16. நந்தி³க்க²யவக்³கோ³

1. அஜ்ஜ²த்தனந்தி³க்க²யஸுத்தம்

156. ‘‘அனிச்சம்யேவ, பி⁴க்க²வே, பி⁴க்கு² சக்கு²ம் அனிச்சந்தி பஸ்ஸதி, ஸாஸ்ஸ [ஸாயம் (பீ. க.)] ஹோதி ஸம்மாதி³ட்டி². ஸம்மா பஸ்ஸம் நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதி…பே… அனிச்சம்யேவ, பி⁴க்க²வே, பி⁴க்கு² ஜிவ்ஹம் அனிச்சந்தி பஸ்ஸதி, ஸாஸ்ஸ ஹோதி ஸம்மாதி³ட்டி². ஸம்மா பஸ்ஸம் நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா…பே… சித்தம் ஸுவிமுத்தந்தி வுச்சதி…பே… அனிச்சம்யேவ, பி⁴க்க²வே, பி⁴க்கு² மனம் அனிச்சந்தி பஸ்ஸதி, ஸாஸ்ஸ ஹோதி ஸம்மாதி³ட்டி². ஸம்மா பஸ்ஸம் நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதீ’’தி. பட²மம்.

2. பா³ஹிரனந்தி³க்க²யஸுத்தம்

157. ‘‘அனிச்சேயேவ, பி⁴க்க²வே, பி⁴க்கு² ரூபே அனிச்சாதி பஸ்ஸதி, ஸாஸ்ஸ ஹோதி ஸம்மாதி³ட்டி². ஸம்மா பஸ்ஸம் நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதி. அனிச்சேயேவ, பி⁴க்க²வே, பி⁴க்கு² ஸத்³தே³… க³ந்தே⁴… ரஸே… போ²ட்ட²ப்³பே³… த⁴ம்மே அனிச்சாதி பஸ்ஸதி, ஸாஸ்ஸ ஹோதி ஸம்மாதி³ட்டி². ஸம்மா பஸ்ஸம் நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதீ’’தி. து³தியம்.

3. அஜ்ஜ²த்தஅனிச்சனந்தி³க்க²யஸுத்தம்

158. ‘‘சக்கு²ம், பி⁴க்க²வே, யோனிஸோ மனஸி கரோத²; சக்கா²னிச்சதஞ்ச யதா²பூ⁴தம் ஸமனுபஸ்ஸத². சக்கு²ம், பி⁴க்க²வே, பி⁴க்கு² யோனிஸோ மனஸிகரோந்தோ, சக்கா²னிச்சதஞ்ச யதா²பூ⁴தம் ஸமனுபஸ்ஸந்தோ சக்கு²ஸ்மிம்பி நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதி. ஸோதம், பி⁴க்க²வே, யோனிஸோ மனஸி கரோத²… கா⁴னம்… ஜிவ்ஹம், பி⁴க்க²வே, யோனிஸோ மனஸி கரோத²; ஜிவ்ஹானிச்சதஞ்ச யதா²பூ⁴தம் ஸமனுபஸ்ஸத². ஜிவ்ஹம், பி⁴க்க²வே, பி⁴க்கு² யோனிஸோ மனஸிகரோந்தோ, ஜிவ்ஹானிச்சதஞ்ச யதா²பூ⁴தம் ஸமனுபஸ்ஸந்தோ ஜிவ்ஹாயபி நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதி. காயம்… மனம், பி⁴க்க²வே, யோனிஸோ மனஸி கரோத²; மனானிச்சதஞ்ச யதா²பூ⁴தம் ஸமனுபஸ்ஸத². மனம், பி⁴க்க²வே, பி⁴க்கு² யோனிஸோ மனஸிகரோந்தோ, மனானிச்சதஞ்ச யதா²பூ⁴தம் ஸமனுபஸ்ஸந்தோ மனஸ்மிம்பி நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதீ’’தி. ததியம்.

