9. அம்ப³பாலிவனஸுத்தம்

907. ஏகம் ஸமயம் ஆயஸ்மா ச அனுருத்³தோ⁴ ஆயஸ்மா ச ஸாரிபுத்தோ வேஸாலியம் விஹரந்தி அம்ப³பாலிவனே. அத² கோ² ஆயஸ்மா ஸாரிபுத்தோ ஸாயன்ஹஸமயம் படிஸல்லானா வுட்டி²தோ…பே… ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் அனுருத்³த⁴ம் ஏதத³வோச –

‘‘விப்பஸன்னானி கோ² தே, ஆவுஸோ அனுருத்³த⁴, இந்த்³ரியானி, பரிஸுத்³தோ⁴ முக²வண்ணோ பரியோதா³தோ. கதமேனாயஸ்மா அனுருத்³தோ⁴ விஹாரேன ஏதரஹி ப³ஹுலம் விஹரதீ’’தி? ‘‘சதூஸு க்²வாஹம், ஆவுஸோ, ஸதிபட்டா²னேஸு ஸுப்பதிட்டி²தசித்தோ ஏதரஹி ப³ஹுலம் விஹராமி. கதமேஸு சதூஸு? இதா⁴ஹம், ஆவுஸோ, காயே காயானுபஸ்ஸீ விஹராமி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹராமி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம் – இமேஸு க்²வாஹம், ஆவுஸோ, சதூஸு ஸதிபட்டா²னேஸு ஸுப்பதிட்டி²தசித்தோ ஏதரஹி ப³ஹுலம் விஹராமி. யோ ஸோ, ஆவுஸோ, பி⁴க்கு² அரஹம் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞா விமுத்தோ, ஸோ இமேஸு சதூஸு ஸதிபட்டா²னேஸு ஸுப்பதிட்டி²தசித்தோ ப³ஹுலம் விஹரதீ’’தி.

‘‘லாபா⁴ வத நோ, ஆவுஸோ, ஸுலத்³த⁴ம் வத நோ, ஆவுஸோ! யே மயம் ஆயஸ்மதோ அனுருத்³த⁴ஸ்ஸ ஸம்முகா²வ அஸ்ஸும்ஹ ஆஸபி⁴ம் வாசம் பா⁴ஸமானஸ்ஸா’’தி. நவமம்.