9. ஸூகஸுத்தம்

9. ஸாவத்தி²னிதா³னம். ‘‘ஸேய்யதா²பி, பி⁴க்க²வே, ஸாலிஸூகம் வா யவஸூகம் வா மிச்சா²பணிஹிதம் ஹத்தே²ன வா பாதே³ன வா அக்கந்தம் ஹத்த²ம் வா பாத³ம் வா பி⁴ந்தி³ஸ்ஸதி [பே⁴ச்ச²தி (க.)], லோஹிதம் வா உப்பாதே³ஸ்ஸதீதி – நேதம் டா²னம் விஜ்ஜதி. தம் கிஸ்ஸ ஹேது? மிச்சா²பணிஹிதத்தா, பி⁴க்க²வே, ஸூகஸ்ஸ. ஏவமேவ கோ², பி⁴க்க²வே, ஸோ வத பி⁴க்கு² மிச்சா²பணிஹிதாய தி³ட்டி²யா மிச்சா²பணிஹிதாய மக்³க³பா⁴வனாய அவிஜ்ஜம் பி⁴ந்தி³ஸ்ஸதி, விஜ்ஜம் உப்பாதே³ஸ்ஸதி, நிப்³பா³னம் ஸச்சி²கரிஸ்ஸதீதி – நேதம் டா²னம் விஜ்ஜதி. தம் கிஸ்ஸ ஹேது? மிச்சா²பணிஹிதத்தா, பி⁴க்க²வே, தி³ட்டி²யா.

‘‘ஸேய்யதா²பி, பி⁴க்க²வே, ஸாலிஸூகம் வா யவஸூகம் வா ஸம்மாபணிஹிதம் ஹத்தே²ன வா பாதே³ன வா அக்கந்தம் ஹத்த²ம் வா பாத³ம் வா பி⁴ந்தி³ஸ்ஸதி, லோஹிதம் வா உப்பாதே³ஸ்ஸதீதி – டா²னமேதம் விஜ்ஜதி. தம் கிஸ்ஸ ஹேது? ஸம்மாபணிஹிதத்தா, பி⁴க்க²வே, ஸூகஸ்ஸ. ஏவமேவ கோ², பி⁴க்க²வே, ஸோ வத பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜம் பி⁴ந்தி³ஸ்ஸதி, விஜ்ஜம் உப்பாதே³ஸ்ஸதி, நிப்³பா³னம் ஸச்சி²கரிஸ்ஸதீதி – டா²னமேதம் விஜ்ஜதி. தம் கிஸ்ஸ ஹேது? ஸம்மாபணிஹிதத்தா, பி⁴க்க²வே, தி³ட்டி²யா.

‘‘கத²ஞ்ச, பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜம் பி⁴ந்த³தி, விஜ்ஜம் உப்பாதே³தி, நிப்³பா³னம் ஸச்சி²கரோதீதி? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம்…பே… ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். ஏவம் கோ², பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜம் பி⁴ந்த³தி, விஜ்ஜம் உப்பாதே³தி, நிப்³பா³னம் ஸச்சி²கரோதீ’’தி. நவமம்.