4. பா³ஹிரஅனிச்சனந்தி³க்க²யஸுத்தம்

159. ‘‘ரூபே, பி⁴க்க²வே, யோனிஸோ மனஸி கரோத²; ரூபானிச்சதஞ்ச யதா²பூ⁴தம் ஸமனுபஸ்ஸத². ரூபே, பி⁴க்க²வே, பி⁴க்கு² யோனிஸோ மனஸிகரோந்தோ, ரூபானிச்சதஞ்ச யதா²பூ⁴தம் ஸமனுபஸ்ஸந்தோ ரூபேஸுபி நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதி. ஸத்³தே³… க³ந்தே⁴… ரஸே… போ²ட்ட²ப்³பே³… த⁴ம்மே, பி⁴க்க²வே, யோனிஸோ மனஸி கரோத²; த⁴ம்மானிச்சதஞ்ச யதா²பூ⁴தம் ஸமனுபஸ்ஸத². த⁴ம்மே, பி⁴க்க²வே, பி⁴க்கு² யோனிஸோ மனஸிகரோந்தோ, த⁴ம்மானிச்சதஞ்ச யதா²பூ⁴தம் ஸமனுபஸ்ஸந்தோ த⁴ம்மேஸுபி நிப்³பி³ந்த³தி. நந்தி³க்க²யா ராக³க்க²யோ; ராக³க்க²யா நந்தி³க்க²யோ. நந்தி³ராக³க்க²யா சித்தம் ஸுவிமுத்தந்தி வுச்சதீ’’தி. சதுத்த²ம்.

5. ஜீவகம்ப³வனஸமாதி⁴ஸுத்தம்

160. ஏகம் ஸமயம் ப⁴க³வா ராஜக³ஹே விஹரதி ஜீவகம்ப³வனே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி…பே… ‘‘ஸமாதி⁴ம், பி⁴க்க²வே, பா⁴வேத². ஸமாஹிதஸ்ஸ, பி⁴க்க²வே, பி⁴க்கு²னோ யதா²பூ⁴தம் ஓக்கா²யதி. கிஞ்ச யதா²பூ⁴தம் ஓக்கா²யதி? சக்கு²ம் அனிச்சந்தி யதா²பூ⁴தம் ஓக்கா²யதி, ரூபா அனிச்சாதி யதா²பூ⁴தம் ஓக்கா²யதி, சக்கு²விஞ்ஞாணம் அனிச்சந்தி யதா²பூ⁴தம் ஓக்கா²யதி, சக்கு²ஸம்ப²ஸ்ஸோ அனிச்சோதி யதா²பூ⁴தம் ஓக்கா²யதி, யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி யதா²பூ⁴தம் ஓக்கா²யதி…பே… ஜிவ்ஹா அனிச்சாதி யதா²பூ⁴தம் ஓக்கா²யதி…பே… மனோ அனிச்சோதி யதா²பூ⁴தம் ஓக்கா²யதி, த⁴ம்மா அனிச்சாதி யதா²பூ⁴தம் ஓக்கா²யதி…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி யதா²பூ⁴தம் ஓக்கா²யதி. ஸமாதி⁴ம், பி⁴க்க²வே, பா⁴வேத². ஸமாஹிதஸ்ஸ, பி⁴க்க²வே, பி⁴க்கு²னோ யதா²பூ⁴தம் ஓக்கா²யதீ’’தி. பஞ்சமம்.

6. ஜீவகம்ப³வனபடிஸல்லானஸுத்தம்

161. ஏகம் ஸமயம் ப⁴க³வா ராஜக³ஹே விஹரதி ஜீவகம்ப³வனே. தத்ர கோ² ப⁴க³வா பி⁴க்கூ² ஆமந்தேஸி…பே… ‘‘படிஸல்லானே, பி⁴க்க²வே, யோக³மாபஜ்ஜத². படிஸல்லீனஸ்ஸ, பி⁴க்க²வே, பி⁴க்கு²னோ யதா²பூ⁴தம் ஓக்கா²யதி. கிஞ்ச யதா²பூ⁴தம் ஓக்கா²யதி? சக்கு²ம் அனிச்சந்தி யதா²பூ⁴தம் ஓக்கா²யதி, ரூபா அனிச்சாதி யதா²பூ⁴தம் ஓக்கா²யதி, சக்கு²விஞ்ஞாணம் அனிச்சந்தி யதா²பூ⁴தம் ஓக்கா²யதி, சக்கு²ஸம்ப²ஸ்ஸோ அனிச்சோதி யதா²பூ⁴தம் ஓக்கா²யதி, யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி யதா²பூ⁴தம் ஓக்கா²யதி…பே… மனோ அனிச்சோதி யதா²பூ⁴தம் ஓக்கா²யதி, த⁴ம்மா… மனோவிஞ்ஞாணம்… மனோஸம்ப²ஸ்ஸோ… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி யதா²பூ⁴தம் ஓக்கா²யதி. படிஸல்லானே பி⁴க்க²வே, யோக³மாபஜ்ஜத². படிஸல்லீனஸ்ஸ, பி⁴க்க²வே, பி⁴க்கு²னோ யதா²பூ⁴தம் ஓக்கா²யதீ’’தி. ச²ட்ட²ம்.

