5. பப்³ப³தஸுத்தம்

128. ஸாவத்தி²யம் விஹரதி…பே… ஆராமே. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘கீவதீ³கோ⁴ நு கோ², ப⁴ந்தே, கப்போ’’தி? ‘‘தீ³கோ⁴ கோ², பி⁴க்கு², கப்போ. ஸோ ந ஸுகரோ ஸங்கா²தும் ஏத்தகானி வஸ்ஸானி இதி வா, ஏத்தகானி வஸ்ஸஸதானி இதி வா, ஏத்தகானி வஸ்ஸஸஹஸ்ஸானி இதி வா, ஏத்தகானி வஸ்ஸஸதஸஹஸ்ஸானி இதி வா’’தி.

‘‘ஸக்கா பன, ப⁴ந்தே, உபமம் காது’’ந்தி? ‘‘ஸக்கா, பி⁴க்கூ²’’தி ப⁴க³வா அவோச. ‘‘ஸேய்யதா²பி, பி⁴க்கு², மஹாஸேலோ பப்³ப³தோ யோஜனம் ஆயாமேன யோஜனம் வித்தா²ரேன யோஜனம் உப்³பே³தே⁴ன அச்சி²ன்னோ அஸுஸிரோ ஏகக்³க⁴னோ. தமேனம் புரிஸோ வஸ்ஸஸதஸ்ஸ வஸ்ஸஸதஸ்ஸ அச்சயேன காஸிகேன வத்தே²ன ஸகிம் ஸகிம் பரிமஜ்ஜேய்ய. கி²ப்பதரம் கோ² ஸோ, பி⁴க்கு², மஹாஸேலோ பப்³ப³தோ இமினா உபக்கமேன பரிக்க²யம் பரியாதா³னம் க³ச்சே²ய்ய, ந த்வேவ கப்போ. ஏவம் தீ³கோ⁴, பி⁴க்கு², கப்போ. ஏவம் தீ³கா⁴னம் கோ², பி⁴க்கு², கப்பானம் நேகோ கப்போ ஸம்ஸிதோ, நேகம் கப்பஸதம் ஸம்ஸிதம், நேகம் கப்பஸஹஸ்ஸம் ஸம்ஸிதம், நேகம் கப்பஸதஸஹஸ்ஸம் ஸம்ஸிதம். தம் கிஸ்ஸ ஹேது? அனமதக்³கோ³யம், பி⁴க்கு², ஸம்ஸாரோ. புப்³பா³ கோடி…பே… யாவஞ்சித³ம், பி⁴க்கு², அலமேவ ஸப்³ப³ஸங்கா²ரேஸு நிப்³பி³ந்தி³தும், அலம் விரஜ்ஜிதும், அலம் விமுச்சிது’’ந்தி. பஞ்சமம்.