நிக³மனகதா²வண்ணனா

1401. ஸுமதிமதிவிசாரபோ³த⁴னோதி ஸுமதீனம் ஸுந்த³ரபஞ்ஞானம் கவீனம் மதியா விசாரஸ்ஸ போ³த⁴னோ. விமதிவிமோஹவினாஸனோதி விமதீனம் பா³லானம் விமோஹஸ்ஸ வினாஸனோ. குமதிமதிமஹாதமோனாஸோதி குமதீனம் பா³லானம் மஹாதமஸன்னிபா⁴ய மதியா நாஸகோ. படுமதிபா⁴ஸகரோதி படூனம் பண்டி³தானம் திக்க²பஞ்ஞாய ஓபா⁴ஸகரோ.

1402. ஸுமதினாமகோ பி⁴க்கு² அஸமானதோ அஸதி³ஸாய பூஜாய மம ஆயாசிதோ யதோ யஸ்மா காரணா, ததோ தஸ்மா காரணா அயம் அபி⁴த⁴ம்மாவதாரோ. பதா³தோ பதா³தி கோட்டா²ஸதோ கோட்டா²ஸதோ. ஹிதவிபா⁴வனா பா⁴வனாதி ஹிதப்பகாஸனாய பா⁴வனாய மயா ரசிதோ. அத² வா அஹம் ஸுமதினா பி⁴க்கு²னா அஸமானதோ மானதோ ஆயாசிதோ யதோ யஸ்மா, ததோ தஸ்மா.

1405. திவிதா⁴ ப்³யப்பதா²னஞ்ஹி க³தியோதி ப்³யப்பதா²னம் வசனானம் அத்த²க³ந்த²யுத்திவஸேன திவிதா⁴ க³தியோ.

1406. நிகாயந்தரலத்³தீ⁴ஹீதி அஞ்ஞஸ்மிம் நிகாயே லத்³தீ⁴ஹி. வாசனாமக்³க³னிஸ்ஸிதோதி வசனப்பப³ந்த⁴னிஸ்ஸிதோ.

1410. அஸம்கிண்ணகுலாகுலேதி அஸம்மிஸ்ஸகுலேஹி ஆகிண்ணே. ஸுபஸன்னஸிதோத³கேதி மது⁴ரஸீதோத³கே.

1411. ஸங்கடேதி ஸம்பா³தே⁴.

1412. கேலாஸஸிக²ராகாரபாஸாத³படிமண்டி³தேதி ரஜதபப்³ப³தமத்த²கனிபே⁴ஹி பாஸாதே³ஹி அலங்கதே.

1413. விவிதா⁴காரசாருபாகாரகோ³புரேதி விவித⁴ஸண்டா²னமனுஞ்ஞபாகாரத்³வாரகோட்ட²கே.

1414. ஸல்லேகா²தி ஸல்லேக²வுத்தி. ஸாக²ல்யேதி ஸகி²லபா⁴வே. ஸதாதி ஸதிஸம்பன்னேன.

1415. வஸ்ஸவலாஹகா தே³வாதி வஸ்ஸவலாஹகபூ⁴தா தே³வா அமரா.

நிக³மனகதா²வண்ணனா நிட்டி²தா.

அபி⁴த⁴ம்மாவதாரபுராணடீகா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

அபி⁴த⁴ம்மாவதார-அபி⁴னவடீகா

(பட²மோ பா⁴கோ³)

க³ந்தா²ரம்ப⁴கதா²

(க) விஸுத்³த⁴கருணாஞாணம், பு³த்³த⁴ம் ஸம்பு³த்³த⁴பூஜிதம்;

த⁴ம்மம் ஸத்³த⁴ம்மஸம்பூ⁴தம், வந்தே³ ஸம்க⁴ம் நிரங்க³ணம்.

(க²) ஸாரிபுத்தம் மஹாதே²ரம், பரியத்திவிஸாரத³ம்;

நமாமி ஸந்தவுத்திம் மே, கு³ரும் கா³ரவபா⁴ஜனம்.

(க³) வந்த³ந்தேன மயா ஏவம்,

யா லத்³தா⁴ புஞ்ஞஸம்பதா³;

ஹித்வா தஸ்ஸானுபா⁴வேன,

அந்தராயே அஸேஸதோ.

(க⁴) மஹாவிஹாரவாஸீனம், தே²ரானம் தி²ரஸீலினம்;

வம்ஸாலங்காரபூ⁴தேன, பூ⁴தானுக்³க³ஹகாரினா.

(ங) தே²ரேன பு³த்³த⁴த³த்தேன, ரசிதம் யம் மனோரமம்;

பிடகே அபி⁴த⁴ம்மஸ்மிம், ஓதாருபாயபா⁴வதோ.

(ச) அபி⁴த⁴ம்மாவதாரோதி, லத்³த⁴னாமேன விஸ்ஸுதம்;

நானானிபுணக³ம்பீ⁴ரனயம் பகரணுத்தமம்.

(ச²) அத்த²ஸம்வண்ணனம் தஸ்ஸ, ஆரபி⁴ஸ்ஸம் யதா²ப³லம்;

பாமோஜ்ஜஜனனத்தா²ய, ஆபி⁴த⁴ம்மிகபி⁴க்கு²னந்தி.