2. உண்ணாப⁴ப்³ராஹ்மணஸுத்தம்

512. ஸாவத்தி²னிதா³னம். அத² கோ² உண்ணாபோ⁴ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² உண்ணாபோ⁴ ப்³ராஹ்மணோ ப⁴க³வந்தம் ஏதத³வோச –

‘‘பஞ்சிமானி, போ⁴ கோ³தம, இந்த்³ரியானி நானாவிஸயானி நானாகோ³சரானி, ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தி. கதமானி பஞ்ச? சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம். இமேஸம் நு கோ², போ⁴ கோ³தம, பஞ்சன்னம் இந்த்³ரியானம் நானாவிஸயானம் நானாகோ³சரானம் ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தானம் கிம் படிஸரணம், கோ ச நேஸம் கோ³சரவிஸயம் பச்சனுபோ⁴தீ’’தி?

‘‘பஞ்சிமானி, ப்³ராஹ்மண, இந்த்³ரியானி நானாவிஸயானி நானாகோ³சரானி ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தி. கதமானி பஞ்ச? சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம். இமேஸம் கோ², ப்³ராஹ்மண, பஞ்சன்னம் இந்த்³ரியானம் நானாவிஸயானம் நானாகோ³சரானம் ந அஞ்ஞமஞ்ஞஸ்ஸ கோ³சரவிஸயம் பச்சனுபோ⁴ந்தானம் மனோ படிஸரணம், மனோவ நேஸம் கோ³சரவிஸயம் பச்சனுபோ⁴தீ’’தி.

‘‘மனஸ்ஸ பன, போ⁴ கோ³தம, கிம் படிஸரண’’ந்தி? ‘‘மனஸ்ஸ கோ², ப்³ராஹ்மண, ஸதி படிஸரண’’ந்தி. ‘‘ஸதியா பன, போ⁴ கோ³தம, கிம் படிஸரண’’ந்தி? ‘‘ஸதியா கோ², ப்³ராஹ்மண, விமுத்தி படிஸரண’’ந்தி. ‘‘விமுத்தியா பன, போ⁴ கோ³தம, கிம் படிஸரண’’ந்தி? ‘‘விமுத்தியா கோ², ப்³ராஹ்மண, நிப்³பா³னம் படிஸரண’’ந்தி. ‘‘நிப்³பா³னஸ்ஸ பன, போ⁴ கோ³தம, கிம் படிஸரண’’ந்தி? ‘‘அச்சயாஸி [அச்சஸரா (ஸீ. ஸ்யா. கம்.), அஜ்ஜ²பரம் (பீ. க.)], ப்³ராஹ்மண, பஞ்ஹம், நாஸக்கி² பஞ்ஹஸ்ஸ பரியந்தம் க³ஹேதும். நிப்³பா³னோக³த⁴ஞ்ஹி, ப்³ராஹ்மண, ப்³ரஹ்மசரியம் வுஸ்ஸதி நிப்³பா³னபராயணம் நிப்³பா³னபரியோஸான’’ந்தி.

அத² கோ² உண்ணாபோ⁴ ப்³ராஹ்மணோ ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² ப⁴க³வா அசிரபக்கந்தே உண்ணாபே⁴ ப்³ராஹ்மணே பி⁴க்கூ² ஆமந்தேஸி – ‘‘ஸேய்யதா²பி, பி⁴க்க²வே, கூடாகா³ரே வா கூடாகா³ரஸாலாயம் வா [ரஸ்மியோ (ஸ்யா. க.)] பாசீனவாதபானா ஸூரியே உக்³க³ச்ச²ந்தே வாதபானேன ரஸ்மி [கூடாகா³ரம் வா கூடாகா³ரஸாலம் வா உத்தராய (க. ஸீ.)] பவிஸித்வா க்வாஸ்ஸ [காய (ஸ்யா. க.)] பதிட்டி²தா’’தி? ‘‘பச்சி²மாயம், ப⁴ந்தே, பி⁴த்திய’’ந்தி. ‘‘ஏவமேவ கோ², பி⁴க்க²வே, உண்ணாப⁴ஸ்ஸ ப்³ராஹ்மணஸ்ஸ ததா²க³தே ஸத்³தா⁴ நிவிட்டா² மூலஜாதா பதிட்டி²தா த³ள்ஹா அஸம்ஹாரியா ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம். இமம்ஹி சே, பி⁴க்க²வே, ஸமயே உண்ணாபோ⁴ ப்³ராஹ்மணோ காலங்கரேய்ய, நத்தி² ஸம்யோஜனம் யேன ஸம்யோஜனேன ஸம்யுத்தோ உண்ணாபோ⁴ ப்³ராஹ்மணோ புன இமம் லோகம் ஆக³ச்சே²ய்யா’’தி. து³தியம்.