2. து³தியவக்³கோ³

1. இச்சா²னங்க³லஸுத்தம்

987. ஏகம் ஸமயம் ப⁴க³வா இச்சா²னங்க³லே விஹரதி இச்சா²னங்க³லவனஸண்டே³. தத்ர கோ² ப⁴க³வா பி⁴க்கூ² ஆமந்தேஸி – ‘‘இச்சா²மஹம், பி⁴க்க²வே, தேமாஸம் படிஸல்லீயிதும். நாம்ஹி கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேனா’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுத்வா நாஸ்ஸுத⁴ கோசி ப⁴க³வந்தம் உபஸங்கமதி, அஞ்ஞத்ர ஏகேன பிண்ட³பாதனீஹாரகேன.

அத² கோ² ப⁴க³வா தஸ்ஸ தேமாஸஸ்ஸ அச்சயேன படிஸல்லானா வுட்டி²தோ பி⁴க்கூ² ஆமந்தேஸி – ‘‘ஸசே கோ², பி⁴க்க²வே, அஞ்ஞதித்தி²யா பரிப்³பா³ஜகா ஏவம் புச்சே²ய்யும் – ‘கதமேனாவுஸோ, விஹாரேன ஸமணோ கோ³தமோ வஸ்ஸாவாஸம் ப³ஹுலம் விஹாஸீ’தி, ஏவம் புட்டா² தும்ஹே, பி⁴க்க²வே, தேஸம் அஞ்ஞதித்தி²யானம் பரிப்³பா³ஜகானம் ஏவம் ப்³யாகரேய்யாத² – ‘ஆனாபானஸ்ஸதிஸமாதி⁴னா கோ², ஆவுஸோ, ப⁴க³வா வஸ்ஸாவாஸம் ப³ஹுலம் விஹாஸீ’தி. இதா⁴ஹம், பி⁴க்க²வே, ஸதோ அஸ்ஸஸாமி, ஸதோ பஸ்ஸஸாமி. தீ³க⁴ம் அஸ்ஸஸந்தோ ‘தீ³க⁴ம் அஸ்ஸஸாமீ’தி பஜானாமி, தீ³க⁴ம் பஸ்ஸஸந்தோ ‘தீ³க⁴ம் பஸ்ஸஸாமீ’தி பஜானாமி; ரஸ்ஸம் அஸ்ஸஸந்தோ ‘ரஸ்ஸம் அஸ்ஸஸாமீ’தி பஜானாமி, ரஸ்ஸம் பஸ்ஸஸந்தோ ‘ரஸ்ஸம் பஸ்ஸஸாமீ’தி பஜானாமி; ‘ஸப்³ப³காயப்படிஸம்வேதீ³ அஸ்ஸஸிஸ்ஸாமீ’தி பஜானாமி…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி பஜானாமி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி பஜானாமி’’.

‘‘யஞ்ஹி தம், பி⁴க்க²வே, ஸம்மா வத³மானோ வதே³ய்ய – ‘அரியவிஹாரோ’ இதிபி, ‘ப்³ரஹ்மவிஹாரோ’ இதிபி, ‘ததா²க³தவிஹாரோ’ இதிபி. ஆனாபானஸ்ஸதிஸமாதி⁴ம் ஸம்மா வத³மானோ வதே³ய்ய – ‘அரியவிஹாரோ’ இதிபி, ‘ப்³ரஹ்மவிஹாரோ’ இதிபி, ‘ததா²க³தவிஹாரோ’ இதிபி. யே தே, பி⁴க்க²வே, பி⁴க்கூ² ஸேகா² அப்பத்தமானஸா அனுத்தரம் யோக³க்கே²மம் பத்த²யமானா விஹரந்தி தேஸம் ஆனாபானஸ்ஸதிஸமாதி⁴ பா⁴விதோ ப³ஹுலீகதோ ஆஸவானம் க²யாய ஸம்வத்ததி. யே ச கோ² தே, பி⁴க்க²வே, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸம்யோஜனா ஸம்மத³ஞ்ஞா விமுத்தா தேஸம் ஆனாபானஸ்ஸதிஸமாதி⁴ பா⁴விதோ ப³ஹுலீகதோ தி³ட்ட²த⁴ம்மஸுக²விஹாராய சேவ ஸம்வத்ததி ஸதிஸம்பஜஞ்ஞாய ச.

2. கங்கே²ய்யஸுத்தம்

988. ஏகம் ஸமயம் ஆயஸ்மா லோமஸகம்பி⁴யோ [லோமஸவங்கி³ஸோ (ஸீ. பீ.)] ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. அத² கோ² மஹானாமோ ஸக்கோ யேனாயஸ்மா லோமஸகம்பி⁴யோ தேனுபஸங்கமி; உபஸங்கமித்வா ஆயஸ்மந்தம் லோமஸகம்பி⁴யம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மஹானாமோ ஸக்கோ ஆயஸ்மந்தம் லோமஸகம்பி⁴யம் ஏதத³வோச – ‘‘ஸோ ஏவ நு கோ², ப⁴ந்தே, ஸேகோ² விஹாரோ ஸோ ததா²க³தவிஹாரோ, உதா³ஹு அஞ்ஞோவ [அஞ்ஞோ (ஸ்யா. கம். பீ. க.)] ஸேகோ² விஹாரோ அஞ்ஞோ ததா²க³தவிஹாரோ’’தி?

