9. ஓபம்மஸம்யுத்தம்

1. கூடஸுத்தம்

223. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச – ‘‘ஸேய்யதா²பி, பி⁴க்க²வே, கூடாகா³ரஸ்ஸ யா காசி கோ³பானஸியோ ஸப்³பா³ தா கூடங்க³மா கூடஸமோஸரணா கூடஸமுக்³கா⁴தா ஸப்³பா³ தா ஸமுக்³கா⁴தம் க³ச்ச²ந்தி; ஏவமேவ கோ², பி⁴க்க²வே, யே கேசி அகுஸலா த⁴ம்மா ஸப்³பே³ தே அவிஜ்ஜாமூலகா அவிஜ்ஜாஸமோஸரணா அவிஜ்ஜாஸமுக்³கா⁴தா, ஸப்³பே³ தே ஸமுக்³கா⁴தம் க³ச்ச²ந்தி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அப்பமத்தா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பட²மம்.

2. நக²ஸிக²ஸுத்தம்

224. ஸாவத்தி²யம் விஹரதி. அத² கோ² ப⁴க³வா பரித்தம் நக²ஸிகா²யம் பம்ஸும் ஆரோபேத்வா பி⁴க்கூ² ஆமந்தேஸி – ‘‘தம் கிம் மஞ்ஞத² பி⁴க்க²வே, கதமம் நு கோ² ப³ஹுதரம், யோ வாயம் [யோ சாயம் (ப³ஹூஸு)] மயா பரித்தோ நக²ஸிகா²யம் பம்ஸு ஆரோபிதோ அயம் வா [யா சாயம் (ஸ்யா. க.)] மஹாபத²வீ’’தி? ‘‘ஏததே³வ, ப⁴ந்தே, ப³ஹுதரம் யதி³த³ம் மஹாபத²வீ. அப்பமத்தகோயம் ப⁴க³வதா பரித்தோ நக²ஸிகா²யம் பம்ஸு ஆரோபிதோ. ஸங்க²ம்பி ந உபேதி உபனிதி⁴ம்பி ந உபேதி கலபா⁴க³ம்பி ந உபேதி மஹாபத²விம் உபனிதா⁴ய ப⁴க³வதா பரித்தோ நக²ஸிகா²யம் பம்ஸு ஆரோபிதோ’’தி. ‘‘ஏவமேவ கோ², பி⁴க்க²வே, அப்பகா தே ஸத்தா யே மனுஸ்ஸேஸு பச்சாஜாயந்தி; அத² கோ² ஏதேயேவ ப³ஹுதரா ஸத்தா யே அஞ்ஞத்ர மனுஸ்ஸேஹி பச்சாஜாயந்தி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அப்பமத்தா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியம்.

3. குலஸுத்தம்

225. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, யானி கானிசி குலானி ப³ஹுத்தி²கானி அப்பபுரிஸானி தானி ஸுப்பத⁴ம்ஸியானி ஹோந்தி சோரேஹி கும்ப⁴த்தே²னகேஹி; ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ மேத்தாசேதோவிமுத்தி அபா⁴விதா அப³ஹுலீகதா ஸோ ஸுப்பத⁴ம்ஸியோ ஹோதி அமனுஸ்ஸேஹி. ஸேய்யதா²பி, பி⁴க்க²வே, யானி கானிசி குலானி அப்பித்தி²கானி ப³ஹுபுரிஸானி தானி து³ப்பத⁴ம்ஸியானி ஹோந்தி சோரேஹி கும்ப⁴த்தே²னகேஹி, ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ மேத்தாசேதோவிமுத்தி பா⁴விதா ப³ஹுலீகதா ஸோ து³ப்பத⁴ம்ஸியோ ஹோதி அமனுஸ்ஸேஹி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘மேத்தா நோ சேதோவிமுத்தி பா⁴விதா ப⁴விஸ்ஸதி ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ததியம்.

