7. உதா³யீஸுத்தம்

234. ஏகம் ஸமயம் ஆயஸ்மா ச ஆனந்தோ³ ஆயஸ்மா ச உதா³யீ கோஸம்பி³யம் விஹரந்தி கோ⁴ஸிதாராமே. அத² கோ² ஆயஸ்மா உதா³யீ ஸாயன்ஹஸமயம் படிஸல்லானா வுட்டி²தோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா உதா³யீ ஆயஸ்மந்தம் ஆனந்த³ம் ஏதத³வோச –

‘‘யதே²வ நு கோ², ஆவுஸோ ஆனந்த³, அயம் காயோ ப⁴க³வதா அனேகபரியாயேன அக்கா²தோ விவடோ பகாஸிதோ – ‘இதிபாயம் காயோ அனத்தா’தி, ஸக்கா ஏவமேவ விஞ்ஞாணம் பித³ம் ஆசிக்கி²தும் தே³ஸேதும் பஞ்ஞபேதும் பட்ட²பேதும் விவரிதும் விப⁴ஜிதும் உத்தானீகாதும் – ‘இதிபித³ம் விஞ்ஞாணம் அனத்தா’’’தி?

‘‘யதே²வ கோ², ஆவுஸோ உதா³யீ, அயம் காயோ ப⁴க³வதா அனேகபரியாயேன அக்கா²தோ விவடோ பகாஸிதோ – ‘இதிபாயம் காயோ அனத்தா’தி, ஸக்கா ஏவமேவ விஞ்ஞாணம் பித³ம் ஆசிக்கி²தும் தே³ஸேதும் பஞ்ஞபேதும் பட்ட²பேதும் விவரிதும் விப⁴ஜிதும் உத்தானீகாதும் – ‘இதிபித³ம் விஞ்ஞாணம் அனத்தா’’’தி.

‘‘சக்கு²ஞ்ச, ஆவுஸோ, படிச்ச ரூபே ச உப்பஜ்ஜதி சக்கு²விஞ்ஞாண’’ந்தி? ‘‘ஏவமாவுஸோ’’தி. ‘‘யோ சாவுஸோ, ஹேது, யோ ச பச்சயோ சக்கு²விஞ்ஞாணஸ்ஸ உப்பாதா³ய, ஸோ ச ஹேது, ஸோ ச பச்சயோ ஸப்³பே³ன ஸப்³ப³ம் ஸப்³ப³தா² ஸப்³ப³ம் அபரிஸேஸம் நிருஜ்ஜே²ய்ய. அபி நு கோ² சக்கு²விஞ்ஞாணம் பஞ்ஞாயேதா²’’தி? ‘‘நோ ஹேதம், ஆவுஸோ’’. ‘‘இமினாபி கோ² ஏதம், ஆவுஸோ, பரியாயேன ப⁴க³வதா அக்கா²தம் விவடம் பகாஸிதம் – ‘இதிபித³ம் விஞ்ஞாணம் அனத்தா’’’தி…பே….

‘‘ஜிவ்ஹஞ்சாவுஸோ, படிச்ச ரஸே ச உப்பஜ்ஜதி ஜிவ்ஹாவிஞ்ஞாண’’ந்தி? ‘‘ஏவமாவுஸோ’’தி. ‘‘யோ சாவுஸோ, ஹேது யோ ச பச்சயோ ஜிவ்ஹாவிஞ்ஞாணஸ்ஸ உப்பாதா³ய, ஸோ ச ஹேது, ஸோ ச பச்சயோ ஸப்³பே³ன ஸப்³ப³ம் ஸப்³ப³தா² ஸப்³ப³ம் அபரிஸேஸம் நிருஜ்ஜே²ய்ய, அபி நு கோ² ஜிவ்ஹாவிஞ்ஞாணம் பஞ்ஞாயேதா²’’தி? ‘‘நோ ஹேதம், ஆவுஸோ’’. ‘‘இமினாபி கோ² ஏதம், ஆவுஸோ, பரியாயேன ப⁴க³வதா அக்கா²தம் விவடம் பகாஸிதம் – ‘இதிபித³ம் விஞ்ஞாணம் அனத்தா’’’தி…பே….

‘‘மனஞ்சாவுஸோ, படிச்ச த⁴ம்மே ச உப்பஜ்ஜதி மனோவிஞ்ஞாண’’ந்தி? ‘‘ஏவமாவுஸோ’’தி. ‘‘யோ சாவுஸோ, ஹேது, யோ ச பச்சயோ மனோவிஞ்ஞாணஸ்ஸ உப்பாதா³ய, ஸோ ச ஹேது, ஸோ ச பச்சயோ ஸப்³பே³ன ஸப்³ப³ம் ஸப்³ப³தா² ஸப்³ப³ம் அபரிஸேஸம் நிருஜ்ஜே²ய்ய, அபி நு கோ² மனோவிஞ்ஞாணம் பஞ்ஞாயேதா²’’தி? ‘‘நோ ஹேதம், ஆவுஸோ’’. ‘‘இமினாபி கோ² ஏதம், ஆவுஸோ, பரியாயேன ப⁴க³வதா அக்கா²தம் விவடம் பகாஸிதம் – ‘இதிபித³ம் விஞ்ஞாணம் அனத்தா’’’தி.

‘‘ஸேய்யதா²பி, ஆவுஸோ, புரிஸோ ஸாரத்தி²கோ ஸாரக³வேஸீ ஸாரபரியேஸனம் சரமானோ திண்ஹம் குடா²ரிம் ஆதா³ய வனம் பவிஸேய்ய. ஸோ தத்த² பஸ்ஸேய்ய மஹந்தம் கத³லிக்க²ந்த⁴ம் உஜும் நவம் அகுக்குகஜாதம் [அகுக்குடகஜாதம் (ஸ்யா. கம்.), அகுக்கஜடஜாதம் (க.)]. தமேனம் மூலே சி²ந்தே³ய்ய; மூலே சே²த்வா அக்³கே³ சி²ந்தே³ய்ய; அக்³கே³ சே²த்வா பத்தவட்டிம் வினிப்³பு⁴ஜேய்ய [வினிப்³பு⁴ஜ்ஜேய்ய (பீ.), வினிப்³ப⁴ஜ்ஜேய்ய (ஸ்யா. கம்.)]. ஸோ தத்த² பே²க்³கு³ம்பி நாதி⁴க³ச்சே²ய்ய, குதோ ஸாரம்! ஏவமேவ கோ², ஆவுஸோ, பி⁴க்கு² ச²ஸு ப²ஸ்ஸாயதனேஸு நேவத்தானம் ந அத்தனியம் ஸமனுபஸ்ஸதி. ஸோ ஏவம் அஸமனுபஸ்ஸந்தோ [ஏவம் ஸமனுபஸ்ஸந்தோ (ஸ்யா. கம். க.)] ந கிஞ்சி லோகே உபாதி³யதி. அனுபாதி³யம் ந பரிதஸ்ஸதி. அபரிதஸ்ஸம் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. ஸத்தமம்.