4. நீவரணவக்³கோ³

1. பட²மகுஸலஸுத்தம்

212. ‘‘யே கேசி, பி⁴க்க²வே, த⁴ம்மா குஸலா குஸலபா⁴கி³யா குஸலபக்கி²கா, ஸப்³பே³ தே அப்பமாத³மூலகா அப்பமாத³ஸமோஸரணா; அப்பமாதோ³ தேஸம் த⁴ம்மானம் அக்³க³மக்கா²யதி. அப்பமத்தஸ்ஸேதம், பி⁴க்க²வே, பி⁴க்கு²னோ பாடிகங்க²ம் – ஸத்த போ³ஜ்ஜ²ங்கே³ பா⁴வேஸ்ஸதி, ஸத்த போ³ஜ்ஜ²ங்கே³ ப³ஹுலீகரிஸ்ஸதி.

‘‘கத²ஞ்ச, பி⁴க்க²வே, பி⁴க்கு² அப்பமத்தோ ஸத்த போ³ஜ்ஜ²ங்கே³ பா⁴வேதி, ஸத்த போ³ஜ்ஜ²ங்கே³ ப³ஹுலீகரோதி? இத⁴, பி⁴க்க²வே, பி⁴க்கு² ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம்…பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² அப்பமத்தோ ஸத்த போ³ஜ்ஜ²ங்கே³ பா⁴வேதி, ஸத்த போ³ஜ்ஜ²ங்கே³ ப³ஹுலீகரோதீ’’தி. பட²மம்.

2. து³தியகுஸலஸுத்தம்

213. ‘‘யே கேசி, பி⁴க்க²வே, த⁴ம்மா குஸலா குஸலபா⁴கி³யா குஸலபக்கி²கா, ஸப்³பே³ தே யோனிஸோமனஸிகாரமூலகா யோனிஸோமனஸிகாரஸமோஸரணா; யோனிஸோமனஸிகாரோ தேஸம் த⁴ம்மானம் அக்³க³மக்கா²யதி. யோனிஸோமனஸிகாரஸம்பன்னஸ்ஸேதம், பி⁴க்க²வே, பி⁴க்கு²னோ பாடிகங்க²ம் – ஸத்த போ³ஜ்ஜ²ங்கே³ பா⁴வேஸ்ஸதி, ஸத்த போ³ஜ்ஜ²ங்கே³ ப³ஹுலீகரிஸ்ஸதி.

‘‘கத²ஞ்ச, பி⁴க்க²வே, பி⁴க்கு² யோனிஸோமனஸிகாரஸம்பன்னோ ஸத்த போ³ஜ்ஜ²ங்கே³ பா⁴வேதி, ஸத்த போ³ஜ்ஜ²ங்கே³ ப³ஹுலீகரோதி? இத⁴, பி⁴க்க²வே, பி⁴க்கு² ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம்…பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² யோனிஸோமனஸிகாரஸம்பன்னோ ஸத்த போ³ஜ்ஜ²ங்கே³ பா⁴வேதி, ஸத்த போ³ஜ்ஜ²ங்கே³ ப³ஹுலீகரோதீ’’தி. து³தியம்.

3. உபக்கிலேஸஸுத்தம்

214. ‘‘பஞ்சிமே, பி⁴க்க²வே, ஜாதரூபஸ்ஸ உபக்கிலேஸா, யேஹி உபக்கிலேஸேஹி உபக்கிலிட்ட²ம் ஜாதரூபம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா உபேதி கம்மாய. கதமே பஞ்ச? அயோ, பி⁴க்க²வே, ஜாதரூபஸ்ஸ உபக்கிலேஸோ, யேன உபக்கிலேஸேன உபக்கிலிட்ட²ம் ஜாதரூபம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா உபேதி கம்மாய. லோஹம், பி⁴க்க²வே, ஜாதரூபஸ்ஸ உபக்கிலேஸோ, யேன உபக்கிலேஸேன உபக்கிலிட்ட²ம் ஜாதரூபம்…பே… திபு, பி⁴க்க²வே, ஜாதரூபஸ்ஸ உபக்கிலேஸோ…பே… ஸீஸம், பி⁴க்க²வே, ஜாதரூபஸ்ஸ உபக்கிலேஸோ…பே… ஸஜ்ஜு², பி⁴க்க²வே, ஜாதரூபஸ்ஸ உபக்கிலேஸோ, யேன உபக்கிலேஸேன உபக்கிலிட்ட²ம் ஜாதரூபம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா உபேதி கம்மாய. இமே கோ², பி⁴க்க²வே, பஞ்ச ஜாதரூபஸ்ஸ உபக்கிலேஸா, யேஹி உபக்கிலேஸேஹி உபக்கிலிட்ட²ம் ஜாதரூபம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா உபேதி கம்மாய.

