8. பச்சயபரிச்சே²தோ³

1. யேஸம் ஸங்க²தத⁴ம்மானம், யே த⁴ம்மா பச்சயா யதா².

தம் விபா⁴க³மிஹேதா³னி, பவக்கா²மி யதா²ரஹம்.

2. படிச்சஸமுப்பாத³னயோ பட்டா²னனயோ சேதி பச்சயஸங்க³ஹோ து³விதோ⁴ வேதி³தப்³போ³.

3. தத்த² தப்³பா⁴வபா⁴வீபா⁴வாகாரமத்தோபலக்கி²தோ படிச்சஸமுப்பாத³னயோ, பட்டா²னனயோ பன ஆஹச்சபச்சயட்டி²திமாரப்³ப⁴ பவுச்சதி, உப⁴யம் பன வோமிஸ்ஸேத்வா பபஞ்சேந்தி ஆசரியா.

படிச்சஸமுப்பாத³னயோ

4. தத்த² அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணம், விஞ்ஞாணபச்சயா நாமரூபம், நாமரூபபச்சயா ஸளாயதனம், ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னம், உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணம் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீதி அயமேத்த² படிச்சஸமுப்பாத³னயோ.

5. தத்த² தயோ அத்³தா⁴ த்³வாத³ஸங்கா³னி வீஸதாகாரா திஸந்தி⁴ சதுஸங்கே²பா தீணி வட்டானி த்³வே மூலானி ச வேதி³தப்³பா³னி.

6. கத²ம்? அவிஜ்ஜாஸங்கா²ரா அதீதோ அத்³தா⁴, ஜாதிஜராமரணம் அனாக³தோ அத்³தா⁴, மஜ்ஜே² அட்ட² பச்சுப்பன்னோ அத்³தா⁴தி தயோ அத்³தா⁴.

7. அவிஜ்ஜா ஸங்கா²ரா விஞ்ஞாணம் நாமரூபம் ஸளாயதனம் ப²ஸ்ஸோ வேத³னா தண்ஹா உபாதா³னம் ப⁴வோ ஜாதி ஜராமரணந்தி த்³வாத³ஸங்கா³னி.

8. ஸோகாதி³வசனம் பனேத்த² நிஸ்ஸந்த³ப²லனித³ஸ்ஸனம்.

9. அவிஜ்ஜாஸங்கா²ரக்³க³ஹணேன பனேத்த² தண்ஹுபாதா³னப⁴வாபி க³ஹிதா ப⁴வந்தி, ததா² தண்ஹுபாதா³னப⁴வக்³க³ஹணேன ச அவிஜ்ஜாஸங்கா²ரா, ஜாதிஜராமரணக்³க³ஹணேன ச விஞ்ஞாணாதி³ப²லபஞ்சகமேவ க³ஹிதந்தி கத்வா –

10. அதீதே ஹேதவோ பஞ்ச, இதா³னி ப²லபஞ்சகம்.

இதா³னி ஹேதவோ பஞ்ச, ஆயதிம் ப²லபஞ்சகந்தி;

வீஸதாகாரா திஸந்தி⁴, சதுஸங்கே²பா ச ப⁴வந்தி.

11. அவிஜ்ஜாதண்ஹுபாதா³னா ச கிலேஸவட்டம், கம்மப⁴வஸங்கா²தோ ப⁴வேகதே³ஸோ ஸங்கா²ரா ச கம்மவட்டம், உபபத்திப⁴வஸங்கா²தோ ப⁴வேகதே³ஸோ அவஸேஸா ச விபாகவட்டந்தி தீணி வட்டானி.

12. அவிஜ்ஜாதண்ஹாவஸேன த்³வே மூலானி ச வேதி³தப்³பா³னி.

13. தேஸமேவ ச மூலானம், நிரோதே⁴ன நிருஜ்ஜ²தி.

ஜராமரணமுச்சா²ய, பீளிதானமபி⁴ண்ஹஸோ;

ஆஸவானம் ஸமுப்பாதா³, அவிஜ்ஜா ச பவத்ததி.

வட்டமாப³ந்த⁴மிச்சேவம், தேபூ⁴மகமனாதி³கம்;

படிச்சஸமுப்பாதோ³தி, பட்ட²பேஸி மஹாமுனி.

