2. து³தியகி³லானஸுத்தம்

75. அத² கோ² அஞ்ஞதரோ பி⁴க்கு²…பே… ப⁴க³வந்தம் ஏதத³வோச – ‘‘அமுகஸ்மிம், ப⁴ந்தே, விஹாரே அஞ்ஞதரோ பி⁴க்கு² நவோ அப்பஞ்ஞாதோ ஆபா³தி⁴கோ து³க்கி²தோ பா³ள்ஹகி³லானோ. ஸாது⁴, ப⁴ந்தே, ப⁴க³வா யேன ஸோ பி⁴க்கு² தேனுபஸங்கமது அனுகம்பம் உபாதா³யா’’தி.

அத² கோ² ப⁴க³வா நவவாத³ஞ்ச ஸுத்வா கி³லானவாத³ஞ்ச, ‘‘அப்பஞ்ஞாதோ பி⁴க்கூ²’’தி இதி விதி³த்வா யேன ஸோ பி⁴க்கு² தேனுபஸங்கமி. அத்³த³ஸா கோ² ஸோ பி⁴க்கு² ப⁴க³வந்தம் தூ³ரதோவ ஆக³ச்ச²ந்தம். தி³ஸ்வான மஞ்சகே ஸமதோ⁴ஸி. அத² கோ² ப⁴க³வா தம் பி⁴க்கு²ம் ஏதத³வோச – ‘‘அலம், பி⁴க்கு², மா த்வம் மஞ்சகே ஸமதோ⁴ஸி. ஸந்திமானி ஆஸனானி பஞ்ஞத்தானி, தத்தா²ஹம் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா தம் பி⁴க்கு²ம் ஏதத³வோச – ‘‘கச்சி தே, பி⁴க்கு², க²மனீயம், கச்சி யாபனீயம், கச்சி து³க்கா² வேத³னா படிக்கமந்தி நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோ’’தி?

‘‘ந மே, ப⁴ந்தே, க²மனீயம், ந யாபனீயம்…பே… ந கோ² மம் [மே (ஸப்³ப³த்த²)], ப⁴ந்தே, அத்தா ஸீலதோ உபவத³தீ’’தி.

‘‘நோ சே கிர தே, பி⁴க்கு², அத்தா ஸீலதோ உபவத³தி, அத² கிஞ்ச தே குக்குச்சம் கோ ச விப்படிஸாரோ’’தி?

‘‘ந க்²வாஹம், ப⁴ந்தே, ஸீலவிஸுத்³த⁴த்த²ம் ப⁴க³வதா த⁴ம்மம் தே³ஸிதம் ஆஜானாமீ’’தி.

‘‘நோ சே கிர த்வம், பி⁴க்கு², ஸீலவிஸுத்³த⁴த்த²ம் மயா த⁴ம்மம் தே³ஸிதம் ஆஜானாஸி, அத² கிமத்த²ம் சரஹி த்வம், பி⁴க்கு², மயா த⁴ம்மம் தே³ஸிதம் ஆஜானாஸீ’’தி?

‘‘அனுபாதா³பரினிப்³பா³னத்த²ம் க்²வாஹம், ப⁴ந்தே, ப⁴க³வதா த⁴ம்மம் தே³ஸிதம் ஆஜானாமீ’’தி.

‘‘ஸாது⁴ ஸாது⁴, பி⁴க்கு²! ஸாது⁴ கோ² த்வம், பி⁴க்கு², அனுபாதா³பரினிப்³பா³னத்த²ம் மயா த⁴ம்மம் தே³ஸிதம் ஆஜானாஸி. அனுபாதா³பரினிப்³பா³னத்தோ² ஹி, பி⁴க்கு², மயா த⁴ம்மோ தே³ஸிதோ.

‘‘தம் கிம் மஞ்ஞஸி, பி⁴க்கு², சக்கு² நிச்சம் வா அனிச்சம் வா’’தி?

‘‘அனிச்சம், ப⁴ந்தே’’.

‘‘யம்…பே… ஸோதம்… கா⁴னம்… ஜிவ்ஹா… காயோ… மனோ… மனோவிஞ்ஞாணம்… மனோஸம்ப²ஸ்ஸோ… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி நிச்சம் வா அனிச்சம் வா’’தி?

‘‘அனிச்சம், ப⁴ந்தே’’.

‘‘யம் பனானிச்சம் து³க்க²ம் வா தம் ஸுக²ம் வா’’தி?

‘‘து³க்க²ம், ப⁴ந்தே’’.

‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி?

‘‘நோ ஹேதம், ப⁴ந்தே’’.

‘‘ஏவம் பஸ்ஸம், பி⁴க்கு², ஸுதவா அரியஸாவகோ சக்கு²ஸ்மிம்பி நிப்³பி³ந்த³தி…பே… மனஸ்மிம்பி… மனோவிஞ்ஞாணேபி… மனோஸம்ப²ஸ்ஸேபி நிப்³பி³ந்த³தி. யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி; விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி.

இத³மவோச ப⁴க³வா. அத்தமனோ ஸோ பி⁴க்கு² ப⁴க³வதோ பா⁴ஸிதம் அபி⁴னந்தி³. இமஸ்மிஞ்ச பன வேய்யாகரணஸ்மிம் ப⁴ஞ்ஞமானே தஸ்ஸ பி⁴க்கு²ஸ்ஸ அனுபாதா³ய ஆஸவேஹி சித்தம் விமுச்சீதி [விமுச்சதீதி (ஸப்³ப³த்த²)]. து³தியம்.