1. பட²மகி³லானஸுத்தம்

74. ஸாவத்தி²னிதா³னம். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘அமுகஸ்மிம், ப⁴ந்தே, விஹாரே அஞ்ஞதரோ பி⁴க்கு² நவோ அப்பஞ்ஞாதோ ஆபா³தி⁴கோ து³க்கி²தோ பா³ள்ஹகி³லானோ. ஸாது⁴, ப⁴ந்தே, ப⁴க³வா யேன ஸோ பி⁴க்கு² தேனுபஸங்கமது அனுகம்பம் உபாதா³யா’’தி.

அத² கோ² ப⁴க³வா நவவாத³ஞ்ச ஸுத்வா கி³லானவாத³ஞ்ச, ‘‘அப்பஞ்ஞாதோ பி⁴க்கூ²’’தி இதி விதி³த்வா யேன ஸோ பி⁴க்கு² தேனுபஸங்கமி. அத்³த³ஸா கோ² ஸோ பி⁴க்கு² ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான மஞ்சகே ஸமதோ⁴ஸி [ஸமஞ்சோஸி (ஸீ.), ஸமதேஸி (ஸ்யா. கம்.), ஸமஞ்சோபி (பீ.)]. அத² கோ² ப⁴க³வா தம் பி⁴க்கு²ம் ஏதத³வோச – ‘‘அலம், பி⁴க்கு², மா த்வம் மஞ்சகே ஸமதோ⁴ஸி. ஸந்திமானி ஆஸனானி பஞ்ஞத்தானி, தத்தா²ஹம் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா தம் பி⁴க்கு²ம் ஏதத³வோச – ‘‘கச்சி தே, பி⁴க்கு², க²மனீயம், கச்சி யாபனீயம், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோ’’தி?

‘‘ந மே, ப⁴ந்தே, க²மனீயம், ந யாபனீயம், பா³ள்ஹா மே து³க்கா² வேத³னா அபி⁴க்கமந்தி நோ படிக்கமந்தி, அபி⁴க்கமோஸானம் பஞ்ஞாயதி நோ படிக்கமோ’’தி.

‘‘கச்சி தே, பி⁴க்கு², ந கிஞ்சி குக்குச்சம், ந கோசி விப்படிஸாரோ’’தி?

‘‘தக்³க⁴ மே, ப⁴ந்தே, அனப்பகம் குக்குச்சம், அனப்பகோ விப்படிஸாரோ’’தி.

‘‘கச்சி பன தம் [த்வம் (ஸீ.), தே (ஸ்யா. கம். க.)], பி⁴க்கு², அத்தா ஸீலதோ உபவத³தீ’’தி?

‘‘ந கோ² மம், ப⁴ந்தே, அத்தா ஸீலதோ உபவத³தீ’’தி [நோ ஹேதம் ப⁴ந்தே (பீ. க.)].

‘‘நோ சே கிர தே, பி⁴க்கு², அத்தா ஸீலதோ உபவத³தி, அத² கிஞ்ச [அத² கிஸ்மிஞ்ச (ஸீ.), அத² பி⁴க்கு² கிஸ்மிஞ்ச (ஸ்யா. கம். பீ. க.)] தே குக்குச்சம் கோ ச விப்படிஸாரோ’’தி?

‘‘ந க்²வாஹம், ப⁴ந்தே, ஸீலவிஸுத்³த⁴த்த²ம் ப⁴க³வதா த⁴ம்மம் தே³ஸிதம் ஆஜானாமீ’’தி.

‘‘நோ சே கிர த்வம், பி⁴க்கு², ஸீலவிஸுத்³த⁴த்த²ம் மயா த⁴ம்மம் தே³ஸிதம் ஆஜானாஸி, அத² கிமத்த²ம் சரஹி த்வம், பி⁴க்கு², மயா த⁴ம்மம் தே³ஸிதம் ஆஜானாஸீ’’தி?

‘‘ராக³விராக³த்த²ம் க்²வாஹம், ப⁴ந்தே, ப⁴க³வதா த⁴ம்மம் தே³ஸிதம் ஆஜானாமீ’’தி.

‘‘ஸாது⁴ ஸாது⁴, பி⁴க்கு²! ஸாது⁴ கோ² த்வம், பி⁴க்கு², ராக³விராக³த்த²ம் மயா த⁴ம்மம் தே³ஸிதம் ஆஜானாஸி. ராக³விராக³த்தோ² ஹி, பி⁴க்கு², மயா த⁴ம்மோ தே³ஸிதோ. தம் கிம் மஞ்ஞஸி பி⁴க்கு², சக்கு² நிச்சம் வா அனிச்சம் வா’’தி?

‘‘அனிச்சம், ப⁴ந்தே’’.

‘‘யம்…பே… ஸோதம்… கா⁴னம்… ஜிவ்ஹா… காயோ… மனோ நிச்சோ வா அனிச்சோ வா’’தி?

‘‘அனிச்சோ, ப⁴ந்தே’’.

‘‘யம் பனானிச்சம் து³க்க²ம் வா தம் ஸுக²ம் வா’’தி?

‘‘து³க்க²ம், ப⁴ந்தே’’.

‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி?

‘‘நோ ஹேதம், ப⁴ந்தே’’.

‘‘ஏவம் பஸ்ஸம், பி⁴க்கு², ஸுதவா அரியஸாவகோ சக்கு²ஸ்மிம்பி நிப்³பி³ந்த³தி, ஸோதஸ்மிம்பி நிப்³பி³ந்த³தி…பே… மனஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி; விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம் நாபரம் இத்த²த்தாயா’தி பஜானாதீ’’தி.

இத³மவோச ப⁴க³வா. அத்தமனோ ஸோ பி⁴க்கு² ப⁴க³வதோ பா⁴ஸிதம் அபி⁴னந்தி³. இமஸ்மிஞ்ச பன வேய்யாகரணஸ்மிம் ப⁴ஞ்ஞமானே தஸ்ஸ பி⁴க்கு²னோ விரஜம் வீதமலம் த⁴ம்மசக்கு²ம் உத³பாதி³ – ‘‘யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்ம’’ந்தி. பட²மம்.