12. உபாதா³னபஞ்ஹாஸுத்தம்

325. ‘‘‘உபாதா³னம், உபாதா³ன’ந்தி, ஆவுஸோ ஸாரிபுத்த, வுச்சதி. கதமம் நு கோ², ஆவுஸோ, உபாதா³ன’’ந்தி? ‘‘சத்தாரிமானி, ஆவுஸோ, உபாதா³னானி. காமுபாதா³னம், தி³ட்டு²பாதா³னம் ஸீலப்³ப³துபாதா³னம், அத்தவாது³பாதா³னம் – இமானி கோ², ஆவுஸோ, சத்தாரி உபாதா³னானீ’’தி. ‘‘அத்தி² பனாவுஸோ, மக்³கோ³ அத்தி² படிபதா³, ஏதேஸம் உபாதா³னானம் பஹானாயா’’தி? ‘‘அத்தி² கோ², ஆவுஸோ, மக்³கோ³ அத்தி² படிபதா³, ஏதேஸம் உபாதா³னானம் பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³, ஏதேஸம் உபாதா³னானம் பஹானாயா’’தி? ‘‘அயமேவ கோ², ஆவுஸோ, அரியோ அட்ட²ங்கி³கோ மக்³கோ³, ஏதேஸம் உபாதா³னானம் பஹானாய, ஸேய்யதி²த³ம் – ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³, ஏதேஸம் உபாதா³னானம் பஹானாயா’’தி. ‘‘ப⁴த்³த³கோ, ஆவுஸோ, மக்³கோ³ ப⁴த்³தி³கா படிபதா³, ஏதேஸம் உபாதா³னானம் பஹானாய. அலஞ்ச பனாவுஸோ ஸாரிபுத்த, அப்பமாதா³யா’’தி. த்³வாத³ஸமம்.