4. சதுத்த²வக்³கோ³

1. சதுதா⁴துஸுத்தம்

114. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே…பே… ‘‘சதஸ்ஸோ இமா, பி⁴க்க²வே, தா⁴துயோ. கதமா சதஸ்ஸோ? பத²வீதா⁴து, ஆபோதா⁴து, தேஜோதா⁴து, வாயோதா⁴து – இமா கோ², பி⁴க்க²வே, சதஸ்ஸோ தா⁴துயோ’’தி. பட²மம்.

2. புப்³பே³ஸம்போ³த⁴ஸுத்தம்

115. ஸாவத்தி²யம் விஹரதி…பே… ‘‘புப்³பே³வ மே, பி⁴க்க²வே, ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘கோ நு கோ² பத²வீதா⁴துயா அஸ்ஸாதோ³, கோ ஆதீ³னவோ, கிம் நிஸ்ஸரணம்; கோ ஆபோதா⁴துயா அஸ்ஸாதோ³, கோ ஆதீ³னவோ, கிம் நிஸ்ஸரணம்; கோ தேஜோதா⁴துயா அஸ்ஸாதோ³, கோ ஆதீ³னவோ, கிம் நிஸ்ஸரணம்; கோ வாயோதா⁴துயா அஸ்ஸாதோ³, கோ ஆதீ³னவோ, கிம் நிஸ்ஸரண’’’ந்தி?

‘‘தஸ்ஸ மய்ஹம், பி⁴க்க²வே, ஏதத³ஹோஸி – ‘யம் கோ² பத²வீதா⁴தும் படிச்ச உப்பஜ்ஜதி ஸுக²ம் ஸோமனஸ்ஸம், அயம் பத²வீதா⁴துயா அஸ்ஸாதோ³; யம் [யா (ஸீ.)] பத²வீதா⁴து அனிச்சா து³க்கா² விபரிணாமத⁴ம்மா, அயம் பத²வீதா⁴துயா ஆதீ³னவோ; யோ பத²வீதா⁴துயா ச²ந்த³ராக³வினயோ ச²ந்த³ராக³ப்பஹானம், இத³ம் பத²வீதா⁴துயா நிஸ்ஸரணம். யம் ஆபோதா⁴தும் படிச்ச…பே… யம் தேஜோதா⁴தும் படிச்ச…பே… யம் வாயோதா⁴தும் படிச்ச உப்பஜ்ஜதி ஸுக²ம் ஸோமனஸ்ஸம், அயம் வாயோதா⁴துயா அஸ்ஸாதோ³; யம் வாயோதா⁴து அனிச்சா து³க்கா² விபரிணாமத⁴ம்மா, அயம் வாயோதா⁴துயா ஆதீ³னவோ; யோ வாயோதா⁴துயா ச²ந்த³ராக³வினயோ ச²ந்த³ராக³ப்பஹானம், இத³ம் வாயோதா⁴துயா நிஸ்ஸரணம்’’’.

‘‘யாவகீவஞ்சாஹம், பி⁴க்க²வே, இமாஸம் சதுன்னம் தா⁴தூனம் ஏவம் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தம் ந அப்³ப⁴ஞ்ஞாஸிம், நேவ தாவாஹம், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴தி [அபி⁴ஸம்பு³த்³தோ⁴ (ஸீ. ஸ்யா. கம்.)] பச்சஞ்ஞாஸிம்.

‘‘யதோ ச க்²வாஹம், பி⁴க்க²வே, இமாஸம் சதுன்னம் தா⁴தூனம் ஏவம் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தம் அப்³ப⁴ஞ்ஞாஸிம், அதா²ஹம், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴தி பச்சஞ்ஞாஸிம். ஞாணஞ்ச பன மே த³ஸ்ஸனம் உத³பாதி³ – ‘அகுப்பா மே விமுத்தி [சேதோவிமுத்தி (ஸீ. பீ. க.)], அயமந்திமா ஜாதி, நத்தி² தா³னி புனப்³ப⁴வோ’’’தி. து³தியம்.

