7. மிக³ஜாலவக்³கோ³

1. பட²மமிக³ஜாலஸுத்தம்

63. ஸாவத்தி²னிதா³னம். அத² கோ² ஆயஸ்மா மிக³ஜாலோ யேன ப⁴க³வா…பே… ஏகமந்தம் நிஸின்னோ கோ² ஆயஸ்மா மிக³ஜாலோ ப⁴க³வந்தம் ஏதத³வோச – ‘‘‘ஏகவிஹாரீ, ஏகவிஹாரீ’தி, ப⁴ந்தே, வுச்சதி. கித்தாவதா நு கோ², ப⁴ந்தே, ஏகவிஹாரீ ஹோதி, கித்தாவதா ச பன ஸது³தியவிஹாரீ ஹோதீ’’தி?

‘‘ஸந்தி கோ², மிக³ஜால, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தம் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³ [நந்தி³ (ஸீ. ஸ்யா. கம். பீ.)]. நந்தி³யா ஸதி ஸாராகோ³ ஹோதி; ஸாராகே³ ஸதி ஸம்யோகோ³ ஹோதி. நந்தி³ஸம்யோஜனஸம்யுத்தோ கோ², மிக³ஜால, பி⁴க்கு² ஸது³தியவிஹாரீதி வுச்சதி. ஸந்தி…பே… ஸந்தி கோ², மிக³ஜால, ஜிவ்ஹாவிஞ்ஞேய்யா ரஸா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தம் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³. நந்தி³யா ஸதி ஸாராகோ³ ஹோதி; ஸாராகே³ ஸதி ஸம்யோகோ³ ஹோதி. நந்தி³ஸம்யோஜனஸம்யுத்தோ கோ², மிக³ஜால, பி⁴க்கு² ஸது³தியவிஹாரீதி வுச்சதி. ஏவம்விஹாரீ ச, மிக³ஜால, பி⁴க்கு² கிஞ்சாபி அரஞ்ஞவனபத்தா²னி பந்தானி ஸேனாஸனானி படிஸேவதி அப்பஸத்³தா³னி அப்பனிக்³கோ⁴ஸானி விஜனவாதானி மனுஸ்ஸராஹஸ்ஸேய்யகானி [மனுஸ்ஸராஹஸேய்யகானி (ஸீ. ஸ்யா. கம். பீ.)] படிஸல்லானஸாருப்பானி; அத² கோ² ஸது³தியவிஹாரீதி வுச்சதி. தம் கிஸ்ஸ ஹேது? தண்ஹா ஹிஸ்ஸ து³தியா, ஸாஸ்ஸ அப்பஹீனா. தஸ்மா ஸது³தியவிஹாரீ’’தி வுச்சதி.

‘‘ஸந்தி ச கோ², மிக³ஜால, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தம் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ நந்தீ³ நிருஜ்ஜ²தி. நந்தி³யா அஸதி ஸாராகோ³ ந ஹோதி; ஸாராகே³ அஸதி ஸம்யோகோ³ ந ஹோதி. நந்தி³ஸம்யோஜனவிஸம்யுத்தோ கோ², மிக³ஜால, பி⁴க்கு² ஏகவிஹாரீதி வுச்சதி…பே… ஸந்தி ச கோ², மிக³ஜால, ஜிவ்ஹாவிஞ்ஞேய்யா ரஸா…பே… ஸந்தி ச கோ², மிக³ஜால, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தம் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ நந்தீ³ நிருஜ்ஜ²தி. நந்தி³யா அஸதி ஸாராகோ³ ந ஹோதி; ஸாராகே³ அஸதி ஸம்யோகோ³ ந ஹோதி. நந்தி³ஸம்யோஜனவிப்பயுத்தோ கோ², மிக³ஜால, பி⁴க்கு² ஏகவிஹாரீதி வுச்சதி. ஏவம்விஹாரீ ச, மிக³ஜால, பி⁴க்கு² கிஞ்சாபி கா³மந்தே விஹரதி ஆகிண்ணோ பி⁴க்கூ²ஹி பி⁴க்கு²னீஹி உபாஸகேஹி உபாஸிகாஹி ராஜூஹி ராஜமஹாமத்தேஹி தித்தி²யேஹி தித்தி²யஸாவகேஹி. அத² கோ² ஏகவிஹாரீதி வுச்சதி. தம் கிஸ்ஸ ஹேது? தண்ஹா ஹிஸ்ஸ து³தியா, ஸாஸ்ஸ பஹீனா. தஸ்மா ஏகவிஹாரீதி வுச்சதீ’’தி. பட²மம்.

