6. கரோதோஸுத்தம்

211. ஸாவத்தி²னிதா³னம். ‘‘கிஸ்மிம் நு கோ², பி⁴க்க²வே, ஸதி, கிம் உபாதா³ய, கிம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘கரோதோ காரயதோ சி²ந்த³தோ சே²தா³பயதோ பசதோ பாசாபயதோ ஸோசதோ ஸோசாபயதோ கிலமதோ கிலமாபயதோ ப²ந்த³தோ ப²ந்தா³பயதோ பாணமதிபாதயதோ அதி³ன்னம் ஆதி³யதோ ஸந்தி⁴ம் சி²ந்த³தோ நில்லோபம் ஹரதோ ஏகாகா³ரிகம் கரோதோ பரிபந்தே² திட்ட²தோ பரதா³ரம் க³ச்ச²தோ முஸா ப⁴ணதோ கரோதோ ந கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகமம்ஸக²லம் ஏகமம்ஸபுஞ்ஜம் கரேய்ய, நத்தி² ததோனிதா³னம் பாபம், நத்தி² பாபஸ்ஸ ஆக³மோ. த³க்கி²ணம் சேபி க³ங்கா³ய தீரம் க³ச்சே²ய்ய; ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசேந்தோ, நத்தி² ததோனிதா³னம் பாபம், நத்தி² பாபஸ்ஸ ஆக³மோ. உத்தரம் சேபி க³ங்கா³ய தீரம் க³ச்சே²ய்ய; த³த³ந்தோ தா³பேந்தோ யஜந்தோ யஜாபேந்தோ, நத்தி² ததோனிதா³னம் புஞ்ஞம், நத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன நத்தி² புஞ்ஞம் நத்தி² புஞ்ஞஸ்ஸ ஆக³மோ’’’தி. ப⁴க³வம்மூலகா நோ, ப⁴ந்தே, த⁴ம்மா…பே… ‘‘ரூபே கோ², பி⁴க்க²வே, ஸதி, ரூபம் உபாதா³ய, ரூபம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘கரோதோ காரயதோ…பே… நத்தி² புஞ்ஞம் நத்தி² புஞ்ஞஸ்ஸ ஆக³மோ’தி. வேத³னாய ஸதி…பே… ஸஞ்ஞாய ஸதி… ஸங்கா²ரேஸு ஸதி… விஞ்ஞாணே ஸதி, விஞ்ஞாணம் உபாதா³ய, விஞ்ஞாணம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘கரோதோ காரயதோ…பே… நத்தி² புஞ்ஞம் நத்தி² புஞ்ஞஸ்ஸ ஆக³மோ’’’தி.

‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘கரோதோ…பே… நத்தி² புஞ்ஞம் நத்தி² புஞ்ஞஸ்ஸ ஆக³மோ’’தி? ‘‘நோ ஹேதம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘கரோதோ காரயதோ …பே… நத்தி² புஞ்ஞம் நத்தி² புஞ்ஞஸ்ஸ ஆக³மோ’’’தி? ‘‘நோ ஹேதம், ப⁴ந்தே’’. ‘‘யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தம்பி நிச்சம் வா அனிச்சம் வா’’தி? ‘‘அனிச்சம், ப⁴ந்தே…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘கரோதோ காரயதோ…பே… நத்தி² புஞ்ஞம் நத்தி² புஞ்ஞஸ்ஸ ஆக³மோ’’’தி? ‘‘நோ ஹேதம், ப⁴ந்தே’’.

‘‘யதோ கோ², பி⁴க்க²வே, அரியஸாவகஸ்ஸ இமேஸு ச டா²னேஸு கங்கா² பஹீனா ஹோதி, து³க்கே²பிஸ்ஸ கங்கா² பஹீனா ஹோதி…பே… து³க்க²னிரோத⁴கா³மினியா படிபதா³யபிஸ்ஸ கங்கா² பஹீனா ஹோதி – அயம் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. ச²ட்ட²ம்.