4. மேத்தாஸஹக³தஸுத்தம்

235. ஏகம் ஸமயம் ப⁴க³வா கோலியேஸு விஹரதி ஹலித்³த³வஸனம் நாம கோலியானம் நிக³மோ. அத² கோ² ஸம்ப³ஹுலா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய ஹலித்³த³வஸனம் பிண்டா³ய பவிஸிம்ஸு. அத² கோ² தேஸம் பி⁴க்கூ²னம் ஏதத³ஹோஸி – ‘‘அதிப்பகோ³ கோ² தாவ ஹலித்³த³வஸனே பிண்டா³ய சரிதும். யம்னூன மயம் யேன அஞ்ஞதித்தி²யானம் பரிப்³பா³ஜகானம் ஆராமோ தேனுபஸங்கமேய்யாமா’’தி.

அத² கோ² தே பி⁴க்கூ² யேன அஞ்ஞதித்தி²யானம் பரிப்³பா³ஜகானம் ஆராமோ தேனுபஸங்கமிம்ஸு; உபஸங்கமித்வா தேஹி அஞ்ஞதித்தி²யேஹி பரிப்³பா³ஜகேஹி ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னே கோ² தே பி⁴க்கூ² அஞ்ஞதித்தி²யா பரிப்³பா³ஜகா ஏதத³வோசும் –

‘‘ஸமணோ, ஆவுஸோ, கோ³தமோ ஸாவகானம் ஏவம் த⁴ம்மம் தே³ஸேதி – ‘ஏத² தும்ஹே, பி⁴க்க²வே, பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே மேத்தாஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரத². கருணாஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் கருணாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரத². முதி³தாஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் முதி³தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரத². உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதா²’’’தி.

‘‘மயம்பி கோ², ஆவுஸோ, ஸாவகானம் ஏவம் த⁴ம்மம் தே³ஸேம – ‘ஏத² தும்ஹே, ஆவுஸோ, பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே மேத்தாஸஹக³தேன சேதஸா ஏகம் தி³ஸம் ப²ரித்வா விஹரத²…பே… கருணாஸஹக³தேன சேதஸா… முதி³தாஸஹக³தேன சேதஸா… உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதா²’தி. இத⁴ நோ, ஆவுஸோ, கோ விஸேஸோ, கோ அதி⁴ப்பயாஸோ, கிம் நானாகரணம் ஸமணஸ்ஸ வா கோ³தமஸ்ஸ அம்ஹாகம் வா, யதி³த³ம் – த⁴ம்மதே³ஸனாய வா த⁴ம்மதே³ஸனம், அனுஸாஸனியா வா அனுஸாஸனி’’ந்தி?

அத² கோ² தே பி⁴க்கூ² தேஸம் அஞ்ஞதித்தி²யானம் பரிப்³பா³ஜகானம் பா⁴ஸிதம் நேவ அபி⁴னந்தி³ம்ஸு நப்படிக்கோஸிம்ஸு. அனபி⁴னந்தி³த்வா அப்படிக்கோஸித்வா உட்டா²யாஸனா பக்கமிம்ஸு – ‘‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ம் ஆஜானிஸ்ஸாமா’’தி. அத² கோ² தே பி⁴க்கூ² ஹலித்³த³வஸனே பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் –

‘‘இத⁴ மயம், ப⁴ந்தே, புப்³ப³ண்ஹஸமயம் நிவாஸேத்வா பத்தசீவரமாதா³ய ஹலித்³த³வஸனே பிண்டா³ய பவிஸிம்ஹ. தேஸம் நோ, ப⁴ந்தே, அம்ஹாகம் ஏதத³ஹோஸி – ‘அதிப்பகோ³ கோ² தாவ ஹலித்³த³வஸனே பிண்டா³ய சரிதும். யம்னூன மயம் யேன அஞ்ஞதித்தி²யானம் பரிப்³பா³ஜகானம் ஆராமோ தேனுபஸங்கமேய்யாமா’’’தி.