4. ஓக்கா²ஸுத்தம்

226. ஸாவத்தி²யம் விஹரதி…பே… ‘‘யோ, பி⁴க்க²வே, புப்³ப³ண்ஹஸமயம் ஓக்கா²ஸதம் தா³னம் த³தே³ய்ய, யோ மஜ்ஜ²ன்ஹிகஸமயம் ஓக்கா²ஸதம் தா³னம் த³தே³ய்ய, யோ ஸாயன்ஹஸமயம் ஓக்கா²ஸதம் தா³னம் த³தே³ய்ய, யோ வா புப்³ப³ண்ஹஸமயம் அந்தமஸோ க³த்³து³ஹனமத்தம்பி மேத்தசித்தம் பா⁴வேய்ய, யோ வா மஜ்ஜ²ன்ஹிகஸமயம் அந்தமஸோ க³த்³து³ஹனமத்தம்பி மேத்தசித்தம் பா⁴வேய்ய, யோ வா ஸாயன்ஹஸமயம் அந்தமஸோ க³த்³து³ஹனமத்தம்பி மேத்தசித்தம் பா⁴வேய்ய, இத³ம் ததோ மஹப்ப²லதரம். தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘மேத்தா நோ சேதோவிமுத்தி பா⁴விதா ப⁴விஸ்ஸதி ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. சதுத்த²ம்.

5. ஸத்திஸுத்தம்

227. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, ஸத்தி திண்ஹப²லா. அத² புரிஸோ ஆக³ச்சே²ய்ய – ‘அஹம் இமம் ஸத்திம் திண்ஹப²லம் பாணினா வா முட்டி²னா வா படிலேணிஸ்ஸாமி படிகோட்டிஸ்ஸாமி படிவட்டேஸ்ஸாமீ’தி. தம் கிம் மஞ்ஞத², பி⁴க்க²வே, ப⁴ப்³போ³ நு கோ² ஸோ புரிஸோ அமும் ஸத்திம் திண்ஹப²லம் பாணினா வா முட்டி²னா வா படிலேணேதும் படிகோட்டேதும் படிவட்டேது’’ந்தி? ‘‘நோ ஹேதம், ப⁴ந்தே’’. ‘‘தம் கிஸ்ஸ ஹேது’’? ‘‘அஸு ஹி, ப⁴ந்தே, ஸத்தி திண்ஹப²லா ந ஸுகரா பாணினா வா முட்டி²னா வா படிலேணேதும் படிகோட்டேதும் படிவட்டேதும். யாவதே³வ ச பன ஸோ புரிஸோ கிலமத²ஸ்ஸ விகா⁴தஸ்ஸ பா⁴கீ³ அஸ்ஸா’’தி.

‘‘ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ மேத்தாசேதோவிமுத்தி பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, தஸ்ஸ சே அமனுஸ்ஸோ சித்தம் கி²பிதப்³ப³ம் மஞ்ஞேய்ய; அத² கோ² ஸ்வேவ அமனுஸ்ஸோ கிலமத²ஸ்ஸ விகா⁴தஸ்ஸ பா⁴கீ³ அஸ்ஸ. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘மேத்தா நோ சேதோவிமுத்தி பா⁴விதா ப⁴விஸ்ஸதி ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பஞ்சமம்.

6. த⁴னுக்³க³ஹஸுத்தம்

228. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, சத்தாரோ த³ள்ஹத⁴ம்மா த⁴னுக்³க³ஹா ஸுஸிக்கி²தா கதஹத்தா² கதூபாஸனா சதுத்³தி³ஸா டி²தா அஸ்ஸு. அத² புரிஸோ ஆக³ச்சே²ய்ய – ‘அஹம் இமேஸம் சதுன்னம் த³ள்ஹத⁴ம்மானம் த⁴னுக்³க³ஹானம் ஸுஸிக்கி²தானம் கதஹத்தா²னம் கதூபாஸனானம் சதுத்³தி³ஸா கண்டே³ கி²த்தே அப்பதிட்டி²தே பத²வியம் க³ஹேத்வா ஆஹரிஸ்ஸாமீ’தி. தம் கிம் மஞ்ஞத², பி⁴க்க²வே, ‘ஜவனோ புரிஸோ பரமேன ஜவேன ஸமன்னாக³தோ’தி அலம் வசனாயா’’தி?

