13. தேரஸமோ பரிச்சே²தோ³

காரகபடிவேத⁴வண்ணனா

வேத³கஸ்ஸாதி ஸுக²து³க்க²வேத³கஸ்ஸ. ததா³யத்தவுத்தீனந்தி தேஸம் ஆயத்தா படிப³த்³தா⁴ யேஸம் விபாகானம் தே ததா³யத்தவுத்தினோ, தேஸம். அத்ர இமஸ்மிம் டா²னே ஆசரியேன பரிஹாரோ வுச்சதே. குதோயம் தவ தத்தா²னுரோதோ⁴தி தத்த² தஸ்மிம் அஞ்ஞஸ்ஸ அத்தகாரகஸ்ஸ அபா⁴வேபி ஸத்துஸங்கா²தஸ்ஸ அத்தனோ பா⁴வேபி அயம் தவ அனுரோதோ⁴ அனுனயோ குதோ கேன காரணேன இத⁴ இமஸ்மிம் அஸதி கத்தரி குஸலாதீ³னம் அத்தி²பா⁴வே கம்மவிரோதோ⁴ குதோ கேன காரணேன. அதா²பீதி அபரோ நயோபி. கிஞ்சேத்தா²தி ஏத்த² ஏதிஸ்ஸம் சோத³னாயம் கிஞ்சி வத்தப்³ப³ம் அத்தி², அவஸிட்ட²ம் தாவ ப்³ரூஹி, அபரிஸமத்தா தே சோத³னா. தஸ்ஸாதி அத்தனோ. காரகவேத³கத்தாபா⁴வோதி காரகவேத³கத்தஸ்ஸ அபா⁴வோ ஸியா.

அத² ந ப⁴வதீதி அத்தனோ அனாஸே சேதனாபி அனாஸோ யதி³ ந ப⁴வதி. படிஞ்ஞா ஹீனாதி ‘‘சேதனாய அனஞ்ஞோ அத்தா’’தி படிஞ்ஞா ஹீனா. வுத்தப்பகாரதோதி ‘‘அத்தனோ அனாஸே சேதனாய நாஸோ ந ப⁴வதி’’இதி வுத்தப்பகாரதோ. விபரீதந்தி ‘‘அத்தனோ அனாஸே சேதனாய அனாஸோ’’இதி விபரீதக்³க³ஹணம் ஸியா. அத்தா நஸ்ஸது, சேதனா திட்ட²து, அத² பன ஏவம் ந ப⁴வதீதி அத்தா நஸ்ஸது, சேதனா திட்ட²து, ஏவம் க³ஹணம் பன ந ப⁴வதி. அனஞ்ஞத்தபக்க²ம் பரிச்சஜ பரிச்சஜாஹி ‘‘சேதனாய அனஞ்ஞோ அத்தா’’தி. படிஞ்ஞா ஹீனா யஸ்ஸ ஸோ படிஞ்ஞாஹீனோ.

உபி⁴ன்னம் சேதனத்தானம் ஏகதே³ஸதா ஏகதே³ஸபா⁴வோ நத்தி². ஏவஞ்ச ஸதீதி ஏவம் உபி⁴ன்னம் ஏகதே³ஸஸ்ஸ அபா⁴வே ஸதி கோ தோ³ஸோ இதி த்வம் சே வதே³ய்யாஸி. யம் பன தயா வுத்தம் யதா² ரூபரஸக³ந்தா⁴தீ³னம் ஏகதே³ஸே வத்தமானானம்பி லக்க²ணதோ அஞ்ஞத்தந்தி யம் வசனம் பன தயா வுத்தம், தம் வசனம் அயுத்தம், நானுரூபந்தி அத்தோ². தவ படிஞ்ஞா ஹீனாதி ‘‘ஏகதே³ஸே வத்தமானானம் சேதனத்தானம் லக்க²ணதோ அஞ்ஞத்த’’ந்தி படிஞ்ஞா ஹீனா.

ஏவஞ்ச ஸதீதி ஏதம் சேதனாய அஞ்ஞபா⁴வே ஸதி கோ தோ³ஸோ இதி சே ப⁴வம் வதே³ய்ய. ‘‘அசேதனோ அத்தா’’தி வசனம், புப்³பே³ வுத்ததோ³ஸதோதி ‘‘பாகாரதருபாஸாணதிணஸதி³ஸோ ஸியா’’தி புப்³பே³ வுத்ததோ³ஸதோ.

780. அத்தி² ஸத்தோபபாதிகோதி ஓபபாதிகா ஸத்தா அத்தி².

781. பா⁴ராதா³னந்தி பா⁴ரக்³க³ஹணம். பா⁴ரனிக்கே²பனந்தி பா⁴ரோரோபனம்.

783. ஏகஸ்ஸ புக்³க³லஸ்ஸ அட்டி²ஸஞ்சயோ அட்டி²ஸமூஹோ ஏகேன கப்பேன பப்³ப³தஸமோ ராஸி ஸியா.

785. போ⁴ மார, த்வம் ஸத்தோ இதி பச்சேஸி, கம் ஸத்³த³ஹஸி, ‘‘ஸத்தோ’’தி க³ஹணம் தே தவ தி³ட்டி²க³தம், ஸுத்³த⁴ஸங்கா²ரபுஞ்ஜோ அயம், இத⁴ லோகே ஸத்தோ ந உபலப்³ப⁴தி.

787. யோ பி⁴க்கு² இமம் க³ந்த²ம் அச்சந்தம் ஸததம்பி சிந்தேதி, தஸ்ஸ பி⁴க்கு²னோ பரமா பஞ்ஞா வேபுலம் விபுலபா⁴வம் க³ச்ச²தி.

788. யோ பி⁴க்கு² இமம் அபி⁴த⁴ம்மாவதாரம் அதிமதிகரம் உத்தமம் அபி⁴ஞ்ஞாணகரம் விமதிவினாஸகரம் கங்க²ச்சே²த³கரம் பியக்கரம் பேமகரம் ஸதா³ பட²தி, ஸுணாதி, தஸ்ஸ பி⁴க்கு²னோ மதி இத⁴ ஸாஸனே டி²தே விகஸதி படிபு²ல்லதி.

இதி அபி⁴த⁴ம்மாவதாரடீகாய

காரகபடிவேத⁴வண்ணனா நிட்டி²தா.

தேரஸமோ பரிச்சே²தோ³.