‘‘ந கோ², ஆவுஸோ மஹானாம, ஸ்வேவ ஸேகோ² விஹாரோ, ஸோ ததா²க³தவிஹாரோ. அஞ்ஞோ கோ², ஆவுஸோ மஹானாம, ஸேகோ² விஹாரோ, அஞ்ஞோ ததா²க³தவிஹாரோ. யே தே, ஆவுஸோ மஹானாம, பி⁴க்கூ² ஸேகா² அப்பத்தமானஸா அனுத்தரம் யோக³க்கே²மம் பத்த²யமானா விஹரந்தி, தே பஞ்ச நீவரணே பஹாய விஹரந்தி. கதமே பஞ்ச? காமச்ச²ந்த³னீவரணம் பஹாய விஹரந்தி, ப்³யாபாத³னீவரணம்…பே… தி²னமித்³த⁴னீவரணம்…பே… உத்³த⁴ச்சகுக்குச்சனீவரணம்…பே… விசிகிச்சா²னீவரணம் பஹாய விஹரந்தி.

‘‘யேபி தே, ஆவுஸோ மஹானாம, பி⁴க்கூ² ஸேகா² அப்பத்தமானஸா அனுத்தரம் யோக³க்கே²மம் பத்த²யமானா விஹரந்தி, தே இமே பஞ்ச நீவரணே பஹாய விஹரந்தி.

‘‘யே ச கோ² தே, ஆவுஸோ மஹானாம, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸம்யோஜனா ஸம்மத³ஞ்ஞா விமுத்தா, தேஸம் பஞ்ச நீவரணா பஹீனா உச்சி²ன்னமூலா தாலாவத்து²கதா அனபா⁴வம்கதா [அனபா⁴வகதா (ஸீ. பீ.)] ஆயதிம் அனுப்பாத³த⁴ம்மா. கதமே பஞ்ச? காமச்ச²ந்த³னீவரணம் பஹீனம் உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்மம்; ப்³யாபாத³னீவரணம் பஹீனம்…பே… தி²னமித்³த⁴னீவரணம்…பே… உத்³த⁴ச்சகுக்குச்சனீவரணம்…பே… விசிகிச்சா²னீவரணம் பஹீனம் உச்சி²ன்னமூலம் தாலாவத்து²கதம் அனபா⁴வம்கதம் ஆயதிம் அனுப்பாத³த⁴ம்மம்.

‘‘யே தே, ஆவுஸோ மஹானாம, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸம்யோஜனா ஸம்மத³ஞ்ஞா விமுத்தா, தேஸம் இமே பஞ்ச நீவரணா பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தத³மினாபேதம், ஆவுஸோ மஹானாம, பரியாயேன வேதி³தப்³ப³ம் யதா² – அஞ்ஞோவ ஸேகோ² விஹாரோ, அஞ்ஞோ ததா²க³தவிஹாரோ.

‘‘ஏகமித³ம், ஆவுஸோ மஹானாம, ஸமயம் ப⁴க³வா இச்சா²னங்க³லே விஹரதி இச்சா²னங்க³லவனஸண்டே³. தத்ர கோ², ஆவுஸோ மஹானாம, ப⁴க³வா பி⁴க்கூ² ஆமந்தேஸி – ‘இச்சா²மஹம், பி⁴க்க²வே, தேமாஸம் படிஸல்லீயிதும். நாம்ஹி கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேனா’தி. ‘ஏவம், ப⁴ந்தே’தி கோ², ஆவுஸோ மஹானாம, தே பி⁴க்கூ² ப⁴க³வதோ படிஸ்ஸுத்வா நாஸ்ஸுத⁴ கோசி ப⁴க³வந்தம் உபஸங்கமதி, அஞ்ஞத்ர ஏகேன பிண்ட³பாதனீஹாரகேன.

‘‘அத² கோ², ஆவுஸோ, ப⁴க³வா தஸ்ஸ தேமாஸஸ்ஸ அச்சயேன படிஸல்லானா வுட்டி²தோ பி⁴க்கூ² ஆமந்தேஸி – ‘ஸசே கோ², பி⁴க்க²வே, அஞ்ஞதித்தி²யா பரிப்³பா³ஜகா ஏவம் புச்சே²ய்யும் – கதமேனாவுஸோ, விஹாரேன ஸமணோ கோ³தமோ வஸ்ஸாவாஸம் ப³ஹுலம் விஹாஸீதி, ஏவம் புட்டா² தும்ஹே, பி⁴க்க²வே, தேஸம் அஞ்ஞதித்தி²யானம் பரிப்³பா³ஜகானம் ஏவம் ப்³யாகரேய்யாத² – ஆனாபானஸ்ஸதிஸமாதி⁴னா கோ², ஆவுஸோ, ப⁴க³வா வஸ்ஸாவாஸம் ப³ஹுலம் விஹாஸீதி. இதா⁴ஹம், பி⁴க்க²வே, ஸதோ அஸ்ஸஸாமி, ஸதோ பஸ்ஸஸாமி. தீ³க⁴ம் அஸ்ஸஸந்தோ தீ³க⁴ம் அஸ்ஸஸாமீதி பஜானாமி, தீ³க⁴ம் பஸ்ஸஸந்தோ தீ³க⁴ம் பஸ்ஸஸாமீதி பஜானாமி…பே… படினிஸ்ஸக்³கா³னுபஸ்ஸீ அஸ்ஸஸிஸ்ஸாமீதி பஜானாமி, படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி பஜானாமி’’.

