14. சுத்³த³ஸமோ பரிச்சே²தோ³

ரூபாவசரஸமாதி⁴பா⁴வனானித்³தே³ஸவண்ணனா

789-93. ஹிதானயந்தி ஹிதாவஹம். மானஸஞ்ச ஸுக³தந்தி ஸுட்டு² பவத்தமானஸஞ்ச. மது⁴ரா அத்த²வண்ணனா ஏதஸ்ஸாதி மது⁴ரத்த²வண்ணனம். உத்தரம் து மனுஸ்ஸானம், த⁴ம்மதோ ஞாணத³ஸ்ஸனந்தி மனுஸ்ஸானம் லோகியத⁴ம்மதோ உத்தரிபூ⁴தஞாணத³ஸ்ஸனலோகுத்தரம். ஸங்கஸ்ஸரஸமாசாரேதி ஸங்காய கங்கா²ய ஸரிதப்³ப³ஸமாசாரே. அச்சி²த்³த³ம் அக்க²ண்ட³ம் அகம்மாஸம். அத்த²காமேனாதி அத்தனோ ஹிதகாமேன.

797. து³வித⁴லக்க²ணம் சாரித்தவாரித்தலக்க²ணம்.

805. தேஸம் சரிதானம் வோமிஸ்ஸகனயா.

807. ஸவண்ணகஸிணாதி நீலபீதஓதா³தலோஹிதவண்ணகஸிணா.

808. தம் ஏககம் ஆனாபானம் அஸ்ஸாஸபஸ்ஸாஸோ.

809-10. மரணூபஸமாயுத்தா ஸதீதி மரணானுஸ்ஸதி உபஸமானுஸ்ஸதி. ஆஹாரனிஸ்ஸிதஸஞ்ஞாதி ஆஹாரே படிகூலஸஞ்ஞா. தா⁴துவவத்தா²னந்தி சதுதா⁴துவவத்தா²னம்.

811-2. அனுகூலா இமே ஸப்³ப³-சரிதானந்தி வண்ணிதாதி யம் கம்மட்டா²னம் ஸத்³தா⁴சரிதஸ்ஸ அனுகூலம், தமேவ பஞ்ஞாசரிதஸ்ஸ அனுகூலந்தி அதி⁴ப்பாயோ. இத³ம் ஸப்³ப³ம் பன வசனம் ஏகந்தவிபச்சனீகபா⁴வதோ ஏகந்தபடிபக்க²பா⁴வதோ அதிஸப்பாயதோ வுத்தம், இதி விபா⁴வினா ஞேய்யம்.

835. விபஸ்ஸனாப⁴வஸம்பத்தி-ஸுகா²னம் பச்சயா ஸியும் விபஸ்ஸனாஸம்பத்திஸுகா²னம் ப⁴வஸம்பத்திஸுகா²னம் பச்சயா ஸியும்.

838. ஸம்மட்டா²னம் மனோபு⁴னோதி மனோபு⁴ஹத³யோ தஸ்ஸ ஹத³யஸ்ஸ ஸம்மட்டா²னம்.

844. பத்துகாமேன தீ⁴மதா கஸிணம் கத்தப்³ப³ம்.

845. ஸம்ஹாரிமந்தி இதோ சிதோ ச ஹரிதப்³ப³கஸிணம். தத்ரட்ட²கந்தி தஸ்மிம் டா²னே டி²தம் இதோ சிதோ ச அனாஹரிதப்³ப³ம் கஸிணம்.

849. விவட்டம் பன மிச்ச²தாதி நிப்³பா³னம் இச்ச²ந்தேன வித³த்தி²சதுரங்கு³லம் வட்டம் காதும் தம் கஸிணம் வட்டதி.

851-2. ஹத்த²பாஸப்பமாணஸ்மிம், தம்ஹா கஸிணமண்ட³லாதி ததோ கஸிணமண்ட³லதோ ஹத்த²பாஸப்பமாணஸ்மிம் பதே³ஸே வித³த்தி²சதுரங்கு³லே உச்சே. பரிமுக²ம் ஸதிந்தி கம்மட்டா²னாபி⁴முக²ம் ஸதிம்.

