1. அவிஜ்ஜாபஹானஸுத்தம்

53. ஸாவத்தி²னிதா³னம். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘கத²ம் நு கோ², ப⁴ந்தே, ஜானதோ கத²ம் பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதீ’’தி?

‘‘சக்கு²ம் கோ², பி⁴க்கு², அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. ரூபே அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. சக்கு²விஞ்ஞாணம்… சக்கு²ஸம்ப²ஸ்ஸம்… யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. ஸோதம்… கா⁴னம்… ஜிவ்ஹம்… காயம்… மனம் அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. த⁴ம்மே … மனோவிஞ்ஞாணம்… மனோஸம்ப²ஸ்ஸம்… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சதோ ஜானதோ பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதி. ஏவம் கோ², பி⁴க்கு², ஜானதோ ஏவம் பஸ்ஸதோ அவிஜ்ஜா பஹீயதி, விஜ்ஜா உப்பஜ்ஜதீ’’தி. பட²மம்.