‘‘அத² கோ² மயம், ப⁴ந்தே, யேன அஞ்ஞதித்தி²யானம் பரிப்³பா³ஜகானம் ஆராமோ தேனுபஸங்கமிம்ஹ, உபஸங்கமித்வா தேஹி அஞ்ஞதித்தி²யேஹி பரிப்³பா³ஜகேஹி ஸத்³தி⁴ம் ஸம்மோதி³ம்ஹ. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஹ. ஏகமந்தம் நிஸின்னே கோ² அம்ஹே, ப⁴ந்தே, தே அஞ்ஞதித்தி²யா பரிப்³பா³ஜகா ஏதத³வோசும் –

‘‘ஸமணோ, ஆவுஸோ, கோ³தமோ ஸாவகானம் ஏவம் த⁴ம்மம் தே³ஸேதி – ‘ஏத² தும்ஹே, பி⁴க்க²வே, பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே மேத்தாஸஹக³தேன சேதஸா ஏகம் தி³ஸம் ப²ரித்வா விஹரத²…பே… கருணாஸஹக³தேன சேதஸா … முதி³தாஸஹக³தேன சேதஸா… உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதா²’’’தி.

‘‘மயம்பி கோ², ஆவுஸோ, ஸாவகானம் ஏவம் த⁴ம்மம் தே³ஸேம – ‘ஏத² தும்ஹே, ஆவுஸோ, பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே மேத்தாஸஹக³தேன சேதஸா ஏகம் தி³ஸம் ப²ரித்வா விஹரத²…பே… கருணாஸஹக³தேன சேதஸா…பே… முதி³தாஸஹக³தேன சேதஸா…பே… உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரத², ததா² து³தியம், ததா² ததியம், ததா² சதுத்த²ம்; இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதா²’தி. இத⁴ நோ, ஆவுஸோ, கோ விஸேஸோ, கோ அதி⁴ப்பயாஸோ, கிம் நானாகரணம் ஸமணஸ்ஸ வா கோ³தமஸ்ஸ அம்ஹாகம் வா, யதி³த³ம், த⁴ம்மதே³ஸனாய வா த⁴ம்மதே³ஸனம், அனுஸாஸனியா வா அனுஸாஸனி’’ந்தி?

அத² கோ² மயம், ப⁴ந்தே, தேஸம் அஞ்ஞதித்தி²யானம் பரிப்³பா³ஜகானம் பா⁴ஸிதம் நேவ அபி⁴னந்தி³ம்ஹ நப்படிக்கோஸிம்ஹ, அனபி⁴னந்தி³த்வா அப்படிக்கோஸித்வா உட்டா²யாஸனா பக்கமிம்ஹ – ‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ம் ஆஜானிஸ்ஸாமா’தி.

‘‘ஏவம்வாதி³னோ, பி⁴க்க²வே, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘கத²ம் பா⁴விதா பனாவுஸோ, மேத்தாசேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? கத²ம் பா⁴விதா பனாவுஸோ, கருணாசேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? கத²ம் பா⁴விதா பனாவுஸோ, முதி³தாசேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? கத²ம் பா⁴விதா பனாவுஸோ, உபேக்கா²சேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா’’’தி? ஏவம் புட்டா², பி⁴க்க²வே, அஞ்ஞதித்தி²யா பரிப்³பா³ஜகா ந சேவ ஸம்பாயிஸ்ஸந்தி, உத்தரிஞ்ச விகா⁴தம் ஆபஜ்ஜிஸ்ஸந்தி. தம் கிஸ்ஸ ஹேது? யதா² தம், பி⁴க்க²வே, அவிஸயஸ்மிம். ‘‘நாஹம் தம், பி⁴க்க²வே, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய, யோ இமேஸம் பஞ்ஹானம் வேய்யாகரணேன சித்தம் ஆராதே⁴ய்ய, அஞ்ஞத்ர ததா²க³தேன வா ததா²க³தஸாவகேன வா இதோ வா பன ஸுத்வா’’.

‘‘கத²ம் பா⁴விதா ச, பி⁴க்க²வே, மேத்தாசேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? இத⁴, பி⁴க்க²வே, பி⁴க்கு² மேத்தாஸஹக³தம் ஸதிஸம்போ³ஜ்ஜ²ங்க³ம் பா⁴வேதி…பே… மேத்தாஸஹக³தம் உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஸோ ஸசே ஆகங்க²தி ‘அப்படிகூலே படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி ‘படிகூலே அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி ‘அப்படிகூலே ச படிகூலே ச படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி ‘படிகூலே ச அப்படிகூலே ச அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி ‘அப்படிகூலஞ்ச படிகூலஞ்ச தது³ப⁴யம் அபி⁴னிவஜ்ஜேத்வா உபேக்க²கோ விஹரேய்யம் ஸதோ ஸம்பஜானோ’தி, உபேக்க²கோ ச தத்த² விஹரதி ஸதோ ஸம்பஜானோ, ஸுப⁴ம் வா கோ² பன விமோக்க²ம் உபஸம்பஜ்ஜ விஹரதி. ஸுப⁴பரமாஹம், பி⁴க்க²வே, மேத்தாசேதோவிமுத்திம் வதா³மி, இத⁴பஞ்ஞஸ்ஸ பி⁴க்கு²னோ உத்தரிவிமுத்திம் அப்படிவிஜ்ஜ²தோ.

