15. நவபுராணவக்³கோ³

1. கம்மனிரோத⁴ஸுத்தம்

146. ‘‘நவபுராணானி, பி⁴க்க²வே, கம்மானி தே³ஸேஸ்ஸாமி கம்மனிரோத⁴ம் கம்மனிரோத⁴கா³மினிஞ்ச படிபத³ம். தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீதி. கதமஞ்ச, பி⁴க்க²வே, புராணகம்மம்? சக்கு², பி⁴க்க²வே, புராணகம்மம் அபி⁴ஸங்க²தம் அபி⁴ஸஞ்சேதயிதம் வேத³னியம் த³ட்ட²ப்³ப³ம்…பே… ஜிவ்ஹா புராணகம்மா அபி⁴ஸங்க²தா அபி⁴ஸஞ்சேதயிதா வேத³னியா த³ட்ட²ப்³பா³…பே… மனோ புராணகம்மோ அபி⁴ஸங்க²தோ அபி⁴ஸஞ்சேதயிதோ வேத³னியோ த³ட்ட²ப்³போ³. இத³ம் வுச்சதி, பி⁴க்க²வே, புராணகம்மம். கதமஞ்ச, பி⁴க்க²வே, நவகம்மம்? யம் கோ², பி⁴க்க²வே, ஏதரஹி கம்மம் கரோதி காயேன வாசாய மனஸா, இத³ம் வுச்சதி, பி⁴க்க²வே, நவகம்மம். கதமோ ச, பி⁴க்க²வே, கம்மனிரோதோ⁴? யோ கோ², பி⁴க்க²வே, காயகம்மவசீகம்மமனோகம்மஸ்ஸ நிரோதா⁴ விமுத்திம் பு²ஸதி, அயம் வுச்சதி, பி⁴க்க²வே, கம்மனிரோதோ⁴. கதமா ச, பி⁴க்க²வே, கம்மனிரோத⁴கா³மினீ படிபதா³? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴ – அயம் வுச்சதி, பி⁴க்க²வே, கம்மனிரோத⁴கா³மினீ படிபதா³. இதி கோ², பி⁴க்க²வே, தே³ஸிதம் மயா புராணகம்மம், தே³ஸிதம் நவகம்மம், தே³ஸிதோ கம்மனிரோதோ⁴, தே³ஸிதா கம்மனிரோத⁴கா³மினீ படிபதா³. யம் கோ², பி⁴க்க²வே, ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்க²வே, ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்க²வே, மா பமாத³த்த²; மா பச்சா²விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. பட²மம்.

2. அனிச்சனிப்³பா³னஸப்பாயஸுத்தம்

147. ‘‘நிப்³பா³னஸப்பாயம் வோ, பி⁴க்க²வே, படிபத³ம் தே³ஸேஸ்ஸாமி. தம் ஸுணாத²…பே… கதமா ச ஸா, பி⁴க்க²வே, நிப்³பா³னஸப்பாயா படிபதா³? இத⁴, பி⁴க்க²வே, பி⁴க்கு² சக்கு²ம் அனிச்சந்தி பஸ்ஸதி, ரூபா அனிச்சாதி பஸ்ஸதி, சக்கு²விஞ்ஞாணம் அனிச்சந்தி பஸ்ஸதி, சக்கு²ஸம்ப²ஸ்ஸோ அனிச்சோதி பஸ்ஸதி. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி பஸ்ஸதி…பே… ஜிவ்ஹா அனிச்சாதி பஸ்ஸதி, ரஸா அனிச்சாதி பஸ்ஸதி, ஜிவ்ஹாவிஞ்ஞாணம் அனிச்சந்தி பஸ்ஸதி, ஜிவ்ஹாஸம்ப²ஸ்ஸோ அனிச்சோதி பஸ்ஸதி, யம்பித³ம் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி பஸ்ஸதி…பே… மனோ அனிச்சோதி பஸ்ஸதி, த⁴ம்மா அனிச்சாதி பஸ்ஸதி, மனோவிஞ்ஞாணம் அனிச்சந்தி பஸ்ஸதி, மனோஸம்ப²ஸ்ஸோ அனிச்சோதி பஸ்ஸதி, யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சந்தி பஸ்ஸதி. அயம் கோ² ஸா, பி⁴க்க²வே, நிப்³பா³னஸப்பாயா படிபதா³’’தி. து³தியம்.