‘‘ஏகஸ்ஸ சேபி, ப⁴ந்தே, த³ள்ஹத⁴ம்மஸ்ஸ த⁴னுக்³க³ஹஸ்ஸ ஸுஸிக்கி²தஸ்ஸ கதஹத்த²ஸ்ஸ கதூபாஸனஸ்ஸ கண்ட³ம் கி²த்தம் அப்பதிட்டி²தம் பத²வியம் க³ஹேத்வா ஆஹரேய்ய – ‘ஜவனோ புரிஸோ பரமேன ஜவேன ஸமன்னாக³தோ’தி அலம் வசனாய, கோ பன வாதோ³ சதுன்னம் த³ள்ஹத⁴ம்மானம் த⁴னுக்³க³ஹானம் ஸுஸிக்கி²தானம் கதஹத்தா²னம் கதூபாஸனான’’ந்தி?

‘‘யதா² ச, பி⁴க்க²வே, தஸ்ஸ புரிஸஸ்ஸ ஜவோ, யதா² ச சந்தி³மஸூரியானம் ஜவோ, ததோ ஸீக⁴தரோ. யதா² ச, பி⁴க்க²வே, தஸ்ஸ புரிஸஸ்ஸ ஜவோ யதா² ச சந்தி³மஸூரியானம் ஜவோ யதா² ச யா தே³வதா சந்தி³மஸூரியானம் புரதோ தா⁴வந்தி தாஸம் தே³வதானம் ஜவோ, ( ) [(ததோ ஸீக⁴தரோ. யதா² ச பி⁴க்க²வே தஸ்ஸ புரிஸஸ்ஸ ஜவோ, யதா² ச சந்தி³மஸுரியானம் ஜவோ, யதா² ச யா தே³வதா சந்தி³மஸுரியானம் புரதோ தா⁴வந்தி, தாஸம் தே³வதானம் ஜவோ,) (ஸீ. ஸ்யா. கம்.)] ததோ ஸீக⁴தரம் ஆயுஸங்கா²ரா கி²யந்தி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அப்பமத்தா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ச²ட்ட²ம்.

7. ஆணிஸுத்தம்

229. ஸாவத்தி²யம் விஹரதி…பே… ‘‘பூ⁴தபுப்³ப³ம், பி⁴க்க²வே, த³ஸாரஹானம் ஆனகோ [ஆணகோ (ஸீ.)] நாம முதி³ங்கோ³ அஹோஸி. தஸ்ஸ த³ஸாரஹா ஆனகே க⁴டிதே அஞ்ஞம் ஆணிம் ஓத³ஹிம்ஸு. அஹு கோ² ஸோ, பி⁴க்க²வே, ஸமயோ யம் ஆனகஸ்ஸ முதி³ங்க³ஸ்ஸ போராணம் போக்க²ரப²லகம் அந்தரதா⁴யி. ஆணிஸங்கா⁴டோவ அவஸிஸ்ஸி. ஏவமேவ கோ², பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம், யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதப்படிஸம்யுத்தா, தேஸு ப⁴ஞ்ஞமானேஸு ந ஸுஸ்ஸூஸிஸ்ஸந்தி ந ஸோதம் ஓத³ஹிஸ்ஸந்தி ந அஞ்ஞா சித்தம் உபட்டா²பேஸ்ஸந்தி ந ச தே த⁴ம்மே உக்³க³ஹேதப்³ப³ம் பரியாபுணிதப்³ப³ம் மஞ்ஞிஸ்ஸந்தி’’.