‘‘ஏவமேவ கோ², பி⁴க்க²வே, பஞ்சிமே சித்தஸ்ஸ உபக்கிலேஸா, யேஹி உபக்கிலேஸேஹி உபக்கிலிட்ட²ம் சித்தம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா ஸமாதி⁴யதி ஆஸவானம் க²யாய. கதமே பஞ்ச? காமச்ச²ந்தோ³, பி⁴க்க²வே, சித்தஸ்ஸ உபக்கிலேஸோ, யேன உபக்கிலேஸேன உபக்கிலிட்ட²ம் சித்தம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா ஸமாதி⁴யதி ஆஸவானம் க²யாய…பே… இமே கோ², பி⁴க்க²வே, பஞ்ச சித்தஸ்ஸ உபேக்கிலேஸா, யேஹி உபக்கிலேஸேஹி உபக்கிலிட்ட²ம் சித்தம் ந சேவ முது³ ஹோதி ந ச கம்மனியம், ந ச பப⁴ஸ்ஸரம் பப⁴ங்கு³ ச, ந ச ஸம்மா ஸமாதி⁴யதி ஆஸவானம் க²யாயா’’தி. ததியம்.

4. அனுபக்கிலேஸஸுத்தம்

215. ‘‘ஸத்திமே, பி⁴க்க²வே, போ³ஜ்ஜ²ங்கா³ அனாவரணா அனீவரணா சேதஸோ அனுபக்கிலேஸா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸம்வத்தந்தி. கதமே ஸத்த? ஸதிஸம்போ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனுபக்கிலேஸோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸம்வத்ததி…பே… உபேக்கா²ஸம்போ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனுபக்கிலேஸோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸம்வத்ததி. இமே கோ², பி⁴க்க²வே, ஸத்த போ³ஜ்ஜ²ங்கா³ அனாவரணா அனீவரணா சேதஸோ அனுபக்கிலேஸா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸம்வத்தந்தீ’’தி. சதுத்த²ம்.

5. அயோனிஸோமனஸிகாரஸுத்தம்

216. ‘‘அயோனிஸோ, பி⁴க்க²வே, மனஸிகரோதோ அனுப்பன்னோ சேவ காமச்ச²ந்தோ³ உப்பஜ்ஜதி, உப்பன்னோ ச காமச்ச²ந்தோ³ பி⁴ய்யோபா⁴வாய வேபுல்லாய ஸம்வத்ததி; அனுப்பன்னோ சேவ ப்³யாபாதோ³ உப்பஜ்ஜதி, உப்பன்னோ ச ப்³யாபாதோ³ பி⁴ய்யோபா⁴வாய வேபுல்லாய ஸம்வத்ததி; அனுப்பன்னஞ்சேவ தி²னமித்³த⁴ம் உப்பஜ்ஜதி, உப்பன்னஞ்ச தி²னமித்³த⁴ம் பி⁴ய்யோபா⁴வாய வேபுல்லாய ஸம்வத்ததி; அனுப்பன்னஞ்சேவ உத்³த⁴ச்சகுக்குச்சம் உப்பஜ்ஜதி, உப்பன்னஞ்ச உத்³த⁴ச்சகுக்குச்சம் பி⁴ய்யோபா⁴வாய வேபுல்லாய ஸம்வத்ததி; அனுப்பன்னா சேவ விசிகிச்சா² உப்பஜ்ஜதி, உப்பன்னா ச விசிகிச்சா² பி⁴ய்யோபா⁴வாய வேபுல்லாய ஸம்வத்ததீ’’தி. பஞ்சமம்.

6. யோனிஸோமனஸிகாரஸுத்தம்

217. ‘‘யோனிஸோ ச கோ², பி⁴க்க²வே, மனஸிகரோதோ அனுப்பன்னோ சேவ ஸதிஸம்போ³ஜ்ஜ²ங்கோ³ உப்பஜ்ஜதி, உப்பன்னோ ச ஸதிஸம்போ³ஜ்ஜ²ங்கோ³ பா⁴வனாபாரிபூரிம் க³ச்ச²தி…பே… அனுப்பன்னோ சேவ உபேக்கா²ஸம்போ³ஜ்ஜ²ங்கோ³ உப்பஜ்ஜதி, உப்பன்னோ ச உபேக்கா²ஸம்போ³ஜ்ஜ²ங்கோ³ பா⁴வனாபாரிபூரிம் க³ச்ச²தீ’’தி. ச²ட்ட²ம்.

