7. உபஸேனஆஸீவிஸஸுத்தம்

69. ஏகம் ஸமயம் ஆயஸ்மா ச ஸாரிபுத்தோ ஆயஸ்மா ச உபஸேனோ ராஜக³ஹே விஹரந்தி ஸீதவனே ஸப்பஸோண்டி³கபப்³பா⁴ரே. தேன கோ² பன ஸமயேன ஆயஸ்மதோ உபஸேனஸ்ஸ காயே ஆஸீவிஸோ பதிதோ ஹோதி. அத² கோ² ஆயஸ்மா உபஸேனோ பி⁴க்கூ² ஆமந்தேஸி – ‘‘ஏத² மே, ஆவுஸோ, இமம் காயம் மஞ்சகம் ஆரோபேத்வா ப³ஹித்³தா⁴ நீஹரத². புராயம் காயோ இதே⁴வ விகிரதி; ஸேய்யதா²பி பு⁴ஸமுட்டீ²’’தி.

ஏவம் வுத்தே, ஆயஸ்மா ஸாரிபுத்தோ ஆயஸ்மந்தம் உபஸேனம் ஏதத³வோச – ‘‘ந கோ² பன மயம் பஸ்ஸாம ஆயஸ்மதோ உபஸேனஸ்ஸ காயஸ்ஸ வா அஞ்ஞத²த்தம் இந்த்³ரியானம் வா விபரிணாமம். அத² ச பனாயஸ்மா உபஸேனோ ஏவமாஹ – ‘ஏத² மே, ஆவுஸோ, இமம் காயம் மஞ்சகம் ஆரோபேத்வா ப³ஹித்³தா⁴ நீஹரத². புராயம் காயோ இதே⁴வ விகிரதி; ஸேய்யதா²பி பு⁴ஸமுட்டீ²’’’தி. ‘‘யஸ்ஸ நூன, ஆவுஸோ ஸாரிபுத்த, ஏவமஸ்ஸ – ‘அஹம் சக்கூ²தி வா மம சக்கூ²தி வா…பே… அஹம் ஜிவ்ஹாதி வா மம ஜிவ்ஹாதி வா… அஹம் மனோதி வா மம மனோதி வா’. தஸ்ஸ, ஆவுஸோ ஸாரிபுத்த, ஸியா காயஸ்ஸ வா அஞ்ஞத²த்தம் இந்த்³ரியானம் வா விபரிணாமோ. மய்ஹஞ்ச கோ², ஆவுஸோ ஸாரிபுத்த, ந ஏவம் ஹோதி – ‘அஹம் சக்கூ²தி வா மம சக்கூ²தி வா…பே… அஹம் ஜிவ்ஹாதி வா மம ஜிவ்ஹாதி வா…பே… அஹம் மனோதி வா மம மனோதி வா’. தஸ்ஸ மய்ஹஞ்ச கோ², ஆவுஸோ ஸாரிபுத்த, கிம் காயஸ்ஸ வா அஞ்ஞத²த்தம் ப⁴விஸ்ஸதி, இந்த்³ரியானம் வா விபரிணாமோ’’தி!

‘‘ததா² ஹி பனாயஸ்மதோ உபஸேனஸ்ஸ தீ³க⁴ரத்தம் அஹங்காரமமங்காரமானானுஸயோ ஸுஸமூஹதோ. தஸ்மா ஆயஸ்மதோ உபஸேனஸ்ஸ ந ஏவம் ஹோதி – ‘அஹம் சக்கூ²தி வா மம சக்கூ²தி வா…பே… அஹம் ஜிவ்ஹாதி வா மம ஜிவ்ஹாதி வா…பே… அஹம் மனோதி வா மம மனோதி வா’’’தி. அத² கோ² தே பி⁴க்கூ² ஆயஸ்மதோ உபஸேனஸ்ஸ காயம் மஞ்சகம் ஆரோபேத்வா ப³ஹித்³தா⁴ நீஹரிம்ஸு. அத² கோ² ஆயஸ்மதோ உபஸேனஸ்ஸ காயோ தத்தே²வ விகிரி; ஸேய்யதா²பி பு⁴ஸமுட்டீ²தி. ஸத்தமம்.