரதோ க³ஹணவஸேன தோ³மனஸ்ஸம் உப்பஜ்ஜதி. தோ³மனஸ்ஸஸ்ஸ ஏகந்தேன காமதா⁴துயம்யேவ பவத்தனதோ ஆஹ ‘‘ஹத³யவத்து²பத³ட்டா²ன’’ந்தி. தஸ்ஸ ஹி அனீவரணாவத்தா²ய அபா⁴வதோ ரூபாரூபதா⁴துயம் அஸம்ப⁴வோ.

அத்தனோ பவத்திஆகாரவஸேன அனிட்ட²ரூபஸமுட்டா²பனவஸேன வா விரூபம் ஸப்பனம் விஸப்பனம், அனிட்ட²ரூபஸமுட்டா²பனவஸேனேவ வா விஸப்பனம் ஸரீரகம்பனம், தம் ரஸோ கிச்சம், ஸம்பத்தி வா அஸ்ஸாதி விஸப்பனரஸோ, நிஸ்ஸயஸ்ஸ ஹத³யவத்து²னோ, ஸகலஸ்ஸேவ வா காயஸ்ஸ விஜ்ஜ²த்தபா⁴வாபாத³னதோ ஆஹ ‘‘அத்தனோ நிஸ்ஸயத³ஹனரஸோ வா’’தி, விஜ்ஜ²த்தபா⁴வாபாத³னதோதி ச மிலாதபா⁴வாபாத³னதோதி அத்தோ². யதா² கத²ம் வியாதி ஆஹ ‘‘தா³வக்³கி³ வியா’’தி. ஸோ ஹி வனக⁴டேயேவ உப்பன்னோ தமேவ த³ஹதி. து³ஸ்ஸனபச்சுபட்டா²னோதி அத்தனோ, பரஸ்ஸ ச தூ³ஸனாகாரேன பச்சுபட்டா²னோ. ஸோ ஹி யஸ்ஸ ஸந்தானே உப்பன்னோ, தம் ஏகந்தேன அந்தமஸோ விரூபபா⁴வாபாத³னேனபி தூ³ஸேதி, பரம் பன தூ³ஸேது வா, மா வா ஹத்தே²ன க³ஹிதஅஸுசி விய. ‘‘அனத்த²ம் மே அசரீ’’திஆதீ³னி நவ ஆகா⁴தவத்தூ²னி பத³ட்டா²னமஸ்ஸாதி ஆகா⁴தவத்து²பத³ட்டா²னோ. ஸோ உபயோக³ப²லகாலேஸு அனிட்ட²த்தா விஸஸம்ஸட்ட²பூதிமுத்தம் விய த³ட்ட²ப்³போ³. அட்டா²ரஸ வாதி இஸ்ஸாதீ³ஸு அனியதேஸு ஏகேன ஸத்³தி⁴ம் அட்டா²ரஸ வா.