‘‘யே பன தே ஸுத்தந்தா கவிகதா காவேய்யா சித்தக்க²ரா சித்தப்³யஞ்ஜனா பா³ஹிரகா ஸாவகபா⁴ஸிதா, தேஸு ப⁴ஞ்ஞமானேஸு ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தி, அஞ்ஞா சித்தம் உபட்டா²பேஸ்ஸந்தி, தே ச த⁴ம்மே உக்³க³ஹேதப்³ப³ம் பரியாபுணிதப்³ப³ம் மஞ்ஞிஸ்ஸந்தி. ஏவமேதேஸம், பி⁴க்க²வே, ஸுத்தந்தானம் ததா²க³தபா⁴ஸிதானம் க³ம்பீ⁴ரானம் க³ம்பீ⁴ரத்தா²னம் லோகுத்தரானம் ஸுஞ்ஞதப்படிஸம்யுத்தானம் அந்தரதா⁴னம் ப⁴விஸ்ஸதி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதப்படிஸம்யுத்தா, தேஸு ப⁴ஞ்ஞமானேஸு ஸுஸ்ஸூஸிஸ்ஸாம, ஸோதம் ஓத³ஹிஸ்ஸாம, அஞ்ஞா சித்தம் உபட்டா²பேஸ்ஸாம, தே ச த⁴ம்மே உக்³க³ஹேதப்³ப³ம் பரியாபுணிதப்³ப³ம் மஞ்ஞிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ஸத்தமம்.

8. கலிங்க³ரஸுத்தம்

230. ஏவம் மே ஸுதம் – ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தத்ர கோ² ப⁴க³வா பி⁴க்கூ² ஆமந்தேஸி ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கலிங்க³ரூபதா⁴னா, பி⁴க்க²வே, ஏதரஹி லிச்ச²வீ விஹரந்தி அப்பமத்தா ஆதாபினோ உபாஸனஸ்மிம். தேஸம் ராஜா மாக³தோ⁴ அஜாதஸத்து வேதே³ஹிபுத்தோ ந லப⁴தி ஓதாரம் ந லப⁴தி ஆரம்மணம். ப⁴விஸ்ஸந்தி, பி⁴க்க²வே, அனாக³தமத்³தா⁴னம் லிச்ச²வீ ஸுகு²மாலா [ஸுகுமாலா (ஸீ.), ஸுகு²மா (க.)] முது³தலுனஹத்த²பாதா³ [முது³தலாஹத்த²பாதா³ (ஸ்யா. கம்.)] தே முது³காஸு ஸேய்யாஸு தூலபி³ம்போ³ஹனாஸு [தூலபி³ம்போ³ஹனாஸு (ஸ்யா. கம். பீ.), தூலபி³ம்போ³ஹனாதீ³ஸு (ஸீ.), தூலபி³ப்³போ³ஹனாதீ³ஸு (க.)] யாவஸூரியுக்³க³மனா ஸேய்யம் கப்பிஸ்ஸந்தி. தேஸம் ராஜா மாக³தோ⁴ அஜாதஸத்து வேதே³ஹிபுத்தோ லச்ச²தி ஓதாரம் லச்ச²தி ஆரம்மணம்.

‘‘கலிங்க³ரூபதா⁴னா, பி⁴க்க²வே, ஏதரஹி பி⁴க்கூ² விஹரந்தி அப்பமத்தா ஆதாபினோ பதா⁴னஸ்மிம். தேஸம் மாரோ பாபிமா ந லப⁴தி ஓதாரம் ந லப⁴தி ஆரம்மணம். ப⁴விஸ்ஸந்தி, பி⁴க்க²வே, அனாக³தமத்³தா⁴னம் பி⁴க்கூ² ஸுகு²மா முது³தலுனஹத்த²பாதா³. தே முது³காஸு ஸேய்யாஸு தூலபி³ம்போ³ஹனாஸு யாவஸூரியுக்³க³மனா ஸேய்யம் கப்பிஸ்ஸந்தி. தேஸம் மாரோ பாபிமா லச்ச²தி ஓதாரம் லச்ச²தி ஆரம்மணம். தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘கலிங்க³ரூபதா⁴னா விஹரிஸ்ஸாம அப்பமத்தா ஆதாபினோ பதா⁴னஸ்மி’ந்தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. அட்ட²மம்.