2. து³தியமிக³ஜாலஸுத்தம்

64. அத² கோ² ஆயஸ்மா மிக³ஜாலோ யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஆயஸ்மா மிக³ஜாலோ ப⁴க³வந்தம் ஏதத³வோச – ‘‘ஸாது⁴ மே, ப⁴ந்தே, ப⁴க³வா ஸம்கி²த்தேன த⁴ம்மம் தே³ஸேது, யமஹம் ப⁴க³வதோ த⁴ம்மம் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரேய்ய’’ந்தி.

‘‘ஸந்தி கோ², மிக³ஜால, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தம் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³. நந்தி³ஸமுத³யா து³க்க²ஸமுத³யோ, மிக³ஜாலாதி வதா³மி…பே… ஸந்தி ச கோ², மிக³ஜால, ஜிவ்ஹாவிஞ்ஞேய்யா ரஸா…பே… ஸந்தி ச கோ², மிக³ஜால, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தம் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³. நந்தி³ஸமுத³யா து³க்க²ஸமுத³யோ, மிக³ஜாலாதி வதா³மி.

‘‘ஸந்தி ச கோ², மிக³ஜால, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தம் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ நந்தீ³ நிருஜ்ஜ²தி. நந்தி³னிரோதா⁴ து³க்க²னிரோதோ⁴, மிக³ஜாலாதி வதா³மி…பே… ஸந்தி ச கோ², மிக³ஜால, ஜிவ்ஹாவிஞ்ஞேய்யா ரஸா இட்டா² கந்தா…பே… ஸந்தி ச கோ², மிக³ஜால, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தம் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ நந்தீ³ நிருஜ்ஜ²தி. நந்தி³னிரோதா⁴ து³க்க²னிரோதோ⁴, மிக³ஜாலாதி வதா³மீ’’தி.

அத² கோ² ஆயஸ்மா மிக³ஜாலோ ப⁴க³வதோ பா⁴ஸிதம் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ஆயஸ்மா மிக³ஜாலோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரதோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி அப்³ப⁴ஞ்ஞாஸி. அஞ்ஞதரோ ச பனாயஸ்மா மிக³ஜாலோ அரஹதம் அஹோஸீதி. து³தியம்.

3. பட²மஸமித்³தி⁴மாரபஞ்ஹாஸுத்தம்

65. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஆயஸ்மா ஸமித்³தி⁴ யேன ப⁴க³வா…பே… ப⁴க³வந்தம் ஏதத³வோச – ‘‘‘மாரோ, மாரோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, மாரோ வா அஸ்ஸ மாரபஞ்ஞத்தி வா’’தி?

‘‘யத்த² கோ², ஸமித்³தி⁴, அத்தி² சக்கு², அத்தி² ரூபா, அத்தி² சக்கு²விஞ்ஞாணம், அத்தி² சக்கு²விஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² ஸோதம், அத்தி² ஸத்³தா³, அத்தி² ஸோதவிஞ்ஞாணம், அத்தி² ஸோதவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² கா⁴னம், அத்தி² க³ந்தா⁴, அத்தி² கா⁴னவிஞ்ஞாணம், அத்தி² கா⁴னவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² ஜிவ்ஹா, அத்தி² ரஸா, அத்தி² ஜிவ்ஹாவிஞ்ஞாணம், அத்தி² ஜிவ்ஹாவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² காயோ, அத்தி² போ²ட்ட²ப்³பா³, அத்தி² காயவிஞ்ஞாணம், அத்தி² காயவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² மனோ, அத்தி² த⁴ம்மா, அத்தி² மனோவிஞ்ஞாணம், அத்தி² மனோவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா.