‘‘யே தே, பி⁴க்க²வே, பி⁴க்கூ² ஸேகா² அப்பத்தமானஸா அனுத்தரம் யோக³க்கே²மம் பத்த²யமானா விஹரந்தி, தேஸம் ஆனாபானஸ்ஸதிஸமாதி⁴ பா⁴விதோ ப³ஹுலீகதோ ஆஸவானம் க²யாய ஸம்வத்ததி.

‘‘யே ச கோ² தே, பி⁴க்க²வே, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸம்யோஜனா ஸம்மத³ஞ்ஞா விமுத்தா, தேஸம் ஆனாபானஸ்ஸதிஸமாதி⁴ பா⁴விதோ ப³ஹுலீகதோ தி³ட்டே²வ த⁴ம்மே ஸுக²விஹாராய சேவ ஸம்வத்ததி ஸதிஸம்பஜஞ்ஞாய ச.

‘‘யஞ்ஹி தம், பி⁴க்க²வே, ஸம்மா வத³மானோ வதே³ய்ய – அரியவிஹாரோ இதிபி, ப்³ரஹ்மவிஹாரோ இதிபி, ததா²க³தவிஹாரோ இதிபி. ஆனாபானஸ்ஸதிஸமாதி⁴ம் ஸம்மா வத³மானோ வதே³ய்ய – அரியவிஹாரோ இதிபி, ப்³ரஹ்மவிஹாரோ இதிபி, ததா²க³தவிஹாரோ இதிபீ’’தி. ‘‘இமினா கோ² ஏதம், ஆவுஸோ மஹானாம, பரியாயேன வேதி³தப்³ப³ம், யதா² – அஞ்ஞோவ ஸேகோ² விஹாரோ, அஞ்ஞோ ததா²க³தவிஹாரோ’’தி. து³தியம்.

3. பட²மஆனந்த³ஸுத்தம்

989. ஸாவத்தி²னிதா³னம். அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச – ‘‘அத்தி² நு கோ², ப⁴ந்தே, ஏகத⁴ம்மோ [ஏகோ த⁴ம்மோ (ஸீ.)] பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி?

‘‘அத்தி² கோ², ஆனந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி.

‘‘கதமோ பன, ப⁴ந்தே, ஏகத⁴ம்மோ [ஏகோ த⁴ம்மோ (ஸீ.)] பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி? ‘‘ஆனாபானஸ்ஸதிஸமாதி⁴ கோ², ஆனந்த³, ஏகத⁴ம்மோ பா⁴விதோ ப³ஹுலீகதோ சத்தாரோ ஸதிபட்டா²னே பரிபூரேதி, சத்தாரோ ஸதிபட்டா²னா பா⁴விதா ப³ஹுலீகதா ஸத்த போ³ஜ்ஜ²ங்கே³ பரிபூரேந்தி, ஸத்த போ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்திம் பரிபூரேந்தி’’.

‘‘கத²ம் பா⁴விதோ, ஆனந்த³, ஆனாபானஸ்ஸதிஸமாதி⁴ கத²ம் ப³ஹுலீகதோ சத்தாரோ ஸதிபட்டா²னே பரிபூரேதி? இதா⁴னந்த³, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி, ஸதோவ பஸ்ஸஸதி. தீ³க⁴ம் வா அஸ்ஸஸந்தோ ‘தீ³க⁴ம் அஸ்ஸஸாமீ’தி பஜானாதி, தீ³க⁴ம் வா பஸ்ஸஸந்தோ ‘தீ³க⁴ம் பஸ்ஸஸாமீ’தி பஜானாதி…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி’’. ‘‘யஸ்மிம் ஸமயே, ஆனந்த³, பி⁴க்கு² தீ³க⁴ம் வா அஸ்ஸஸந்தோ ‘தீ³க⁴ம் அஸ்ஸஸாமீ’தி பஜானாதி, தீ³க⁴ம் வா பஸ்ஸஸந்தோ ‘தீ³க⁴ம் பஸ்ஸஸாமீ’தி பஜானாதி; ரஸ்ஸம் வா…பே… ‘பஸ்ஸம்ப⁴யம் காயஸங்கா²ரம் அஸ்ஸஸிஸ்ஸாமீ’தி ஸிக்க²தி, ‘பஸ்ஸம்ப⁴யம் காயஸங்கா²ரம் பஸ்ஸஸிஸ்ஸாமீ’தி ஸிக்க²தி – காயே காயானுபஸ்ஸீ, ஆனந்த³, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தம் கிஸ்ஸ ஹேது? காயஞ்ஞதராஹம், ஆனந்த³, ஏதம் வதா³மி, யதி³த³ம் – அஸ்ஸாஸபஸ்ஸாஸம். தஸ்மாதிஹானந்த³, காயே காயானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்’’.