பவத்திட்டி²திமத்தாதி சேதஸோ பவத்திஸங்கா²தா டி²திமத்தா, மக்³க³ங்கா³தி³பா⁴வம் ந க³ச்ச²தி அதி⁴மோக்க²விரஹதோதி அத்தோ². அத² வா பவத்திட்டி²திமத்தாதி க²ணட்டி²திமத்தா. ‘‘நிவாதே தீ³பச்சீனம் டி²தி வியா’’தி ஹி வுத்தம். சித்தட்டி²தி விய ஸந்தானட்டி²தியா பச்சயோ ப⁴விதும் அஸமத்த²த்தா நிச்ச²யாபா⁴வேன அஸண்ட²ஹனதோ சேதஸோ பவத்திபச்சயமத்ததாய பவத்திட்டி²திமத்தா க²ணட்டி²திமத்தா பவத்திபச்சயமத்தா டி²தி பவத்திட்டி²தீதி கத்வா. விக³தா சிகிச்சா²தி நிஸ்ஸக்கே பச்சத்தவசனம் ‘‘பிஸுணா வாசா படிவிரதோ’’திஆதீ³ஸு விய, விக³தா திகிச்சா²யாதி அத்தோ². அயமேவ வா பாடோ². ‘‘விக³தா சிகிச்சா²’’தி சிகிச்சி²தும் து³க்கரதாய சேதம் வுத்தம், ந ஸப்³ப³தா² சிகிச்சா²ய அபா⁴வதோ. ‘‘ஏவம் நு கோ², ந நு கோ²’’திஆதி³னா ஸம்ஸப்பனவஸேன ஸேதி, ஸமந்ததோ வா ஸேதீதி ஸம்ஸயோ. கம்பனரஸாதி சித்தஸ்ஸ கம்பனகிச்சா. உத்³த⁴ச்சஞ்ஹி அத்தனா க³ஹிதாகாரேயேவ ட²த்வா ப⁴மதீதி ஏகாரம்மணஸ்மிம் ஏவ விப்ப²ந்த³னவஸேன பவத்ததி, விசிகிச்சா² பன யதி³பி ஏகஸ்மிம் ஆரம்மணே உப்பஜ்ஜதி, ததா²பி ‘‘ஏவம் நு கோ², ந நு கோ²’’தி அஞ்ஞம் க³ஹேதப்³பா³காரம் அபேக்க²தீதி நானாரம்மணே கம்பனம் ஹோதி. அனிச்ச²யாகாரேன த்³வேள்ஹகாகாரேன பச்சுபட்டா²தி, அனிச்ச²யம் வா பச்சுபட்டா²பேதீதி அனிச்ச²யபச்சுபட்டா²னா.

அதி⁴மோக்க²விசிகிச்சா²னம் அஞ்ஞமஞ்ஞம் விபரீதகிச்சதாய ஆஹ ‘‘விசிகிச்சா²ய அபா⁴வேனா’’தி. ஸமாதீ⁴தி சித்தேகக்³க³தா. ஸா ஹி ஆரம்மணே சித்தஸ்ஸ ஸம்மா ஆதா⁴னதோ ‘‘ஸமாதீ⁴’’தி வுச்சதி. ப³லவா ஹோதீதி ப³லவமித்தேன தி³ன்னபிட்டி²ப³லோ புரிஸோ விய ப³லவா ஹோதி, ப³லாதி³பா⁴வம் க³ச்ச²தீதி அதி⁴ப்பாயோ.

ஸத்தாரம்மணத்தாதி ஸத்தபஞ்ஞத்தாரம்மணத்தா. நனு பஞ்ஞத்தாரம்மணாபி விபாகா ஹோந்தீதி சோத³னம் ஸந்தா⁴யாஹ ‘‘காமாவசரவிபாகானம் ஏகந்தபரித்தாரம்மணத்தா’’தி. குதோ பன விரதீனம் குஸலத்தமேவாதி சாரிதந்தி ஆஹ ‘‘பஞ்ச ஸிக்கா²பதா³ குஸலாதி (விப⁴. 715) ஹி வுத்த’’ந்தி. யதி³ ஏவம் லோகுத்தரவிபாகேஸு விரதியோ ந லப்³ப⁴ந்தீதி? நோ ந லப்³ப⁴ந்தி ஸிக்கா²பத³விப⁴ங்கே³ லோகியவிரதியோயேவ ஸந்தா⁴ய வுத்தத்தா. தேன லோகியவிபாகேஸுயேவ விரதியோ ந ஸம்ப⁴வந்தீதி க³ஹேதப்³ப³ம்.

காயபஸாத³ஸன்னிஸ்ஸிதத்தா காயே ப⁴வோ ஸாதபா⁴வோ லக்க²ணமஸ்ஸாதி காயிகஸாதலக்க²ணா. சேதஸிகஸுகே² வுத்தனயேன பச்சுபட்டா²னாத³யோ நேதப்³பா³தி ஆஹ ‘‘ஸேஸா வுத்தனயா ஏவா’’தி.

