8. ஆதி³த்தபரியாயஸுத்தம்

235. ‘‘ஆதி³த்தபரியாயம் வோ, பி⁴க்க²வே, த⁴ம்மபரியாயம் தே³ஸேஸ்ஸாமி. தம் ஸுணாத². கதமோ ச, பி⁴க்க²வே, ஆதி³த்தபரியாயோ, த⁴ம்மபரியாயோ? வரம், பி⁴க்க²வே, தத்தாய அயோஸலாகாய ஆதி³த்தாய ஸம்பஜ்ஜலிதாய ஸஜோதிபூ⁴தாய [ஸஞ்ஜோதிபூ⁴தாய (ஸ்யா. கம்.)] சக்கு²ந்த்³ரியம் ஸம்பலிமட்ட²ம், ந த்வேவ சக்கு²விஞ்ஞேய்யேஸு ரூபேஸு அனுப்³யஞ்ஜனஸோ நிமித்தக்³கா³ஹோ. நிமித்தஸ்ஸாத³க³தி²தம் [நிமித்தஸ்ஸாத³க³தி⁴தம் (ஸ்யா. கம். க.) ம. நி. 3.316-317] வா, பி⁴க்க²வே, விஞ்ஞாணம் திட்ட²மானம் திட்டே²ய்ய, அனுப்³யஞ்ஜனஸ்ஸாத³க³தி²தம் வா தஸ்மிஞ்சே ஸமயே காலம் கரேய்ய, டா²னமேதம் விஜ்ஜதி, யம் த்³வின்னம் க³தீனம் அஞ்ஞதரம் க³திம் க³ச்சே²ய்ய – நிரயம் வா, திரச்சா²னயோனிம் வா. இமம் க்²வாஹம், பி⁴க்க²வே, ஆதீ³னவம் தி³ஸ்வா ஏவம் வதா³மி.

‘‘வரம், பி⁴க்க²வே, திண்ஹேன அயோஸங்குனா ஆதி³த்தேன ஸம்பஜ்ஜலிதேன ஸஜோதிபூ⁴தேன ஸோதிந்த்³ரியம் ஸம்பலிமட்ட²ம், ந த்வேவ ஸோதவிஞ்ஞேய்யேஸு ஸத்³தே³ஸு அனுப்³யஞ்ஜனஸோ நிமித்தக்³கா³ஹோ. நிமித்தஸ்ஸாத³க³தி²தம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய, அனுப்³யஞ்ஜனஸ்ஸாத³க³தி²தம் வா தஸ்மிஞ்சே ஸமயே காலங்கரேய்ய, டா²னமேதம் விஜ்ஜதி, யம் த்³வின்னம் க³தீனம் அஞ்ஞதரம் க³திம் க³ச்சே²ய்ய – நிரயம் வா திரச்சா²னயோனிம் வா. இமம் க்²வாஹம், பி⁴க்க²வே, ஆதீ³னவம் தி³ஸ்வா ஏவம் வதா³மி.

‘‘வரம், பி⁴க்க²வே, திண்ஹேன நக²ச்சே²த³னேன ஆதி³த்தேன ஸம்பஜ்ஜலிதேன ஸஜோதிபூ⁴தேன கா⁴னிந்த்³ரியம் ஸம்பலிமட்ட²ம், ந த்வேவ கா⁴னவிஞ்ஞேய்யேஸு க³ந்தே⁴ஸு அனுப்³யஞ்ஜனஸோ நிமித்தக்³கா³ஹோ. நிமித்தஸ்ஸாத³க³தி²தம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய, அனுப்³யஞ்ஜனஸ்ஸாத³க³தி²தம் வா தஸ்மிஞ்சே ஸமயே காலம் கரேய்ய. டா²னமேதம் விஜ்ஜதி, யம் த்³வின்னம் க³தீனம் அஞ்ஞதரம் க³திம் க³ச்சே²ய்ய – நிரயம் வா திரச்சா²னயோனிம் வா. இமம் க்²வாஹம், பி⁴க்க²வே, ஆதீ³னவம் தி³ஸ்வா ஏவம் வதா³மி.

