8. லோகஸுத்தம்

394. தம்யேவ நிதா³னம். ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் அனுருத்³த⁴ம் ஏதத³வோச – ‘‘கதமேஸம், ஆவுஸோ அனுருத்³த⁴, த⁴ம்மானம் பா⁴விதத்தா ப³ஹுலீகதத்தா மஹாபி⁴ஞ்ஞதம் [மஹாபி⁴ஞ்ஞாதம் (பீ.)] பத்தோ’’தி? ‘‘சதுன்னம், ஆவுஸோ, ஸதிபட்டா²னானம் பா⁴விதத்தா ப³ஹுலீகதத்தா மஹாபி⁴ஞ்ஞதம் பத்தோ’’.

‘‘கதமேஸம் சதுன்னம்? இதா⁴ஹம், ஆவுஸோ, காயே காயானுபஸ்ஸீ விஹராமி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹராமி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். இமேஸம் க்²வாஹம், ஆவுஸோ, சதுன்னம் ஸதிபட்டா²னானம் பா⁴விதத்தா ப³ஹுலீகதத்தா மஹாபி⁴ஞ்ஞதம் பத்தோ. இமேஸஞ்ச பனாஹம், ஆவுஸோ, சதுன்னம் ஸதிபட்டா²னானம் பா⁴விதத்தா ப³ஹுலீகதத்தா ஸஹஸ்ஸம் லோகம் அபி⁴ஜானாமீ’’தி. அட்ட²மம்.