1. க³ங்கா³பேய்யாலவக்³கோ³

1. பட²மபாசீனனின்னஸுத்தம்

91. ஸாவத்தி²னிதா³னம். ‘‘ஸேய்யதா²பி, பி⁴க்க²வே, க³ங்கா³ நதீ³ பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. பட²மம்.

2-5. து³தியாதி³பாசீனனின்னஸுத்தசதுக்கம்

92-95. ‘‘ஸேய்யதா²பி, பி⁴க்க²வே, யமுனா நதீ³ பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே…பே… ஸேய்யதா²பி, பி⁴க்க²வே, அசிரவதீ நதீ³ பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே…பே… ஸேய்யதா²பி, பி⁴க்க²வே, ஸரபூ⁴ நதீ³ பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே…பே… ஸேய்யதா²பி, பி⁴க்க²வே, மஹீ நதீ³ பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே…பே…. பஞ்சமம்.

6. ச²ட்ட²பாசீனனின்னஸுத்தம்

96. ‘‘ஸேய்யதா²பி, பி⁴க்க²வே, யா காசிமா மஹானதி³யோ, ஸேய்யதி²த³ம் – க³ங்கா³, யமுனா, அசிரவதீ, ஸரபூ⁴, மஹீ, ஸப்³பா³ தா பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. ச²ட்ட²ம்.

1. பட²மஸமுத்³த³னின்னஸுத்தம்

97. ‘‘ஸேய்யதா²பி, பி⁴க்க²வே, க³ங்கா³ நதீ³ ஸமுத்³த³னின்னா ஸமுத்³த³போணா ஸமுத்³த³பப்³பா⁴ரா; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. பட²மம்.

2-6. து³தியாதி³ஸமுத்³த³னின்னஸுத்தபஞ்சகம்

98-102. ‘‘ஸேய்யதா²பி, பி⁴க்க²வே, யமுனா நதீ³ ஸமுத்³த³னின்னா ஸமுத்³த³போணா ஸமுத்³த³பப்³பா⁴ரா; ஏவமேவ கோ², பி⁴க்க²வே, பி⁴க்கு²…பே… ஸேய்யதா²பி, பி⁴க்க²வே, அசிரவதீ நதீ³ ஸமுத்³த³னின்னா ஸமுத்³த³போணா ஸமுத்³த³பப்³பா⁴ரா; ஏவமேவ கோ², பி⁴க்க²வே, பி⁴க்கு²…பே… ஸேய்யதா²பி, பி⁴க்க²வே, ஸரபூ⁴ நதீ³ ஸமுத்³த³னின்னா ஸமுத்³த³போணா ஸமுத்³த³பப்³பா⁴ரா; ஏவமேவ கோ², பி⁴க்க²வே, பி⁴க்கு²…பே… ஸேய்யதா²பி, பி⁴க்க²வே, மஹீ நதீ³ ஸமுத்³த³னின்னா ஸமுத்³த³போணா ஸமுத்³த³பப்³பா⁴ரா; ஏவமேவ கோ², பி⁴க்க²வே, பி⁴க்கு²…பே… ஸேய்யதா²பி, பி⁴க்க²வே, யா காசிமா மஹானதி³யோ, ஸேய்யதி²த³ம் – க³ங்கா³, யமுனா, அசிரவதீ, ஸரபூ⁴, மஹீ, ஸப்³பா³ தா ஸமுத்³த³னின்னா ஸமுத்³த³போணா ஸமுத்³த³பப்³பா⁴ரா; ஏவமேவ கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. ச²ட்ட²ம்.

க³ங்கா³பேய்யாலவக்³கோ³ பட²மோ.

தஸ்ஸுத்³தா³னம் –

ச² பாசீனதோ நின்னா, ச² நின்னா ச ஸமுத்³த³தோ;

ஏதே த்³வே ச² த்³வாத³ஸ ஹோந்தி, வக்³கோ³ தேன பவுச்சதீதி;

க³ங்கா³பேய்யாலீ பாசீனனின்னவாசனமக்³கீ³, விவேகனிஸ்ஸிதம் த்³வாத³ஸகீ பட²மகீ.