‘‘யத்த² ச கோ², ஸமித்³தி⁴, நத்தி² சக்கு², நத்தி² ரூபா, நத்தி² சக்கு²விஞ்ஞாணம், நத்தி² சக்கு²விஞ்ஞாணவிஞ்ஞாதப்³பா³ த⁴ம்மா, நத்தி² தத்த² மாரோ வா மாரபஞ்ஞத்தி வா. நத்தி² ஸோதம்…பே… நத்தி² கா⁴னம்…பே… நத்தி² ஜிவ்ஹா, நத்தி² ரஸா, நத்தி² ஜிவ்ஹாவிஞ்ஞாணம், நத்தி² ஜிவ்ஹாவிஞ்ஞாணவிஞ்ஞாதப்³பா³ த⁴ம்மா, நத்தி² தத்த² மாரோ வா மாரபஞ்ஞத்தி வா. நத்தி² காயோ…பே…. நத்தி² மனோ, நத்தி² த⁴ம்மா, நத்தி² மனோவிஞ்ஞாணம், நத்தி² மனோவிஞ்ஞாணவிஞ்ஞாதப்³பா³ த⁴ம்மா, நத்தி² தத்த² மாரோ வா மாரபஞ்ஞத்தி வா’’தி. ததியம்.

4. ஸமித்³தி⁴ஸத்தபஞ்ஹாஸுத்தம்

66. ‘‘‘ஸத்தோ, ஸத்தோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸத்தோ வா அஸ்ஸ ஸத்தபஞ்ஞத்தி வா’’தி…பே…. சதுத்த²ம்.

5. ஸமித்³தி⁴து³க்க²பஞ்ஹாஸுத்தம்

67. ‘‘‘து³க்க²ம், து³க்க²’ந்தி, ப⁴ந்தே, வுச்சதி. கித்தாவதா நு கோ², ப⁴ந்தே, து³க்க²ம் வா அஸ்ஸ து³க்க²பஞ்ஞத்தி வா’’தி…பே…. பஞ்சமம்.

6. ஸமித்³தி⁴லோகபஞ்ஹாஸுத்தம்

68. ‘‘‘லோகோ, லோகோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, லோகோ வா அஸ்ஸ லோகபஞ்ஞத்தி வா’’தி? யத்த² கோ², ஸமித்³தி⁴, அத்தி² சக்கு², அத்தி² ரூபா, அத்தி² சக்கு²விஞ்ஞாணம், அத்தி² சக்கு²விஞ்ஞாணவிஞ்ஞாதப்³பா³ த⁴ம்மா, அத்தி² தத்த² லோகோ வா லோகபஞ்ஞத்தி வாதி…பே… அத்தி² ஜிவ்ஹா…பே… அத்தி² மனோ, அத்தி² த⁴ம்மா, அத்தி² மனோவிஞ்ஞாணம், அத்தி² மனோவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² லோகோ வா லோகபஞ்ஞத்தி வா.

‘‘யத்த² ச கோ², ஸமித்³தி⁴, நத்தி² சக்கு², நத்தி² ரூபா, நத்தி² சக்கு²விஞ்ஞாணம், நத்தி² சக்கு²விஞ்ஞாணவிஞ்ஞாதப்³பா³ த⁴ம்மா, நத்தி² தத்த² லோகோ வா லோகபஞ்ஞத்தி வா…பே… நத்தி² ஜிவ்ஹா…பே… நத்தி² மனோ, நத்தி² த⁴ம்மா, நத்தி² மனோவிஞ்ஞாணம், நத்தி² மனோவிஞ்ஞாணவிஞ்ஞாதப்³பா³ த⁴ம்மா, நத்தி² தத்த² லோகோ வா லோகபஞ்ஞத்தி வா’’தி. ச²ட்ட²ம்.

7. உபஸேனஆஸீவிஸஸுத்தம்

69. ஏகம் ஸமயம் ஆயஸ்மா ச ஸாரிபுத்தோ ஆயஸ்மா ச உபஸேனோ ராஜக³ஹே விஹரந்தி ஸீதவனே ஸப்பஸோண்டி³கபப்³பா⁴ரே. தேன கோ² பன ஸமயேன ஆயஸ்மதோ உபஸேனஸ்ஸ காயே ஆஸீவிஸோ பதிதோ ஹோதி. அத² கோ² ஆயஸ்மா உபஸேனோ பி⁴க்கூ² ஆமந்தேஸி – ‘‘ஏத² மே, ஆவுஸோ, இமம் காயம் மஞ்சகம் ஆரோபேத்வா ப³ஹித்³தா⁴ நீஹரத². புராயம் காயோ இதே⁴வ விகிரதி; ஸேய்யதா²பி பு⁴ஸமுட்டீ²’’தி.