3. அசரிம்ஸுத்தம்

116. ஸாவத்தி²யம் விஹரதி…பே… ‘‘பத²வீதா⁴துயாஹம், பி⁴க்க²வே, அஸ்ஸாத³பரியேஸனம் அசரிம், யோ பத²வீதா⁴துயா அஸ்ஸாதோ³ தத³ஜ்ஜ²க³மம், யாவதா பத²வீதா⁴துயா அஸ்ஸாதோ³ பஞ்ஞாய மே ஸோ ஸுதி³ட்டோ². பத²வீதா⁴துயாஹம், பி⁴க்க²வே, ஆதீ³னவபரியேஸனம் அசரிம், யோ பத²வீதா⁴துயா ஆதீ³னவோ தத³ஜ்ஜ²க³மம், யாவதா பத²வீதா⁴துயா ஆதீ³னவோ பஞ்ஞாய மே ஸோ ஸுதி³ட்டோ². பத²வீதா⁴துயாஹம், பி⁴க்க²வே, நிஸ்ஸரணபரியேஸனம் அசரிம், யம் பத²வீதா⁴துயா நிஸ்ஸரணம் தத³ஜ்ஜ²க³மம், யாவதா பத²வீதா⁴துயா நிஸ்ஸரணம் பஞ்ஞாய மே தம் ஸுதி³ட்ட²ம்’’.

‘‘ஆபோதா⁴துயாஹம், பி⁴க்க²வே…பே… தேஜோதா⁴துயாஹம், பி⁴க்க²வே… வாயோதா⁴துயாஹம், பி⁴க்க²வே, அஸ்ஸாத³பரியேஸனம் அசரிம், யோ வாயோதா⁴துயா அஸ்ஸாதோ³ தத³ஜ்ஜ²க³மம், யாவதா வாயோதா⁴துயா அஸ்ஸாதோ³ பஞ்ஞாய மே ஸோ ஸுதி³ட்டோ². வாயோதா⁴துயாஹம், பி⁴க்க²வே, ஆதீ³னவபரியேஸனம் அசரிம், யோ வாயோதா⁴துயா ஆதீ³னவோ தத³ஜ்ஜ²க³மம், யாவதா வாயோதா⁴துயா ஆதீ³னவோ பஞ்ஞாய மே ஸோ ஸுதி³ட்டோ². வாயோதா⁴துயாஹம், பி⁴க்க²வே, நிஸ்ஸரணபரியேஸனம் அசரிம், யம் வாயோதா⁴துயா நிஸ்ஸரணம் தத³ஜ்ஜ²க³மம், யாவதா வாயோதா⁴துயா நிஸ்ஸரணம் பஞ்ஞாய மே தம் ஸுதி³ட்ட²ம்.

‘‘யாவகீவஞ்சாஹம், பி⁴க்க²வே, இமாஸம் சதுன்னம் தா⁴தூனம் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தம் ந அப்³ப⁴ஞ்ஞாஸிம், நேவ தாவாஹம், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴தி பச்சஞ்ஞாஸிம்.

‘‘யதோ ச க்²வாஹம், பி⁴க்க²வே, இமாஸம் சதுன்னம் தா⁴தூனம் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தம் அப்³ப⁴ஞ்ஞாஸிம், அதா²ஹம், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴தி பச்சஞ்ஞாஸிம். ஞாணஞ்ச பன மே த³ஸ்ஸனம் உத³பாதி³ – ‘அகுப்பா மே விமுத்தி, அயமந்திமா ஜாதி, நத்தி² தா³னி புனப்³ப⁴வோ’’’தி. ததியம்.

4. நோசேத³ம்ஸுத்தம்

117. ஸாவத்தி²யம் விஹரதி…பே… ‘‘நோ சேத³ம், பி⁴க்க²வே, பத²வீதா⁴துயா அஸ்ஸாதோ³ அப⁴விஸ்ஸ, நயித³ம் ஸத்தா பத²வீதா⁴துயா ஸாரஜ்ஜேய்யும். யஸ்மா ச கோ², பி⁴க்க²வே, அத்தி² பத²வீதா⁴துயா அஸ்ஸாதோ³, தஸ்மா ஸத்தா பத²வீதா⁴துயா ஸாரஜ்ஜந்தி. நோ சேத³ம், பி⁴க்க²வே, பத²வீதா⁴துயா ஆதீ³னவோ அப⁴விஸ்ஸ, நயித³ம் ஸத்தா பத²வீதா⁴துயா நிப்³பி³ந்தே³ய்யும். யஸ்மா ச கோ², பி⁴க்க²வே, அத்தி² பத²வீதா⁴துயா ஆதீ³னவோ, தஸ்மா ஸத்தா பத²வீதா⁴துயா நிப்³பி³ந்த³ந்தி. நோ சேத³ம், பி⁴க்க²வே, பத²வீதா⁴துயா நிஸ்ஸரணம் அப⁴விஸ்ஸ, நயித³ம் ஸத்தா பத²வீதா⁴துயா நிஸ்ஸரேய்யும். யஸ்மா ச கோ², பி⁴க்க²வே, அத்தி² பத²வீதா⁴துயா நிஸ்ஸரணம், தஸ்மா ஸத்தா பத²வீதா⁴துயா நிஸ்ஸரந்தி’’.