‘‘வரம், பி⁴க்க²வே, திண்ஹேன கு²ரேன ஆதி³த்தேன ஸம்பஜ்ஜலிதேன ஸஜோதிபூ⁴தேன ஜிவ்ஹிந்த்³ரியம் ஸம்பலிமட்ட²ம், ந த்வேவ ஜிவ்ஹாவிஞ்ஞேய்யேஸு ரஸேஸு அனுப்³யஞ்ஜனஸோ நிமித்தக்³கா³ஹோ. நிமித்தஸ்ஸாத³க³தி²தம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய, அனுப்³யஞ்ஜனஸ்ஸாத³க³தி²தம் வா தஸ்மிஞ்சே ஸமயே காலம் கரேய்ய. டா²னமேதம் விஜ்ஜதி, யம் த்³வின்னம் க³தீனம் அஞ்ஞதரம் க³திம் க³ச்சே²ய்ய – நிரயம் வா திரச்சா²னயோனிம் வா. இமம் க்²வாஹம், பி⁴க்க²வே, ஆதீ³னவம் தி³ஸ்வா ஏவம் வதா³மி.

‘‘வரம், பி⁴க்க²வே, திண்ஹாய ஸத்தியா ஆதி³த்தாய ஸம்பஜ்ஜலிதாய ஸஜோதிபூ⁴தாய காயிந்த்³ரியம் ஸம்பலிமட்ட²ம், ந த்வேவ காயவிஞ்ஞேய்யேஸு போ²ட்ட²ப்³பே³ஸு அனுப்³யஞ்ஜனஸோ நிமித்தக்³கா³ஹோ. நிமித்தஸ்ஸாத³க³தி²தம் வா, பி⁴க்க²வே, விஞ்ஞாணம் திட்ட²மானம் திட்டே²ய்ய, அனுப்³யஞ்ஜனஸ்ஸாத³க³தி²தம் வா தஸ்மிஞ்சே ஸமயே காலம் கரேய்ய. டா²னமேதம் விஜ்ஜதி, யம் த்³வின்னம் க³தீனம் அஞ்ஞதரம் க³திம் க³ச்சே²ய்ய – நிரயம் வா திரச்சா²னயோனிம் வா. இமம் க்²வாஹம், பி⁴க்க²வே, ஆதீ³னவம் தி³ஸ்வா ஏவம் வதா³மி.

‘‘வரம், பி⁴க்க²வே, ஸோத்தம். ஸோத்தம் கோ² பனாஹம், பி⁴க்க²வே, வஞ்ஜ²ம் ஜீவிதானம் வதா³மி, அப²லம் ஜீவிதானம் வதா³மி, மோமூஹம் ஜீவிதானம் வதா³மி, ந த்வேவ ததா²ரூபே விதக்கே விதக்கேய்ய யதா²ரூபானம் விதக்கானம் வஸம் க³தோ ஸங்க⁴ம் பி⁴ந்தே³ய்ய. இமம் க்²வாஹம், பி⁴க்க²வே, வஞ்ஜ²ம் ஜீவிதானம் ஆதீ³னவம் தி³ஸ்வா ஏவம் வதா³மி.

‘‘தத்த², பி⁴க்க²வே, ஸுதவா அரியஸாவகோ இதி படிஸஞ்சிக்க²தி – ‘திட்ட²து தாவ தத்தாய அயோஸலாகாய ஆதி³த்தாய ஸம்பஜ்ஜலிதாய ஸஜோதிபூ⁴தாய சக்கு²ந்த்³ரியம் ஸம்பலிமட்ட²ம். ஹந்தா³ஹம் இத³மேவ மனஸி கரோமி – இதி சக்கு² அனிச்சம், ரூபா அனிச்சா, சக்கு²விஞ்ஞாணம் அனிச்சம், சக்கு²ஸம்ப²ஸ்ஸோ அனிச்சோ, யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சம்’’’ [அனிச்ச’’ந்தி (?)].