ஏவம் வுத்தே, ஆயஸ்மா ஸாரிபுத்தோ ஆயஸ்மந்தம் உபஸேனம் ஏதத³வோச – ‘‘ந கோ² பன மயம் பஸ்ஸாம ஆயஸ்மதோ உபஸேனஸ்ஸ காயஸ்ஸ வா அஞ்ஞத²த்தம் இந்த்³ரியானம் வா விபரிணாமம். அத² ச பனாயஸ்மா உபஸேனோ ஏவமாஹ – ‘ஏத² மே, ஆவுஸோ, இமம் காயம் மஞ்சகம் ஆரோபேத்வா ப³ஹித்³தா⁴ நீஹரத². புராயம் காயோ இதே⁴வ விகிரதி; ஸேய்யதா²பி பு⁴ஸமுட்டீ²’’’தி. ‘‘யஸ்ஸ நூன, ஆவுஸோ ஸாரிபுத்த, ஏவமஸ்ஸ – ‘அஹம் சக்கூ²தி வா மம சக்கூ²தி வா…பே… அஹம் ஜிவ்ஹாதி வா மம ஜிவ்ஹாதி வா… அஹம் மனோதி வா மம மனோதி வா’. தஸ்ஸ, ஆவுஸோ ஸாரிபுத்த, ஸியா காயஸ்ஸ வா அஞ்ஞத²த்தம் இந்த்³ரியானம் வா விபரிணாமோ. மய்ஹஞ்ச கோ², ஆவுஸோ ஸாரிபுத்த, ந ஏவம் ஹோதி – ‘அஹம் சக்கூ²தி வா மம சக்கூ²தி வா…பே… அஹம் ஜிவ்ஹாதி வா மம ஜிவ்ஹாதி வா…பே… அஹம் மனோதி வா மம மனோதி வா’. தஸ்ஸ மய்ஹஞ்ச கோ², ஆவுஸோ ஸாரிபுத்த, கிம் காயஸ்ஸ வா அஞ்ஞத²த்தம் ப⁴விஸ்ஸதி, இந்த்³ரியானம் வா விபரிணாமோ’’தி!

‘‘ததா² ஹி பனாயஸ்மதோ உபஸேனஸ்ஸ தீ³க⁴ரத்தம் அஹங்காரமமங்காரமானானுஸயோ ஸுஸமூஹதோ. தஸ்மா ஆயஸ்மதோ உபஸேனஸ்ஸ ந ஏவம் ஹோதி – ‘அஹம் சக்கூ²தி வா மம சக்கூ²தி வா…பே… அஹம் ஜிவ்ஹாதி வா மம ஜிவ்ஹாதி வா…பே… அஹம் மனோதி வா மம மனோதி வா’’’தி. அத² கோ² தே பி⁴க்கூ² ஆயஸ்மதோ உபஸேனஸ்ஸ காயம் மஞ்சகம் ஆரோபேத்வா ப³ஹித்³தா⁴ நீஹரிம்ஸு. அத² கோ² ஆயஸ்மதோ உபஸேனஸ்ஸ காயோ தத்தே²வ விகிரி; ஸேய்யதா²பி பு⁴ஸமுட்டீ²தி. ஸத்தமம்.

8. உபவாணஸந்தி³ட்டி²கஸுத்தம்

70. அத² கோ² ஆயஸ்மா உபவாணோ யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஆயஸ்மா உபவாணோ ப⁴க³வந்தம் ஏதத³வோச – ‘‘‘ஸந்தி³ட்டி²கோ த⁴ம்மோ, ஸந்தி³ட்டி²கோ த⁴ம்மோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸந்தி³ட்டி²கோ த⁴ம்மோ ஹோதி, அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி?

‘‘இத⁴ பன, உபவாண, பி⁴க்கு² சக்கு²னா ரூபம் தி³ஸ்வா ரூபப்படிஸம்வேதீ³ ச ஹோதி ரூபராக³ப்படிஸம்வேதீ³ ச. ஸந்தஞ்ச அஜ்ஜ²த்தம் ரூபேஸு ராக³ம் ‘அத்தி² மே அஜ்ஜ²த்தம் ரூபேஸு ராகோ³’தி பஜானாதி. யம் தம், உபவாண, பி⁴க்கு² சக்கு²னா ரூபம் தி³ஸ்வா ரூபப்படிஸம்வேதீ³ ச ஹோதி ரூபராக³ப்படிஸம்வேதீ³ ச. ஸந்தஞ்ச அஜ்ஜ²த்தம் ரூபேஸு ராக³ம் ‘அத்தி² மே அஜ்ஜ²த்தம் ரூபேஸு ராகோ³’தி பஜானாதி. ஏவம்பி கோ², உபவாண, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி…பே….