‘‘நோ சேத³ம், பி⁴க்க²வே, ஆபோதா⁴துயா அஸ்ஸாதோ³ அப⁴விஸ்ஸ…பே… நோ சேத³ம், பி⁴க்க²வே, தேஜோதா⁴துயா…பே… நோ சேத³ம், பி⁴க்க²வே, வாயோதா⁴துயா அஸ்ஸாதோ³ அப⁴விஸ்ஸ, நயித³ம் ஸத்தா வாயோதா⁴துயா ஸாரஜ்ஜேய்யும். யஸ்மா ச கோ², பி⁴க்க²வே, அத்தி² வாயோதா⁴துயா அஸ்ஸாதோ³, தஸ்மா ஸத்தா வாயோதா⁴துயா ஸாரஜ்ஜந்தி. நோ சேத³ம், பி⁴க்க²வே, வாயோதா⁴துயா ஆதீ³னவோ அப⁴விஸ்ஸ, நயித³ம் ஸத்தா வாயோதா⁴துயா நிப்³பி³ந்தே³ய்யும். யஸ்மா ச கோ², பி⁴க்க²வே, அத்தி² வாயோதா⁴துயா ஆதீ³னவோ, தஸ்மா ஸத்தா வாயோதா⁴துயா நிப்³பி³ந்த³ந்தி. நோ சேத³ம், பி⁴க்க²வே, வாயோதா⁴துயா நிஸ்ஸரணம் அப⁴விஸ்ஸ, நயித³ம் ஸத்தா வாயோதா⁴துயா நிஸ்ஸரேய்யும். யஸ்மா ச கோ², பி⁴க்க²வே, அத்தி² வாயோதா⁴துயா நிஸ்ஸரணம், தஸ்மா ஸத்தா வாயோதா⁴துயா நிஸ்ஸரந்தி.

‘‘யாவகீவஞ்சிமே, பி⁴க்க²வே, ஸத்தா இமாஸம் சதுன்னம் தா⁴தூனம் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தம் ந அப்³ப⁴ஞ்ஞம்ஸு, நேவ தாவிமே பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸம்யுத்தா விப்பமுத்தா விமரியாதி³கதேன சேதஸா விஹரிம்ஸு.

‘‘யதோ ச கோ², பி⁴க்க²வே, ஸத்தா இமாஸம் சதுன்னம் தா⁴தூனம் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தம் அப்³ப⁴ஞ்ஞம்ஸு, அத², பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸம்யுத்தா விப்பமுத்தா விமரியாதி³கதேன சேதஸா விஹரந்தீ’’தி. சதுத்த²ம்.

5. ஏகந்தது³க்க²ஸுத்தம்

118. ஸாவத்தி²யம் விஹரதி…பே… ‘‘பத²வீதா⁴து சே [ச (ஸீ. ஸ்யா. கம்.)] ஹித³ம், பி⁴க்க²வே, ஏகந்தது³க்கா² அப⁴விஸ்ஸ து³க்கா²னுபதிதா து³க்கா²வக்கந்தா அனவக்கந்தா ஸுகே²ன, நயித³ம் ஸத்தா பத²வீதா⁴துயா ஸாரஜ்ஜேய்யும். யஸ்மா ச கோ², பி⁴க்க²வே, பத²வீதா⁴து ஸுகா² ஸுகா²னுபதிதா ஸுகா²வக்கந்தா அனவக்கந்தா து³க்கே²ன, தஸ்மா ஸத்தா பத²வீதா⁴துயா ஸாரஜ்ஜந்தி’’.

‘‘ஆபோதா⁴து சே ஹித³ம், பி⁴க்க²வே…பே… தேஜோதா⁴து சே ஹித³ம், பி⁴க்க²வே… வாயோதா⁴து சே ஹித³ம், பி⁴க்க²வே, ஏகந்தது³க்கா² அப⁴விஸ்ஸ து³க்கா²னுபதிதா து³க்கா²வக்கந்தா அனவக்கந்தா ஸுகே²ன, நயித³ம் ஸத்தா வாயோதா⁴துயா ஸாரஜ்ஜேய்யும். யஸ்மா ச கோ², பி⁴க்க²வே, வாயோதா⁴து ஸுகா² ஸுகா²னுபதிதா ஸுகா²வக்கந்தா அனவக்கந்தா து³க்கே²ன, தஸ்மா ஸத்தா வாயோதா⁴துயா ஸாரஜ்ஜந்தி.