84-6. நனு ச இட்டே² ஆரம்மணே ஸுக²வேத³னா உப்பஜ்ஜதி, அனிட்டே² து³க்க²வேத³னா, இட்டா²னிட்ட²மஜ்ஜ²த்தே உபேக்கா²வேத³னா, சக்கு²விஞ்ஞாணாத³யோ ச குஸலவிபாகா இட்டே², இட்ட²மஜ்ஜ²த்தே வா ஆரம்மணே உப்பஜ்ஜந்தி, தத்த² யுத்தோ தாவ இட்ட²மஜ்ஜ²த்தே உபேக்கா²வேத³னாயோகோ³, ந பன இட்டா²ரம்மணே, ந சாபி ஏதம் ஸக்கா வத்தும் பரிகப்பனாவஸேன இட்டா²ரம்மணம்பி இட்ட²மஜ்ஜ²த்ததோ க³ண்ஹந்தி யதா² ‘‘கம்மவிஞ்ஞாண’’ந்தி விபாகானம் அவஞ்சனீயபா⁴வதோ, தஸ்மா கத²ம் இட்டே², இட்ட²மஜ்ஜ²த்தே ச உப்பஜ்ஜமானேஸு சக்கு²ஸோதகா⁴னஜிவ்ஹாவிஞ்ஞாணேஸு உபேக்கா²வேத³னாயேவ ஸம்ப⁴வதி, ந ஸுக²வேத³னா, யதோ தேஸு உபேக்கா²வேத³னா வுத்தாதி இமம் சோத³னம் ஸங்கே²பதோ த³ஸ்ஸேதும் ‘‘இட்டா²ரம்மணயோக³ஸ்மி’’ந்திஆதி³ம் வத்வா புன தஸ்ஸா ஸோத⁴னத்த²ம் ‘‘உபாதா³ய ச ரூபேனா’’திஆதி³ வுத்தம். பூ⁴தரூபம் உபாதா³ய நிஸ்ஸாய பவத்தம் ரூபம் உபாதா³யரூபம். ‘‘உபாதா³ய ச ரூபேனா’’தி பன ‘‘மனஸீ ச காரோ’’தி ஏத்த² வுத்தனயமேவ. ‘‘உபாதா³யகரூபேனா’’தி வா பாடோ², சக்கு²விஞ்ஞாணஸ்ஸ வத்து²பூ⁴தேன சக்கு²பஸாதே³ன, ததா² ஸோதவிஞ்ஞாணாதீ³னம் வத்து²பூ⁴தேன ஸோதபஸாதா³தி³னா ச உபாதா³யரூபேனாதி அத்தோ². உபாதா³ரூபகே பனாதி ய-காரலோபம் கத்வா நித்³தே³ஸோ ‘‘படிஸங்கா² யோனிஸோ’’திஆதீ³ஸு விய, யதா²க்கமம் சக்கு²விஞ்ஞாணாதீ³னம் ஆரம்மணபூ⁴தே ரூபஸத்³தா³தி³கே உபாதா³யரூபேதி அத்தோ². ஸம்க⁴ட்டனானிக⁴ம்ஸஸ்ஸாதி ஸம்க⁴ட்டனாஸங்கா²தஸ்ஸ நிக⁴ம்ஸஸ்ஸ. ஸம்க⁴ட்டனாயேவ அஞ்ஞமஞ்ஞவிஸயவிஸயீபா⁴வஸ்ஸ அனுரூபதே³ஸுப்பத்திஸங்கா²தனிக⁴ம்ஸோ வியாதி நிக⁴ம்ஸோதி வுச்சதி. அத² வா ஸம்பத்தாஸம்பத்தக்³க³ஹணவஸேன ஸம்க⁴ட்டனாய நிக⁴ம்ஸஸ்ஸ சாதி அத்தோ². சக்கு²ரூபஸோதஸத்³தா³ ஹி அஞ்ஞமஞ்ஞம் அஸம்பத்தாயேவ அனுரூபதே³ஸுப்பத்தியா அஞ்ஞமஞ்ஞம் க⁴ட்டந்தி நாம. ததோ தேஸம் வஸேன க⁴ட்டனாகாரபூ⁴தோ அஞ்ஞமஞ்ஞாபி⁴முக²பா⁴வோ ‘‘ஸம்க⁴ட்டனா’’தி வுத்தோ. கா⁴னக³ந்தா⁴, பன ஜிவ்ஹாரஸா ச அஞ்ஞமஞ்ஞம் ஸம்பத்தாயேவ ஆஸன்னதரதே³ஸே உப்பன்னா அஞ்ஞமஞ்ஞம் நிக⁴ம்ஸேந்தி ஆஹச்ச திட்ட²ந்தி. ததோ தேஸம் வஸேன நிக⁴ம்ஸோ வுத்தோதி. து³ப்³ப³லத்தாதி அதி⁴கரணீமத்த²கே பிசுபிண்ட³கம் ட²பேத்வா பிசுபிண்டே³னேவ பஹதகாலே விய பு²ட்ட²மத்தபா⁴வேன து³ப்³ப³லத்தா. தீ³பயேதி ஏவம் ஸம்க⁴ட்டனானிக⁴ம்ஸஸ்ஸ து³ப்³ப³லத்தா வேத³னா மஜ்ஜ²த்தட்டா²னே திட்ட²தீதி உபேக்கா²யோக³ம் பகாஸேய்ய. யதி³ ஏவம் காயவிஞ்ஞாணேபி இத³ம் ஸமானந்தி, நோதி ஆஹ ‘‘பஸாத³ம் பனா’’திஆதி³. யதா² ஹி அதி⁴கரணீமத்த²கே கப்பாஸபிசுபிண்ட³ம் ட²பேத்வா கூடேன பஹரந்தஸ்ஸ கூடம் பிசுபிண்ட³மதிக்கம்ம அதி⁴கரணிம் க³ண்ஹாதி, ஏவமேவம் காயத்³வாரே ப³ஹித்³தா⁴ மஹாபூ⁴தாரம்மணம் அஜ்ஜ²த்திககாயபஸாத³ம் க⁴ட்டேத்வா தம் அதிக்கம்ம பஸாத³பச்சயேஸு மஹாபூ⁴தேஸு படிஹஞ்ஞதி, நிக⁴ம்ஸோ ப³லவா ஹோதி, தஸ்மா இட்டா²ரம்மணே காயவிஞ்ஞாணஸம்பயுத்தா ஸுக²வேத³னா ஹோதி, அனிட்டா²ரம்மணே பன வுத்தனயேன து³க்க²வேத³னாதி வுத்தம் ஹோதி.