7. பு³த்³தி⁴ஸுத்தம்

218. ‘‘ஸத்திமே, பி⁴க்க²வே, போ³ஜ்ஜ²ங்கா³ பா⁴விதா ப³ஹுலீகதா பு³த்³தி⁴யா அபரிஹானாய ஸம்வத்தந்தி. கதமே ஸத்த? ஸதிஸம்போ³ஜ்ஜ²ங்கோ³…பே… உபேக்கா²ஸம்போ³ஜ்ஜ²ங்கோ³. இமே கோ², பி⁴க்க²வே, ஸத்த போ³ஜ்ஜ²ங்கா³ பா⁴விதா ப³ஹுலீகதா பு³த்³தி⁴யா அபரிஹானாய ஸம்வத்தந்தீ’’தி. ஸத்தமம்.

8. ஆவரணனீவரணஸுத்தம்

219. ‘‘பஞ்சிமே, பி⁴க்க²வே, ஆவரணா நீவரணா சேதஸோ உபக்கிலேஸா பஞ்ஞாய து³ப்³ப³லீகரணா. கதமே பஞ்ச? காமச்ச²ந்தோ³, பி⁴க்க²வே, ஆவரணோ நீவரணோ சேதஸோ உபக்கிலேஸோ பஞ்ஞாய து³ப்³ப³லீகரணோ. ப்³யாபாதோ³, பி⁴க்க²வே, ஆவரணோ நீவரணோ சேதஸோ உபக்கிலேஸோ பஞ்ஞாய து³ப்³ப³லீகரணோ. தி²னமித்³த⁴ம், பி⁴க்க²வே, ஆவரணம் நீவரணம் சேதஸோ உபக்கிலேஸம் பஞ்ஞாய து³ப்³ப³லீகரணம். உத்³த⁴ச்சகுக்குச்சம், பி⁴க்க²வே, ஆவரணம் நீவரணம் சேதஸோ உபக்கிலேஸம் பஞ்ஞாய து³ப்³ப³லீகரணம். விசிகிச்சா², பி⁴க்க²வே, ஆவரணா நீவரணா சேதஸோ உபக்கிலேஸா பஞ்ஞாய து³ப்³ப³லீகரணா. இமே கோ², பி⁴க்க²வே, பஞ்ச ஆவரணா நீவரணா சேதஸோ உபக்கிலேஸா பஞ்ஞாய து³ப்³ப³லீகரணா.

‘‘ஸத்திமே, பி⁴க்க²வே, போ³ஜ்ஜ²ங்கா³ அனாவரணா அனீவரணா சேதஸோ அனுபக்கிலேஸா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸம்வத்தந்தி. கதமே ஸத்த? ஸதிஸம்போ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனுபக்கிலேஸோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸம்வத்ததி…பே… உபேக்கா²ஸம்போ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனுபக்கிலேஸோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸம்வத்ததி. இமே கோ², பி⁴க்க²வே, ஸத்த போ³ஜ்ஜ²ங்கா³ அனாவரணா அனீவரணா சேதஸோ அனுபக்கிலேஸா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸம்வத்தந்தீதி.

‘‘யஸ்மிம், பி⁴க்க²வே, ஸமயே அரியஸாவகோ அட்டி²ம் கத்வா மனஸி கத்வா ஸப்³ப³ம் சேதஸோ ஸமன்னாஹரித்வா ஓஹிதஸோதோ த⁴ம்மம் ஸுணாதி, இமஸ்ஸ பஞ்ச நீவரணா தஸ்மிம் ஸமயே ந ஹோந்தி. ஸத்த போ³ஜ்ஜ²ங்கா³ தஸ்மிம் ஸமயே பா⁴வனாபாரிபூரிம் க³ச்ச²ந்தி.

‘‘கதமே பஞ்ச நீவரணா தஸ்மிம் ஸமயே ந ஹோந்தி? காமச்ச²ந்த³னீவரணம் தஸ்மிம் ஸமயே ந ஹோதி, ப்³யாபாத³னீவரணம் தஸ்மிம் ஸமயே ந ஹோதி, தி²னமித்³த⁴னீவரணம் தஸ்மிம் ஸமயே ந ஹோதி, உத்³த⁴ச்சகுக்குச்சனீவரணம் தஸ்மிம் ஸமயே ந ஹோதி, விசிகிச்சா²னீவரணம் தஸ்மிம் ஸமயே ந ஹோதி. இமஸ்ஸ பஞ்ச நீவரணா தஸ்மிம் ஸமயே ந ஹோந்தி.