3. து³க்க²னிப்³பா³னஸப்பாயஸுத்தம்

148. ‘‘நிப்³பா³னஸப்பாயம் வோ, பி⁴க்க²வே, படிபத³ம் தே³ஸேஸ்ஸாமி. தம் ஸுணாத²…பே… கதமா ச ஸா, பி⁴க்க²வே, நிப்³பா³னஸப்பாயா படிபதா³? இத⁴, பி⁴க்க²வே, சக்கு²ம் து³க்க²ந்தி பஸ்ஸதி, ரூபா து³க்கா²தி பஸ்ஸதி, சக்கு²விஞ்ஞாணம் து³க்க²ந்தி பஸ்ஸதி, சக்கு²ஸம்ப²ஸ்ஸோ து³க்கோ²தி பஸ்ஸதி, யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²ந்தி பஸ்ஸதி…பே… ஜிவ்ஹா து³க்கா²தி பஸ்ஸதி…பே… மனோ து³க்கோ²தி பஸ்ஸதி, த⁴ம்மா து³க்கா²தி பஸ்ஸதி, மனோவிஞ்ஞாணம் து³க்க²ந்தி பஸ்ஸதி, மனோஸம்ப²ஸ்ஸோ து³க்கோ²தி பஸ்ஸதி, யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²ந்தி பஸ்ஸதி. அயம் கோ² ஸா, பி⁴க்க²வே, நிப்³பா³னஸப்பாயா படிபதா³’’தி. ததியம்.

4. அனத்தனிப்³பா³னஸப்பாயஸுத்தம்

149. ‘‘நிப்³பா³னஸப்பாயம் வோ, பி⁴க்க²வே, படிபத³ம் தே³ஸேஸ்ஸாமி. தம் ஸுணாத²…பே… கதமா ச ஸா, பி⁴க்க²வே, நிப்³பா³னஸப்பாயா படிபதா³? இத⁴, பி⁴க்க²வே, பி⁴க்கு² சக்கு²ம் அனத்தாதி பஸ்ஸதி, ரூபா அனத்தாதி பஸ்ஸதி, சக்கு²விஞ்ஞாணம் அனத்தாதி பஸ்ஸதி, சக்கு²ஸம்ப²ஸ்ஸோ அனத்தாதி பஸ்ஸதி, யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனத்தாதி பஸ்ஸதி…பே… மனோ அனத்தாதி பஸ்ஸதி, த⁴ம்மா அனத்தாதி பஸ்ஸதி, மனோவிஞ்ஞாணம் அனத்தாதி பஸ்ஸதி, மனோஸம்ப²ஸ்ஸோ அனத்தாதி பஸ்ஸதி, யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனத்தாதி பஸ்ஸதி. அயம் கோ² ஸா, பி⁴க்க²வே, நிப்³பா³னஸப்பாயா படிபதா³’’தி. சதுத்த²ம்.

5. நிப்³பா³னஸப்பாயபடிபதா³ஸுத்தம்

150. ‘‘நிப்³பா³னஸப்பாயம் வோ, பி⁴க்க²வே, படிபத³ம் தே³ஸேஸ்ஸாமி. தம் ஸுணாத²…பே… கதமா ச ஸா, பி⁴க்க²வே, நிப்³பா³னஸப்பாயா படிபதா³? தம் கிம் மஞ்ஞத², பி⁴க்க²வே, சக்கு² நிச்சம் வா அனிச்சம் வா’’தி?

‘‘அனிச்சம், ப⁴ந்தே’’.

‘‘யம் பனானிச்சம் து³க்க²ம் வா தம் ஸுக²ம் வா’’தி?

‘‘து³க்க²ம், ப⁴ந்தே’’.

‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி?