‘‘பத²வீதா⁴து சே ஹித³ம், பி⁴க்க²வே, ஏகந்தஸுகா² அப⁴விஸ்ஸ ஸுகா²னுபதிதா ஸுகா²வக்கந்தா அனவக்கந்தா து³க்கே²ன, நயித³ம் ஸத்தா பத²வீதா⁴துயா நிப்³பி³ந்தே³ய்யும். யஸ்மா ச கோ², பி⁴க்க²வே, பத²வீதா⁴து து³க்கா² து³க்கா²னுபதிதா து³க்கா²வக்கந்தா அனவக்கந்தா ஸுகே²ன, தஸ்மா ஸத்தா பத²வீதா⁴துயா நிப்³பி³ந்த³ந்தி.

‘‘ஆபோதா⁴து சே ஹித³ம், பி⁴க்க²வே…பே… தேஜோதா⁴து சே ஹித³ம், பி⁴க்க²வே… வாயோதா⁴து சே ஹித³ம், பி⁴க்க²வே, ஏகந்தஸுகா² அப⁴விஸ்ஸ ஸுகா²னுபதிதா ஸுகா²வக்கந்தா அனவக்கந்தா து³க்கே²ன, நயித³ம் ஸத்தா வாயோதா⁴துயா நிப்³பி³ந்தே³ய்யும். யஸ்மா ச கோ², பி⁴க்க²வே, வாயோதா⁴து து³க்கா² து³க்கா²னுபதிதா து³க்கா²வக்கந்தா அனவக்கந்தா ஸுகே²ன, தஸ்மா ஸத்தா வாயோதா⁴துயா நிப்³பி³ந்த³ந்தீ’’தி. பஞ்சமம்.

6. அபி⁴னந்த³ஸுத்தம்

119. ஸாவத்தி²யம் விஹரதி…பே… ‘‘யோ, பி⁴க்க²வே, பத²வீதா⁴தும் அபி⁴னந்த³தி, து³க்க²ம் ஸோ அபி⁴னந்த³தி. யோ து³க்க²ம் அபி⁴னந்த³தி, அபரிமுத்தோ ஸோ து³க்க²ஸ்மாதி வதா³மி. யோ ஆபோதா⁴தும் அபி⁴னந்த³தி…பே… யோ தேஜோதா⁴தும்… யோ வாயோதா⁴தும் அபி⁴னந்த³தி, து³க்க²ம் ஸோ அபி⁴னந்த³தி. யோ து³க்க²ம் அபி⁴னந்த³தி, அபரிமுத்தோ ஸோ து³க்க²ஸ்மாதி வதா³மி’’.

‘‘யோ ச கோ², பி⁴க்க²வே, பத²வீதா⁴தும் நாபி⁴னந்த³தி, து³க்க²ம் ஸோ நாபி⁴னந்த³தி. யோ து³க்க²ம் நாபி⁴னந்த³தி, பரிமுத்தோ ஸோ து³க்க²ஸ்மாதி வதா³மி. யோ ஆபோதா⁴தும்…பே… யோ தேஜோதா⁴தும்… யோ வாயோதா⁴தும் நாபி⁴னந்த³தி, து³க்க²ம் ஸோ நாபி⁴னந்த³தி. யோ து³க்க²ம் நாபி⁴னந்த³தி, பரிமுத்தோ ஸோ து³க்க²ஸ்மாதி வதா³மீ’’தி. ச²ட்ட²ம்.

7. உப்பாத³ஸுத்தம்

120. ஸாவத்தி²யம் விஹரதி…பே… ‘‘யோ, பி⁴க்க²வே, பத²வீதா⁴துயா உப்பாதோ³ டி²தி அபி⁴னிப்³ப³த்தி பாதுபா⁴வோ, து³க்க²ஸ்ஸேஸோ உப்பாதோ³ ரோகா³னம் டி²தி ஜராமரணஸ்ஸ பாதுபா⁴வோ. யோ ஆபோதா⁴துயா…பே… யோ தேஜோதா⁴துயா… யோ வாயோதா⁴துயா உப்பாதோ³ டி²தி அபி⁴னிப்³ப³த்தி பாதுபா⁴வோ, து³க்க²ஸ்ஸேஸோ உப்பாதோ³ ரோகா³னம் டி²தி ஜராமரணஸ்ஸ பாதுபா⁴வோ’’.

