2. து³தியவக்³கோ³

1. அஸங்க²தஸுத்தம்

377. ‘‘அஸங்க²தஞ்ச வோ, பி⁴க்க²வே, தே³ஸேஸ்ஸாமி அஸங்க²தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அஸங்க²தம்? யோ, பி⁴க்க²வே, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி, பி⁴க்க²வே, அஸங்க²தம். கதமோ ச, பி⁴க்க²வே, அஸங்க²தகா³மிமக்³கோ³? ஸமதோ². அயம் வுச்சதி, பி⁴க்க²வே, அஸங்க²தகா³மிமக்³கோ³. இதி கோ², பி⁴க்க²வே, தே³ஸிதம் வோ மயா அஸங்க²தம், தே³ஸிதோ அஸங்க²தகா³மிமக்³கோ³. யம், பி⁴க்க²வே, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்க²வே, ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்க²வே, மா பமாத³த்த²; மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீதி.

‘‘அஸங்க²தஞ்ச வோ, பி⁴க்க²வே, தே³ஸேஸ்ஸாமி அஸங்க²தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அஸங்க²தம்? யோ, பி⁴க்க²வே, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி, பி⁴க்க²வே, அஸங்க²தம். கதமோ ச, பி⁴க்க²வே, அஸங்க²தகா³மிமக்³கோ³? விபஸ்ஸனா. அயம் வுச்சதி, பி⁴க்க²வே, அஸங்க²தகா³மிமக்³கோ³. இதி கோ², பி⁴க்க²வே, தே³ஸிதம் வோ மயா அஸங்க²தம்…பே… அயம் வோ அம்ஹாகம் அனுஸாஸனீதி.

‘‘கதமோ ச, பி⁴க்க²வே, அஸங்க²தகா³மிமக்³கோ³? ஸவிதக்கோ ஸவிசாரோ ஸமாதி⁴. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? அவிதக்கோ விசாரமத்தோ ஸமாதி⁴. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? அவிதக்கோ அவிசாரோ ஸமாதி⁴. அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? ஸுஞ்ஞதோ ஸமாதி⁴. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? அனிமித்தோ ஸமாதி⁴. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? அப்பணிஹிதோ ஸமாதி⁴. அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² வேத³னாஸு வேத³னானுபஸ்ஸீ விஹரதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² சித்தே சித்தானுபஸ்ஸீ…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² த⁴ம்மேஸு த⁴ம்மானுபஸ்ஸீ விஹரதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² உப்பன்னானம் பாபகானம் அகுஸலானம் த⁴ம்மானம் பஹானா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² அனுப்பன்னானம் குஸலானம் த⁴ம்மானம் உப்பாதா³ ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ச²ந்த³ஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. அயம் வுச்சதி, பி⁴க்க²வே, அஸங்க²தகா³மிமக்³கோ³ …பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² வீரியஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² சித்தஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² வீமம்ஸஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸத்³தி⁴ந்த்³ரியம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² வீரியிந்த்³ரியம் பா⁴வேதி விவேகனிஸ்ஸிதம்…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸதிந்த்³ரியம் பா⁴வேதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸமாதி⁴ந்த்³ரியம் பா⁴வேதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² பஞ்ஞிந்த்³ரியம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸத்³தா⁴ப³லம் பா⁴வேதி விவேகனிஸ்ஸிதம்…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² வீரியப³லம் பா⁴வேதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸதிப³லம் பா⁴வேதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸமாதி⁴ப³லம் பா⁴வேதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² பஞ்ஞாப³லம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸதிஸம்போ³ஜ்ஜ²ங்க³ம் பா⁴வேதி…பே… அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² த⁴ம்மவிசயஸம்போ³ஜ்ஜ²ங்க³ம் பா⁴வேதி…பே… வீரியஸம்போ³ஜ்ஜ²ங்க³ம் பா⁴வேதி…பே… பீதிஸம்போ³ஜ்ஜ²ங்க³ம் பா⁴வேதி…பே… பஸ்ஸத்³தி⁴ஸம்போ³ஜ்ஜ²ங்க³ம் பா⁴வேதி…பே… ஸமாதி⁴ஸம்போ³ஜ்ஜ²ங்க³ம் பா⁴வேதி…பே… உபேக்கா²ஸம்போ³ஜ்ஜ²ங்க³ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். அயம் வுச்சதி, பி⁴க்க²வே, அஸங்க²தகா³மிமக்³கோ³…பே….