‘‘நோ ஹேதம், ப⁴ந்தே’’.

‘‘ரூபா நிச்சா வா அனிச்சா வா’’தி?

‘‘அனிச்சா, ப⁴ந்தே’’…பே….

‘‘சக்கு²விஞ்ஞாணம்… சக்கு²ஸம்ப²ஸ்ஸோ…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி நிச்சம் வா அனிச்சம் வா’’தி?

‘‘அனிச்சம், ப⁴ந்தே’’.

‘‘யம் பனானிச்சம் து³க்க²ம் வா தம் ஸுக²ம் வா’’தி?

‘‘து³க்க²ம், ப⁴ந்தே’’.

‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி?

‘‘நோ ஹேதம், ப⁴ந்தே’’.

‘‘ஏவம் பஸ்ஸம், பி⁴க்க²வே, ஸுதவா அரியஸாவகோ சக்கு²ஸ்மிம்பி நிப்³பி³ந்த³தி, ரூபேஸுபி நிப்³பி³ந்த³தி, சக்கு²விஞ்ஞாணேபி நிப்³பி³ந்த³தி, சக்கு²ஸம்ப²ஸ்ஸேபி நிப்³பி³ந்த³தி…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தஸ்மிம்பி நிப்³பி³ந்த³தி. நிப்³பி³ந்த³ம் விரஜ்ஜதி; விராகா³ விமுச்சதி …பே… நாபரம் இத்த²த்தாயாதி பஜானாதி. அயம் கோ² ஸா, பி⁴க்க²வே, நிப்³பா³னஸப்பாயா படிபதா³’’தி. பஞ்சமம்.

6. அந்தேவாஸிகஸுத்தம்

151. ‘‘அனந்தேவாஸிகமித³ம், பி⁴க்க²வே, ப்³ரஹ்மசரியம் வுஸ்ஸதி அனாசரியகம். ஸந்தேவாஸிகோ, பி⁴க்க²வே, பி⁴க்கு² ஸாசரியகோ து³க்க²ம் ந பா²ஸு [பா²ஸும் (ஸீ. பீ.)] விஹரதி. அனந்தேவாஸிகோ, பி⁴க்க²வே, பி⁴க்கு² அனாசரியகோ ஸுக²ம் பா²ஸு விஹரதி. கத²ஞ்ச, பி⁴க்கு², ஸந்தேவாஸிகோ ஸாசரியகோ து³க்க²ம் ந பா²ஸு விஹரதி? இத⁴, பி⁴க்க²வே, பி⁴க்கு²னோ சக்கு²னா ரூபம் தி³ஸ்வா உப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. த்யாஸ்ஸ அந்தோ வஸந்தி, அந்தஸ்ஸ வஸந்தி பாபகா அகுஸலா த⁴ம்மாதி. தஸ்மா ஸந்தேவாஸிகோதி வுச்சதி. தே நம் ஸமுதா³சரந்தி, ஸமுதா³சரந்தி நம் பாபகா அகுஸலா த⁴ம்மாதி. தஸ்மா ஸாசரியகோதி வுச்சதி…பே….

‘‘புன சபரம், பி⁴க்க²வே, பி⁴க்கு²னோ ஜிவ்ஹாய ரஸம் ஸாயித்வா உப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. த்யாஸ்ஸ அந்தோ வஸந்தி, அந்தஸ்ஸ வஸந்தி பாபகா அகுஸலா த⁴ம்மாதி. தஸ்மா ஸந்தேவாஸிகோதி வுச்சதி. தே நம் ஸமுதா³சரந்தி, ஸமுதா³சரந்தி நம் பாபகா அகுஸலா த⁴ம்மாதி. தஸ்மா ஸாசரியகோதி வுச்சதி…பே….