‘‘கதமே ஸத்த போ³ஜ்ஜ²ங்கா³ தஸ்மிம் ஸமயே பா⁴வனாபாரிபூரிம் க³ச்ச²ந்தி? ஸதிஸம்போ³ஜ்ஜ²ங்கோ³ தஸ்மிம் ஸமயே பா⁴வனாபாரிபூரிம் க³ச்ச²தி…பே… உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பா⁴வனாபாரிபூரிம் க³ச்ச²தி. இமே ஸத்த போ³ஜ்ஜ²ங்கா³ தஸ்மிம் ஸமயே பா⁴வனாபாரிபூரிம் க³ச்ச²ந்தி. யஸ்மிம், பி⁴க்க²வே, ஸமயே அரியஸாவகோ அட்டி²ம் கத்வா மனஸி கத்வா ஸப்³ப³ம் சேதஸோ ஸமன்னாஹரித்வா ஓஹிதஸோதோ த⁴ம்மம் ஸுணாதி, இமஸ்ஸ பஞ்ச நீவரணா தஸ்மிம் ஸமயே ந ஹோந்தி. இமே ஸத்த போ³ஜ்ஜ²ங்கா³ தஸ்மிம் ஸமயே பா⁴வனாபாரிபூரிம் க³ச்ச²ந்தீ’’தி. அட்ட²மம்.

9. ருக்க²ஸுத்தம்

220. ‘‘ஸந்தி, பி⁴க்க²வே, மஹாருக்கா² அணுபீ³ஜா மஹாகாயா ருக்கா²னம் அஜ்ஜா²ருஹா, யேஹி ருக்கா² அஜ்ஜா²ரூள்ஹா ஓப⁴க்³க³விப⁴க்³கா³ விபதிதா ஸேந்தி. கதமே ச தே, பி⁴க்க²வே, மஹாருக்கா² அணுபீ³ஜா மஹாகாயா ருக்கா²னம் அஜ்ஜா²ருஹா, யேஹி ருக்கா² அஜ்ஜா²ரூள்ஹா ஓப⁴க்³க³விப⁴க்³கா³ விபதிதா ஸேந்தி [ஸேந்தி. ஸேய்யதி²த³ம் (கத்த²சி)]? அஸ்ஸத்தோ², நிக்³ரோதோ⁴, பிலக்கோ², உது³ம்ப³ரோ, கச்ச²கோ, கபித்த²னோ – இமே கோ² தே, பி⁴க்க²வே, மஹாருக்கா² அணுபீ³ஜா மஹாகாயா ருக்கா²னம் அஜ்ஜா²ருஹா, யேஹி ருக்கா² அஜ்ஜா²ரூள்ஹா ஓப⁴க்³க³விப⁴க்³கா³ விபதிதா ஸேந்தி. ஏவமேவ கோ², பி⁴க்க²வே, இதே⁴கச்சோ குலபுத்தோ யாதி³ஸகே காமே ஓஹாய அகா³ரஸ்மா அனகா³ரியம் பப்³ப³ஜிதோ ஹோதி, ஸோ தாதி³ஸகேஹி காமேஹி ததோ வா பாபிட்ட²தரேஹி ஓப⁴க்³க³விப⁴க்³கோ³ விபதிதோ ஸேதி.

‘‘பஞ்சிமே, பி⁴க்க²வே, ஆவரணா நீவரணா சேதஸோ அஜ்ஜா²ருஹா பஞ்ஞாய து³ப்³ப³லீகரணா. கதமே பஞ்ச? காமச்ச²ந்தோ³, பி⁴க்க²வே, ஆவரணோ நீவரணோ சேதஸோ அஜ்ஜா²ருஹோ பஞ்ஞாய து³ப்³ப³லீகரணோ. ப்³யாபாதோ³, பி⁴க்க²வே, ஆவரணோ நீவரணோ சேதஸோ அஜ்ஜா²ருஹோ பஞ்ஞாய து³ப்³ப³லீகரணோ. தி²னமித்³த⁴ம், பி⁴க்க²வே, ஆவரணம் நீவரணம் சேதஸோ அஜ்ஜா²ருஹம் பஞ்ஞாய து³ப்³ப³லீகரணம். உத்³த⁴ச்சகுக்குச்சம், பி⁴க்க²வே, ஆவரணம் நீவரணம் சேதஸோ அஜ்ஜா²ருஹம் பஞ்ஞாய து³ப்³ப³லீகரணம். விசிகிச்சா², பி⁴க்க²வே, ஆவரணா நீவரணா சேதஸோ அஜ்ஜா²ருஹா பஞ்ஞாய து³ப்³ப³லீகரணா. இமே கோ², பி⁴க்க²வே, பஞ்ச ஆவரணா நீவரணா சேதஸோ அஜ்ஜா²ருஹா பஞ்ஞாய து³ப்³ப³லீகரணா.