பட்டா²னனயோ

14. ஹேதுபச்சயோ ஆரம்மணபச்சயோ அதி⁴பதிபச்சயோ அனந்தரபச்சயோ ஸமனந்தரபச்சயோ ஸஹஜாதபச்சயோ அஞ்ஞமஞ்ஞபச்சயோ நிஸ்ஸயபச்சயோ உபனிஸ்ஸயபச்சயோ புரேஜாதபச்சயோ பச்சா²ஜாதபச்சயோ ஆஸேவனபச்சயோ கம்மபச்சயோ விபாகபச்சயோ ஆஹாரபச்சயோ இந்த்³ரியபச்சயோ ஜா²னபச்சயோ மக்³க³பச்சயோ ஸம்பயுத்தபச்சயோ விப்பயுத்தபச்சயோ அத்தி²பச்சயோ நத்தி²பச்சயோ விக³தபச்சயோ அவிக³தபச்சயோதி அயமேத்த² பட்டா²னனயோ.

15. ச²தா⁴ நாமம் து நாமஸ்ஸ, பஞ்சதா⁴ நாமரூபினம்.

ஏகதா⁴ புன ரூபஸ்ஸ, ரூபம் நாமஸ்ஸ சேகதா⁴.

பஞ்ஞத்தினாமரூபானி, நாமஸ்ஸ து³விதா⁴ த்³வயம்;

த்³வயஸ்ஸ நவதா⁴ சேதி, ச²ப்³பி³தா⁴ பச்சயா கத²ம்.

16. அனந்தரனிருத்³தா⁴ சித்தசேதஸிகா த⁴ம்மா படுப்பன்னானம் சித்தசேதஸிகானம் த⁴ம்மானம் அனந்தரஸமனந்தரனத்தி²விக³தவஸேன, புரிமானி ஜவனானி பச்சி²மானம் ஜவனானம் ஆஸேவனவஸேன, ஸஹஜாதா சித்தசேதஸிகா த⁴ம்மா அஞ்ஞமஞ்ஞம் ஸம்பயுத்தவஸேனேதி ச ச²தா⁴ நாமம் நாமஸ்ஸ பச்சயோ ஹோதி.

17. ஹேதுஜா²னங்க³மக்³க³ங்கா³னி ஸஹஜாதானம் நாமரூபானம் ஹேதாதி³வஸேன, ஸஹஜாதா சேதனா ஸஹஜாதானம் நாமரூபானம், நானாக்க²ணிகா சேதனா கம்மாபி⁴னிப்³ப³த்தானம் நாமரூபானம் கம்மவஸேன, விபாகக்க²ந்தா⁴ அஞ்ஞமஞ்ஞம் ஸஹஜாதானம் ரூபானம் விபாகவஸேனேதி ச பஞ்சதா⁴ நாமம் நாமரூபானம் பச்சயோ ஹோதி.

18. பச்சா²ஜாதா சித்தசேதஸிகா த⁴ம்மா புரேஜாதஸ்ஸ இமஸ்ஸ காயஸ்ஸ பச்சா²ஜாதவஸேனேதி ஏகதா⁴வ நாமம் ரூபஸ்ஸ பச்சயோ ஹோதி.

19. ச² வத்தூ²னி பவத்தியம் ஸத்தன்னம் விஞ்ஞாணதா⁴தூனம் பஞ்சாரம்மணானி ச பஞ்சவிஞ்ஞாணவீதி²யா புரேஜாதவஸேனேதி ஏகதா⁴வ ரூபம் நாமஸ்ஸ பச்சயோ ஹோதி.

20. ஆரம்மணவஸேன உபனிஸ்ஸயவஸேனேதி ச து³விதா⁴ பஞ்ஞத்தினாமரூபானி நாமஸ்ஸேவ பச்சயா ஹோந்தி.

21. தத்த² ரூபாதி³வஸேன ச²ப்³பி³த⁴ம் ஹோதி ஆரம்மணம்.

22. உபனிஸ்ஸயோ பன திவிதோ⁴ ஹோதி – ஆரம்மணூபனிஸ்ஸயோ அனந்தரூபனிஸ்ஸயோ பகதூபனிஸ்ஸயோ சேதி.

23. தத்த² ஆரம்மணமேவ க³ருகதம் ஆரம்மணூபனிஸ்ஸயோ.

24. அனந்தரனிருத்³தா⁴ சித்தசேதஸிகா த⁴ம்மா அனந்தரூபனிஸ்ஸயோ.

25. ராகா³த³யோ பன த⁴ம்மா ஸத்³தா⁴த³யோ ச ஸுக²ம் து³க்க²ம் புக்³க³லோ போ⁴ஜனம் உதுஸேனாஸனஞ்ச யதா²ரஹம் அஜ்ஜ²த்தஞ்ச ப³ஹித்³தா⁴ ச குஸலாதி³த⁴ம்மானம், கம்மம் விபாகானந்தி ச ப³ஹுதா⁴ ஹோதி பகதூபனிஸ்ஸயோ.