‘‘புன சபரம், பி⁴க்க²வே, பி⁴க்கு²னோ மனஸா த⁴ம்மம் விஞ்ஞாய உப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. த்யாஸ்ஸ அந்தோ வஸந்தி, அந்தஸ்ஸ வஸந்தி பாபகா அகுஸலா த⁴ம்மாதி. தஸ்மா ஸந்தேவாஸிகோதி வுச்சதி. தே நம் ஸமுதா³சரந்தி, ஸமுதா³சரந்தி நம் பாபகா அகுஸலா த⁴ம்மாதி. தஸ்மா ஸாசரியகோதி வுச்சதி. ஏவம் கோ², பி⁴க்க²வே, பி⁴க்கு² ஸந்தேவாஸிகோ ஸாசரியகோ து³க்க²ம், ந பா²ஸு விஹரதி.

‘‘கத²ஞ்ச, பி⁴க்க²வே, பி⁴க்கு² அனந்தேவாஸிகோ அனாசரியகோ ஸுக²ம் பா²ஸு விஹரதி? இத⁴, பி⁴க்க²வே, பி⁴க்கு²னோ சக்கு²னா ரூபம் தி³ஸ்வா ந உப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. த்யாஸ்ஸ ந அந்தோ வஸந்தி, நாஸ்ஸ அந்தோ வஸந்தி பாபகா அகுஸலா த⁴ம்மாதி. தஸ்மா அனந்தேவாஸிகோதி வுச்சதி. தே நம் ந ஸமுதா³சரந்தி, ந ஸமுதா³சரந்தி நம் பாபகா அகுஸலா த⁴ம்மாதி. தஸ்மா அனாசரியகோதி வுச்சதி…பே….

‘‘புன சபரம், பி⁴க்க²வே, பி⁴க்கு²னோ ஜிவ்ஹாய ரஸம் ஸாயித்வா ந உப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. த்யாஸ்ஸ ந அந்தோ வஸந்தி, நாஸ்ஸ அந்தோ வஸந்தி பாபகா அகுஸலா த⁴ம்மாதி. தஸ்மா அனந்தேவாஸிகோதி வுச்சதி. தே நம் ந ஸமுதா³சரந்தி, ந ஸமுதா³சரந்தி நம் பாபகா அகுஸலா த⁴ம்மாதி. தஸ்மா அனாசரியகோதி வுச்சதி…பே….

‘‘புன சபரம், பி⁴க்க²வே, பி⁴க்கு²னோ மனஸா த⁴ம்மம் விஞ்ஞாய ந உப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. த்யாஸ்ஸ ந அந்தோ வஸந்தி, நாஸ்ஸ அந்தோ வஸந்தி பாபகா அகுஸலா த⁴ம்மாதி. தஸ்மா அனந்தேவாஸிகோதி வுச்சதி. தே நம் ந ஸமுதா³சரந்தி, ந ஸமுதா³சரந்தி நம் பாபகா அகுஸலா த⁴ம்மாதி. தஸ்மா அனாசரியகோதி வுச்சதி. ஏவம் கோ², பி⁴க்க²வே, பி⁴க்கு² அனந்தேவாஸிகோ அனாசரியகோ ஸுக²ம் பா²ஸு விஹரதி. அனந்தேவாஸிகமித³ம், பி⁴க்க²வே, ப்³ரஹ்மசரியம் வுஸ்ஸதி. அனாசரியகம் ஸந்தேவாஸிகோ, பி⁴க்க²வே, பி⁴க்கு² ஸாசரியகோ து³க்க²ம், ந பா²ஸு விஹரதி. அனந்தேவாஸிகோ, பி⁴க்க²வே, பி⁴க்கு² அனாசரியகோ ஸுக²ம் பா²ஸு விஹரதீ’’தி. ச²ட்ட²ம்.