‘‘யஸ்மிம் ஸமயே, ஆனந்த³, பி⁴க்கு² ‘பீதிப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி …பே… ஸுக²ப்படிஸம்வேதீ³…பே… சித்தஸங்கா²ரப்படிஸம்வேதீ³…பே… ‘பஸ்ஸம்ப⁴யம் சித்தஸங்கா²ரம் அஸ்ஸஸிஸ்ஸாமீ’தி ஸிக்க²தி, ‘பஸ்ஸம்ப⁴யம் சித்தஸங்கா²ரம் பஸ்ஸஸிஸ்ஸாமீ’தி ஸிக்க²தி – வேத³னாஸு வேத³னானுபஸ்ஸீ, ஆனந்த³, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தம் கிஸ்ஸ ஹேது? வேத³னாஞ்ஞதராஹம், ஆனந்த³, ஏதம் வதா³மி, யதி³த³ம் – அஸ்ஸாஸபஸ்ஸாஸானம் ஸாது⁴கம் மனஸிகாரம். தஸ்மாதிஹானந்த³, வேத³னாஸு வேத³னானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘யஸ்மிம் ஸமயே, ஆனந்த³, பி⁴க்கு² ‘சித்தப்படிஸம்வேதீ³ அஸ்ஸஸிஸ்ஸாமீ’தி ஸிக்க²தி, ‘சித்தப்படிஸம்வேதீ³ பஸ்ஸஸிஸ்ஸாமீ’தி ஸிக்க²தி; அபி⁴ப்பமோத³யம் சித்தம்…பே… ஸமாத³ஹம் சித்தம்…பே… ‘விமோசயம் சித்தம் அஸ்ஸஸிஸ்ஸாமீ’தி ஸிக்க²தி, ‘விமோசயம் சித்தம் பஸ்ஸஸிஸ்ஸாமீ’தி ஸிக்க²தி – சித்தே சித்தானுபஸ்ஸீ, ஆனந்த³, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தம் கிஸ்ஸ ஹேது? நாஹம், ஆனந்த³, முட்ட²ஸ்ஸதிஸ்ஸ அஸம்பஜானஸ்ஸ ஆனாபானஸ்ஸதிஸமாதி⁴பா⁴வனம் வதா³மி. தஸ்மாதிஹானந்த³, சித்தே சித்தானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘யஸ்மிம் ஸமயே, ஆனந்த³, பி⁴க்கு² அனிச்சானுபஸ்ஸீ…பே… விராகா³னுபஸ்ஸீ…பே… நிரோதா⁴னுபஸ்ஸீ…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி – த⁴ம்மேஸு த⁴ம்மானுபஸ்ஸீ, ஆனந்த³, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். ஸோ யம் தம் ஹோதி அபி⁴ஜ்ஜா²தோ³மனஸ்ஸானம் பஹானம் தம் பஞ்ஞாய தி³ஸ்வா ஸாது⁴கம் அஜ்ஜு²பேக்கி²தா ஹோதி. தஸ்மாதிஹானந்த³, த⁴ம்மேஸு த⁴ம்மானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘ஏவம் பா⁴விதோ கோ², ஆனந்த³, ஆனாபானஸ்ஸதிஸமாதி⁴ ஏவம் ப³ஹுலீகதோ சத்தாரோ ஸதிபட்டா²னே பரிபூரேதி.

‘‘கத²ம் பா⁴விதா சானந்த³, சத்தாரோ ஸதிபட்டா²னா கத²ம் ப³ஹுலீகதா ஸத்த போ³ஜ்ஜ²ங்கே³ பரிபூரேந்தி? யஸ்மிம் ஸமயே, ஆனந்த³, பி⁴க்கு² காயே காயானுபஸ்ஸீ விஹரதி – உபட்டி²தாஸ்ஸ [உபட்டி²தஸ்ஸதி (பீ. க.)] தஸ்மிம் ஸமயே பி⁴க்கு²னோ [தஸ்மிம் ஸமயே ஆனந்த³ பி⁴க்கு²னோ (பீ. க.), தஸ்மிம் ஸமயே (ம. நி. 3.149)] ஸதி ஹோதி அஸம்முட்டா². யஸ்மிம் ஸமயே, ஆனந்த³, பி⁴க்கு²னோ உபட்டி²தா ஸதி ஹோதி அஸம்முட்டா² – ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, ஸதிஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘ஸோ ததா² ஸதோ விஹரந்தோ தம் த⁴ம்மம் பஞ்ஞாய பவிசினதி பவிசரதி பரிவீமம்ஸமாபஜ்ஜதி. யஸ்மிம் ஸமயே, ஆனந்த³, பி⁴க்கு² ததா² ஸதோ விஹரந்தோ தம் த⁴ம்மம் பஞ்ஞாய பவிசினதி பவிசரதி பரிவீமம்ஸமாபஜ்ஜதி – த⁴ம்மவிசயஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, த⁴ம்மவிசயஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, த⁴ம்மவிசயஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘தஸ்ஸ தம் த⁴ம்மம் பஞ்ஞாய பவிசினதோ பவிசரதோ பரிவீமம்ஸமாபஜ்ஜதோ ஆரத்³த⁴ம் ஹோதி வீரியம் அஸல்லீனம். யஸ்மிம் ஸமயே, ஆனந்த³, பி⁴க்கு²னோ தம் த⁴ம்மம் பஞ்ஞாய பவிசினதோ பவிசரதோ பரிவீமம்ஸமாபஜ்ஜதோ ஆரத்³த⁴ம் ஹோதி வீரியம் அஸல்லீனம் – வீரியஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, வீரியஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, வீரியஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘ஆரத்³த⁴வீரியஸ்ஸ உப்பஜ்ஜதி பீதி நிராமிஸா. யஸ்மிம் ஸமயே, ஆனந்த³, பி⁴க்கு²னோ ஆரத்³த⁴வீரியஸ்ஸ உப்பஜ்ஜதி பீதி நிராமிஸா – பீதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, பீதிஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, பீதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘பீதிமனஸ்ஸ காயோபி பஸ்ஸம்ப⁴தி, சித்தம்பி பஸ்ஸம்ப⁴தி. யஸ்மிம் ஸமயே, ஆனந்த³, பி⁴க்கு²னோ பீதிமனஸ்ஸ காயோபி பஸ்ஸம்ப⁴தி, சித்தம்பி பஸ்ஸம்ப⁴தி – பஸ்ஸத்³தி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, பஸ்ஸத்³தி⁴ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, பஸ்ஸத்³தி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘பஸ்ஸத்³த⁴காயஸ்ஸ ஸுகி²னோ சித்தம் ஸமாதி⁴யதி. யஸ்மிம் ஸமயே, ஆனந்த³, பி⁴க்கு²னோ பஸ்ஸத்³த⁴காயஸ்ஸ ஸுகி²னோ சித்தம் ஸமாதி⁴யதி – ஸமாதி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, ஸமாதி⁴ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, ஸமாதி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘ஸோ ததா²ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி. யஸ்மிம் ஸமயே, ஆனந்த³, பி⁴க்கு² ததா²ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி – உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, உபேக்கா²ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘யஸ்மிம் ஸமயே, ஆனந்த³, பி⁴க்கு² வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி – உபட்டி²தாஸ்ஸ தஸ்மிம் ஸமயே பி⁴க்கு²னோ ஸதி ஹோதி அஸம்முட்டா². யஸ்மிம் ஸமயே, ஆனந்த³, பி⁴க்கு²னோ உபட்டி²தா ஸதி ஹோதி அஸம்முட்டா² – ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, ஸதிஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி. (யதா² பட²மம் ஸதிபட்டா²னம், ஏவம் வித்தா²ரேதப்³ப³ம்).

