4. அயோனிஸோமனஸிகாரஸுத்தம்

205. ‘‘அயோனிஸோ, பி⁴க்க²வே, மனஸிகரோதோ அனுப்பன்னோ சேவ காமச்ச²ந்தோ³ உப்பஜ்ஜதி, உப்பன்னோ ச காமச்ச²ந்தோ³ பி⁴ய்யோபா⁴வாய வேபுல்லாய ஸம்வத்ததி; அனுப்பன்னோ சேவ ப்³யாபாதோ³ உப்பஜ்ஜதி, உப்பன்னோ ச ப்³யாபாதோ³ பி⁴ய்யோபா⁴வாய வேபுல்லாய ஸம்வத்ததி; அனுப்பன்னஞ்சேவ தி²னமித்³த⁴ம் உப்பஜ்ஜதி, உப்பன்னஞ்ச தி²னமித்³த⁴ம் பி⁴ய்யோபா⁴வாய வேபுல்லாய ஸம்வத்ததி; அனுப்பன்னஞ்சேவ உத்³த⁴ச்சகுக்குச்சம் உப்பஜ்ஜதி, உப்பன்னஞ்ச உத்³த⁴ச்சகுக்குச்சம் பி⁴ய்யோபா⁴வாய வேபுல்லாய ஸம்வத்ததி; அனுப்பன்னா சேவ விசிகிச்சா² உப்பஜ்ஜதி, உப்பன்னா ச விசிகிச்சா² பி⁴ய்யோபா⁴வாய வேபுல்லாய ஸம்வத்ததி; அனுப்பன்னோ சேவ ஸதிஸம்போ³ஜ்ஜ²ங்கோ³ நுப்பஜ்ஜதி, உப்பன்னோ ச ஸதிஸம்போ³ஜ்ஜ²ங்கோ³ நிருஜ்ஜ²தி…பே… அனுப்பன்னோ சேவ உபேக்கா²ஸம்போ³ஜ்ஜ²ங்கோ³ நுப்பஜ்ஜதி, உப்பன்னோ ச உபேக்கா²ஸம்போ³ஜ்ஜ²ங்கோ³ நிருஜ்ஜ²தி.

யோனிஸோ ச கோ², பி⁴க்க²வே, மனஸிகரோதோ அனுப்பன்னோ சேவ காமச்ச²ந்தோ³ நுப்பஜ்ஜதி, உப்பன்னோ ச காமச்ச²ந்தோ³ பஹீயதி; அனுப்பன்னோ சேவ ப்³யாபாதோ³ நுப்பஜ்ஜதி, உப்பன்னோ ச ப்³யாபாதோ³ பஹீயதி; அனுப்பன்னஞ்சேவ தி²னமித்³த⁴ம் நுப்பஜ்ஜதி, உப்பன்னஞ்ச தி²னமித்³த⁴ம் பஹீயதி; அனுப்பன்னஞ்சேவ உத்³த⁴ச்சகுக்குச்சம் நுப்பஜ்ஜதி, உப்பன்னஞ்ச உத்³த⁴ச்சகுக்குச்சம் பஹீயதி; அனுப்பன்னா சேவ விசிகிச்சா² நுப்பஜ்ஜதி, உப்பன்னா ச விசிகிச்சா² பஹீயதி.

‘‘அனுப்பன்னோ சேவ ஸதிஸம்போ³ஜ்ஜ²ங்கோ³ உப்பஜ்ஜதி, உப்பன்னோ ச ஸதிஸம்போ³ஜ்ஜ²ங்கோ³ பா⁴வனாபாரிபூரிம் க³ச்ச²தி…பே… அனுப்பன்னோ சேவ உபேக்கா²ஸம்போ³ஜ்ஜ²ங்கோ³ உப்பஜ்ஜதி, உப்பன்னோ ச உபேக்கா²ஸம்போ³ஜ்ஜ²ங்கோ³ பா⁴வனாபாரிபூரிம் க³ச்ச²தீ’’தி. சதுத்த²ம்.