7. கோட்டி²கஅனிச்சஸுத்தம்

162. அத² கோ² ஆயஸ்மா மஹாகோட்டி²கோ யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஆயஸ்மா கோட்டி²கோ ப⁴க³வந்தம் ஏதத³வோச – ‘‘ஸாது⁴ மே, ப⁴ந்தே, ப⁴க³வா ஸம்கி²த்தேன த⁴ம்மம் தே³ஸேது, யமஹம் ப⁴க³வதோ த⁴ம்மம் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரேய்ய’’ந்தி.

‘‘யம் கோ², கோட்டி²க, அனிச்சம் தத்ர தே ச²ந்தோ³ பஹாதப்³போ³. கிஞ்ச, கோட்டி²க, அனிச்சம்? சக்கு² கோ², கோட்டி²க, அனிச்சம்; தத்ர தே ச²ந்தோ³ பஹாதப்³போ³. ரூபா அனிச்சா; தத்ர தே ச²ந்தோ³ பஹாதப்³போ³. சக்கு²விஞ்ஞாணம் அனிச்சம்; தத்ர தே ச²ந்தோ³ பஹாதப்³போ³. சக்கு²ஸம்ப²ஸ்ஸோ அனிச்சோ; தத்ர தே ச²ந்தோ³ பஹாதப்³போ³. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சம்; தத்ர தே ச²ந்தோ³ பஹாதப்³போ³…பே… ஜிவ்ஹா அனிச்சா; தத்ர தே ச²ந்தோ³ பஹாதப்³போ³. ரஸா அனிச்சா; தத்ர தே ச²ந்தோ³ பஹாதப்³போ³. ஜிவ்ஹாவிஞ்ஞாணம் அனிச்சம்; தத்ர தே ச²ந்தோ³ பஹாதப்³போ³. ஜிவ்ஹாஸம்ப²ஸ்ஸோ அனிச்சோ; தத்ர தே ச²ந்தோ³ பஹாதப்³போ³. யம்பித³ம் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சம்; தத்ர தே ச²ந்தோ³ பஹாதப்³போ³…பே… மனோ அனிச்சோ; தத்ர தே ச²ந்தோ³ பஹாதப்³போ³. த⁴ம்மா அனிச்சா; தத்ர தே ச²ந்தோ³ பஹாதப்³போ³. மனோவிஞ்ஞாணம் அனிச்சம்; தத்ர தே ச²ந்தோ³ பஹாதப்³போ³. மனோஸம்ப²ஸ்ஸோ அனிச்சோ; தத்ர தே ச²ந்தோ³ பஹாதப்³போ³. யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சம்; தத்ர தே ச²ந்தோ³ பஹாதப்³போ³. யம் கோ², கோட்டி²க, அனிச்சம் தத்ர தே ச²ந்தோ³ பஹாதப்³போ³’’தி. ஸத்தமம்.

