8. து³தியஸூரியஸுத்தம்

1108. ‘‘யாவகீவஞ்ச, பி⁴க்க²வே, சந்தி³மஸூரியா லோகே நுப்பஜ்ஜந்தி, நேவ தாவ மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. அந்த⁴தமம் ததா³ ஹோதி அந்த⁴காரதிமிஸா. நேவ தாவ ரத்திந்தி³வா [ரத்திதி³வா (க.)] பஞ்ஞாயந்தி, ந மாஸத்³த⁴மாஸா பஞ்ஞாயந்தி, ந உதுஸம்வச்ச²ரா பஞ்ஞாயந்தி.

‘‘யதோ ச கோ², பி⁴க்க²வே, சந்தி³மஸூரியா லோகே உப்பஜ்ஜந்தி, அத² மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. நேவ அந்த⁴காரதமம் ததா³ ஹோதி ந அந்த⁴காரதிமிஸா. அத² ரத்திந்தி³வா பஞ்ஞாயந்தி, மாஸத்³த⁴மாஸா பஞ்ஞாயந்தி, உதுஸம்வச்ச²ரா பஞ்ஞாயந்தி. ஏவமேவ கோ², பி⁴க்க²வே, யாவகீவஞ்ச ததா²க³தோ லோகே நுப்பஜ்ஜதி அரஹம் ஸம்மாஸம்பு³த்³தோ⁴, நேவ தாவ மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. அந்த⁴தமம் ததா³ ஹோதி அந்த⁴காரதிமிஸா. நேவ தாவ சதுன்னம் அரியஸச்சானம் ஆசிக்க²ணா ஹோதி தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம்.

‘‘யதோ ச கோ², பி⁴க்க²வே, ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴, அத² மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. நேவ அந்த⁴தமம் ததா³ ஹோதி ந அந்த⁴காரதிமிஸா. அத² கோ² சதுன்னம் அரியஸச்சானம் ஆசிக்க²ணா ஹோதி தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மம். கதமேஸம் சதுன்னம்? து³க்க²ஸ்ஸ அரியஸச்சஸ்ஸ…பே… து³க்க²னிரோத⁴கா³மினியா படிபதா³ய அரியஸச்சஸ்ஸ.

‘‘தஸ்மாதிஹ, பி⁴க்க²வே, ‘இத³ம் து³க்க²’ந்தி யோகோ³ கரணீயோ…பே… ‘அயம் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. அட்ட²மம்.