‘‘புன சபரம், உபவாண, பி⁴க்கு² ஜிவ்ஹாய ரஸம் ஸாயித்வா ரஸப்படிஸம்வேதீ³ ச ஹோதி ரஸராக³ப்படிஸம்வேதீ³ ச. ஸந்தஞ்ச அஜ்ஜ²த்தம் ரஸேஸு ராக³ம் ‘அத்தி² மே அஜ்ஜ²த்தம் ரஸேஸு ராகோ³’தி பஜானாதி. யம் தம், உபவாண, பி⁴க்கு² ஜிவ்ஹாய ரஸம் ஸாயித்வா ரஸப்படிஸம்வேதீ³ ச ஹோதி ரஸராக³ப்படிஸம்வேதீ³ ச. ஸந்தஞ்ச அஜ்ஜ²த்தம் ரஸேஸு ராக³ம் ‘அத்தி² மே அஜ்ஜ²த்தம் ரஸேஸு ராகோ³’தி பஜானாதி. ஏவம்பி கோ², உபவாண, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி…பே….

‘‘புன சபரம், உபவாண, பி⁴க்கு² மனஸா த⁴ம்மம் விஞ்ஞாய த⁴ம்மப்படிஸம்வேதீ³ ச ஹோதி த⁴ம்மராக³ப்படிஸம்வேதீ³ ச. ஸந்தஞ்ச அஜ்ஜ²த்தம் த⁴ம்மேஸு ராக³ம் ‘அத்தி² மே அஜ்ஜ²த்தம் த⁴ம்மேஸு ராகோ³’தி பஜானாதி. யம் தம், உபவாண, பி⁴க்கு² மனஸா த⁴ம்மம் விஞ்ஞாய த⁴ம்மப்படிஸம்வேதீ³ ச ஹோதி த⁴ம்மராக³ப்படிஸம்வேதீ³ ச. ஸந்தஞ்ச அஜ்ஜ²த்தம் த⁴ம்மேஸு ராக³ம் ‘அத்தி² மே அஜ்ஜ²த்தம் த⁴ம்மேஸு ராகோ³’தி பஜானாதி. ஏவம்பி கோ², உபவாண, ஸந்தி³ட்டி²கோ த⁴ம்மோ ஹோதி…பே… பச்சத்தம் வேதி³தப்³போ³ விஞ்ஞூஹீ’’தி…பே….

‘‘இத⁴ பன, உபவாண, பி⁴க்கு² சக்கு²னா ரூபம் தி³ஸ்வா ரூபப்படிஸம்வேதீ³ ச ஹோதி, நோ ச ரூபராக³ப்படிஸம்வேதீ³. அஸந்தஞ்ச அஜ்ஜ²த்தம் ரூபேஸு ராக³ம் ‘நத்தி² மே அஜ்ஜ²த்தம் ரூபேஸு ராகோ³’தி பஜானாதி. யம் தம், உபவாண, பி⁴க்கு² சக்கு²னா ரூபம் தி³ஸ்வா ரூபப்படிஸம்வேதீ³ஹி கோ² ஹோதி, நோ ச ரூபராக³ப்படிஸம்வேதீ³. அஸந்தஞ்ச அஜ்ஜ²த்தம் ரூபேஸு ராக³ம் ‘நத்தி² மே அஜ்ஜ²த்தம் ரூபேஸு ராகோ³’தி பஜானாதி. ஏவம்பி கோ², உபவாண, ஸந்தி³ட்டி²கோ த⁴ம்மோ ஹோதி, அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி…பே….

‘‘புன சபரம், உபவாண, பி⁴க்கு² ஜிவ்ஹாய ரஸம் ஸாயித்வா ரஸப்படிஸம்வேதீ³ஹி கோ² ஹோதி, நோ ச ரஸராக³ப்படிஸம்வேதீ³. அஸந்தஞ்ச அஜ்ஜ²த்தம் ரஸேஸு ராக³ம் ‘நத்தி² மே அஜ்ஜ²த்தம் ரஸேஸு ராகோ³’தி பஜானாதி…பே….