8. கோட்டி²கது³க்க²ஸுத்தம்

163. அத² கோ² ஆயஸ்மா மஹாகோட்டி²கோ…பே… ப⁴க³வந்தம் ஏதத³வோச – ‘‘ஸாது⁴ மே, ப⁴ந்தே…பே… விஹரேய்ய’’ந்தி. ‘‘யம் கோ², கோட்டி²க, து³க்க²ம் தத்ர தே ச²ந்தோ³ பஹாதப்³போ³. கிஞ்ச, கோட்டி²க, து³க்க²ம்? சக்கு² கோ², கோட்டி²க, து³க்க²ம்; தத்ர தே ச²ந்தோ³ பஹாதப்³போ³. ரூபா து³க்கா²; தத்ர தே ச²ந்தோ³ பஹாதப்³போ³. சக்கு²விஞ்ஞாணம் து³க்க²ம்; தத்ர தே ச²ந்தோ³ பஹாதப்³போ³. சக்கு²ஸம்ப²ஸ்ஸோ து³க்கோ²; தத்ர தே ச²ந்தோ³ பஹாதப்³போ³. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²ம்; தத்ர தே ச²ந்தோ³ பஹாதப்³போ³…பே… ஜிவ்ஹா து³க்கா²; தத்ர தே ச²ந்தோ³ பஹாதப்³போ³…பே… மனோ து³க்கோ²; தத்ர தே ச²ந்தோ³ பஹாதப்³போ³. த⁴ம்மா து³க்கா²; தத்ர தே ச²ந்தோ³ பஹாதப்³போ³. மனோவிஞ்ஞாணம் து³க்க²ம்; தத்ர தே ச²ந்தோ³ பஹாதப்³போ³. மனோஸம்ப²ஸ்ஸோ து³க்கோ²; தத்ர தே ச²ந்தோ³ பஹாதப்³போ³. யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²ம்; தத்ர தே ச²ந்தோ³ பஹாதப்³போ³. யம் கோ², கோட்டி²க, து³க்க²ம் தத்ர தே ச²ந்தோ³ பஹாதப்³போ³’’தி. அட்ட²மம்.

9. கோட்டி²கஅனத்தஸுத்தம்

164. ஏகமந்தம்…பே… விஹரேய்யந்தி. ‘‘யோ கோ², கோட்டி²க, அனத்தா தத்ர தே ச²ந்தோ³ பஹாதப்³போ³. கோ ச, கோட்டி²க, அனத்தா? சக்கு² கோ², கோட்டி²க, அனத்தா; தத்ர தே ச²ந்தோ³ பஹாதப்³போ³. ரூபா அனத்தா; தத்ர தே ச²ந்தோ³ பஹாதப்³போ³. சக்கு²விஞ்ஞாணம் அனத்தா; தத்ர தே ச²ந்தோ³ பஹாதப்³போ³. சக்கு²ஸம்ப²ஸ்ஸோ அனத்தா; தத்ர தே ச²ந்தோ³ பஹாதப்³போ³. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனத்தா; தத்ர தே ச²ந்தோ³ பஹாதப்³போ³ …பே… ஜிவ்ஹா அனத்தா; தத்ர தே ச²ந்தோ³ பஹாதப்³போ³…பே… மனோ அனத்தா; தத்ர தே ச²ந்தோ³ பஹாதப்³போ³. த⁴ம்மா அனத்தா; தத்ர தே ச²ந்தோ³ பஹாதப்³போ³. மனோவிஞ்ஞாணம்… மனோஸம்ப²ஸ்ஸோ… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனத்தா; தத்ர தே ச²ந்தோ³ பஹாதப்³போ³. யோ கோ², கோட்டி²க, அனத்தா, தத்ர தே ச²ந்தோ³ பஹாதப்³போ³’’தி. நவமம்.

10. மிச்சா²தி³ட்டி²பஹானஸுத்தம்

165. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே… ஏகமந்தம் நிஸின்னோ ஸோ பி⁴க்கு² ப⁴க³வந்தம் ஏதத³வோச – ‘‘கத²ம் நு கோ², ப⁴ந்தே, ஜானதோ கத²ம் பஸ்ஸதோ மிச்சா²தி³ட்டி² பஹீயதீ’’தி?