மனோதா⁴துனாதி ஏத்த² கிஞ்சாபி தா⁴து-ஸத்³தோ³ இத⁴ இத்தி²லிங்கே³யேவ தி³ஸ்ஸதி, இமினாயேவ பன ஆசரியஸ்ஸ வசனேன புல்லிங்கோ³ அத்தீ²தி ஸித்³த⁴ம். கேசி பன ‘‘ஸக்கடவோஹாரேன வுத்த’’ந்தி வத³ந்தி. ஸம்பயுத்தா த³ஸ த⁴ம்மாதி ஸம்ப³ந்தோ⁴. தஸ்மாவேத்தா²தி ஏத்த² வ-காரோ பத³ஸந்தி⁴மத்தகரோ.

காயவிஞ்ஞாணே து³க்க²வேத³னாதி கிஞ்சாபி ஸுகா²தி³கந்தி ஆதி³-ஸத்³தே³ன அகுஸலவிபாககாயவிஞ்ஞாணஸ்ஸ து³க்க²வேத³னாஸம்பயோகோ³ வுத்தோ, இத⁴ பனஸ்ஸா லக்க²ணாதி³த³ஸ்ஸனத்த²ம் புன ‘‘காயவிஞ்ஞாணே து³க்க²வேத³னா’’தி உபஞ்ஞாஸோ கதோ, ரஸாத³யோ பனஸ்ஸ குஸலவிபாகே ஸுக²வேத³னாய வுத்தவிபரியாயேன யோஜேதப்³பா³தி இத⁴ ந வுத்தா. ஸேஸாதி ஸேஸசேதஸிகா.

