5. பி⁴க்கு²ஸுத்தம்

186. ஸாவத்தி²னிதா³னம். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘‘போ³ஜ்ஜ²ங்கா³, போ³ஜ்ஜ²ங்கா³’தி, ப⁴ந்தே, வுச்சந்தி. கித்தாவதா நு கோ², ப⁴ந்தே, ‘போ³ஜ்ஜ²ங்கா³’தி வுச்சந்தீ’’தி? ‘‘போ³தா⁴ய ஸம்வத்தந்தீதி கோ², பி⁴க்கு², தஸ்மா ‘போ³ஜ்ஜ²ங்கா³’தி வுச்சந்தி. இத⁴, பி⁴க்கு², ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். தஸ்ஸிமே ஸத்த போ³ஜ்ஜ²ங்கே³ பா⁴வயதோ காமாஸவாபி சித்தம் விமுச்சதி, ப⁴வாஸவாபி சித்தம் விமுச்சதி, அவிஜ்ஜாஸவாபி சித்தம் விமுச்சதி. விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. போ³தா⁴ய ஸம்வத்தந்தீதி, பி⁴க்கு², தஸ்மா ‘போ³ஜ்ஜ²ங்கா³’தி வுச்சந்தீ’’தி. பஞ்சமம்.