2. வஸ்ஸம்வுத்த²ஸுத்தம்

1048. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ பி⁴க்கு² ஸாவத்தி²யம் வஸ்ஸம்வுத்தோ² கபிலவத்து²ம் அனுப்பத்தோ ஹோதி கேனசிதே³வ கரணீயேன. அஸ்ஸோஸும் கோ² காபிலவத்த²வா ஸக்யா – ‘‘அஞ்ஞதரோ கிர பி⁴க்கு² ஸாவத்தி²யம் வஸ்ஸம்வுத்தோ² கபிலவத்து²ம் அனுப்பத்தோ’’தி.

அத² கோ² காபிலவத்த²வா ஸக்யா யேன ஸோ பி⁴க்கு² தேனுபஸங்கமிம்ஸு; உபஸங்கமித்வா தம் பி⁴க்கு²ம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² காபிலவத்த²வா ஸக்யா தம் பி⁴க்கு²ம் ஏதத³வோசும் – ‘‘கச்சி, ப⁴ந்தே, ப⁴க³வா அரோகோ³ சேவ ப³லவா சா’’தி? ‘‘அரோகோ³ சாவுஸோ, ப⁴க³வா ப³லவா சா’’தி. ‘‘கச்சி பன, ப⁴ந்தே, ஸாரிபுத்தமோக்³க³ல்லானா அரோகா³ சேவ ப³லவந்தோ சா’’தி? ‘‘ஸாரிபுத்தமோக்³க³ல்லானாபி கோ², ஆவுஸோ, அரோகா³ சேவ ப³லவந்தோ சா’’தி. ‘‘கச்சி பன, ப⁴ந்தே, பி⁴க்கு²ஸங்கோ⁴ அரோகோ³ ச ப³லவா சா’’தி. ‘‘பி⁴க்கு²ஸங்கோ⁴பி கோ², ஆவுஸோ, அரோகோ³ ச ப³லவா சா’’தி. ‘‘அத்தி² பன தே, ப⁴ந்தே, கிஞ்சி இமினா அந்தரவஸ்ஸேன ப⁴க³வதோ ஸம்முகா² ஸுதம் ஸம்முகா² படிக்³க³ஹித’’ந்தி? ‘‘ஸம்முகா² மேதம், ஆவுஸோ, ப⁴க³வதோ ஸுதம் ஸம்முகா² படிக்³க³ஹிதம் – ‘அப்பகா தே, பி⁴க்க²வே, பி⁴க்கூ² யே ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. அத² கோ² ஏதேவ ப³ஹுதரா பி⁴க்கூ² யே பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா’’’தி.

‘‘அபரம்பி கோ² மே, ஆவுஸோ, ப⁴க³வதோ ஸம்முகா² ஸுதம் ஸம்முகா² படிக்³க³ஹிதம் – ‘அப்பகா தே, பி⁴க்க²வே, பி⁴க்கூ² யே பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா. அத² கோ² ஏதேவ ப³ஹுதரா பி⁴க்கூ² யே திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மினோ, ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரிஸ்ஸந்தீ’’’தி.

‘‘அபரம்பி கோ² மே, ஆவுஸோ, ப⁴க³வதோ ஸம்முகா² ஸுதம் ஸம்முகா² படிக்³க³ஹிதம் – ‘அப்பகா தே, பி⁴க்க²வே, பி⁴க்கூ² யே திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா ஸகதா³கா³மினோ, ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரிஸ்ஸந்தி. அத² கோ² ஏதேவ ப³ஹுதரா பி⁴க்கூ² யே திண்ணம் ஸம்யோஜனானம் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’’’தி. து³தியம்.