9. குதூஹலஸாலாஸுத்தம்

418. அத² கோ² வச்ச²கோ³த்தோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச –

‘‘புரிமானி, போ⁴ கோ³தம, தி³வஸானி புரிமதரானி ஸம்ப³ஹுலானம் நானாதித்தி²யானம் ஸமணப்³ராஹ்மணானம் பரிப்³பா³ஜகானம் குதூஹலஸாலாயம் ஸன்னிஸின்னானம் ஸன்னிபதிதானம் அயமந்தராகதா² உத³பாதி³ – ‘அயம் கோ² பூரணோ கஸ்ஸபோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ. ஸோபி ஸாவகம் அப்³ப⁴தீதம் காலங்கதம் உபபத்தீஸு ப்³யாகரோதி – ‘அஸு அமுத்ர உபபன்னோ, அஸு அமுத்ர உபபன்னோ’தி. யோபிஸ்ஸ ஸாவகோ உத்தமபுரிஸோ பரமபுரிஸோ பரமபத்திபத்தோ தம்பி ஸாவகம் அப்³ப⁴தீதம் காலங்கதம் உபபத்தீஸு ப்³யாகரோதி – ‘அஸு அமுத்ர உபபன்னோ, அஸு அமுத்ர உபபன்னோ’’’தி.

‘‘அயம்பி கோ² மக்க²லி கோ³ஸாலோ…பே… அயம்பி கோ² நிக³ண்டோ² நாடபுத்தோ…பே… அயம்பி கோ² ஸஞ்சயோ [ஸஞ்ஜயோ (ஸீ. ஸ்யா. கம். பீ.)] பே³லட்ட²புத்தோ…பே… அயம்பி கோ² பகுதோ⁴ [பகுத்³தோ⁴ (பீ.)] கச்சானோ…பே… அயம்பி கோ² அஜிதோ கேஸகம்ப³லோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ. ஸோபி ஸாவகம் அப்³ப⁴தீதம் காலங்கதம் உபபத்தீஸு ப்³யாகரோதி – ‘அஸு அமுத்ர உபபன்னோ, அஸு அமுத்ர உபபன்னோ’தி. யோபிஸ்ஸ ஸாவகோ உத்தமபுரிஸோ பரமபுரிஸோ பரமபத்திபத்தோ தம்பி ஸாவகம் அப்³ப⁴தீதம் காலங்கதம் உபபத்தீஸு ப்³யாகரோதி – ‘அஸு அமுத்ர உபபன்னோ, அஸு அமுத்ர உபபன்னோ’’’தி.

‘‘அயம்பி கோ² ஸமணோ கோ³தமோ ஸங்கீ⁴ சேவ க³ணீ ச க³ணாசரியோ ச ஞாதோ யஸஸ்ஸீ தித்த²கரோ ஸாது⁴ஸம்மதோ ப³ஹுஜனஸ்ஸ. ஸோபி ஸாவகம் அப்³ப⁴தீதம் காலங்கதம் உபபத்தீஸு ப்³யாகரோதி – ‘அஸு அமுத்ர உபபன்னோ, அஸு அமுத்ர உபபன்னோ’தி. யோபிஸ்ஸ [யோ ச க்²வஸ்ஸ (பீ.)] ஸாவகோ உத்தமபுரிஸோ பரமபுரிஸோ பரமபத்திபத்தோ தஞ்ச ஸாவகம் அப்³ப⁴தீதம் காலங்கதம் உபபத்தீஸு ந ப்³யாகரோதி – ‘அஸு அமுத்ர உபபன்னோ, அஸு அமுத்ர உபபன்னோ’தி. அபி ச கோ² நம் ஏவம் ப்³யாகரோதி – ‘அச்சே²ச்சி² தண்ஹம், விவத்தயி ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸா’தி. தஸ்ஸ மய்ஹம், போ⁴ கோ³தம, அஹு தே³வ கங்கா², அஹு விசிகிச்சா² – ‘கத²ம் நாம [கத²ஞ்ஹி நாம (ஸ்யா. கம். பீ. க.) கத²ம் கத²ம் நாம (ச²க்கங்கு³த்தரே பஞ்சமவக்³கே³ து³தியஸுத்தே)] ஸமணஸ்ஸ கோ³தமஸ்ஸ த⁴ம்மோ அபி⁴ஞ்ஞேய்யோ’’’தி [த⁴ம்மாபி⁴ஞ்ஞேய்யாதி (பீ. க.) த⁴ம்மோ… அஞ்ஞேய்யோ (ச²க்கங்கு³த்தரே)]?

‘‘அலஞ்ஹி தே, வச்ச², கங்கி²தும், அலம் விசிகிச்சி²தும். கங்க²னீயே ச பன தே டா²னே விசிகிச்சா² உப்பன்னா. ஸஉபாதா³னஸ்ஸ க்²வாஹம், வச்ச², உபபத்திம் பஞ்ஞாபேமி நோ அனுபாதா³னஸ்ஸ. ஸேய்யதா²பி, வச்ச², அக்³கி³ ஸஉபாதா³னோ ஜலதி, நோ அனுபாதா³னோ; ஏவமேவ க்²வாஹம், வச்ச², ஸஉபாதா³னஸ்ஸ உபபத்திம் பஞ்ஞாபேமி, நோ அனுபாதா³னஸ்ஸா’’தி.

‘‘யஸ்மிம், போ⁴ கோ³தம, ஸமயே அச்சி வாதேன கி²த்தா தூ³ரம்பி க³ச்ச²தி, இமஸ்ஸ பன ப⁴வம் கோ³தமோ கிம் உபாதா³னஸ்மிம் பஞ்ஞாபேதீ’’தி? ‘‘யஸ்மிம் கோ², வச்ச², ஸமயே அச்சி வாதேன கி²த்தா தூ³ரம்பி க³ச்ச²தி, தமஹம் வாதூபாதா³னம் பஞ்ஞாபேமி. வாதோ ஹிஸ்ஸ, வச்ச², தஸ்மிம் ஸமயே உபாதா³னம் ஹோதீ’’தி. ‘‘யஸ்மிஞ்ச பன, போ⁴ கோ³தம, ஸமயே இமஞ்ச காயம் நிக்கி²பதி, ஸத்தோ ச அஞ்ஞதரம் காயம் அனுபபன்னோ ஹோதி, இமஸ்ஸ பன ப⁴வம் கோ³தமோ கிம் உபாதா³னஸ்மிம் பஞ்ஞாபேதீ’’தி? ‘‘யஸ்மிம் கோ², வச்ச², ஸமயே இமஞ்ச காயம் நிக்கி²பதி, ஸத்தோ ச அஞ்ஞதரம் காயம் அனுபபன்னோ ஹோதி, தமஹம் தண்ஹூபாதா³னம் வதா³மி. தண்ஹா ஹிஸ்ஸ, வச்ச², தஸ்மிம் ஸமயே உபாதா³னம் ஹோதீ’’தி [ஹோதீதி…பே… (க.)]. நவமம்.