‘‘சக்கு²ம் கோ², பி⁴க்கு², அனிச்சதோ ஜானதோ பஸ்ஸதோ மிச்சா²தி³ட்டி² பஹீயதி. ரூபே அனிச்சதோ ஜானதோ பஸ்ஸதோ மிச்சா²தி³ட்டி² பஹீயதி. சக்கு²விஞ்ஞாணம் அனிச்சதோ ஜானதோ பஸ்ஸதோ மிச்சா²தி³ட்டி² பஹீயதி. சக்கு²ஸம்ப²ஸ்ஸம் அனிச்சதோ ஜானதோ பஸ்ஸதோ மிச்சா²தி³ட்டி² பஹீயதி…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சதோ ஜானதோ பஸ்ஸதோ மிச்சா²தி³ட்டி² பஹீயதி. ஏவம் கோ², பி⁴க்கு², ஜானதோ ஏவம் பஸ்ஸதோ மிச்சா²தி³ட்டி² பஹீயதீ’’தி. த³ஸமம்.

11. ஸக்காயதி³ட்டி²பஹானஸுத்தம்

166. அத² கோ² அஞ்ஞதரோ பி⁴க்கு²…பே… ஏதத³வோச – ‘‘கத²ம் நு கோ², ப⁴ந்தே, ஜானதோ கத²ம் பஸ்ஸதோ ஸக்காயதி³ட்டி² பஹீயதீ’’தி? ‘‘சக்கு²ம் கோ², பி⁴க்கு², து³க்க²தோ ஜானதோ பஸ்ஸதோ ஸக்காயதி³ட்டி² பஹீயதி. ரூபே து³க்க²தோ ஜானதோ பஸ்ஸதோ ஸக்காயதி³ட்டி² பஹீயதி. சக்கு²விஞ்ஞாணம் து³க்க²தோ ஜானதோ பஸ்ஸதோ ஸக்காயதி³ட்டி² பஹீயதி. சக்கு²ஸம்ப²ஸ்ஸம் து³க்க²தோ ஜானதோ பஸ்ஸதோ ஸக்காயதி³ட்டி² பஹீயதி…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²தோ ஜானதோ பஸ்ஸதோ ஸக்காயதி³ட்டி² பஹீயதி. ஏவம் கோ², பி⁴க்கு², ஜானதோ ஏவம் பஸ்ஸதோ ஸக்காயதி³ட்டி² பஹீயதீ’’தி. ஏகாத³ஸமம்.

12. அத்தானுதி³ட்டி²பஹானஸுத்தம்

167. அத² கோ² அஞ்ஞதரோ பி⁴க்கு²…பே… ஏதத³வோச – ‘‘கத²ம் நு கோ², ப⁴ந்தே, ஜானதோ கத²ம் பஸ்ஸதோ அத்தானுதி³ட்டி² பஹீயதீ’’தி? ‘‘சக்கு²ம் கோ², பி⁴க்கு², அனத்ததோ ஜானதோ பஸ்ஸதோ அத்தானுதி³ட்டி² பஹீயதி. ரூபே அனத்ததோ ஜானதோ பஸ்ஸதோ அத்தானுதி³ட்டி² பஹீயதி. சக்கு²விஞ்ஞாணம் அனத்ததோ ஜானதோ பஸ்ஸதோ அத்தானுதி³ட்டி² பஹீயதி. சக்கு²ஸம்ப²ஸ்ஸம் அனத்ததோ ஜானதோ பஸ்ஸதோ அத்தானுதி³ட்டி² பஹீயதி. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனத்ததோ ஜானதோ பஸ்ஸதோ அத்தானுதி³ட்டி² பஹீயதி…பே… ஜிவ்ஹம் அனத்ததோ ஜானதோ பஸ்ஸதோ அத்தானுதி³ட்டி² பஹீயதி…பே… மனம் அனத்ததோ ஜானதோ பஸ்ஸதோ அத்தானுதி³ட்டி² பஹீயதி. த⁴ம்மே… மனோவிஞ்ஞாணம்… மனோஸம்ப²ஸ்ஸம்… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனத்ததோ ஜானதோ பஸ்ஸதோ அத்தானுதி³ட்டி² பஹீயதீ’’தி. த்³வாத³ஸமம்.

நந்தி³க்க²யவக்³கோ³ ஸோளஸமோ.

தஸ்ஸுத்³தா³னம் –

நந்தி³க்க²யேன சத்தாரோ, ஜீவகம்ப³வனே து³வே;

கோட்டி²கேன தயோ வுத்தா, மிச்சா² ஸக்காய அத்தனோதி.