‘‘கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸம்மாதி³ட்டி²ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். அயம் வுச்சதி, பி⁴க்க²வே, அஸங்க²தகா³மிமக்³கோ³…பே… கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸம்மாஸங்கப்பம் பா⁴வேதி …பே… ஸம்மாவாசம் பா⁴வேதி…பே… ஸம்மாகம்மந்தம் பா⁴வேதி…பே… ஸம்மாஆஜீவம் பா⁴வேதி…பே… ஸம்மாவாயாமம் பா⁴வேதி…பே… ஸம்மாஸதிம் பா⁴வேதி…பே… அஸங்க²தஞ்ச வோ பி⁴க்க²வே, தே³ஸேஸ்ஸாமி அஸங்க²தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அஸங்க²தம்…பே…? கதமோ ச, பி⁴க்க²வே, அஸங்க²தகா³மிமக்³கோ³? இத⁴, பி⁴க்க²வே, பி⁴க்கு² ஸம்மாஸமாதி⁴ம் பா⁴வேதி விவேகனிஸ்ஸிதம் விராக³னிஸ்ஸிதம் நிரோத⁴னிஸ்ஸிதம் வோஸ்ஸக்³க³பரிணாமிம். அயம் வுச்சதி, பி⁴க்க²வே, அஸங்க²தகா³மிமக்³கோ³. இதி கோ², பி⁴க்க²வே, தே³ஸிதம் வோ மயா அஸங்க²தம், தே³ஸிதோ அஸங்க²தகா³மிமக்³கோ³. யம், பி⁴க்க²வே, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்க²வே, ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்க²வே, மா பமாத³த்த²; மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. பட²மம்.

2. அனதஸுத்தம்

378. ‘‘அனதஞ்ச வோ, பி⁴க்க²வே, தே³ஸேஸ்ஸாமி, அனதகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அனதம்…பே…’’. (யதா² அஸங்க²தம் ததா² வித்தா²ரேதப்³ப³ம்). து³தியம்.

3-32. அனாஸவாதி³ஸுத்தம்

379-408. ‘‘அனாஸவஞ்ச வோ, பி⁴க்க²வே, தே³ஸேஸ்ஸாமி அனாஸவகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அனாஸவம்…பே… ஸச்சஞ்ச வோ, பி⁴க்க²வே, தே³ஸேஸ்ஸாமி ஸச்சகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, ஸச்சம்…பே… பாரஞ்ச வோ, பி⁴க்க²வே, தே³ஸேஸ்ஸாமி பாரகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, பாரம்…பே… நிபுணஞ்ச வோ, பி⁴க்க²வே, தே³ஸேஸ்ஸாமி நிபுணகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, நிபுணம்…பே… ஸுது³த்³த³ஸஞ்ச வோ, பி⁴க்க²வே, தே³ஸேஸ்ஸாமி ஸுது³த்³த³ஸகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, ஸுது³த்³த³ஸம்…பே… அஜஜ்ஜரஞ்ச வோ, பி⁴க்க²வே, தே³ஸேஸ்ஸாமி அஜஜ்ஜரகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அஜஜ்ஜரம்…பே… து⁴வஞ்ச வோ, பி⁴க்க²வே, தே³ஸேஸ்ஸாமி து⁴வகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, து⁴வம்…பே… அபலோகிதஞ்ச வோ, பி⁴க்க²வே, தே³ஸேஸ்ஸாமி அபலோகிதகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அபலோகிதம்…பே… அனித³ஸ்ஸனஞ்ச வோ, பி⁴க்க²வே, தே³ஸேஸ்ஸாமி அனித³ஸ்ஸனகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அனித³ஸ்ஸனம்…பே… நிப்பபஞ்சஞ்ச வோ, பி⁴க்க²வே, தே³ஸேஸ்ஸாமி நிப்பபஞ்சகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, நிப்பபஞ்சம்…பே…?

‘‘ஸந்தஞ்ச வோ, பி⁴க்க²வே, தே³ஸேஸ்ஸாமி ஸந்தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, ஸந்தம்…பே… அமதஞ்ச வோ, பி⁴க்க²வே, தே³ஸேஸ்ஸாமி அமதகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அமதம்…பே… பணீதஞ்ச வோ, பி⁴க்க²வே, தே³ஸேஸ்ஸாமி பணீதகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, பணீதம்…பே… ஸிவஞ்ச வோ, பி⁴க்க²வே, தே³ஸேஸ்ஸாமி ஸிவகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, ஸிவம்…பே… கே²மஞ்ச வோ, பி⁴க்க²வே, தே³ஸேஸ்ஸாமி கே²மகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, கே²மம்…பே… தண்ஹாக்க²யஞ்ச வோ, பி⁴க்க²வே, தே³ஸேஸ்ஸாமி தண்ஹாக்க²யகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, தண்ஹாக்க²யம்…பே…?