7. கிமத்தி²யப்³ரஹ்மசரியஸுத்தம்

152. ‘‘ஸசே வோ, பி⁴க்க²வே, அஞ்ஞதித்தி²யா பரிப்³பா³ஜகா ஏவம் புச்சே²ய்யும் – ‘கிமத்தி²யம், ஆவுஸோ, ஸமணே கோ³தமே ப்³ரஹ்மசரியம் வுஸ்ஸதீ’தி? ஏவம் புட்டா² தும்ஹே, பி⁴க்க²வே, தேஸம் அஞ்ஞதித்தி²யானம் பரிப்³பா³ஜகானம் ஏவம் ப்³யாகரேய்யாத² – ‘து³க்க²ஸ்ஸ கோ², ஆவுஸோ, பரிஞ்ஞாய ப⁴க³வதி ப்³ரஹ்மசரியம் வுஸ்ஸதீ’தி. ஸசே பன வோ, பி⁴க்க²வே, அஞ்ஞதித்தி²யா பரிப்³பா³ஜகா ஏவம் புச்சே²ய்யும் – ‘கதமம் பனாவுஸோ, து³க்க²ம், யஸ்ஸ பரிஞ்ஞாய ஸமணே கோ³தமே ப்³ரஹ்மசரியம் வுஸ்ஸதீ’தி? ஏவம் புட்டா² தும்ஹே, பி⁴க்க²வே, தேஸம் அஞ்ஞதித்தி²யானம் பரிப்³பா³ஜகானம் ஏவம் ப்³யாகரேய்யாத² –

‘‘சக்கு² கோ², ஆவுஸோ, து³க்க²ம்; தஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி. ரூபா து³க்கா²; தேஸம் பரிஞ்ஞாய ப⁴க³வதி ப்³ரஹ்மசரியம் வுஸ்ஸதி. சக்கு²விஞ்ஞாணம் து³க்க²ம்; தஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி. சக்கு²ஸம்ப²ஸ்ஸோ து³க்கோ²; தஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²ம்; தஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி…பே… ஜிவ்ஹா து³க்கா²… மனோ து³க்கோ²; தஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி…பே… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி து³க்க²ம்; தஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதி. இத³ம் கோ², ஆவுஸோ, து³க்க²ம்; யஸ்ஸ பரிஞ்ஞாய ப⁴க³வதி ப்³ரஹ்மசரியம் வுஸ்ஸதீ’தி. ஏவம் புட்டா² தும்ஹே, பி⁴க்க²வே, தேஸம் அஞ்ஞதித்தி²யானம் பரிப்³பா³ஜகானம் ஏவம் ப்³யாகரேய்யாதா²’’தி. ஸத்தமம்.

8. அத்தி²னுகோ²பரியாயஸுத்தம்

153. ‘‘அத்தி² நு கோ², பி⁴க்க²வே, பரியாயோ யம் பரியாயம் ஆக³ம்ம பி⁴க்கு² அஞ்ஞத்ரேவ ஸத்³தா⁴ய, அஞ்ஞத்ர ருசியா, அஞ்ஞத்ர அனுஸ்ஸவா, அஞ்ஞத்ர ஆகாரபரிவிதக்கா, அஞ்ஞத்ர தி³ட்டி²னிஜ்ஜா²னக்க²ந்தியா அஞ்ஞம் ப்³யாகரேய்ய – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமீ’’தி [பஜானாதீதி (ஸ்யா. கம். பீ. க.)]? ‘‘ப⁴க³வம்மூலகா நோ, ப⁴ந்தே, த⁴ம்மா, ப⁴க³வம்னேத்திகா ப⁴க³வம்படிஸரணா. ஸாது⁴ வத, ப⁴ந்தே, ப⁴க³வந்தம்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரேஸ்ஸந்தீ’’தி. ‘‘தேன ஹி, பி⁴க்க²வே, ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச – ‘‘அத்தி², பி⁴க்க²வே, பரியாயோ யம் பரியாயம் ஆக³ம்ம பி⁴க்கு² அஞ்ஞத்ரேவ ஸத்³தா⁴ய, அஞ்ஞத்ர ருசியா, அஞ்ஞத்ர அனுஸ்ஸவா, அஞ்ஞத்ர ஆகாரபரிவிதக்கா, அஞ்ஞத்ர தி³ட்டி²னிஜ்ஜா²னக்க²ந்தியா அஞ்ஞம் ப்³யாகரேய்ய – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமீ’’தி.