‘‘ஸத்திமே, பி⁴க்க²வே, போ³ஜ்ஜ²ங்கா³ அனாவரணா அனீவரணா சேதஸோ அனஜ்ஜா²ருஹா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸம்வத்தந்தி. கதமே ஸத்த? ஸதிஸம்போ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனஜ்ஜா²ருஹோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸம்வத்ததி…பே… உபேக்கா²ஸம்போ³ஜ்ஜ²ங்கோ³, பி⁴க்க²வே, அனாவரணோ அனீவரணோ சேதஸோ அனஜ்ஜா²ருஹோ பா⁴விதோ ப³ஹுலீகதோ விஜ்ஜாவிமுத்திப²லஸச்சி²கிரியாய ஸம்வத்ததி. இமே கோ², பி⁴க்க²வே, ஸத்த போ³ஜ்ஜ²ங்கா³ அனாவரணா அனீவரணா சேதஸோ அனஜ்ஜா²ருஹா பா⁴விதா ப³ஹுலீகதா விஜ்ஜாவிமுத்திப²லஸச்சி²கிரியாய ஸம்வத்தந்தீ’’தி. நவமம்.

10. நீவரணஸுத்தம்

221. ‘‘பஞ்சிமே, பி⁴க்க²வே, நீவரணா அந்த⁴கரணா அசக்கு²கரணா அஞ்ஞாணகரணா பஞ்ஞானிரோதி⁴கா விகா⁴தபக்கி²யா அனிப்³பா³னஸம்வத்தனிகா. கதமே பஞ்ச? காமச்ச²ந்த³னீவரணம், பி⁴க்க²வே, அந்த⁴கரணம் அசக்கு²கரணம் அஞ்ஞாணகரணம் பஞ்ஞானிரோதி⁴கம் விகா⁴தபக்கி²யம் அனிப்³பா³னஸம்வத்தனிகம். ப்³யாபாத³னீவரணம், பி⁴க்க²வே…பே… தி²னமித்³த⁴னீவரணம், பி⁴க்க²வே… உத்³த⁴ச்சகுக்குச்சனீவரணம், பி⁴க்க²வே… விசிகிச்சா²னீவரணம், பி⁴க்க²வே, அந்த⁴கரணம் அசக்கு²கரணம் அஞ்ஞாணகரணம் பஞ்ஞானிரோதி⁴கம் விகா⁴தபக்கி²யம் அனிப்³பா³னஸம்வத்தனிகம். இமே கோ², பி⁴க்க²வே, பஞ்ச நீவரணா அந்த⁴கரணா அசக்கு²கரணா அஞ்ஞாணகரணா பஞ்ஞானிரோதி⁴கா விகா⁴தபக்கி²யா அனிப்³பா³னஸம்வத்தனிகா.

‘‘ஸத்திமே, பி⁴க்க²வே, போ³ஜ்ஜ²ங்கா³ சக்கு²கரணா ஞாணகரணா பஞ்ஞாபு³த்³தி⁴யா அவிகா⁴தபக்கி²யா நிப்³பா³னஸம்வத்தனிகா. கதமே ஸத்த? ஸதிஸம்போ³ஜ்ஜ²ங்கோ³, பி⁴க்க²வே, சக்கு²கரணோ ஞாணகரணோ பஞ்ஞாபு³த்³தி⁴யோ அவிகா⁴தபக்கி²யோ நிப்³பா³னஸம்வத்தனிகோ…பே… உபேக்கா²ஸம்போ³ஜ்ஜ²ங்கோ³, பி⁴க்க²வே, சக்கு²கரணோ ஞாணகரணோ பஞ்ஞாபு³த்³தி⁴யோ அவிகா⁴தபக்கி²யோ நிப்³பா³னஸம்வத்தனிகோ. இமே கோ², பி⁴க்க²வே, ஸத்த போ³ஜ்ஜ²ங்கா³ சக்கு²கரணா ஞாணகரணா பஞ்ஞாபு³த்³தி⁴யா அவிகா⁴தபக்கி²யா நிப்³பா³னஸம்வத்தனிகா’’தி. த³ஸமம்.

நீவரணவக்³கோ³ சதுத்தோ².

தஸ்ஸுத்³தா³னம் –

த்³வே குஸலா கிலேஸா ச, த்³வே யோனிஸோ ச பு³த்³தி⁴ ச;

ஆவரணா நீவரணா ருக்க²ம், நீவரணஞ்ச தே த³ஸாதி.