9. நாக³ஸுத்தம்

231. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ நவோ பி⁴க்கு² அதிவேலம் குலானி உபஸங்கமதி. தமேனம் பி⁴க்கூ² ஏவமாஹம்ஸு – ‘‘மாயஸ்மா அதிவேலம் குலானி உபஸங்கமீ’’தி. ஸோ பி⁴க்கு² பி⁴க்கூ²ஹி வுச்சமானோ ஏவமாஹ – ‘‘இமே ஹி நாம தே²ரா பி⁴க்கூ² குலானி உபஸங்கமிதப்³ப³ம் மஞ்ஞிஸ்ஸந்தி, கிமங்க³ம் [கிமங்க³ (ஸீ.)] பனாஹ’’ந்தி?

அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘இத⁴, ப⁴ந்தே, அஞ்ஞதரோ நவோ பி⁴க்கு² அதிவேலம் குலானி உபஸங்கமதி. தமேனம் பி⁴க்கூ² ஏவமாஹம்ஸு – ‘மாயஸ்மா அதிவேலம் குலானி உபஸங்கமீ’தி. ஸோ பி⁴க்கு² பி⁴க்கூ²ஹி வுச்சமானோ ஏவமாஹ – ‘இமே ஹி நாம தே²ரா பி⁴க்கூ² குலானி உபஸங்கமிதப்³ப³ம் மஞ்ஞிஸ்ஸந்தி, கிமங்க³ம் பனாஹ’’’ந்தி.

‘‘பூ⁴தபுப்³ப³ம், பி⁴க்க²வே, அரஞ்ஞாயதனே மஹாஸரஸீ. தம் நாகா³ உபனிஸ்ஸாய விஹரந்தி. தே தம் ஸரஸிம் ஓகா³ஹேத்வா ஸோண்டா³ய பி⁴ஸமுளாலம் அப்³பு³ஹேத்வா [அப்³பூ⁴ஹேத்வா (க.), அப்³பா³ஹித்வா (மஹாவ. 278)] ஸுவிக்கா²லிதம் விக்கா²லேத்வா அகத்³த³மம் ஸங்கா²தி³த்வா [ஸங்க²ரித்வா (பீ. க.)] அஜ்ஜோ²ஹரந்தி. தேஸம் தம் வண்ணாய சேவ ஹோதி ப³லாய ச, ந ச ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம். தேஸம்யேவ கோ² பன, பி⁴க்க²வே, மஹானாகா³னம் அனுஸிக்க²மானா தருணா பி⁴ங்கச்சா²பா தம் ஸரஸிம் ஓகா³ஹேத்வா ஸோண்டா³ய பி⁴ஸமுளாலம் அப்³பு³ஹேத்வா ந ஸுவிக்கா²லிதம் விக்கா²லேத்வா ஸகத்³த³மம் அஸங்கா²தி³த்வா அஜ்ஜோ²ஹரந்தி. தேஸம் தம் நேவ வண்ணாய ஹோதி ந ப³லாய. ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம்.