‘‘கதமோ ச, பி⁴க்க²வே, பரியாயோ, யம் பரியாயம் ஆக³ம்ம பி⁴க்கு² அஞ்ஞத்ரேவ ஸத்³தா⁴ய…பே… அஞ்ஞத்ர தி³ட்டி²னிஜ்ஜா²னக்க²ந்தியா அஞ்ஞம் ப்³யாகரோதி – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’தி? இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா ஸந்தம் வா அஜ்ஜ²த்தம் ராக³தோ³ஸமோஹம், அத்தி² மே அஜ்ஜ²த்தம் ராக³தோ³ஸமோஹோதி பஜானாதி; அஸந்தம் வா அஜ்ஜ²த்தம் ராக³தோ³ஸமோஹம், நத்தி² மே அஜ்ஜ²த்தம் ராக³தோ³ஸமோஹோதி பஜானாதி. யம் தம், பி⁴க்க²வே, பி⁴க்கு² சக்கு²னா ரூபம் தி³ஸ்வா ஸந்தம் வா அஜ்ஜ²த்தம் ராக³தோ³ஸமோஹம், அத்தி² மே அஜ்ஜ²த்தம் ராக³தோ³ஸமோஹோதி பஜானாதி; அஸந்தம் வா அஜ்ஜ²த்தம் ராக³தோ³ஸமோஹம், நத்தி² மே அஜ்ஜ²த்தம் ராக³தோ³ஸமோஹோதி பஜானாதி. அபி நுமே, பி⁴க்க²வே, த⁴ம்மா ஸத்³தா⁴ய வா வேதி³தப்³பா³, ருசியா வா வேதி³தப்³பா³, அனுஸ்ஸவேன வா வேதி³தப்³பா³, ஆகாரபரிவிதக்கேன வா வேதி³தப்³பா³, தி³ட்டி²னிஜ்ஜா²னக்க²ந்தியா வா வேதி³தப்³பா³’’தி? ‘‘நோ ஹேதம், ப⁴ந்தே’’. ‘‘நனுமே, பி⁴க்க²வே, த⁴ம்மா பஞ்ஞாய தி³ஸ்வா வேதி³தப்³பா³’’தி? ‘‘ஏவம், ப⁴ந்தே’’. ‘‘அயம் கோ², பி⁴க்க²வே, பரியாயோ யம் பரியாயம் ஆக³ம்ம பி⁴க்கு² அஞ்ஞத்ரேவ ஸத்³தா⁴ய, அஞ்ஞத்ர ருசியா, அஞ்ஞத்ர அனுஸ்ஸவா, அஞ்ஞத்ர ஆகாரபரிவிதக்கா, அஞ்ஞத்ர தி³ட்டி²னிஜ்ஜா²னக்க²ந்தியா அஞ்ஞம் ப்³யாகரோதி – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமீ’’தி…பே….

‘‘புன சபரம், பி⁴க்க²வே, பி⁴க்கு² ஜிவ்ஹாய ரஸம் ஸாயித்வா ஸந்தம் வா அஜ்ஜ²த்தம்…பே… ராக³தோ³ஸமோஹோதி பஜானாதி; அஸந்தம் வா அஜ்ஜ²த்தம் ராக³தோ³ஸமோஹம், நத்தி² மே அஜ்ஜ²த்தம் ராக³தோ³ஸமோஹோதி பஜானாதி. யம் தம், பி⁴க்க²வே, ஜிவ்ஹாய ரஸம் ஸாயித்வா ஸந்தம் வா அஜ்ஜ²த்தம் ராக³தோ³ஸமோஹம், அத்தி² மே அஜ்ஜ²த்தம் ராக³தோ³ஸமோஹோதி பஜானாதி; அஸந்தம் வா அஜ்ஜ²த்தம் ராக³தோ³ஸமோஹம், நத்தி² மே அஜ்ஜ²த்தம் ராக³தோ³ஸமோஹோதி பஜானாதி; அபி நுமே, பி⁴க்க²வே, த⁴ம்மா ஸத்³தா⁴ய வா வேதி³தப்³பா³, ருசியா வா வேதி³தப்³பா³, அனுஸ்ஸவேன வா வேதி³தப்³பா³, ஆகாரபரிவிதக்கேன வா வேதி³தப்³பா³, தி³ட்டி²னிஜ்ஜா²னக்க²ந்தியா வா வேதி³தப்³பா³’’தி? ‘‘நோ ஹேதம், ப⁴ந்தே’’. ‘‘நனுமே, பி⁴க்க²வே, த⁴ம்மா பஞ்ஞாய தி³ஸ்வா வேதி³தப்³பா³’’தி? ‘‘ஏவம், ப⁴ந்தே’’. ‘‘அயம்பி கோ², பி⁴க்க²வே, பரியாயோ யம் பரியாயம் ஆக³ம்ம பி⁴க்கு² அஞ்ஞத்ரேவ ஸத்³தா⁴ய, அஞ்ஞத்ர ருசியா, அஞ்ஞத்ர அனுஸ்ஸவா, அஞ்ஞத்ர ஆகாரபரிவிதக்கா, அஞ்ஞத்ர தி³ட்டி²னிஜ்ஜா²னக்க²ந்தியா அஞ்ஞம் ப்³யாகரோதி – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமீ’’தி [பஜானாதீதி (ஸ்யா. கம். பீ. க.)] …பே….

