16. ஸோளஸமோ பரிச்சே²தோ³

அபி⁴ஞ்ஞானித்³தே³ஸவண்ணனா

1045. ஸதாதி ஸதிஸம்பன்னேன. அனுயோக³ந்தி வீரியம்.

1047. யோகா³வசரபி⁴க்கு²னா நிப்³ப³த்திதாஸு அபி⁴ஞ்ஞாஸு அஸ்ஸ யோகா³வசரஸ்ஸ பி⁴க்கு²னோ ஸமாதி⁴பா⁴வனா நிட்ட²ம் பரியோஸானம் க³தா ஸியா.

1050. த³ந்தேதி த³ந்தே டி²தே. அசலேதி அசலே டி²தே.

1052-4. அபி⁴ஞ்ஞாய பாத³கம் காரணம் அபி⁴ஞ்ஞாபாத³கம் யோகீ³ ஸதம் வாபி ஸஹஸ்ஸம் வாபி யதி³ ஸசே இச்ச²தி, அபி⁴ஞ்ஞாபாத³கம் ஜா²னம் ஸமாபஜ்ஜித்வா ததோ அபி⁴ஞ்ஞாபாத³கஜா²னதோ வுட்டா²ய வுட்ட²ஹித்வா ‘‘ஸதம் ஹோமி, ஸதம் ஹோமி’’ இதி ஏவம் காமாவசரபரிகம்மமானஸம் கத்வா அபி⁴ஞ்ஞாய பாத³கம் காரணபூ⁴தம் ஜா²னம் புனாதி⁴ட்டா²தி புன ஆபஜ்ஜித்வா ததோ ஜா²னதோ வுட்டா²ய புன அதி⁴ட்டா²தி, ஸஹாதி⁴ட்டா²னேன சேதஸா அதி⁴ட்டா²னஸங்கா²தேன சதுத்த²ஜ்ஜா²னசித்தேன ஸஹ ஸோ யோகீ³ ஸதம் ஹோதி. இத்³தி⁴வித⁴ஞாணம்.

1067-8. ஏஸோ அதி⁴க³தாபி⁴ஞ்ஞோ யோகீ³ பாத³காரம்மணேன சதுத்த²ஜ்ஜா²னஸ்ஸ படிபா⁴க³னிமித்தஸங்கா²தேன ஆரம்மணேன பு²ட்டே² ஓகாஸே க³தே பவத்தே பன ஸத்³தே³ ஸுணாதி. தி³ப்³ப³ஸோதஞாணம்.

1069. பரஸ்ஸ சித்தம் பரியதி பரிச்சி²ஜ்ஜதீதி சேதோபரியம், தமேவ மானஸம் சேதோபரியமானஸம்.

1070. ஹத³யம் பன நிஸ்ஸாயாதி ஹத³யவத்து²ம் நிஸ்ஸாய பவத்தமானலோஹிதம், ஹத³யகோஸே பவத்தம் ருஹிரந்தி அத்தோ².

1075. காமாவசரசித்தஞ்சாதி காமாவசரஸத்தானம் காமாவசரசித்தஞ்ச. ரூபாரூபேஸு ரூபப⁴வாரூபப⁴வேஸு ஸத்தானம் மானஸஞ்ச. கிம் பூ⁴தம்? ஸராகா³தி³ப்பபே⁴த³கம் மானஸம் ஸப்³ப³ம் சேதோபரியஞாணம் ஜானாதி. சேதோபரியஞாணம்.