‘‘புன சபரம், உபவாண, பி⁴க்கு² மனஸா த⁴ம்மம் விஞ்ஞாய த⁴ம்மப்படிஸம்வேதீ³ஹி கோ² ஹோதி, நோ ச த⁴ம்மராக³ப்படிஸம்வேதீ³. அஸந்தஞ்ச அஜ்ஜ²த்தம் த⁴ம்மேஸு ராக³ம் ‘நத்தி² மே அஜ்ஜ²த்தம் த⁴ம்மேஸு ராகோ³’தி பஜானாதி. யம் தம், உபவாண, பி⁴க்கு² மனஸா த⁴ம்மம் விஞ்ஞாய த⁴ம்மப்படிஸம்வேதீ³ஹி கோ² ஹோதி, நோ ச த⁴ம்மராக³ப்படிஸம்வேதீ³. அஸந்தஞ்ச அஜ்ஜ²த்தம் த⁴ம்மேஸு ராக³ம் ‘நத்தி² மே அஜ்ஜ²த்தம் த⁴ம்மேஸு ராகோ³’தி பஜானாதி. ஏவம்பி கோ², உபவாண, ஸந்தி³ட்டி²கோ த⁴ம்மோ ஹோதி, அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’’தி. அட்ட²மம்.

9. பட²மச²ப²ஸ்ஸாயதனஸுத்தம்

71. ‘‘யோ ஹி கோசி, பி⁴க்க²வே, பி⁴க்கு² ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. அவுஸிதம் தேன ப்³ரஹ்மசரியம், ஆரகா ஸோ இமஸ்மா த⁴ம்மவினயா’’தி.

ஏவம் வுத்தே, அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘ஏத்தா²ஹம், ப⁴ந்தே, அனஸ்ஸஸம் [அனஸ்ஸஸிம் (ஸீ.), அனஸ்ஸாஸம் (ஸ்யா. கம்.), அனஸ்ஸாஸிம் (பீ.)]. அஹஞ்ஹி, ப⁴ந்தே, ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாமீ’’தி.

‘‘தம் கிம் மஞ்ஞஸி, பி⁴க்கு², சக்கு²ம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸீ’’தி?

‘‘நோ ஹேதம், ப⁴ந்தே’’.

‘‘ஸாது⁴, பி⁴க்கு², ஏத்த² ச தே, பி⁴க்கு², சக்கு² ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய ஸுதி³ட்ட²ம் ப⁴விஸ்ஸதி. ஏஸேவந்தோ து³க்க²ஸ்ஸ…பே… ஜிவ்ஹம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸீ’’தி?

‘‘நோ ஹேதம், ப⁴ந்தே’’.

‘‘ஸாது⁴, பி⁴க்கு², ஏத்த² ச தே, பி⁴க்கு², ஜிவ்ஹா ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய ஸுதி³ட்ட²ம் ப⁴விஸ்ஸதி. ஏஸேவந்தோ து³க்க²ஸ்ஸ…பே… மனம் ‘ஏதம் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸீ’’தி?

‘‘நோ ஹேதம், ப⁴ந்தே’’.

‘‘ஸாது⁴, பி⁴க்கு², ஏத்த² ச தே, பி⁴க்கு², மனோ ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய ஸுதி³ட்ட²ம் ப⁴விஸ்ஸதி. ஏஸேவந்தோ து³க்க²ஸ்ஸா’’தி. நவமம்.

10. து³தியச²ப²ஸ்ஸாயதனஸுத்தம்

72. ‘‘யோ ஹி கோசி, பி⁴க்க²வே, பி⁴க்கு² ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. அவுஸிதம் தேன ப்³ரஹ்மசரியம், ஆரகா ஸோ இமஸ்மா த⁴ம்மவினயா’’தி.

ஏவம் வுத்தே, அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘ஏத்தா²ஹம், ப⁴ந்தே, அனஸ்ஸஸம் பனஸ்ஸஸம். அஹஞ்ஹி, ப⁴ந்தே, ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாமீ’’தி.

‘‘தம் கிம் மஞ்ஞஸி, பி⁴க்கு², சக்கு²ம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸீ’’தி?