853-4. நேக்க²ம்மந்தி ஜா²னம். கே²மதோ த³ட்டு²ம் தி³ஸ்வா அஹம் இமாய படிபத்தியா அத்³தா⁴ ஏகந்தேன பவிவேகஸுக²ஸ்ஸ நிப்³பா³னஸுக²ஸ்ஸ பா⁴கீ³ அஸ்ஸம் ப⁴வேய்யம்.

856. ஸோ கஸிணஸ்ஸ வண்ணோ தேன யோகி³னா ந பேக்கி²தப்³போ³, கஸிணஸ்ஸ லக்க²ணம் ந பேக்கி²தப்³ப³ம் உஸ்ஸத³ஸ்ஸ வஸேன வண்ணம் அமுஞ்சித்வா.

860. ஏவம் இமினா வுத்தப்பகாரேன ஏகக்³க³சேதஸோ ஏகக்³க³சித்தஸ்ஸ யோகி³னோ நிமீலேத்வா ஆவஜ்ஜந்தஸ்ஸ யதா² யேன பகாரேன கம்மட்டா²னம் ஹோதி உம்மீலிதே காலேபி, ததா² தேன பகாரேன தம் கம்மட்டா²னம் ஆபாத²ம் யாதி சே யதி³ ஆக³ச்ச²தி, உக்³க³ஹமேவ உக்³க³ஹனிமித்தம்.

864. பாதா³னம் தோ⁴வனே பபஞ்சபரிஹாரத்த²ம். ஏகதலிகாதி ஏகதலமத்தா.

865. தம் ஸம்ஹாரிமம் கஸிணமாதா³ய.

866. ஸமன்னாஹரிதப்³ப³ந்தி கம்மட்டா²னம் ஸுமனேன ஆஹரிதப்³ப³ம், மனஸிகாதப்³ப³ந்தி அத்தோ². தக்காஹடந்தி விதக்கேன ஆஹடம் பு²ஸிதம் கரே கரேய்ய.

868. தந்தி தம் நிமித்தம்.

871-4. இமஸ்ஸாதி படிபா⁴க³னிமித்தஸ்ஸ. புரிமஸ்ஸாதி உக்³க³ஹனிமித்தஸ்ஸ. கோ பன அயம் விஸேஸோ? த²விகா நீஹரிதம் ஆதா³ஸமண்ட³லம் மஜ்ஜிதம் விய. தோயதே³ காளமேகே⁴ ஸேதப³லாகா விய. ததா³ தம் உக்³க³ஹனிமித்தம் பதா³லேத்வாவ நிக்³க³தம் படிபா⁴க³னிமித்தம். ததோ உக்³க³ஹனிமித்ததோ. தந்தி தம் படிபா⁴க³னிமித்தம். ஸண்டா²னவந்தஞ்ச வண்ணவந்தஞ்ச ந ச உபட்டா²காரமத்தம். பஞ்ஞஜந்தி பஞ்ஞாய ஜாதம்.

877-8. உபசாரக்க²ணே தஸ்ஸாதி தஸ்ஸ ஸமாதி⁴னோ உபசாரக்க²ணே. நீவரணப்பஹானேன ஸமாதி⁴னோ படிலாப⁴க்க²ணே பன அங்கா³னம் விதக்காதீ³னம் பாதுபா⁴வேன இதி த்³வீஹி ஆகாரேஹி.

879. த்³வின்னம் ஸமாதீ⁴னந்தி உபசாரப்பனாஸமாதீ⁴னம்.

882. சக்கவத்தியக³ப்³போ⁴வ ரதனம் விய அஸ்ஸ அனேன ஸுது³ல்லப⁴ம்.

884. அயந்தி படிஸந்தி⁴ஸந்தா²ரோ.

891-2. ஸமதம் வீரியஸ்ஸேவாதி வீரியஸமபா⁴வம். லயம் லீனபா⁴வம் ஈஸகம்பி யந்தம் க³ச்ச²ந்தம் மானஸம் ஆவஜ்ஜனசித்தம்.