1077-82. நிஸஜ்ஜா ஸப்³ப³பச்சி²மாதி ஸப்³பே³ஸம் இரியாபதா²னம் பச்சா² ஜாதா நிஸஜ்ஜா பி⁴க்கு²னா ஆவஜ்ஜிதப்³பா³. ததோ பபு⁴தி ததோ ஸப்³ப³பச்சி²மதோ நிஸஜ்ஜாதோ பபு⁴தி தம் ஸப்³ப³ம் பச்சி²மனிஸஜ்ஜம் ஆதி³ம் கத்வா படிலோமக்கமா படிலோமக்கமேன ஸப்³ப³ம் அத்தனா கதம் ஆவஜ்ஜிதப்³ப³ம். அஸ்மிம் ப⁴வே யாவ யத்தகம் காலம் ஸந்தி⁴ படிஸந்தி⁴ ஹோதி, தாவ தத்தகம் காலம் கதம் கிரியம் தேன பி⁴க்கு²னா ஆவஜ்ஜிதப்³ப³ம். புரிமஸ்மிம் ப⁴வேபி சுதிக்க²ணேபி நிப்³ப³த்தம் நாமரூபஞ்ச ஸாது⁴கம் ஆவஜ்ஜிதப்³ப³ம். சுதிக்க²ணே நிப்³ப³த்தே தஸ்மிம் நாமரூபே ஏவம் பி⁴க்கு²னா ஆவஜ்ஜிதப்³பே³ யதா³ ததே³வ தமேவ நாமரூபம் ஆரம்மணம் கத்வா சுதிக்க²ணே மனோத்³வாரே மனக்காரோ மனோத்³வாராவஜ்ஜனசித்தம் உப்பஜ்ஜதி. புப்³பே³னிவாஸானுஸ்ஸதிஞாணம்.

1086-96. அபி⁴ஞ்ஞாபாத³கம் கஸிணாரம்மணம் ஜா²னம் அபி⁴னீஹாரக்க²மம் கத்வா இமேஸு தீஸு கஸிணேஸு கதபுஞ்ஞேஹி. தஸ்மா தமிதரம் வாபீதி ஆலோககஸிணம் வா இதரம் வாபி கஸிணத்³வயம் யதா²க்கமம் உப்பாதே³த்வா உபசாரபூ⁴மியம்யேவ ட²த்வா தம் ஆலோககஸிணம் ட²பேதப்³ப³ம். அப்பனம் பண்டி³தோ ந உப்பாதே³ய்ய, ஸசே உப்பாதே³தி, தம் ஆலோககஸிணம் பாத³கஜ்ஜா²னனிஸ்ஸிதம் பாத³கஜ்ஜா²னஸ்ஸ ஆரம்மணம் ஹோதி. வட்³டி⁴தஸ்ஸ ஜா²னஸ்ஸ அந்தோக³த⁴ம் ரூபம் தேன யோகி³னா பஸ்ஸிதப்³ப³ம் ப⁴வே ப⁴வேய்ய. தம் ரூபம் பஸ்ஸதோ பஸ்ஸந்தஸ்ஸ தஸ்ஸ யோகி³னோ பரிகம்மஸ்ஸ வாரோ அதிக்கமதி, தாவதே³ தஸ்மிம்யேவ க²ணே ஆலோகோபி தஸ்ஸ யோகி³னோ ஆலோகோபி கி²ப்பம் அந்தரதா⁴யதி. தஸ்மிம் ஆலோகே அந்தரஹிதே ரூபக³தம் ரூபம் ந தி³ஸ்ஸதி. தி³வஸம்பி நிஸீதி³த்வா பஸ்ஸதோ ரூபத³ஸ்ஸனம் ஹோதி.

1100-1. தம்சித்தஸம்யுதந்தி தேன சதுத்த²ஜ்ஜா²னேன யுத்தம் சித்தம். அனாக³தம்ஸஞாணஸ்ஸ பரிகம்மம், யதா²கம்மூபக³ஸ்ஸ ஞாணஸ்ஸ ச பரிகம்மம். தி³ப்³ப³சக்கு²ஞாணம்.

1103. யோ பி⁴க்கு² இத⁴ இமஸ்மிம் ஸாஸனே இமம் பன க³ந்த²ம் ஸுணாதி, சித்தே கரோதி ச, ஸோ பி⁴க்கு² அனேன தரேன இமினா க³ந்தே²ன தரித்வா அபி⁴த⁴ம்மமஹண்ணவபாரம் யாதி பாபுணாதி, ஜானாதீதி அத்தோ².

இதி அபி⁴த⁴ம்மாவதாரடீகாய

அபி⁴ஞ்ஞானித்³தே³ஸவண்ணனா நிட்டி²தா.

ஸோளஸமோ பரிச்சே²தோ³.