‘‘ஏவம், ப⁴ந்தே’’.

‘‘ஸாது⁴, பி⁴க்கு², ஏத்த² ச தே, பி⁴க்கு², சக்கு² ‘நேதம் மம, நேஸோஹமஸ்மி ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய ஸுதி³ட்ட²ம் ப⁴விஸ்ஸதி. ஏவம் தே ஏதம் பட²மம் ப²ஸ்ஸாயதனம் பஹீனம் ப⁴விஸ்ஸதி ஆயதிம் அபுனப்³ப⁴வாய…பே….

‘‘ஜிவ்ஹம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸீ’’தி?

‘‘ஏவம், ப⁴ந்தே’’.

‘‘ஸாது⁴, பி⁴க்கு², ஏத்த² ச தே, பி⁴க்கு², ஜிவ்ஹா ‘நேதம் மம, நேஸோஹமஸ்மி ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய ஸுதி³ட்ட²ம் ப⁴விஸ்ஸதி. ஏவம் தே ஏதம் சதுத்த²ம் ப²ஸ்ஸாயதனம் பஹீனம் ப⁴விஸ்ஸதி ஆயதிம் அபுனப்³ப⁴வாய…பே….

‘‘மனம் ‘நேதம் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸீ’’தி?

‘‘ஏவம், ப⁴ந்தே’’.

‘‘ஸாது⁴, பி⁴க்கு², ஏத்த² ச தே, பி⁴க்கு², மனோ ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய ஸுதி³ட்ட²ம் ப⁴விஸ்ஸதி. ஏவம் தே ஏதம் ச²ட்ட²ம் ப²ஸ்ஸாயதனம் பஹீனம் ப⁴விஸ்ஸதி ஆயதிம் அபுனப்³ப⁴வாயா’’தி. த³ஸமம்.

11. ததியச²ப²ஸ்ஸாயதனஸுத்தம்

73. ‘‘யோ ஹி கோசி, பி⁴க்க²வே, பி⁴க்கு² ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாதி. அவுஸிதம் தேன ப்³ரஹ்மசரியம், ஆரகா ஸோ இமஸ்மா த⁴ம்மவினயா’’தி.

ஏவம் வுத்தே, அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘ஏத்தா²ஹம், ப⁴ந்தே, அனஸ்ஸஸம் பனஸ்ஸஸம். அஹஞ்ஹி, ப⁴ந்தே, ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானாமீ’’தி.

‘‘தம் கிம் மஞ்ஞஸி, பி⁴க்கு², சக்கு² நிச்சம் வா அனிச்சம் வா’’தி?

‘‘அனிச்சம், ப⁴ந்தே’’.

‘‘யம் பனானிச்சம் து³க்க²ம் வா தம் ஸுக²ம் வா’’தி?

‘‘து³க்க²ம், ப⁴ந்தே’’.

‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி?

‘‘நோ ஹேதம், ப⁴ந்தே’’.

‘‘ஸோதம்… கா⁴னம்… ஜிவ்ஹா… காயோ… மனோ நிச்சோ வா அனிச்சோ வா’’தி?

‘‘அனிச்சோ, ப⁴ந்தே’’.

‘‘யம் பனானிச்சம் து³க்க²ம் வா தம் ஸுக²ம் வா’’தி?

‘‘து³க்க²ம், ப⁴ந்தே’’.

‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி?

‘‘நோ ஹேதம், ப⁴ந்தே’’.

‘‘ஏவம் பஸ்ஸம், பி⁴க்கு², ஸுதவா அரியஸாவகோ சக்கு²ஸ்மிம்பி நிப்³பி³ந்த³தி, ஸோதஸ்மிம்பி நிப்³பி³ந்த³தி, கா⁴னஸ்மிம்பி நிப்³பி³ந்த³தி, ஜிவ்ஹாயபி நிப்³பி³ந்த³தி, காயஸ்மிம்பி நிப்³பி³ந்த³தி, மனஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி; விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. ஏகாத³ஸமம்.

மிக³ஜாலவக்³கோ³ ஸத்தமோ.

தஸ்ஸுத்³தா³னம் –

மிக³ஜாலேன த்³வே வுத்தா, சத்தாரோ ச ஸமித்³தி⁴னா;

உபஸேனோ உபவாணோ, ச²ப²ஸ்ஸாயதனிகா தயோதி.