895-9. ப⁴வங்க³ம் பன பச்சி²ஜ்ஜ உச்சி²ந்தி³த்வா ததே³வ பத²வீகஸிணம் ஆரம்மணம் கத்வா யோகி³னோ மனோத்³வாரம்ஹி ஜாயதி. ததோதி ஆவஜ்ஜனதோ தத்ரேவாரம்மணே தஸ்மிம் பத²வீகஸிணஸங்கா²தே ஆரம்மணே தஸ்ஸ யோகி³னோ ஜவனானி சத்தாரி வா பஞ்ச வா ஜாயந்தே. அவஸானே ஏகம் ஜவனமானஸம் ரூபாவசரிகம் ஹோதி, தஸ்மிம் ரூபாவசரிகே விதக்காத³யோ அங்கா³. அஞ்ஞேஹி அஞ்ஞேஸம் சித்தானம் அஞ்ஞேஹி விதக்காதீ³ஹி ப³லவதரா ஹோந்தி. தானி அப்பனாபா⁴வம் அப்பத்தானி அப்பனாசேதஸோ பரிகம்மோபசாரதோ பரிகம்மபா⁴வதோ பரிகம்மானீதி வுச்சந்தே, உபசாரபா⁴வதோ உபசாரானீதி ச வுச்சந்தே. தானி ஜவனானி அப்பனாயானுலோமத்தா அனுலோமானி ஏவ ச வுச்சந்தி. ஏத்த² அனுலோமகேஸு யம் ஸப்³ப³ந்திமம் ஜவனம், தம் கோ³த்ரபூ⁴தி பவுச்சதி.

901. கோ³த்ரபு⁴ தி³ட்ட²ந்தி கோ³த்ரபு⁴ நாம உத்³தி³ட்ட²ம்.

904-5. புரிமேஹி ஜவனேஹி யம் ஆஸேவனம், தம் ப³லவபச்சயம் லத்³தா⁴ லபி⁴த்வா ச²ட்ட²ம் ஜவனம், ஸத்தமம் வா ஜவனம் அப்பேதி. இதி வசனம் பவுச்சதி, ஏத்த² வாதே³ கோ³த³த்தோ நாம ஆபி⁴த⁴ம்மிகோ ஆசரியோ ஆஹ. சி²ன்னதடே முக²ம் யஸ்ஸ சி²ன்னதடமுகோ².

908. பச்சவேக்க²ணா ஹேது யஸ்ஸ ஆவஜ்ஜனஸ்ஸாதி பச்சவேக்க²ணஹேதுகம்.

911-2. காமச்ச²ந்த³ஸ்ஸ நானாவிஸயே பலுத்³த⁴ஸ்ஸ. சேதஸோ ஏகஸ்மிம் விஸயே ஸமாதா⁴னேன ஸமாதி⁴.

915. ஸயஞ்ச அதிஸந்ததோ ஸுக²ம் அவூபஸந்தஸபா⁴வஸ்ஸ உத்³த⁴ச்சகுக்குச்சத்³வயஸ்ஸ படிபக்க²தோ வுத்தம்.

917. பஞ்சங்க³விப்பயுத்தந்தி பஞ்சனீவரணவிப்பயுத்தம். பஞ்சங்க³ஸம்யுதந்தி விதக்காதீ³ஹி யுத்தம்.

920-1. வேபுல்லந்தி கம்மட்டா²னஸ்ஸ விபுலபா⁴வம். தஞ்ச படிபா⁴க³னிமித்தம் உபசாரம் விசாரேத்வா வட்³டே⁴தும் வட்டதி.