‘‘புன சபரம், பி⁴க்க²வே, பி⁴க்கு² மனஸா த⁴ம்மம் விஞ்ஞாய ஸந்தம் வா அஜ்ஜ²த்தம் ராக³தோ³ஸமோஹம், அத்தி² மே அஜ்ஜ²த்தம் ராக³தோ³ஸமோஹோதி பஜானாதி; அஸந்தம் வா அஜ்ஜ²த்தம் ராக³தோ³ஸமோஹம், நத்தி² மே அஜ்ஜ²த்தம் ராக³தோ³ஸமோஹோதி பஜானாதி. யம் தம், பி⁴க்க²வே, பி⁴க்கு² மனஸா த⁴ம்மம் விஞ்ஞாய ஸந்தம் வா அஜ்ஜ²த்தம் ராக³தோ³ஸமோஹம், அத்தி² மே அஜ்ஜ²த்தம் ராக³தோ³ஸமோஹோதி பஜானாதி; அஸந்தம் வா அஜ்ஜ²த்தம் ராக³தோ³ஸமோஹம், நத்தி² மே அஜ்ஜ²த்தம் ராக³தோ³ஸமோஹோதி பஜானாதி; அபி நுமே, பி⁴க்க²வே, த⁴ம்மா ஸத்³தா⁴ய வா வேதி³தப்³பா³, ருசியா வா வேதி³தப்³பா³, அனுஸ்ஸவேன வா வேதி³தப்³பா³, ஆகாரபரிவிதக்கேன வா வேதி³தப்³பா³, தி³ட்டி²னிஜ்ஜா²னக்க²ந்தியா வா வேதி³தப்³பா³’’தி? ‘‘நோ ஹேதம், ப⁴ந்தே’’. ‘‘நனுமே, பி⁴க்க²வே, த⁴ம்மா பஞ்ஞாய தி³ஸ்வா வேதி³தப்³பா³’’தி? ‘‘ஏவம், ப⁴ந்தே’’. ‘‘அயம்பி கோ², பி⁴க்க²வே, பரியாயோ யம் பரியாயம் ஆக³ம்ம பி⁴க்கு² அஞ்ஞத்ரேவ ஸத்³தா⁴ய, அஞ்ஞத்ர ருசியா, அஞ்ஞத்ர அனுஸ்ஸவா, அஞ்ஞத்ர ஆகாரபரிவிதக்கா, அஞ்ஞத்ர தி³ட்டி²னிஜ்ஜா²னக்க²ந்தியா அஞ்ஞம் ப்³யாகரோதி – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாமீ’’தி. அட்ட²மம்.

9. இந்த்³ரியஸம்பன்னஸுத்தம்

154. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘‘இந்த்³ரியஸம்பன்னோ, இந்த்³ரியஸம்பன்னோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, இந்த்³ரியஸம்பன்னோ ஹோதீ’’தி?