ப³லப்பத்தோதி ஸேஸாஹேதுகசித்தஸம்பயுத்தஸமாதி⁴தோ அயம் வீரியிந்த்³ரியயோகே³ன ப³லவபா⁴வப்பத்தோ, ந பன ப³லராஸிப்பத்தோதி அத்தோ². யதி³ ஏவம் கஸ்மா சேதஸிகவிபா⁴க³னித்³தே³ஸே ‘‘ப³லானி த்³வே த்³விசித்தேஸூ’’தி வுத்தம்? தத்த² ஹி கிரியாஹேதுகமனோவிஞ்ஞாணயுக³ளம் ஸந்தா⁴ய ததா² வுத்தம். ஸப்³ப³ம் ஸேஸாஹேதுகசித்தேஸு சித்தேகக்³க³தாய விப⁴ங்கே³ –

‘‘கதமா தஸ்மிம் ஸமயே சித்தஸ்ஸ ஏகக்³க³தா ஹோதி? யா தஸ்மிம் ஸமயே சித்தஸ்ஸ டி²தீ’’தி (த⁴. ஸ. 11) –

ஏத்தகமேவ வத்வா கிரியாஹேதுகமனோவிஞ்ஞாணதா⁴துஸம்பயுத்தாய ஏகக்³க³தாய விப⁴ங்கே³ –

‘‘கதமா தஸ்மிம் ஸமயே சித்தஸ்ஸ ஏகக்³க³தா ஹோதி? யா தஸ்மிம் ஸமயே சித்தஸ்ஸ டி²தி ஸண்டி²தி அவட்டி²தி அவிஸாஹாரோ அவிக்கே²போ அவிஸாஹடமானஸதா ஸமதோ² ஸமாதி⁴ந்த்³ரியம் ஸமாதி⁴ப³ல’’ந்தி (த⁴. ஸ. 11) –

ப³லபரியோஸானம் கத்வா விப⁴ஜிதத்தா வீரியவிப⁴ங்கே³ ச –

‘‘கதமம் தஸ்மிம் ஸமயே வீரியிந்த்³ரியம் ஹோதி? யோ தஸ்மிம் ஸமயே சேதஸிகோ வீரியாரம்போ⁴ நிக்கமோ பரக்கமோ உய்யாமோ வாயாமோ உஸ்ஸாஹோ உஸ்ஸோள்ஹீ தா²மோ தி⁴தி அஸிதி²லபரக்கமதா அனிக்கி²த்தச²ந்த³தா அனிக்கி²த்தது⁴ரதா து⁴ரஸம்பக்³கா³ஹோ வீரியம் வீரியிந்த்³ரியம் வீரியப³ல’’ந்தி (த⁴. ஸ. 13) –

ப³லபரியோஸானம் கத்வா விப⁴ஜிதத்தா விப⁴ங்க³வாரே ஆக³தம் ஸமாதி⁴ப³லம், வீரியப³லஞ்ச ஸந்தா⁴ய ‘‘ப³லானி த்³வே த்³விசித்தேஸூ’’தி வுத்தம், ந பன த⁴ம்முத்³தே³ஸவாரே ப³லராஸியம் ஆக³தப³லம் ஸந்தா⁴ய ஸப்³பா³ஹேதுகசித்தேஸு த⁴ம்முத்³தே³ஸஸ்ஸ மக்³க³ராஸிதோ பட்டா²ய பரிஹீனத்தா.

