15. ஸக்காயபஞ்ஹாஸுத்தம்

328. ‘‘‘ஸக்காயோ, ஸக்காயோ’தி, ஆவுஸோ ஸாரிபுத்த, வுச்சதி. கதமோ நு கோ², ஆவுஸோ, ஸக்காயோ’’தி? ‘‘பஞ்சிமே, ஆவுஸோ, உபாதா³னக்க²ந்தா⁴ ஸக்காயோ வுத்தோ ப⁴க³வதா, ஸேய்யதி²த³ம் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே கோ², ஆவுஸோ, பஞ்சுபாதா³னக்க²ந்தா⁴ ஸக்காயோ வுத்தோ ப⁴க³வதா’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதஸ்ஸ ஸக்காயஸ்ஸ பரிஞ்ஞாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதஸ்ஸ ஸக்காயஸ்ஸ பரிஞ்ஞாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதஸ்ஸ ஸக்காயஸ்ஸ பரிஞ்ஞாய. அலஞ்ச பனாவுஸோ ஸாரிபுத்த, அப்பமாதா³யா’’தி. பன்னரஸமம்.