‘‘கத²ம் பா⁴விதா, ஆனந்த³, ஸத்த போ³ஜ்ஜ²ங்கா³ கத²ம் ப³ஹுலீகதா விஜ்ஜாவிமுத்திம் பரிபூரேந்தி? இதா⁴னந்த³, பி⁴க்கு² ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம், த⁴ம்மவிசயஸம்போ³ஜ்ஜ²ங்க³ம் பா⁴வேதி …பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் பா⁴விதா கோ², ஆனந்த³, ஸத்த போ³ஜ்ஜ²ங்கா³ ஏவம் ப³ஹுலீகதா விஜ்ஜாவிமுத்திம் பரிபூரேந்தீ’’தி. ததியம்.

4. து³தியஆனந்த³ஸுத்தம்

990. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஆனந்த³ம் ப⁴க³வா ஏதத³வோச – ‘‘அத்தி² நு கோ², ஆனந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா, ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி. ப⁴க³வம்மூலகா நோ, ப⁴ந்தே, த⁴ம்மா…பே… ‘‘அத்தா²னந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தி.

‘‘கதமோ சானந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தி? ஆனாபானஸ்ஸதிஸமாதி⁴, ஆனந்த³, ஏகத⁴ம்மோ பா⁴விதோ ப³ஹுலீகதோ சத்தாரோ ஸதிபட்டா²னே பரிபூரேதி, சத்தாரோ ஸதிபட்டா²னா பா⁴விதா ப³ஹுலீகதா ஸத்த போ³ஜ்ஜ²ங்கே³ பரிபூரேந்தி, ஸத்த போ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்திம் பரிபூரேந்தீ’’தி. ‘‘கத²ம் பா⁴விதோ சானந்த³, ஆனாபானஸ்ஸதிஸமாதி⁴, கத²ம் ப³ஹுலீகதோ சத்தாரோ ஸதிபட்டா²னே பரிபூரேதி? இதா⁴னந்த³, பி⁴க்கு² அரஞ்ஞக³தோ வா…பே… ஏவம் பா⁴விதா கோ², ஆனந்த³, ஸத்த போ³ஜ்ஜ²ங்கா³ ஏவம் ப³ஹுலீகதா விஜ்ஜாவிமுத்திம் பரிபூரேந்தீ’’தி. சதுத்த²ம்.

5. பட²மபி⁴க்கு²ஸுத்தம்

991. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘அத்தி² நு கோ², ப⁴ந்தே, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி? ‘‘அத்தி² கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி.

‘‘கதமோ பன, ப⁴ந்தே, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி? ‘‘ஆனாபானஸ்ஸதிஸமாதி⁴ கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ சத்தாரோ ஸதிபட்டா²னே பரிபூரேதி, சத்தாரோ ஸதிபட்டா²னா பா⁴விதா ப³ஹுலீகதா ஸத்த போ³ஜ்ஜ²ங்கே³ பரிபூரேந்தி, ஸத்த போ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்திம் பரிபூரேந்தீ’’தி.