‘‘ஏவமேவ கோ², பி⁴க்க²வே, இத⁴ தே²ரா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸந்தி. தே தத்த² த⁴ம்மம் பா⁴ஸந்தி. தேஸம் கி³ஹீ பஸன்னாகாரம் கரோந்தி. தே தம் லாப⁴ம் அக³தி⁴தா அமுச்சி²தா அனஜ்ஜோ²பன்னா [அனஜ்ஜா²பன்னா (ஸப்³ப³த்த²) ம. நி. 1 பாஸராஸிஸுத்தவண்ணனா ஓலோகேதப்³பா³] ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜந்தி. தேஸம் தம் வண்ணாய சேவ ஹோதி ப³லாய ச, ந ச ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம். தேஸம்யேவ கோ² பன, பி⁴க்க²வே, தே²ரானம் பி⁴க்கூ²னம் அனுஸிக்க²மானா நவா பி⁴க்கூ² புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸந்தி. தே தத்த² த⁴ம்மம் பா⁴ஸந்தி. தேஸம் கி³ஹீ பஸன்னாகாரம் கரோந்தி. தே தம் லாப⁴ம் க³தி⁴தா முச்சி²தா அஜ்ஜோ²பன்னா அனாதீ³னவத³ஸ்ஸாவினோ அனிஸ்ஸரணபஞ்ஞா பரிபு⁴ஞ்ஜந்தி. தேஸம் தம் நேவ வண்ணாய ஹோதி ந ப³லாய, தே ததோனிதா³னம் மரணம் வா நிக³ச்ச²ந்தி மரணமத்தம் வா து³க்க²ம். தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அக³தி⁴தா அமுச்சி²தா அனஜ்ஜோ²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா தம் லாப⁴ம் பரிபு⁴ஞ்ஜிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. நவமம்.

10. பி³ளாரஸுத்தம்

232. ஸாவத்தி²யம் விஹரதி. தேன கோ² பன ஸமயேன அஞ்ஞதரோ பி⁴க்கு² அதிவேலம் குலேஸு சாரித்தம் ஆபஜ்ஜதி. தமேனம் பி⁴க்கூ² ஏவமாஹம்ஸு – ‘‘மாயஸ்மா அதிவேலம் குலேஸு சாரித்தம் ஆபஜ்ஜீ’’தி. ஸோ பி⁴க்கு² பி⁴க்கூ²ஹி வுச்சமானோ ந விரமதி. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘இத⁴, ப⁴ந்தே, அஞ்ஞதரோ பி⁴க்கு² அதிவேலம் குலேஸு சாரித்தம் ஆபஜ்ஜதி. தமேனம் பி⁴க்கூ² ஏவமாஹம்ஸு – ‘மாயஸ்மா அதிவேலம் குலேஸு சாரித்தம் ஆபஜ்ஜீ’தி. ஸோ பி⁴க்கு² பி⁴க்கூ²ஹி வுச்சமானோ ந விரமதீ’’தி.

‘‘பூ⁴தபுப்³ப³ம், பி⁴க்க²வே, பி³ளாரோ ஸந்தி⁴ஸமலஸங்கடீரே டி²தோ அஹோஸி முது³மூஸிம் மக்³க³யமானோ – ‘யதா³யம் முது³மூஸி கோ³சராய பக்கமிஸ்ஸதி, தத்தே²வ நம் க³ஹேத்வா கா²தி³ஸ்ஸாமீ’தி. அத² கோ² ஸோ, பி⁴க்க²வே, முது³மூஸி கோ³சராய பக்காமி. தமேனம் பி³ளாரோ க³ஹேத்வா ஸஹஸா ஸங்கா²தி³த்வா [ஸங்க²ரித்வா (பீ. க.), மம்ஸம் கா²தி³த்வா (ஸ்யா. கம்.), அஸம்கா²தி³த்வா (கத்த²சி)] அஜ்ஜோ²ஹரி. தஸ்ஸ ஸோ முது³மூஸி அந்தம்பி கா²தி³, அந்தகு³ணம்பி கா²தி³. ஸோ ததோனிதா³னம் மரணம்பி நிக³ச்சி² மரணமத்தம்பி து³க்க²ம்.

