9. நாக³ஸுத்தம்

231. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ நவோ பி⁴க்கு² அதிவேலம் குலானி உபஸங்கமதி. தமேனம் பி⁴க்கூ² ஏவமாஹம்ஸு – ‘‘மாயஸ்மா அதிவேலம் குலானி உபஸங்கமீ’’தி. ஸோ பி⁴க்கு² பி⁴க்கூ²ஹி வுச்சமானோ ஏவமாஹ – ‘‘இமே ஹி நாம தே²ரா பி⁴க்கூ² குலானி உபஸங்கமிதப்³ப³ம் மஞ்ஞிஸ்ஸந்தி, கிமங்க³ம் [கிமங்க³ (ஸீ.)] பனாஹ’’ந்தி?

அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘இத⁴, ப⁴ந்தே, அஞ்ஞதரோ நவோ பி⁴க்கு² அதிவேலம் குலானி உபஸங்கமதி. தமேனம் பி⁴க்கூ² ஏவமாஹம்ஸு – ‘மாயஸ்மா அதிவேலம் குலானி உபஸங்கமீ’தி. ஸோ பி⁴க்கு² பி⁴க்கூ²ஹி வுச்சமானோ ஏவமாஹ – ‘இமே ஹி நாம தே²ரா பி⁴க்கூ² குலானி உபஸங்கமிதப்³ப³ம் மஞ்ஞிஸ்ஸந்தி, கிமங்க³ம் பனாஹ’’’ந்தி.

‘‘பூ⁴தபுப்³ப³ம், பி⁴க்க²வே, அரஞ்ஞாயதனே மஹாஸரஸீ. தம் நாகா³ உபனிஸ்ஸாய விஹரந்தி. தே தம் ஸரஸிம் ஓகா³ஹேத்வா ஸோண்டா³ய பி⁴ஸமுளாலம் அப்³பு³ஹேத்வா [அப்³பூ⁴ஹேத்வா (க.), அப்³பா³ஹித்வா (மஹாவ. 278)] ஸுவிக்கா²லிதம் விக்கா²லேத்வா அகத்³த³மம் ஸங்கா²தி³த்வா [ஸங்க²ரித்வா (பீ. க.)] அஜ்ஜோ²ஹரந்தி. தேஸம் தம் வண்ணாய சேவ ஹோதி ப³லாய ச, ந ச ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம். தேஸம்யேவ கோ² பன, பி⁴க்க²வே, மஹானாகா³னம் அனுஸிக்க²மானா தருணா பி⁴ங்கச்சா²பா தம் ஸரஸிம் ஓகா³ஹேத்வா ஸோண்டா³ய பி⁴ஸமுளாலம் அப்³பு³ஹேத்வா ந ஸுவிக்கா²லிதம் விக்கா²லேத்வா ஸகத்³த³மம் அஸங்கா²தி³த்வா அஜ்ஜோ²ஹரந்தி. தேஸம் தம் நேவ வண்ணாய ஹோதி ந ப³லாய. ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம்.

‘‘ஏவமேவ கோ², பி⁴க்க²வே, இத⁴ தே²ரா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸந்தி. தே தத்த² த⁴ம்மம் பா⁴ஸந்தி. தேஸம் கி³ஹீ பஸன்னாகாரம் கரோந்தி. தே தம் லாப⁴ம் அக³தி⁴தா அமுச்சி²தா அனஜ்ஜோ²பன்னா [அனஜ்ஜா²பன்னா (ஸப்³ப³த்த²) ம. நி. 1 பாஸராஸிஸுத்தவண்ணனா ஓலோகேதப்³பா³] ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜந்தி. தேஸம் தம் வண்ணாய சேவ ஹோதி ப³லாய ச, ந ச ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம். தேஸம்யேவ கோ² பன, பி⁴க்க²வே, தே²ரானம் பி⁴க்கூ²னம் அனுஸிக்க²மானா நவா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸந்தி. தே தத்த² த⁴ம்மம் பா⁴ஸந்தி. தேஸம் கி³ஹீ பஸன்னாகாரம் கரோந்தி. தே தம் லாப⁴ம் க³தி⁴தா முச்சி²தா அஜ்ஜோ²பன்னா அனாதீ³னவத³ஸ்ஸாவினோ அனிஸ்ஸரணபஞ்ஞா பரிபு⁴ஞ்ஜந்தி. தேஸம் தம் நேவ வண்ணாய ஹோதி ந ப³லாய, தே ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம். தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அக³தி⁴தா அமுச்சி²தா அனஜ்ஜோ²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா தம் லாப⁴ம் பரிபு⁴ஞ்ஜிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. நவமம்.