‘‘கத²ம் பா⁴விதோ ச, பி⁴க்க²வே, ஆனாபானஸ்ஸதிஸமாதி⁴ கத²ம் ப³ஹுலீகதோ சத்தாரோ ஸதிபட்டா²னே பரிபூரேதி? இத⁴, பி⁴க்க²வே, பி⁴க்கு² அரஞ்ஞக³தோ வா…பே… ஏவம் பா⁴விதா கோ², பி⁴க்க²வே, ஸத்த போ³ஜ்ஜ²ங்கா³ ஏவம் ப³ஹுலீகதா விஜ்ஜாவிமுத்திம் பரிபூரேந்தீ’’தி. பஞ்சமம்.

6. து³தியபி⁴க்கு²ஸுத்தம்

992. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னே கோ² தே பி⁴க்கூ² ப⁴க³வா ஏதத³வோச – ‘‘அத்தி² நு கோ², பி⁴க்க²வே, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தீ’’தி? ‘‘ப⁴க³வம்மூலகா நோ, ப⁴ந்தே, த⁴ம்மா…பே… ப⁴க³வதோ ஸுத்வா பி⁴க்கூ² தா⁴ரேஸ்ஸந்தீ’’தி. ‘‘அத்தி², பி⁴க்க²வே, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தி’’.

‘‘கதமோ ச, பி⁴க்க²வே, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரேந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரேந்தி? ஆனாபானஸ்ஸதிஸமாதி⁴, பி⁴க்க²வே, ஏகத⁴ம்மோ பா⁴விதோ ப³ஹுலீகதோ சத்தாரோ ஸதிபட்டா²னே பரிபூரேதி, சத்தாரோ ஸதிபட்டா²னா பா⁴விதா ப³ஹுலீகதா ஸத்த போ³ஜ்ஜ²ங்கே³ பரிபூரேந்தி, ஸத்த போ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்திம் பரிபூரேந்தீதி.

‘‘கத²ம் பா⁴விதோ ச, பி⁴க்க²வே, ஆனாபானஸ்ஸதிஸமாதி⁴ கத²ம் ப³ஹுலீகதோ சத்தாரோ ஸதிபட்டா²னே பரிபூரேதி? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி, ஸதோவ பஸ்ஸஸதி…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி’’.

‘‘யஸ்மிம் ஸமயே, பி⁴க்க²வே, பி⁴க்கு² தீ³க⁴ம் வா அஸ்ஸஸந்தோ ‘தீ³க⁴ம் அஸ்ஸஸாமீ’தி பஜானாதி, தீ³க⁴ம் வா பஸ்ஸஸந்தோ ‘தீ³க⁴ம் பஸ்ஸஸாமீ’தி பஜானாதி, ரஸ்ஸம் வா அஸ்ஸஸந்தோ ‘ரஸ்ஸம் அஸ்ஸஸாமீ’தி பஜானாதி…பே… ஸப்³ப³காயப்படிஸம்வேதீ³…பே… ‘பஸ்ஸம்ப⁴யம் காயஸங்கா²ரம் அஸ்ஸஸிஸ்ஸாமீ’தி ஸிக்க²தி, ‘பஸ்ஸம்ப⁴யம் காயஸங்கா²ரம் பஸ்ஸஸிஸ்ஸாமீ’தி ஸிக்க²தி – காயே காயானுபஸ்ஸீ, பி⁴க்க²வே, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தம் கிஸ்ஸ ஹேது? காயஞ்ஞதராஹம், பி⁴க்க²வே, ஏதம் வதா³மி, யதி³த³ம் – அஸ்ஸாஸபஸ்ஸாஸம். தஸ்மாதிஹ, பி⁴க்க²வே, காயே காயானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘யஸ்மிம் ஸமயே, பி⁴க்க²வே, பி⁴க்கு² பீதிப்படிஸம்வேதீ³…பே… ஸுக²ப்படிஸம்வேதீ³…பே… சித்தஸங்கா²ரப்படிஸம்வேதீ³…பே… ‘பஸ்ஸம்ப⁴யம் சித்தஸங்கா²ரம் அஸ்ஸஸிஸ்ஸாமீ’தி ஸிக்க²தி, ‘பஸ்ஸம்ப⁴யம் சித்தஸங்கா²ரம் பஸ்ஸஸிஸ்ஸாமீ’தி ஸிக்க²தி – வேத³னாஸு வேத³னானுபஸ்ஸீ, பி⁴க்க²வே, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தம் கிஸ்ஸ ஹேது? வேத³னாஞ்ஞதராஹம், பி⁴க்க²வே, ஏதம் வதா³மி, யதி³த³ம் – அஸ்ஸாஸபஸ்ஸாஸானம் ஸாது⁴கம் மனஸிகாரம். தஸ்மாதிஹ, பி⁴க்க²வே, வேத³னாஸு வேத³னானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘யஸ்மிம் ஸமயே, பி⁴க்க²வே, பி⁴க்கு² சித்தப்படிஸம்வேதீ³…பே… அபி⁴ப்பமோத³யம் சித்தம்…பே… ‘ஸமாத³ஹம் சித்தம் அஸ்ஸஸிஸ்ஸாமீ’தி ஸிக்க²தி, ‘ஸமாத³ஹம் சித்தம் பஸ்ஸஸிஸ்ஸாமீ’தி ஸிக்க²தி; ‘விமோசயம் சித்தம் அஸ்ஸஸிஸ்ஸாமீ’தி ஸிக்க²தி, ‘விமோசயம் சித்தம் பஸ்ஸஸிஸ்ஸாமீ’தி ஸிக்க²தி – சித்தே சித்தானுபஸ்ஸீ, பி⁴க்க²வே, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். தம் கிஸ்ஸ ஹேது? நாஹம், பி⁴க்க²வே, முட்ட²ஸ்ஸதிஸ்ஸ அஸம்பஜானஸ்ஸ ஆனாபானஸ்ஸதிஸமாதி⁴பா⁴வனம் வதா³மி. தஸ்மாதிஹ, பி⁴க்க²வே, சித்தே சித்தானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘யஸ்மிம் ஸமயே, பி⁴க்க²வே, பி⁴க்கு² அனிச்சானுபஸ்ஸீ…பே… விராகா³னுபஸ்ஸீ…பே… நிரோதா⁴னுபஸ்ஸீ…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி – த⁴ம்மேஸு த⁴ம்மானுபஸ்ஸீ, பி⁴க்க²வே, பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம். ஸோ யம் தம் ஹோதி அபி⁴ஜ்ஜா²தோ³மனஸ்ஸானம் பஹானம் தம் பஞ்ஞாய தி³ஸ்வா ஸாது⁴கம் அஜ்ஜு²பேக்கி²தா ஹோதி. தஸ்மாதிஹ, பி⁴க்க²வே, த⁴ம்மேஸு த⁴ம்மானுபஸ்ஸீ பி⁴க்கு² தஸ்மிம் ஸமயே விஹரதி ஆதாபீ ஸம்பஜானோ ஸதிமா, வினேய்ய லோகே அபி⁴ஜ்ஜா²தோ³மனஸ்ஸம்.