‘‘யோ ச கோ², பி⁴க்க²வே, பத²வீதா⁴துயா நிரோதோ⁴ வூபஸமோ அத்த²ங்க³மோ, து³க்க²ஸ்ஸேஸோ நிரோதோ⁴ ரோகா³னம் வூபஸமோ ஜராமரணஸ்ஸ அத்த²ங்க³மோ. யோ ஆபோதா⁴துயா…பே… யோ தேஜோதா⁴துயா… யோ வாயோதா⁴துயா நிரோதோ⁴ வூபஸமோ அத்த²ங்க³மோ, து³க்க²ஸ்ஸேஸோ நிரோதோ⁴ ரோகா³னம் வூபஸமோ ஜராமரணஸ்ஸ அத்த²ங்க³மோ’’தி. ஸத்தமம்.

8. ஸமணப்³ராஹ்மணஸுத்தம்

121. ஸாவத்தி²யம் விஹரதி…பே… ‘‘சதஸ்ஸோ இமா, பி⁴க்க²வே, தா⁴துயோ. கதமா சதஸ்ஸோ? பத²வீதா⁴து, ஆபோதா⁴து, தேஜோதா⁴து, வாயோதா⁴து. யே ஹி கேசி, பி⁴க்க²வே, ஸமணா வா ப்³ராஹ்மணா வா இமாஸம் சதுன்னம் தா⁴தூனம் அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா; ந ச பன தே ஆயஸ்மந்தோ ஸாமஞ்ஞத்த²ம் வா ப்³ரஹ்மஞ்ஞத்த²ம் வா தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி’’.

‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமாஸம் சதுன்னம் தா⁴தூனம் அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானந்தி, தே ச கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா; தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. அட்ட²மம்.

9. து³தியஸமணப்³ராஹ்மணஸுத்தம்

122. ஸாவத்தி²யம் விஹரதி…பே… ‘‘சதஸ்ஸோ இமா, பி⁴க்க²வே, தா⁴துயோ. கதமா சதஸ்ஸோ? பத²வீதா⁴து, ஆபோதா⁴து, தேஜோதா⁴து, வாயோதா⁴து. யே ஹி கேசி, பி⁴க்க²வே, ஸமணா வா ப்³ராஹ்மணா வா இமாஸம் சதுன்னம் தா⁴தூனம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி…பே… பஜானந்தி…பே… ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. நவமம்.

10. ததியஸமணப்³ராஹ்மணஸுத்தம்

123. ஸாவத்தி²யம் விஹரதி…பே… ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா பத²வீதா⁴தும் நப்பஜானந்தி, பத²வீதா⁴துஸமுத³யம் நப்பஜானந்தி, பத²வீதா⁴துனிரோத⁴ம் நப்பஜானந்தி, பத²வீதா⁴துனிரோத⁴கா³மினிம் படிபத³ம் நப்பஜானந்தி…பே… ஆபோதா⁴தும் நப்பஜானந்தி… தேஜோதா⁴தும் நப்பஜானந்தி… வாயோதா⁴தும் நப்பஜானந்தி, வாயோதா⁴துஸமுத³யம் நப்பஜானந்தி, வாயோதா⁴துனிரோத⁴ம் நப்பஜானந்தி, வாயோதா⁴துனிரோத⁴கா³மினிம் படிபத³ம் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா; ந ச பன தே ஆயஸ்மந்தோ ஸாமஞ்ஞத்த²ம் வா ப்³ரஹ்மஞ்ஞத்த²ம் வா தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி’’.

‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா பத²வீதா⁴தும் பஜானந்தி, பத²வீதா⁴துஸமுத³யம் பஜானந்தி, பத²வீதா⁴துனிரோத⁴ம் பஜானந்தி, பத²வீதா⁴துனிரோத⁴கா³மினிம் படிபத³ம் பஜானந்தி… யே ச கோ² கேசி, பி⁴க்க²வே, ஸமணா வா ப்³ராஹ்மணா வா…பே… ஆபோதா⁴தும் பஜானந்தி… தேஜோதா⁴தும் பஜானந்தி… வாயோதா⁴தும் பஜானந்தி, வாயோதா⁴துஸமுத³யம் பஜானந்தி, வாயோதா⁴துனிரோத⁴ம் பஜானந்தி, வாயோதா⁴துனிரோத⁴கா³மினிம் படிபத³ம் பஜானந்தி, தே ச கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா; தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. த³ஸமம்.

சதுத்தோ² வக்³கோ³.

தஸ்ஸுத்³தா³னம் –

சதஸ்ஸோ புப்³பே³ அசரிம், நோசேத³ஞ்ச து³க்கே²ன ச;

அபி⁴னந்த³ஞ்ச உப்பாதோ³, தயோ ஸமணப்³ராஹ்மணாதி.

தா⁴துஸம்யுத்தம் ஸமத்தம்.