9. வேஸாலீஸுத்தம்

985. ஏவம் மே ஸுதம் – ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன ப⁴க³வா பி⁴க்கூ²னம் அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதி.

அத² கோ² ப⁴க³வா பி⁴க்கூ² ஆமந்தேஸி – ‘‘இச்சா²மஹம், பி⁴க்க²வே, அட்³ட⁴மாஸம் படிஸல்லீயிதும். நாம்ஹி கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேனா’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுத்வா நாஸ்ஸுத⁴ கோசி ப⁴க³வந்தம் உபஸங்கமதி, அஞ்ஞத்ர ஏகேன பிண்ட³பாதனீஹாரகேன.

அத² கோ² தே பி⁴க்கூ² – ‘‘ப⁴க³வா அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதீ’’தி அனேகாகாரவோகாரம் அஸுப⁴பா⁴வனானுயோக³மனுயுத்தா விஹரந்தி. தே இமினா காயேன அட்டீயமானா [அட்டியமானா (ஸீ. ஸ்யா. கம். பீ. க.)] ஹராயமானா ஜிகு³ச்ச²மானா ஸத்த²ஹாரகம் பரியேஸந்தி. த³ஸபி பி⁴க்கூ² ஏகாஹேன ஸத்த²ம் ஆஹரந்தி, வீஸம்பி…பே… திம்ஸம்பி பி⁴க்கூ² ஏகாஹேன ஸத்த²ம் ஆஹரந்தி.

அத² கோ² ப⁴க³வா தஸ்ஸ அட்³ட⁴மாஸஸ்ஸ அச்சயேன படிஸல்லானா வுட்டி²தோ ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ², ஆனந்த³, தனுபூ⁴தோ விய பி⁴க்கு²ஸங்கோ⁴’’தி? ‘‘ததா² ஹி பன, ப⁴ந்தே, ‘ப⁴க³வா பி⁴க்கூ²னம் அனேகபரியாயேன அஸுப⁴கத²ம் கதே²தி, அஸுபா⁴ய வண்ணம் பா⁴ஸதி, அஸுப⁴பா⁴வனாய வண்ணம் பா⁴ஸதீ’தி அனேகாகாரவோகாரம் அஸுப⁴பா⁴வனானுயோக³மனுயுத்தா விஹரந்தி. தே இமினா காயேன அட்டீயமானா ஹராயமானா ஜிகு³ச்ச²மானா ஸத்த²ஹாரகம் பரியேஸந்தி. த³ஸபி பி⁴க்கூ² ஏகாஹேன ஸத்த²ம் ஆஹரந்தி, வீஸம்பி பி⁴க்கூ²… திம்ஸம்பி பி⁴க்கூ² ஏகாஹேன ஸத்த²ம் ஆஹரந்தி. ஸாது⁴, ப⁴ந்தே, ப⁴க³வா அஞ்ஞம் பரியாயம் ஆசிக்க²து யதா²யம் பி⁴க்கு²ஸங்கோ⁴ அஞ்ஞாய ஸண்ட²ஹேய்யா’’தி.

‘‘தேனஹானந்த³, யாவதிகா பி⁴க்கூ² வேஸாலிம் உபனிஸ்ஸாய விஹரந்தி தே ஸப்³பே³ உபட்டா²னஸாலாயம் ஸன்னிபாதேஹீ’’தி. ‘‘ஏவம், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ படிஸ்ஸுத்வா யாவதிகா பி⁴க்கூ² வேஸாலிம் உபனிஸ்ஸாய விஹரந்தி தே ஸப்³பே³ உபட்டா²னஸாலாயம் ஸன்னிபாதேத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘ஸன்னிபதிதோ [ஸன்னிபாதிதோ (ஸீ.)], ப⁴ந்தே, பி⁴க்கு²ஸங்கோ⁴. யஸ்ஸ தா³னி, ப⁴ந்தே, ப⁴க³வா காலம் மஞ்ஞதீ’’தி.

அத² கோ² ப⁴க³வா யேன உபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘அயம்பி கோ², பி⁴க்க²வே, ஆனாபானஸ்ஸதிஸமாதி⁴ பா⁴விதோ ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி’’.

‘‘ஸேய்யதா²பி, பி⁴க்க²வே, கி³ம்ஹானம் பச்சி²மே மாஸே ஊஹதம் ரஜோஜல்லம், தமேனம் மஹாஅகாலமேகோ⁴ டா²னஸோ அந்தரதா⁴பேதி வூபஸமேதி; ஏவமேவ கோ², பி⁴க்க²வே, ஆனாபானஸ்ஸதிஸமாதி⁴ பா⁴விதோ ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி. கத²ம் பா⁴விதோ ச, பி⁴க்க²வே, ஆனாபானஸ்ஸதிஸமாதி⁴ கத²ம் ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதி?

‘‘இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ ஸதோவ அஸ்ஸஸதி, ஸதோவ பஸ்ஸஸதி…பே… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி. ஏவம் பா⁴விதோ கோ², பி⁴க்க²வே, ஆனாபானஸ்ஸதிஸமாதி⁴ ஏவம் ப³ஹுலீகதோ ஸந்தோ சேவ பணீதோ ச அஸேசனகோ ச ஸுகோ² ச விஹாரோ உப்பன்னுப்பன்னே ச பாபகே அகுஸலே த⁴ம்மே டா²னஸோ அந்தரதா⁴பேதி வூபஸமேதீ’’தி. நவமம்.