‘‘சக்கு²ந்த்³ரியே சே, பி⁴க்கு², உத³யப்³ப³யானுபஸ்ஸீ விஹரந்தோ சக்கு²ந்த்³ரியே நிப்³பி³ந்த³தி…பே… ஜிவ்ஹிந்த்³ரியே சே, பி⁴க்கு², உத³யப்³ப³யானுபஸ்ஸீ விஹரந்தோ ஜிவ்ஹிந்த்³ரியே நிப்³பி³ந்த³தி…பே… மனிந்த்³ரியே சே, பி⁴க்கு², உத³யப்³ப³யானுபஸ்ஸீ விஹரந்தோ மனிந்த்³ரியே நிப்³பி³ந்த³தி. நிப்³பி³ந்த³ம் விரஜ்ஜதி…பே… விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. ஏத்தாவதா கோ², பி⁴க்கு², இந்த்³ரியஸம்பன்னோ ஹோதீ’’தி. நவமம்.

10. த⁴ம்மகதி²கபுச்ச²ஸுத்தம்

155. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘‘த⁴ம்மகதி²கோ, த⁴ம்மகதி²கோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, த⁴ம்மகதி²கோ ஹோதீ’’தி?

‘‘சக்கு²ஸ்ஸ சே, பி⁴க்கு² நிப்³பி³தா³ய விராகா³ய நிரோதா⁴ய த⁴ம்மம் தே³ஸேதி, ‘த⁴ம்மகதி²கோ பி⁴க்கூ²’தி அலம்வசனாய. சக்கு²ஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய படிபன்னோ ஹோதி, ‘த⁴ம்மானுத⁴ம்மப்படிபன்னோ பி⁴க்கூ²’தி அலம்வசனாய. சக்கு²ஸ்ஸ சே, பி⁴க்கு², நிப்³பி³தா³ விராகா³ நிரோதா⁴ அனுபாதா³விமுத்தோ ஹோதி, ‘தி³ட்ட²த⁴ம்மனிப்³பா³னப்பத்தோ பி⁴க்கூ²’தி அலம்வசனாய…பே… ஜிவ்ஹாய சே, பி⁴க்கு², நிப்³பி³தா³ய விராகா³ய நிரோதா⁴ய த⁴ம்மம் தே³ஸேதி, ‘த⁴ம்மகதி²கோ பி⁴க்கூ²’தி அலம்வசனாய…பே… மனஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய த⁴ம்மம் தே³ஸேதி, ‘த⁴ம்மகதி²கோ பி⁴க்கூ²’தி அலம்வசனாய. மனஸ்ஸ சே, பி⁴க்கு², நிப்³பி³தா³ய விராகா³ய நிரோதா⁴ய படிபன்னோ ஹோதி, ‘த⁴ம்மானுத⁴ம்மப்படிபன்னோ பி⁴க்கூ²’தி அலம்வசனாய. மனஸ்ஸ சே, பி⁴க்கு², நிப்³பி³தா³ விராகா³ நிரோதா⁴ அனுபாதா³விமுத்தோ ஹோதி, ‘தி³ட்ட²த⁴ம்மனிப்³பா³னப்பத்தோ பி⁴க்கூ²’தி அலம்வசனாயா’’தி. த³ஸமம்.

நவபுராணவக்³கோ³ பஞ்சத³ஸமோ.

தஸ்ஸுத்³தா³னம் –

கம்மம் சத்தாரி ஸப்பாயா, அனந்தேவாஸி கிமத்தி²யா;

அத்தி² நு கோ² பரியாயோ, இந்த்³ரியகதி²கேன சாதி.

ஸளாயதனவக்³கே³ ததியபண்ணாஸகோ ஸமத்தோ.

தஸ்ஸ வக்³கு³த்³தா³னம் –

யோக³க்கே²மி ச லோகோ ச, க³ஹபதி தே³வத³ஹேன ச;

நவபுராணேன பண்ணாஸோ, ததியோ தேன வுச்சதீதி.