‘‘கத²ம் பா⁴விதா ச, பி⁴க்க²வே, கருணாசேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? இத⁴, பி⁴க்க²வே, பி⁴க்கு² கருணாஸஹக³தம் ஸதிஸம்போ³ஜ்ஜ²ங்க³ம் பா⁴வேதி…பே… கருணாஸஹக³தம் உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஸோ ஸசே ஆகங்க²தி ‘அப்படிகூலே படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி…பே… ஸசே ஆகங்க²தி ‘அப்படிகூலஞ்ச படிகூலஞ்ச தது³ப⁴யம் அபி⁴னிவஜ்ஜேத்வா உபேக்க²கோ விஹரேய்யம் ஸதோ ஸம்பஜானோ’தி, உபேக்க²கோ தத்த² விஹரதி ஸதோ ஸம்பஜானோ. ஸப்³ப³ஸோ வா பன ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஆகாஸானஞ்சாயதனபரமாஹம், பி⁴க்க²வே, கருணாசேதோவிமுத்திம் வதா³மி, இத⁴பஞ்ஞஸ்ஸ பி⁴க்கு²னோ உத்தரிவிமுத்திம் அப்படிவிஜ்ஜ²தோ.

‘‘கத²ம் பா⁴விதா ச, பி⁴க்க²வே, முதி³தாசேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? இத⁴, பி⁴க்க²வே, பி⁴க்கு² முதி³தாஸஹக³தம் ஸதிஸம்போ³ஜ்ஜ²ங்க³ம் பா⁴வேதி…பே… முதி³தாஸஹக³தம் உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஸோ ஸசே ஆகங்க²தி ‘அப்படிகூலே படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி …பே… ஸசே ஆகங்க²தி ‘அப்படிகூலஞ்ச படிகூலஞ்ச தது³ப⁴யம் அபி⁴னிவஜ்ஜேத்வா உபேக்க²கோ விஹரேய்யம் ஸதோ ஸம்பஜானோ’தி, உபேக்க²கோ தத்த² விஹரதி ஸதோ ஸம்பஜானோ. ஸப்³ப³ஸோ வா பன ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. விஞ்ஞாணஞ்சாயதனபரமாஹம், பி⁴க்க²வே, முதி³தாசேதோவிமுத்திம் வதா³மி, இத⁴பஞ்ஞஸ்ஸ பி⁴க்கு²னோ உத்தரிவிமுத்திம் அப்படிவிஜ்ஜ²தோ.

‘‘கத²ம் பா⁴விதா ச, பி⁴க்க²வே, உபேக்கா²சேதோவிமுத்தி, கிம்க³திகா ஹோதி, கிம்பரமா, கிம்ப²லா, கிம்பரியோஸானா? இத⁴, பி⁴க்க²வே, பி⁴க்கு² உபேக்கா²ஸஹக³தம் ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… உபேக்கா²ஸஹக³தம் உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஸோ ஸசே ஆகங்க²தி ‘அப்படிகூலே படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி ‘படிகூலே அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி ‘அப்படிகூலே ச படிகூலே ச படிகூலஸஞ்ஞீ விஹரேய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி ‘படிகூலே ச அப்படிகூலே ச அப்படிகூலஸஞ்ஞீ விஹரேய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி ‘அப்படிகூலஞ்ச படிகூலஞ்ச தது³ப⁴யம் அபி⁴னிவஜ்ஜேத்வா உபேக்க²கோ விஹரேய்யம் ஸதோ ஸம்பஜானோ’தி, உபேக்க²கோ தத்த² விஹரதி ஸதோ ஸம்பஜானோ. ஸப்³ப³ஸோ வா பன விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஆகிஞ்சஞ்ஞாயதனபரமாஹம், பி⁴க்க²வே, உபேக்கா²சேதோவிமுத்திம் வதா³மி, இத⁴பஞ்ஞஸ்ஸ பி⁴க்கு²னோ உத்தரிவிமுத்திம் அப்படிவிஜ்ஜ²தோ’’தி. சதுத்த²ம்.