1. பட²மவக்³கோ³

1. காயக³தாஸதிஸுத்தம்

366. ஸாவத்தி²னிதா³னம். ‘‘அஸங்க²தஞ்ச வோ, பி⁴க்க²வே, தே³ஸேஸ்ஸாமி அஸங்க²தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அஸங்க²தம்? யோ, பி⁴க்க²வே, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி, பி⁴க்க²வே, அஸங்க²தம். கதமோ ச, பி⁴க்க²வே, அஸங்க²தகா³மிமக்³கோ³? காயக³தாஸதி. அயம் வுச்சதி, பி⁴க்க²வே, அஸங்க²தகா³மிமக்³கோ³’’.

‘‘இதி கோ², பி⁴க்க²வே, தே³ஸிதம் வோ மயா அஸங்க²தம், தே³ஸிதோ அஸங்க²தகா³மிமக்³கோ³. யம், பி⁴க்க²வே, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்க²வே, ருக்க²மூலானி, ஏதானி ஸுஞ்ஞாகா³ரானி. ஜா²யத² [நிஜ்ஜா²யத² (க.)], பி⁴க்க²வே, மா பமாத³த்த²; மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. பட²மம்.

2. ஸமத²விபஸ்ஸனாஸுத்தம்

367. ‘‘அஸங்க²தஞ்ச வோ, பி⁴க்க²வே, தே³ஸேஸ்ஸாமி அஸங்க²தகா³மிஞ்ச மக்³க³ம். தம் ஸுணாத². கதமஞ்ச, பி⁴க்க²வே, அஸங்க²தம்? யோ, பி⁴க்க²வே, ராக³க்க²யோ தோ³ஸக்க²யோ மோஹக்க²யோ – இத³ம் வுச்சதி, பி⁴க்க²வே, அஸங்க²தம். கதமோ ச, பி⁴க்க²வே, அஸங்க²தகா³மிமக்³கோ³? ஸமதோ² ச விபஸ்ஸனா ச. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. து³தியம்.

3. ஸவிதக்கஸவிசாரஸுத்தம்

368. ‘‘கதமோ ச, பி⁴க்க²வே, அஸங்க²தகா³மிமக்³கோ³? ஸவிதக்கஸவிசாரோ ஸமாதி⁴, அவிதக்கவிசாரமத்தோ ஸமாதி⁴, அவிதக்கஅவிசாரோ ஸமாதி⁴ – அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. ததியம்.

4. ஸுஞ்ஞதஸமாதி⁴ஸுத்தம்

369. ‘‘கதமோ ச, பி⁴க்க²வே, அஸங்க²தகா³மிமக்³கோ³? ஸுஞ்ஞதோ ஸமாதி⁴, அனிமித்தோ ஸமாதி⁴, அப்பணிஹிதோ ஸமாதி⁴ – அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. சதுத்த²ம்.

5. ஸதிபட்டா²னஸுத்தம்

370. ‘‘கதமோ ச, பி⁴க்க²வே, அஸங்க²தகா³மிமக்³கோ³? சத்தாரோ ஸதிபட்டா²னா. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. பஞ்சமம்.

6. ஸம்மப்பதா⁴னஸுத்தம்

371. ‘‘கதமோ ச, பி⁴க்க²வே, அஸங்க²தகா³மிமக்³கோ³? சத்தாரோ ஸம்மப்பதா⁴னா. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. ச²ட்ட²ம்.

7. இத்³தி⁴பாத³ஸுத்தம்

372. ‘‘கதமோ ச, பி⁴க்க²வே, அஸங்க²தகா³மிமக்³கோ³? சத்தாரோ இத்³தி⁴பாதா³. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. ஸத்தமம்.

8. இந்த்³ரியஸுத்தம்

373. ‘‘கதமோ ச, பி⁴க்க²வே, அஸங்க²தகா³மிமக்³கோ³? பஞ்சிந்த்³ரியானி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. அட்ட²மம்.

9. ப³லஸுத்தம்

374. ‘‘கதமோ ச, பி⁴க்க²வே, அஸங்க²தகா³மிமக்³கோ³? பஞ்ச ப³லானி. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. நவமம்.

10. போ³ஜ்ஜ²ங்க³ஸுத்தம்

375. ‘‘கதமோ ச, பி⁴க்க²வே, அஸங்க²தகா³மிமக்³கோ³? ஸத்த போ³ஜ்ஜ²ங்கா³. அயம் வுச்சதி, பி⁴க்க²வே, அஸங்க²தகா³மிமக்³கோ³…பே…. த³ஸமம்.

11. மக்³க³ங்க³ஸுத்தம்

376. ‘‘கதமோ ச, பி⁴க்க²வே, அஸங்க²தகா³மிமக்³கோ³? அரியோ அட்ட²ங்கி³கோ மக்³கோ³. அயம் வுச்சதி, பி⁴க்க²வே, அஸங்க²தகா³மிமக்³கோ³. இதி கோ², பி⁴க்க²வே, தே³ஸிதம் வோ மயா அஸங்க²தம், தே³ஸிதோ அஸங்க²தகா³மிமக்³கோ³. யம், பி⁴க்க²வே, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய கதம் வோ தம் மயா. ஏதானி, பி⁴க்க²வே, ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்க²வே, மா பமாத³த்த²; மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. ஏகாத³ஸமம்.

பட²மோ வக்³கோ³.

தஸ்ஸுத்³தா³னம் –

காயோ ஸமதோ² ஸவிதக்கோ, ஸுஞ்ஞதோ ஸதிபட்டா²னா;

ஸம்மப்பதா⁴னா இத்³தி⁴பாதா³, இந்த்³ரியப³லபோ³ஜ்ஜ²ங்கா³;

மக்³கே³ன ஏகாத³ஸமம், தஸ்ஸுத்³தா³னம் பவுச்சதி.