928-31. பமாத³யோகி³னோதி பமாத³வஸேன யோகி³ஸம்பன்னஸ்ஸ காமஸஹக³தா ஸஞ்ஞாமனக்காரா மனஸிகாரா சே சரந்தி, தஸ்ஸ யோகி³னோ தம் ஜா²னம் ஹானபா⁴கி³யம் ஹோதி. ஸதி ஸந்திட்ட²தே தஸ்மிம், ஸந்தா தத³னுத⁴ம்மதா தஸ்மிம் பட²மஜ்ஜா²னே தத³னுத⁴ம்மதா தஸ்ஸ பட²மஜ்ஜா²னஸ்ஸ அனுரூபா ஸதி நிகந்தி ஸந்தா ஸம்விஜ்ஜமானா ஸந்திட்ட²தே ஸந்திட்ட²தி, தம் ஜா²னம் மந்த³ஸ்ஸ யோகி³னோ டி²திபா⁴கி³யம் ஹோதி, டி²திம் ப⁴ஜதி. விஸேஸபா⁴கி³யம் ஹோதி, விஸேஸம் து³தியாதி³பா⁴வனம் பாபுணாதீதி அத்தோ². நிப்³பி³தா³ஸம்யுதா ஸஞ்ஞா, மனக்காராதி நிப்³பி³தா³விபஸ்ஸனாஸம்யுத்தா ஸஞ்ஞாமனக்காரா. நிப்³பே³த⁴பா⁴கி³யந்தி லோகுத்தரபா⁴கி³யம், லோகுத்தரமக்³க³பா⁴கி³யந்தி அத்தோ².

933. அயம் ஸமாபத்தி ஆஸன்னாகுஸலாரயோ ஆஸன்னாகுஸலாரிகா யஸ்மா தக்கசாரானம் தூ²லத்தா ச, தஸ்மா காரணா அயம் ஸமாபத்தி அங்க³து³ப்³ப³லா.

935. நிகந்திந்தி தண்ஹம். பரியாதா³யாதி ஸோஸாபேத்வா.

936. விதி⁴னாதி புப்³பே³ வுத்தவிதி⁴னா. ஸதஸ்ஸாதி ஸதிஸம்பன்னஸ்ஸ.

938. நிமித்தம் து ததே³வ சாதி தமேவ பட²மனிமித்தம் ‘‘பத²வீ பத²வீ’’இதி ஏவம் மனஸா கரோந்தஸ்ஸ.

943. ஸம்பஸாத³னந்தி ஸத்³தா⁴. மஜ்ஜ²த்தந்தி தத்ரமஜ்ஜ²த்ததா.

944. து³வங்க³ஹீனந்தி விதக்கவிசாரஹீனம்.

948. பீதி நாம சேதஸோ சித்தஸ்ஸ உப்பிலாபனம் உப்பிலாபிதத்தம் யதோ யஸ்மா காரணா.

961-2. ஆஸன்னபீதிதோ³ஸாதி பீதியேவ தோ³ஸா. ஏத்த² ஏதஸ்மிம் ததியஜ்ஜா²னே யதே³வ யம் ஏவ ஸுக²ம் இதி ஏவம் ஸுக²ம் சேதஸோ ஆபோ⁴கோ³ மனஸிகாரோ. ஏவம் இமினா பகாரேன ஸுக²ஸ்ஸ தூ²லத்தா அயம் ஸமாபத்தி அங்க³து³ப்³ப³லா ஹோதி.

974-5. ஸுக²ம் உபேக்கா²ய ஆஸேவனம் பன ந ஹோதி யஸ்மா உபேக்கா²ய ஆஸேவனம் பன ந ஹோதி, யஸ்மா உபேக்கா²ஸஹக³தானி ஜவனானி ஜவந்தி, தஸ்மா சதுத்த²ஜ்ஜா²னம் உபேக்கா²ஸஹக³தம் ஸமுதீ³ரிதம்.

976. து³தியஜ்ஜா²னம் த்³விதா⁴ த்³வீஹி கோட்டா²ஸேஹி டி²தம்.

979. அயம் அபி⁴த⁴ம்மாவதாரோ ஸுமது⁴ரவரதரவசனோ கம் நு ஜனம் நேவ ரஞ்ஜயதி, அதினிஸிதவிஸதோ³ பு³த்³தி⁴ப்பசாரோ யஸ்ஸ ஸோ அதினிஸிதவிஸத³பு³த்³தி⁴ப்பசாரோ, ஸோ தேன ஜனேன வேத³னீயோ ஜானிதப்³போ³.

இதி அபி⁴த⁴ம்மாவதாரடீகாய

ரூபாவசரஸமாதி⁴பா⁴வனானித்³தே³ஸவண்ணனா நிட்டி²தா.

சுத்³த³ஸமோ பரிச்சே²தோ³.