26. அதி⁴பதிஸஹஜாதஅஞ்ஞமஞ்ஞனிஸ்ஸயஆஹாரஇந்த்³ரியவிப்பயுத்தஅத்தி²அவிக³தவஸேனேதி யதா²ரஹம் நவதா⁴ நாமரூபானி நாமரூபானம் பச்சயா ப⁴வந்தி.

27. தத்த² க³ருகதமாரம்மணம் ஆரம்மணாதி⁴பதிவஸேன நாமானம், ஸஹஜாதாதி⁴பதி சதுப்³பி³தோ⁴பி ஸஹஜாதவஸேன ஸஹஜாதானம் நாமரூபானந்தி ச து³விதோ⁴ ஹோதி அதி⁴பதிபச்சயோ.

28. சித்தசேதஸிகா த⁴ம்மா அஞ்ஞமஞ்ஞம் ஸஹஜாதரூபானஞ்ச, மஹாபூ⁴தா அஞ்ஞமஞ்ஞம் உபாதா³ரூபானஞ்ச, படிஸந்தி⁴க்க²ணே வத்து²விபாகா அஞ்ஞமஞ்ஞந்தி ச திவிதோ⁴ ஹோதி ஸஹஜாதபச்சயோ.

29. சித்தசேதஸிகா த⁴ம்மா அஞ்ஞமஞ்ஞம், மஹாபூ⁴தா அஞ்ஞமஞ்ஞம், படிஸந்தி⁴க்க²ணே வத்து²விபாகா அஞ்ஞமஞ்ஞந்தி ச திவிதோ⁴ ஹோதி அஞ்ஞமஞ்ஞபச்சயோ.

30. சித்தசேதஸிகா த⁴ம்மா அஞ்ஞமஞ்ஞம் ஸஹஜாதரூபானஞ்ச, மஹாபூ⁴தா அஞ்ஞமஞ்ஞம் உபாதா³ரூபானஞ்ச, ச² வத்தூ²னி ஸத்தன்னம் விஞ்ஞாணதா⁴தூனந்தி ச திவிதோ⁴ ஹோதி நிஸ்ஸயபச்சயோ.

31. கப³ளீகாரோ ஆஹாரோ இமஸ்ஸ காயஸ்ஸ, அரூபினோ ஆஹாரா ஸஹஜாதானம் நாமரூபானந்தி ச து³விதோ⁴ ஹோதி ஆஹாரபச்சயோ.

32. பஞ்ச பஸாதா³ பஞ்சன்னம் விஞ்ஞாணானம், ரூபஜீவிதிந்த்³ரியம் உபாதி³ன்னரூபானம், அரூபினோ இந்த்³ரியா ஸஹஜாதானம் நாமரூபானந்தி ச திவிதோ⁴ ஹோதி இந்த்³ரியபச்சயோ.

33. ஓக்கந்திக்க²ணே வத்து² விபாகானம், சித்தசேதஸிகா த⁴ம்மா ஸஹஜாதரூபானம் ஸஹஜாதவஸேன, பச்சா²ஜாதா சித்தசேதஸிகா த⁴ம்மா புரேஜாதஸ்ஸ இமஸ்ஸ காயஸ்ஸ பச்சா²ஜாதவஸேன ச² வத்தூ²னி பவத்தியம் ஸத்தன்னம் விஞ்ஞாணதா⁴தூனம் புரேஜாதவஸேனேதி ச திவிதோ⁴ ஹோதி விப்பயுத்தபச்சயோ.

34. ஸஹஜாதம் புரேஜாதம், பச்சா²ஜாதஞ்ச ஸப்³ப³தா².

கப³ளீகாரோ ஆஹாரோ, ரூபஜீவிதமிச்சயந்தி. –

பஞ்சவிதோ⁴ ஹோதி அத்தி²பச்சயோ அவிக³தபச்சயோ ச.

35. ஆரம்மணூபனிஸ்ஸயகம்மத்தி²பச்சயேஸு ச ஸப்³பே³பி பச்சயா ஸமோதா⁴னம் க³ச்ச²ந்தி.

36. ஸஹஜாதரூபந்தி பனேத்த² ஸப்³ப³த்தா²பி பவத்தே சித்தஸமுட்டா²னானம், படிஸந்தி⁴யம் கடத்தாரூபானஞ்ச வஸேன து³வித⁴ம் ஹோதீதி வேதி³தப்³ப³ம்.

37. இதி தேகாலிகா த⁴ம்மா, காலமுத்தா ச ஸம்ப⁴வா.

அஜ்ஜ²த்தஞ்ச ப³ஹித்³தா⁴ ச, ஸங்க²தாஸங்க²தா ததா²;

பஞ்ஞத்தினாமரூபானம், வஸேன திவிதா⁴ டி²தா;

பச்சயா நாம பட்டா²னே, சதுவீஸதி ஸப்³ப³தா².

