17. ஸத்தரஸமோ பரிச்சே²தோ³

அபி⁴ஞ்ஞாரம்மணனித்³தே³ஸவண்ணனா

1104. அனாக³தம்ஸஞாணஞ்சாதி ந ஆக³தோ அனாக³தோ, ந தாவ ஸம்பத்தோதி அத்தோ², அனாக³தே அம்ஸா கோட்டா²ஸா தேஸம் ஞாணம் அனாக³தம்ஸஞாணம். யம் யம் கம்மம் யதா²கம்மம், தம் உபக³ச்ச²தி ஜானாதீதி யதா²கம்முபக³ம், விபாகசேதனாஜானனகஞாணம்.

1107-9. தத்த² தேஸு ஆரம்மணத்திகேஸு. சித்தஸன்னிஸ்ஸிதம் கத்வாதி தம் காயம் சித்தம் ஸன்னிஸ்ஸிதம் கரித்வா தமேவ காயசித்தசேதஸிகவஸேன மஹக்³க³தே சித்தஸ்மிம் ஸமாரோபேதி ஞாணம் இத்³தி⁴வித⁴ஞாணம், ததோ காயாரம்மணதோ காயஸ்ஸ பரித்தத்தா காமாவசரத்தா பரித்தாரம்மணம் ஞாணம் ஸியா.

1110-3. தி³ஸ்ஸமானேன காயேன, க³ந்துகாமோ யதா³ ப⁴வே யோ யோகீ³ தி³ஸ்ஸமானேன காயேன க³ந்துகாமோ யதா³ ப⁴வேய்ய, ஸோ யோகீ³ ததா³ சித்தம் காயஸன்னிஸ்ஸிதம் கத்வா ரூபகாயே ஸன்னிஸ்ஸிதம் கத்வா தம் பாத³கஜ்ஜா²னசித்தம் காயவஸேன காயே ஆரோபேதி, ததா³ ஜா²னாரம்மணதோ தம் ஞாணம் மஹக்³க³தகோ³சரம் ஹோதி, யம் ஞாணம் யதா³ அனாக³தஞ்ச த⁴ம்மஜாதம், அதீதஞ்ச த⁴ம்மஜாதம் விஸயம் ஆரம்மணம் கரோதி, ததா³ தம் ஞாணம் அதீதாரம்மணம் ஹோதி, ததா³ அனாக³தாரம்மணம் ஆரம்மணகரணகாலே அனாக³தகோ³சரம் ஹோதி. தி³ஸ்ஸமானேன காயேன தஸ்ஸ பி⁴க்கு²னோ க³மனே பன ஸதி தஸ்ஸ யோகி³னோ ஞாணஸ்ஸ கோ³சரோ பச்சுப்பன்னோ நாம ஹோதி, இதி வினித்³தி³ஸே.

1114. காயம் சித்தஸ்ஸ வஸேன சித்தே ஆரோபேதி, சித்தம் காயஸ்ஸ வஸேன காயே ஆரோபேதி, இதி பரிணாமனகாலஸ்மிம் தஸ்ஸ யோகி³னோ ஞாணம் அஜ்ஜ²த்தாரம்மணம் ஸியா. ஸம்பவத்ததி ஸத்தஸூதி பரித்தமஹக்³க³தஅதீதஅனாக³தபச்சுப்பன்னஅஜ்ஜ²த்தப³ஹித்³தா⁴ரம்மணஸங்கா²தேஸு ஸத்தஸு ஆரம்மணேஸு ஸம்பவத்ததி.

1120. ஜானனே மஜ்ஜி²மானந்தி மஹக்³க³தானம் ஜானனே.

1122. ஏதஸ்ஸ சேதோபரியஞாணஸ்ஸ மக்³கா³ரம்மணதா பரியாயேன ஏவ மதா ஞாதா.

1126-7. தத்த² திக்க²ணஸம்பத்தம், பச்சுப்பன்னம் க²ணாதி³கம்.

தத்த² தேஸு பச்சுப்பன்னேஸு யம் பச்சுப்பன்னம் க²ணாதி³கம் திக்க²ணஸம்பத்தம் உப்பாத³ட்டி²திப⁴ங்க³க்க²ணஸம்பத்தம் க²ணாதி³கம் க²ணாயேவ தம் க²ணாவயவம் பச்சுப்பன்னம் நாம. ஏகத்³வேஸந்ததிவாரபரியாபன்னந்தி ஏகசித்தத்³விசித்தவீதி²வாரபரியாபன்னம் ஸந்ததிபச்சுப்பன்னம் நாம. பச்சுப்பன்னந்தி பச்சி²மந்தி அத்³தா⁴பச்சுப்பன்னந்தி அத்தோ².