‘‘ஏவம் பா⁴விதோ கோ², பி⁴க்க²வே, ஆனாபானஸ்ஸதிஸமாதி⁴ ஏவம் ப³ஹுலீகதோ சத்தாரோ ஸதிபட்டா²னே பரிபூரேதி.

‘‘கத²ம் பா⁴விதா ச, பி⁴க்க²வே, சத்தாரோ ஸதிபட்டா²னா கத²ம் ப³ஹுலீகதா ஸத்த போ³ஜ்ஜ²ங்கே³ பரிபூரேந்தி? யஸ்மிம் ஸமயே, பி⁴க்க²வே, பி⁴க்கு² காயே காயானுபஸ்ஸீ விஹரதி – உபட்டி²தாஸ்ஸ தஸ்மிம் ஸமயே பி⁴க்கு²னோ ஸதி ஹோதி அஸம்முட்டா². யஸ்மிம் ஸமயே, பி⁴க்க²வே, பி⁴க்கு²னோ உபட்டி²தா ஸதி ஹோதி அஸம்முட்டா² – ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, ஸதிஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘ஸோ ததா² ஸதோ விஹரந்தோ தம் த⁴ம்மம் பஞ்ஞாய பவிசினதி பவிசரதி பரிவீமம்ஸமாபஜ்ஜதி. யஸ்மிம் ஸமயே, பி⁴க்க²வே, பி⁴க்கு² ததா² ஸதோ விஹரந்தோ தம் த⁴ம்மம் பஞ்ஞாய பவிசினதி பவிசரதி பரிவீமம்ஸமாபஜ்ஜதி – த⁴ம்மவிசயஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, த⁴ம்மவிசயஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, த⁴ம்மவிசயஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘தஸ்ஸ தம் த⁴ம்மம் பஞ்ஞாய பவிசினதோ பவிசரதோ பரிவீமம்ஸமாபஜ்ஜதோ ஆரத்³த⁴ம் ஹோதி வீரியம் அஸல்லீனம். யஸ்மிம் ஸமயே, பி⁴க்க²வே, பி⁴க்கு²னோ தம் த⁴ம்மம் பஞ்ஞாய பவிசினதோ பவிசரதோ பரிவீமம்ஸமாபஜ்ஜதோ ஆரத்³த⁴ம் ஹோதி வீரியம் அஸல்லீனம் – வீரியஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, வீரியஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, வீரியஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘ஆரத்³த⁴வீரியஸ்ஸ உப்பஜ்ஜதி பீதி நிராமிஸா. யஸ்மிம் ஸமயே, பி⁴க்க²வே, பி⁴க்கு²னோ ஆரத்³த⁴வீரியஸ்ஸ உப்பஜ்ஜதி பீதி நிராமிஸா – பீதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, பீதிஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, பீதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘பீதிமனஸ்ஸ காயோபி பஸ்ஸம்ப⁴தி, சித்தம்பி பஸ்ஸம்ப⁴தி. யஸ்மிம் ஸமயே, பி⁴க்க²வே, பி⁴க்கு²னோ பீதிமனஸ்ஸ காயோபி பஸ்ஸம்ப⁴தி, சித்தம்பி பஸ்ஸம்ப⁴தி – பஸ்ஸத்³தி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, பஸ்ஸத்³தி⁴ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, பஸ்ஸத்³தி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘பஸ்ஸத்³த⁴காயஸ்ஸ ஸுகி²னோ சித்தம் ஸமாதி⁴யதி. யஸ்மிம் ஸமயே, பி⁴க்க²வே, பி⁴க்கு²னோ பஸ்ஸத்³த⁴காயஸ்ஸ ஸுகி²னோ சித்தம் ஸமாதி⁴யதி – ஸமாதி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, ஸமாதி⁴ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, ஸமாதி⁴ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘ஸோ ததா²ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி. யஸ்மிம் ஸமயே, பி⁴க்க²வே, பி⁴க்கு² ததா²ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி – உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, உபேக்கா²ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி.

