9. ஏகத⁴ம்மஸுத்தம்

210. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி, யோ ஏவம் பா⁴விதோ ப³ஹுலீகதோ ஸம்யோஜனீயானம் த⁴ம்மானம் பஹானாய ஸம்வத்ததி, யத²யித³ம், பி⁴க்க²வே, ஸத்த போ³ஜ்ஜ²ங்கா³. கதமே ஸத்த? ஸதிஸம்போ³ஜ்ஜ²ங்கோ³…பே… உபேக்கா²ஸம்போ³ஜ்ஜ²ங்கோ³. கத²ம் பா⁴விதா ச, பி⁴க்க²வே, ஸத்த போ³ஜ்ஜ²ங்கா³ கத²ம் ப³ஹுலீகதா ஸம்யோஜனீயானம் த⁴ம்மானம் பஹானாய ஸம்வத்தந்தி?

‘‘இத⁴, பி⁴க்க²வே, பி⁴க்கு² ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம்…பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் பா⁴விதா கோ², பி⁴க்க²வே, ஸத்த போ³ஜ்ஜ²ங்கா³ ஏவம் ப³ஹுலீகதா ஸம்யோஜனீயானம் த⁴ம்மானம் பஹானாய ஸம்வத்தந்தி.

‘‘கதமே ச, பி⁴க்க²வே, ஸம்யோஜனீயா த⁴ம்மா? சக்கு², பி⁴க்க²வே, ஸம்யோஜனீயோ த⁴ம்மோ. ஏத்தே²தே உப்பஜ்ஜந்தி ஸம்யோஜனவினிப³ந்தா⁴ அஜ்ஜோ²ஸானா…பே… ஜிவ்ஹா ஸம்யோஜனீயா த⁴ம்மா. ஏத்தே²தே உப்பஜ்ஜந்தி ஸம்யோஜனவினிப³ந்தா⁴ அஜ்ஜோ²ஸானா…பே… மனோ ஸம்யோஜனீயோ த⁴ம்மோ. ஏத்தே²தே உப்பஜ்ஜந்தி ஸம்யோஜனவினிப³ந்தா⁴ அஜ்ஜோ²ஸானா. இமே வுச்சந்தி, பி⁴க்க²வே, ஸம்யோஜனீயா த⁴ம்மா’’தி. நவமம்.