1131-2. யேன ஆவஜ்ஜனசித்தேன த⁴ம்மே ஆவஜ்ஜதி, யேன சேதஸா ஜானாதி, தேஸம் த்³வின்னம் ஆவஜ்ஜனஜவனசித்தானம் ஸஹட்டா²னஸ்ஸ அபா⁴வா தம் ‘‘க²ணாதி³கத்தயம் பச்சுப்பன்ன’’ந்திஆதி³கம் ‘‘ஏகஸ்ஸ சித்தமேகேன, அவஸ்ஸம் பன விஜ்ஜ²தி’’இதி பரியோஸானம் வசனம் ந யுஜ்ஜதி. ஆவஜ்ஜனஜவனானம் நானாரம்மணபா⁴வம் பத்திதோ ஆபஜ்ஜனதோ ச ந யுஜ்ஜதி. அனிட்டே² பன டா²னே தேஸம் ஆவஜ்ஜனஜவனானம் ஏகாரம்மணபா⁴வே அனிச்சி²தே தஸ்மிம் டா²னே ந யுஜ்ஜதி, அஞ்ஞஸ்மிம் பன டா²னே மக்³க³வீதி²யம் ஆவஜ்ஜனபரிகம்மஜவனானம் கஸிணாதி³கம் ஆரம்மணம் ஹோதி, கோ³த்ரபு⁴லோகுத்தரசித்தானஞ்ச நிப்³பா³னம் ஆரம்மணம் ஹோதி, ஏத்த² ஆரம்மணஜவனானம் ஏகாரம்மணதா அனிச்ச²தா.

1134-41. ‘‘ஏகப்³ப⁴வபரிச்சி²ன்னம், பச்சுப்பன்னந்தி பச்சி²ம’’ந்தி வத்வா புன அஞ்ஞேன பரியாயேன தம் பச்சுப்பன்னம் த³ஸ்ஸேதும் இத³ம் அத்³தா⁴க்²யம் அத்³தா⁴னாம பச்சுப்பன்னம் ஜவனவாரதோ தீ³பேதப்³ப³ம். இதி வசனம் நித்³தி³ட்ட²ம். யதா³ இத்³தி⁴மா யோகீ³ பரஸ்ஸ சித்தம் ஞாதும் ஆவஜ்ஜதி, தஸ்ஸ ஆவஜ்ஜனமனோ பச்சுப்பன்னக²ணவ்ஹயம் பச்சுப்பன்னம் மனோத்³வாராவஜ்ஜனசித்தம் ஆரம்மணம் கத்வா தேன சித்தேன ஸத்³தி⁴ம் நிருஜ்ஜ²தி, தேஸு நிருத்³தே⁴ஸு தஸ்ஸ யோகி³னோ சத்தாரி, பஞ்ச வா ஜவனானி ஜாயந்தி. ஏதேஸம் சதுன்னம், பஞ்சன்னம் ஜவனானம் யம் பச்சி²மம் சித்தம் இத்³தி⁴சித்தமுதீ³ரிதம். இத்³தி⁴சித்ததோ ஸேஸானி காமாவசரசித்தானி. ஏதேஸம் காமாவசரே இத்³தி⁴ஜவனானம் ததே³வ ச பரசித்தம் ஆரம்மணம் ஹோதி யஸ்மா, தஸ்மா ஸப்³பா³னி தானி ஜவனானி ஏகாரம்மணதம் யந்தி, தேஸம் ஜவனானம் நானாரம்மணதா அத்³தா⁴வஸா ந ப⁴வேய்ய, பச்சுப்பன்னாரம்மணதோ தேஸம் ஜவனானம் ஏகாரம்மணபா⁴வேபி இத்³தி⁴மானஸமேவ ச பரஸ்ஸ சித்தம் ஜானாதி. இதரானி காமாவசரானி பன சித்தானி பரஸ்ஸ சித்தம் ந ஜானந்தி. யதா² சக்கு²த்³வாரே து விஞ்ஞாணந்தி சக்கு²விஞ்ஞாணம் ரூபம் பஸ்ஸதி, ததா² இதரம் சித்தம் ந பஸ்ஸதி.

1161. அனாக³தம்ஸஞாணஸ்ஸாதி அனாக³தம்ஸஞாணஸ்ஸ அனாக³தம் த⁴ம்மம் அகோ³சரம், கோ³சரம் ந ஹோதியேவாதி அத்தோ².

1169. விவித⁴த்தா²னி வண்ணபதா³னி யஸ்மிம் ஸோ விவித⁴த்த²வண்ணபதோ³, தம் மது⁴ரத்த²மதினீஹரம் உத்தமம் ஸோதுஜனஸ்ஸ ஹத³யம் பீதிகரம் ஸசேதனோ கோ நாம மனுஜோ ந ஸுணேய்ய.

இதி அபி⁴த⁴ம்மாவதாரடீகாய

அபி⁴ஞ்ஞாரம்மணனித்³தே³ஸவண்ணனா நிட்டி²தா.

ஸத்தரஸமோ பரிச்சே²தோ³.