87. விபாககிரியாஹத³யேஹீதி விபாககிரியசித்தேஹி. ஹத³யம் மனோ மானஸம் சித்தந்தி ஹி பரியாயவசனம். ஸோப⁴னம் க³தம் க³மனமஸ்ஸாதி ஸுக³தோ. ப⁴க³வதோ ஹி வினேய்யஜனூபஸங்கமனம் ஏகந்தேன தேஸம் ஹிதஸுக²னிப்பா²த³னதோ ஸோப⁴னம், ததா² லக்க²ணானுப்³யஞ்ஜனபடிமண்டி³தரூபகாயதாய து⁴தவிலம்பி³தாதி³தோ³ஸரஹிதம் அவஹஸிதராஜஹம்ஸவஸப⁴வாரணமிக³ராஜக³மனம் காயக³மனம், ஞாணக³மனஞ்ச நிம்மலவிபுலகருணாஸதிவீரியாதி³கு³ணவிஸேஸஸமங்கீ³பூ⁴தமபி⁴னீஹாரதோ யாவ மஹாபோ³தி⁴ம் அனவஜ்ஜதாய ஸோப⁴னமேவாதி. அத² வா ஸகலம்பி லோகம் பரிஞ்ஞாபி⁴ஸமயவஸேன ஸயம்பு⁴ஞாணேன பரிஜானந்தோ ஸம்மா க³தோ அவக³தோதி ஸுக³தோ, ததா² லோகஸமுத³யம் பஹானாபி⁴ஸமயவஸேன பஜஹந்தோ அனுப்பத்தித⁴ம்மதம் ஆபாதே³ந்தோ ஸம்மா க³தோ அதீதோதி ஸுக³தோ, லோகனிரோத⁴ஸங்கா²தம் நிப்³பா³னம் ஸச்சி²கிரியாபி⁴ஸமயவஸேன ஸம்மா க³தோ அதி⁴க³தோதி ஸுக³தோ, லோகனிரோத⁴கா³மினிபடிபதா³ஸங்கா²தம் மக்³க³ம் பா⁴வனாபி⁴ஸமயவஸேன ஸம்மா க³தோ பத்தோதி ஸுக³தோ. அத² வா ஸம்மா க³த³தீதி ஸுக³தோ. ப⁴க³வா ஹி பூ⁴தம் தச்ச²ம் அத்த²ஸம்ஹிதம் வினேய்யானம் யதா²ரஹம் காலயுத்தமேவ த⁴ம்மம் பா⁴ஸதி, தஸ்மா ஸம்மா க³த³தீதி த³-காரஸ்ஸ த-காரம் கத்வா ‘‘ஸுக³தோ’’தி வுத்தோ. அத² வா ஸுந்த³ரம் டா²னம் ஸம்மாஸம்போ³தி⁴ம், நிப்³பா³னமேவ வா க³தோதி ஸுக³தோ, தேன ஸுக³தேன.

88. ‘‘அவக³ச்ச²தீ’’திஆதீ³ஸு யோ பி⁴க்கு² அனூனம் அத்த²தோ வா ப்³யஞ்ஜனதோ வா அனூனம் ஸுபரிபுண்ணம் ததோயேவ பரமம் விஸிட்ட²ம் இமம் அபி⁴த⁴ம்மாவதாரம் நாம பகரணம் அவக³ச்ச²தி அவபு³ஜ்ஜ²தி, ஸம்மாஉக்³க³ஹணதா⁴ரணாதி³ஸம்பாத³னவஸேன ஓகா³ஹித்வா ஜானாதி. அத² வா பரமனயதீ³பனதோ பரமம் இமம் பகரணம் யோ அனூனம் கத்வா அவக³ச்ச²தி ஜானாதி, தஸ்ஸேவம் அவக³ச்ச²தோ யதா²ஸபா⁴வம் மனனதோ மதிஸங்கா²தா பஞ்ஞா து³ராஸதே³ மம்ஸசக்கு²னா பரமாணு விய லோகியஞாணேன து³ராஸதே³ து³ராதி⁴க³ந்தப்³பே³ அதி⁴க³ந்தும் து³க்கரதரே, அதிக³ம்பீ⁴ரட்டா²னே ட²பேத்வா ஸினேருபப்³ப³தராஜானம் ராஹுஆதீ³ஹி மஹாகாயேஹிபி ஸப்³பே³ன ஸப்³ப³ம் அஜ்ஜோ²கா³ஹிதும் அஸக்குணேய்யதாய மஹாஸமுத்³தே³ விய ட²பேத்வா ஸம்மாஸம்பு³த்³த⁴ம் ஸாரிபுத்தாதீ³ஹிபி மஹாஞாணேஹி ஸாவகேஹி ஸப்³பே³ன ஸப்³ப³ம் அஜ்ஜோ²கா³ஹிதும் அஸக்குணேய்யரூபே அபி⁴த⁴ம்மனயே விஜம்ப⁴தே ஹேமந்தஸாலபந்தி விய பத்த²ரதி, அபி⁴முகா²பி⁴முகே²யேவ த⁴ம்மே பவத்ததீதி வா அத்தோ².

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

சேதஸிகனித்³தே³ஸவண்ணனா நிட்டி²தா.