38. தத்த² ரூபத⁴ம்மா ரூபக்க²ந்தோ⁴வ, சித்தசேதஸிகஸங்கா²தா சத்தாரோ அரூபினோ க²ந்தா⁴, நிப்³பா³னஞ்சேதி பஞ்சவித⁴ம்பி அரூபந்தி ச நாமந்தி ச பவுச்சதி.

பஞ்ஞத்திபே⁴தோ³

39. ததோ அவஸேஸா பஞ்ஞத்தி பன பஞ்ஞாபியத்தா பஞ்ஞத்தி, பஞ்ஞாபனதோ பஞ்ஞத்தீதி ச து³விதா⁴ ஹோதி.

40. கத²ம்? தம்தம்பூ⁴தவிபரிணாமாகாரமுபாதா³ய ததா² ததா² பஞ்ஞத்தா பூ⁴மிபப்³ப³தாதி³கா, ஸம்பா⁴ரஸன்னிவேஸாகாரமுபாதா³ய கே³ஹரத²ஸகடாதி³கா, க²ந்த⁴பஞ்சகமுபாதா³ய புரிஸபுக்³க³லாதி³கா, சந்தா³வட்டனாதி³கமுபாதா³ய தி³ஸாகாலாதி³கா, அஸம்பு²ட்டா²காரமுபாதா³ய கூபகு³ஹாதி³கா, தம்தம்பூ⁴தனிமித்தம் பா⁴வனாவிஸேஸஞ்ச உபாதா³ய கஸிணனிமித்தாதி³கா சேதி ஏவமாதி³ப்பபே⁴தா³ பன பரமத்த²தோ அவிஜ்ஜமானாபி அத்த²ச்சா²யாகாரேன சித்துப்பாதா³னமாரம்மணபூ⁴தா தம் தம் உபாதா³ய உபனிதா⁴ய காரணம் கத்வா ததா² ததா² பரிகப்பியமானா ஸங்கா²யதி ஸமஞ்ஞாயதி வோஹரீயதி பஞ்ஞாபீயதீதி பஞ்ஞத்தீதி பவுச்சதி. அயம் பஞ்ஞத்தி பஞ்ஞாபியத்தா பஞ்ஞத்தி நாம.

41. பஞ்ஞாபனதோ பஞ்ஞத்தி பன நாமனாமகம்மாதி³னாமேன பரிதீ³பிதா, ஸா விஜ்ஜமானபஞ்ஞத்தி அவிஜ்ஜமானபஞ்ஞத்தி, விஜ்ஜமானேன அவிஜ்ஜமானபஞ்ஞத்தி, அவிஜ்ஜமானேன விஜ்ஜமானபஞ்ஞத்தி, விஜ்ஜமானேன விஜ்ஜமானபஞ்ஞத்தி, அவிஜ்ஜமானேன அவிஜ்ஜமானபஞ்ஞத்தி சேதி ச²ப்³பி³தா⁴ ஹோதி.

42. தத்த² யதா³ பன பரமத்த²தோ விஜ்ஜமானம் ரூபவேத³னாதி³ம் ஏதாய பஞ்ஞாபேந்தி, ததா³யம் விஜ்ஜமானபஞ்ஞத்தி. யதா³ பன பரமத்த²தோ அவிஜ்ஜமானம் பூ⁴மிபப்³ப³தாதி³ம் ஏதாய பஞ்ஞாபேந்தி, ததா³யம் அவிஜ்ஜமானபஞ்ஞத்தீதி பவுச்சதி. உபி⁴ன்னம் பன வோமிஸ்ஸகவஸேன ஸேஸா யதா²க்கமம் ச²ளபி⁴ஞ்ஞோ, இத்தி²ஸத்³தோ³, சக்கு²விஞ்ஞாணம், ராஜபுத்தோதி ச வேதி³தப்³பா³.

43. வசீகோ⁴ஸானுஸாரேன, ஸோதவிஞ்ஞாணவீதி²யா.

பவத்தா²னந்தருப்பன்ன-மனோத்³வாரஸ்ஸ கோ³சரா.

அத்தா² யஸ்ஸானுஸாரேன, விஞ்ஞாயந்தி ததோ பரம்;

ஸாயம் பஞ்ஞத்தி விஞ்ஞேய்யா, லோகஸங்கேதனிம்மிதா.

இதி அபி⁴த⁴ம்மத்த²ஸங்க³ஹே பச்சயஸங்க³ஹவிபா⁴கோ³ நாம

அட்ட²மோ பரிச்சே²தோ³.