‘‘திட்ட²து தாவ திண்ஹேன அயோஸங்குனா ஆதி³த்தேன ஸம்பஜ்ஜலிதேன ஸஜோதிபூ⁴தேன ஸோதிந்த்³ரியம் ஸம்பலிமட்ட²ம். ஹந்தா³ஹம் இத³மேவ மனஸி கரோமி – இதி ஸோதம் அனிச்சம், ஸத்³தா³ அனிச்சா, ஸோதவிஞ்ஞாணம் அனிச்சம், ஸோதஸம்ப²ஸ்ஸோ அனிச்சோ, யம்பித³ம் ஸோதஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சம்.

‘‘திட்ட²து தாவ திண்ஹேன நக²ச்சே²த³னேன ஆதி³த்தேன ஸம்பஜ்ஜலிதேன ஸஜோதிபூ⁴தேன கா⁴னிந்த்³ரியம் ஸம்பலிமட்ட²ம். ஹந்தா³ஹம் இத³மேவ மனஸி கரோமி – இதி கா⁴னம் அனிச்சம், க³ந்தா⁴ அனிச்சா, கா⁴னவிஞ்ஞாணம் அனிச்சம், கா⁴னஸம்ப²ஸ்ஸோ அனிச்சோ, யம்பித³ம் கா⁴னஸம்ப²ஸ்ஸபச்சயா உப்பஜ்ஜதி வேத³யிதம்…பே… தம்பி அனிச்சம்.

‘‘திட்ட²து தாவ திண்ஹேன கு²ரேன ஆதி³த்தேன ஸம்பஜ்ஜலிதேன ஸஜோதிபூ⁴தேன ஜிவ்ஹிந்த்³ரியம் ஸம்பலிமட்ட²ம். ஹந்தா³ஹம் இத³மேவ மனஸி கரோமி – இதி ஜிவ்ஹா அனிச்சா, ரஸா அனிச்சா, ஜிவ்ஹாவிஞ்ஞாணம் அனிச்சம், ஜிவ்ஹாஸம்ப²ஸ்ஸோ அனிச்சோ, யம்பித³ம் ஜிவ்ஹாஸம்ப²ஸ்ஸபச்சயா உப்பஜ்ஜதி…பே… தம்பி அனிச்சம்.

‘‘திட்ட²து தாவ திண்ஹாய ஸத்தியா ஆதி³த்தாய ஸம்பஜ்ஜலிதாய ஸஜோதிபூ⁴தாய காயிந்த்³ரியம் ஸம்பலிமட்ட²ம். ஹந்தா³ஹம் இத³மேவ மனஸி கரோமி – இதி காயோ அனிச்சோ, போ²ட்ட²ப்³பா³ அனிச்சா, காயவிஞ்ஞாணம் அனிச்சம், காயஸம்ப²ஸ்ஸோ அனிச்சோ, யம்பித³ம் காயஸம்ப²ஸ்ஸபச்சயா உப்பஜ்ஜதி வேத³யிதம்…பே… தம்பி அனிச்சம்.

‘‘திட்ட²து தாவ ஸோத்தம். ஹந்தா³ஹம் இத³மேவ மனஸி கரோமி – இதி மனோ அனிச்சோ, த⁴ம்மா அனிச்சா, மனோவிஞ்ஞாணம் அனிச்சம், மனோஸம்ப²ஸ்ஸோ அனிச்சோ, யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சம்’’.

‘‘ஏவம் பஸ்ஸம், பி⁴க்க²வே, ஸுதவா அரியஸாவகோ சக்கு²ஸ்மிம்பி நிப்³பி³ந்த³தி, ரூபேஸுபி நிப்³பி³ந்த³தி, சக்கு²விஞ்ஞாணேபி நிப்³பி³ந்த³தி, சக்கு²ஸம்ப²ஸ்ஸேபி நிப்³பி³ந்த³தி…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி; விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. அயம் கோ², பி⁴க்க²வே, ஆதி³த்தபரியாயோ, த⁴ம்மபரியாயோ’’தி. அட்ட²மம்.