3. த⁴ம்மதி³ன்னஸுத்தம்

1049. ஏகம் ஸமயம் ப⁴க³வா பா³ராணஸியம் விஹரதி இஸிபதனே மிக³தா³யே. அத² கோ² த⁴ம்மதி³ன்னோ உபாஸகோ பஞ்சஹி உபாஸகஸதேஹி ஸத்³தி⁴ம் யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² த⁴ம்மதி³ன்னோ உபாஸகோ ப⁴க³வந்தம் ஏதத³வோச – ‘‘ஓவத³து நோ, ப⁴ந்தே, ப⁴க³வா; அனுஸாஸது நோ, ப⁴ந்தே, ப⁴க³வா யம் அம்ஹாகம் அஸ்ஸ தீ³க⁴ரத்தம் ஹிதாய ஸுகா²யா’’தி.

‘‘தஸ்மாதிஹ வோ, த⁴ம்மதி³ன்னம், ஏவம் ஸிக்கி²தப்³ப³ம் – ‘யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதபடிஸம்யுத்தா தே காலேன காலம் உபஸம்பஜ்ஜ விஹரிஸ்ஸாமா’தி. ஏவஞ்ஹி வோ, த⁴ம்மதி³ன்ன, ஸிக்கி²தப்³ப³’’ந்தி. ‘‘ந கோ² நேதம், ப⁴ந்தே, ஸுகரம் அம்ஹேஹி புத்தஸம்பா³த⁴ஸயனம் அஜ்ஜா²வஸந்தேஹி காஸிகசந்த³னம் பச்சனுபோ⁴ந்தேஹி மாலாக³ந்த⁴விலேபனம் தா⁴ரயந்தேஹி ஜாதரூபரஜதம் ஸாதி³யந்தேஹி – யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதபடிஸம்யுத்தா தே காலேன காலம் உபஸம்பஜ்ஜ விஹரிதும். தேஸம் நோ, ப⁴ந்தே, ப⁴க³வா அம்ஹாகம் பஞ்சஸு ஸிக்கா²பதே³ஸு டி²தானம் உத்தரித⁴ம்மம் தே³ஸேதூ’’தி.

‘‘தஸ்மாதிஹ வோ, த⁴ம்மதி³ன்ன, ஏவம் ஸிக்கி²தப்³ப³ம் – ‘பு³த்³தே⁴ அவேச்சப்பஸாதே³ன ஸமன்னாக³தா ப⁴விஸ்ஸாம – இதிபி ஸோ ப⁴க³வா…பே… ஸத்தா² தே³வமனுஸ்ஸானம் பு³த்³தோ⁴ ப⁴க³வாதி. த⁴ம்மே…பே… ஸங்கே⁴…பே… அரியகந்தேஹி ஸீலேஹி ஸமன்னாக³தா ப⁴விஸ்ஸாம அக²ண்டே³ஹி…பே… ஸமாதி⁴ஸம்வத்தனிகேஹீ’தி. ஏவஞ்ஹி வோ, த⁴ம்மதி³ன்ன, ஸிக்கி²தப்³ப³’’ந்தி.

‘‘யானிமானி, ப⁴ந்தே, ப⁴க³வதா சத்தாரி ஸோதாபத்தியங்கா³னி தே³ஸிதானி, ஸம்விஜ்ஜந்தே தே த⁴ம்மா அம்ஹேஸு, மயஞ்ச தேஸு த⁴ம்மேஸு ஸந்தி³ஸ்ஸாம. மயஞ்ஹி ப⁴ந்தே, பு³த்³தே⁴ அவேச்சப்பஸாதே³ன ஸமன்னாக³தா – இதிபி ஸோ ப⁴க³வா…பே… ஸத்தா² தே³வமனுஸ்ஸானம் பு³த்³தோ⁴ ப⁴க³வாதி. த⁴ம்மே…பே… ஸங்கே⁴…பே… அரியகந்தேஹி ஸீலேஹி ஸமன்னாக³தா அக²ண்டே³ஹி…பே… ஸமாதி⁴ஸம்வத்தனிகேஹீ’’தி. ‘‘லாபா⁴ வோ, த⁴ம்மதி³ன்ன, ஸுலத்³த⁴ம் வோ, த⁴ம்மதி³ன்ன! ஸோதாபத்திப²லம் தும்ஹேஹி ப்³யாகத’’ந்தி. ததியம்.