‘‘ஏவமேவ கோ², பி⁴க்க²வே, இதே⁴கச்சோ பி⁴க்கு² புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன, அனுபட்டி²தாய ஸதியா, அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸேன சித்தேன மரணம் வா நிக³ச்ச²தி மரணமத்தம் வா து³க்க²ம். மரணஞ்ஹேதம், பி⁴க்க²வே, அரியஸ்ஸ வினயே யோ ஸிக்க²ம் பச்சக்கா²ய ஹீனாயாவத்ததி. மரணமத்தஞ்ஹேதம், பி⁴க்க²வே, து³க்க²ம் யதி³த³ம் அஞ்ஞதரம் ஸம்கிலிட்ட²ம் ஆபத்திம் ஆபஜ்ஜதி. யதா²ரூபாய ஆபத்தியா வுட்டா²னம் பஞ்ஞாயதி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ரக்கி²தேனேவ காயேன ரக்கி²தாய வாசாய ரக்கி²தேன சித்தேன, உபட்டி²தாய ஸதியா, ஸம்வுதேஹி இந்த்³ரியேஹி கா³மம் வா நிக³மம் வா பிண்டா³ய பவிஸிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. த³ஸமம்.

11. ஸிங்கா³லஸுத்தம்

233. ஸாவத்தி²யம் விஹரதி…பே… ‘‘அஸ்ஸுத்த² நோ தும்ஹே, பி⁴க்க²வே, ரத்தியா பச்சூஸஸமயம் ஜரஸிங்கா³லஸ்ஸ வஸ்ஸமானஸ்ஸா’’தி? ‘‘ஏவம், ப⁴ந்தே’’. ‘‘ஏஸோ கோ², பி⁴க்க²வே, ஜரஸிங்கா³லோ உக்கண்ட³கேன நாம ரோக³ஜாதேன பு²ட்டோ². ஸோ யேன யேன இச்ச²தி தேன தேன க³ச்ச²தி; யத்த² யத்த² இச்ச²தி தத்த² தத்த² திட்ட²தி; யத்த² யத்த² இச்ச²தி தத்த² தத்த² நிஸீத³தி; யத்த² யத்த² இச்ச²தி தத்த² தத்த² நிபஜ்ஜதி; ஸீதகோபி நம் வாதோ உபவாயதி. ஸாது⁴ க்²வஸ்ஸ, பி⁴க்க²வே, யம் இதே⁴கச்சோ ஸக்யபுத்தியபடிஞ்ஞோ ஏவரூபம்பி அத்தபா⁴வபடிலாப⁴ம் படிஸம்வேதி³யேத². தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அப்பமத்தா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ஏகாத³ஸமம்.

12. து³தியஸிங்கா³லஸுத்தம்

234. ஸாவத்தி²யம் விஹரதி…பே… ‘‘அஸ்ஸுத்த² நோ தும்ஹே, பி⁴க்க²வே, ரத்தியா பச்சூஸஸமயம் ஜரஸிங்கா³லஸ்ஸ வஸ்ஸமானஸ்ஸா’’தி? ‘‘ஏவம், ப⁴ந்தே’’. ‘‘ஸியா கோ², பி⁴க்க²வே, தஸ்மிம் ஜரஸிங்கா³லே யா காசி கதஞ்ஞுதா கதவேதி³தா, ந த்வேவ இதே⁴கச்சே ஸக்யபுத்தியபடிஞ்ஞே ஸியா யா காசி கதஞ்ஞுதா கதவேதி³தா. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘கதஞ்ஞுனோ ப⁴விஸ்ஸாம கதவேதி³னோ; ந ச நோ [ந ச நோதி இத³ம் ஸீ. பீ. போத்த²கேஸு நத்தி²] அம்ஹேஸு அப்பகம்பி கதம் நஸ்ஸிஸ்ஸதீ’தி [மா நஸ்ஸிஸ்ஸதீதி (ஸீ. பீ.), வினஸ்ஸிஸ்ஸதீதி (ஸ்யா. கம்.)]. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. த்³வாத³ஸமம்.

ஓபம்மஸம்யுத்தம் ஸமத்தம்.