‘‘யஸ்மிம் ஸமயே, பி⁴க்க²வே, பி⁴க்கு² வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி – உபட்டி²தாஸ்ஸ தஸ்மிம் ஸமயே பி⁴க்கு²னோ ஸதி ஹோதி அஸம்முட்டா². யஸ்மிம் ஸமயே, பி⁴க்க²வே, பி⁴க்கு²னோ உபட்டி²தா ஸதி ஹோதி அஸம்முட்டா² – ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, ஸதிஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி – ஸதிஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி…பே….

ஸோ ததா²ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி. யஸ்மிம் ஸமயே, பி⁴க்க²வே, பி⁴க்கு² ததா²ஸமாஹிதம் சித்தம் ஸாது⁴கம் அஜ்ஜு²பேக்கி²தா ஹோதி – உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ ஆரத்³தோ⁴ ஹோதி, உபேக்கா²ஸம்போ³ஜ்ஜ²ங்க³ம் தஸ்மிம் ஸமயே பி⁴க்கு² பா⁴வேதி, உபேக்கா²ஸம்போ³ஜ்ஜ²ங்கோ³ தஸ்மிம் ஸமயே பி⁴க்கு²னோ பா⁴வனாபாரிபூரிம் க³ச்ச²தி. ஏவம் பா⁴விதா கோ², பி⁴க்க²வே, சத்தாரோ ஸதிபட்டா²னா ஏவம் ப³ஹுலீகதா ஸத்த போ³ஜ்ஜ²ங்கே³ பரிபூரேந்தி.

‘‘கத²ம் பா⁴விதா ச, பி⁴க்க²வே, ஸத்த போ³ஜ்ஜ²ங்கா³ கத²ம் ப³ஹுலீகதா விஜ்ஜாவிமுத்திம் பரிபூரேந்தி? இத⁴, பி⁴க்க²வே, பி⁴க்கு² ஸதிஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்; த⁴ம்மவிசயஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் பா⁴விதா கோ², பி⁴க்க²வே, ஸத்த போ³ஜ்ஜ²ங்கா³ ஏவம் ப³ஹுலீகதா விஜ்ஜாவிமுத்திம் பரிபூரேந்தீ’’தி. ச²ட்ட²ம்.

7. ஸம்யோஜனப்பஹானஸுத்தம்

993. ஆனாபானஸ்ஸதிஸமாதி⁴, பி⁴க்க²வே, பா⁴விதோ ப³ஹுலீகதோ ஸம்யோஜனப்பஹானாய ஸம்வத்ததி…பே…. ஸத்தமம்.

8. அனுஸயஸமுக்³கா⁴தஸுத்தம்

994. …அனுஸயஸமுக்³கா⁴தாய ஸம்வத்ததி…. அட்ட²மம்.

9. அத்³தா⁴னபரிஞ்ஞாஸுத்தம்

995. …அத்³தா⁴னபரிஞ்ஞாய ஸம்வத்ததி…. நவமம்.

10. ஆஸவக்க²யஸுத்தம்

996. ஆஸவானம் க²யாய ஸம்வத்ததி. கத²ம் பா⁴விதோ ச, பி⁴க்க²வே, ஆனாபானஸ்ஸதிஸமாதி⁴ கத²ம் ப³ஹுலீகதோ ஸம்யோஜனப்பஹானாய ஸம்வத்ததி… அனுஸயஸமுக்³கா⁴தாய ஸம்வத்ததி… அத்³தா⁴னபரிஞ்ஞாய ஸம்வத்ததி… ஆஸவானம் க²யாய ஸம்வத்ததி? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா…பே. … படினிஸ்ஸக்³கா³னுபஸ்ஸீ அஸ்ஸஸிஸ்ஸாமீதி ஸிக்க²தி, படினிஸ்ஸக்³கா³னுபஸ்ஸீ பஸ்ஸஸிஸ்ஸாமீதி ஸிக்க²தி. ஏவம் பா⁴விதோ கோ², பி⁴க்க²வே, ஆனாபானஸ்ஸதிஸமாதி⁴ ஏவம் ப³ஹுலீகதோ ஸம்யோஜனப்பஹானாய ஸம்வத்ததி…பே… அனுஸயஸமுக்³கா⁴தாய ஸம்வத்ததி…பே… அத்³தா⁴னபரிஞ்ஞாய ஸம்வத்ததி…பே… ஆஸவானம் க²யாய ஸம்வத்ததீதி. த³ஸமம்.

து³தியோ வக்³கோ³.

தஸ்ஸுத்³தா³னம் –

இச்சா²னங்க³லம் கங்கே²ய்யம், ஆனந்தா³ அபரே து³வே;

பி⁴க்கூ² ஸம்யோஜனானுஸயா, அத்³தா⁴னம் ஆஸவக்க²யந்தி.

ஆனாபானஸம்யுத்தம் த³ஸமம்.