‘‘அச்ச²ரியஞ்ச வோ, பி⁴க்க²வே, தே³ஸேஸ்ஸாமி அச்ச²ரியகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அச்ச²ரியம்…பே… அப்³பு⁴தஞ்ச வோ, பி⁴க்க²வே, தே³ஸேஸ்ஸாமி அப்³பு⁴தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அப்³பு⁴தம்…பே… அனீதிகஞ்ச வோ, பி⁴க்க²வே, தே³ஸேஸ்ஸாமி அனீதிககா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அனீதிகம்…பே… அனீதிகத⁴ம்மஞ்ச வோ, பி⁴க்க²வே, தே³ஸேஸ்ஸாமி அனீதிகத⁴ம்மகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அனீதிகத⁴ம்மம்…பே… நிப்³பா³னஞ்ச வோ, பி⁴க்க²வே, தே³ஸேஸ்ஸாமி நிப்³பா³னகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, நிப்³பா³னம்…பே… அப்³யாபஜ்ஜ²ஞ்ச [அப்³யாபஜ்ஜ²ஞ்ச (ஸீ. ஸ்யா. கம். பீ.)] வோ, பி⁴க்க²வே, தே³ஸேஸ்ஸாமி அப்³யாபஜ்ஜ²கா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அப்³யாபஜ்ஜ²ம்…பே… விராக³ஞ்ச வோ, பி⁴க்க²வே, தே³ஸேஸ்ஸாமி விராக³கா³மிஞ்ச மக்³க³ம். தம் ஸுணாத². கதமோ ச, பி⁴க்க²வே, விராகோ³…பே…?

‘‘ஸுத்³தி⁴ஞ்ச வோ, பி⁴க்க²வே, தே³ஸேஸ்ஸாமி ஸுத்³தி⁴கா³மிஞ்ச மக்³க³ம். தம் ஸுணாத². கதமா ச, பி⁴க்க²வே, ஸுத்³தி⁴…பே… முத்திஞ்ச வோ, பி⁴க்க²வே, தே³ஸேஸ்ஸாமி முத்திகா³மிஞ்ச மக்³க³ம். தம் ஸுணாத². கதமா ச, பி⁴க்க²வே, முத்தி…பே… அனாலயஞ்ச வோ, பி⁴க்க²வே, தே³ஸேஸ்ஸாமி அனாலயகா³மிஞ்ச மக்³க³ம். தம் ஸுணாத². கதமோ ச, பி⁴க்க²வே, அனாலயோ…பே… தீ³பஞ்ச வோ, பி⁴க்க²வே, தே³ஸேஸ்ஸாமி தீ³பகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, தீ³பம்…பே… லேணஞ்ச வோ, பி⁴க்க²வே, தே³ஸேஸ்ஸாமி லேணகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, லேணம்…பே… தாணஞ்ச வோ, பி⁴க்க²வே, தே³ஸேஸ்ஸாமி தாணகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, தாணம்…பே… ஸரணஞ்ச வோ, பி⁴க்க²வே, தே³ஸேஸ்ஸாமி ஸரணகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, ஸரணம்…பே…அனுஸாஸனீ’’தி? பா³த்திம்ஸதிமம்.

33. பராயனஸுத்தம்

409. ‘‘பராயனஞ்ச [பராயணஞ்ச (பீ. ஸீ. அட்ட².)] வோ, பி⁴க்க²வே, தே³ஸேஸ்ஸாமி பராயனகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, பராயனம்? யோ, பி⁴க்க²வே, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி, பி⁴க்க²வே, பராயனம். கதமோ ச, பி⁴க்க²வே, பராயனகா³மீ மக்³கோ³? காயக³தாஸதி. அயம் வுச்சதி, பி⁴க்க²வே, பராயனகா³மிமக்³கோ³. இதி கோ², பி⁴க்க²வே, தே³ஸிதம் வோ மயா பராயனம், தே³ஸிதோ பராயனகா³மிமக்³கோ³. யம், பி⁴க்க²வே, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்க²வே, ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்க²வே, மா பமாத³த்த²; மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. (யதா² அஸங்க²தம் ததா² வித்தா²ரேதப்³ப³ம்). தேத்திம்ஸதிமம்.

து³தியோ வக்³கோ³.

தஸ்ஸுத்³தா³னம் –

அஸங்க²தம் அனதம் அனாஸவம், ஸச்சஞ்ச பாரம் நிபுணம் ஸுது³த்³த³ஸம்;

அஜஜ்ஜரம் து⁴வம் அபலோகிதம், அனித³ஸ்ஸனம் நிப்பபஞ்ச ஸந்தம்.

அமதம் பணீதஞ்ச ஸிவஞ்ச கே²மம், தண்ஹாக்க²யோ அச்ச²ரியஞ்ச அப்³பு⁴தம்;

அனீதிகம் அனீதிகத⁴ம்மம், நிப்³பா³னமேதம் ஸுக³தேன தே³ஸிதம்.

அப்³யாபஜ்ஜோ² விராகோ³ ச, ஸுத்³தி⁴ முத்தி அனாலயோ;

தீ³போ லேணஞ்ச தாணஞ்ச, ஸரணஞ்ச பராயனந்தி.

அஸங்க²தஸம்யுத்தம் ஸமத்தம்.