2. ஸனிதா³னஸுத்தம்

96. ஸாவத்தி²யம் விஹரதி…பே… ‘‘ஸனிதா³னம், பி⁴க்க²வே, உப்பஜ்ஜதி காமவிதக்கோ, நோ அனிதா³னம்; ஸனிதா³னம் உப்பஜ்ஜதி ப்³யாபாத³விதக்கோ, நோ அனிதா³னம்; ஸனிதா³னம் உப்பஜ்ஜதி விஹிம்ஸாவிதக்கோ, நோ அனிதா³னம்’’.

‘‘கத²ஞ்ச, பி⁴க்க²வே, ஸனிதா³னம் உப்பஜ்ஜதி காமவிதக்கோ, நோ அனிதா³னம்; ஸனிதா³னம் உப்பஜ்ஜதி ப்³யாபாத³விதக்கோ, நோ அனிதா³னம்; ஸனிதா³னம் உப்பஜ்ஜதி விஹிம்ஸாவிதக்கோ, நோ அனிதா³னம்? காமதா⁴தும், பி⁴க்க²வே, படிச்ச உப்பஜ்ஜதி காமஸஞ்ஞா, காமஸஞ்ஞம் படிச்ச உப்பஜ்ஜதி காமஸங்கப்போ, காமஸங்கப்பம் படிச்ச உப்பஜ்ஜதி காமச்ச²ந்தோ³, காமச்ச²ந்த³ம் படிச்ச உப்பஜ்ஜதி காமபரிளாஹோ, காமபரிளாஹம் படிச்ச உப்பஜ்ஜதி காமபரியேஸனா. காமபரியேஸனம், பி⁴க்க²வே, பரியேஸமானோ அஸ்ஸுதவா புது²ஜ்ஜனோ தீஹி டா²னேஹி மிச்சா² படிபஜ்ஜதி – காயேன, வாசாய, மனஸா.

‘‘ப்³யாபாத³தா⁴தும், பி⁴க்க²வே, படிச்ச உப்பஜ்ஜதி ப்³யாபாத³ஸஞ்ஞா, ப்³யாபாத³ஸஞ்ஞம் படிச்ச உப்பஜ்ஜதி ப்³யாபாத³ஸங்கப்போ…பே… ப்³யாபாத³ச்ச²ந்தோ³… ப்³யாபாத³பரிளாஹோ… ப்³யாபாத³பரியேஸனா… ப்³யாபாத³பரியேஸனம், பி⁴க்க²வே, பரியேஸமானோ அஸ்ஸுதவா புது²ஜ்ஜனோ தீஹி டா²னேஹி மிச்சா² படிபஜ்ஜதி – காயேன, வாசாய, மனஸா.

‘‘விஹிம்ஸாதா⁴தும், பி⁴க்க²வே, படிச்ச உப்பஜ்ஜதி விஹிம்ஸாஸஞ்ஞா; விஹிம்ஸாஸஞ்ஞம் படிச்ச உப்பஜ்ஜதி விஹிம்ஸாஸங்கப்போ…பே… விஹிம்ஸாச²ந்தோ³… விஹிம்ஸாபரிளாஹோ… விஹிம்ஸாபரியேஸனா… விஹிம்ஸாபரியேஸனம், பி⁴க்க²வே, பரியேஸமானோ அஸ்ஸுதவா புது²ஜ்ஜனோ தீஹி டா²னேஹி மிச்சா² படிபஜ்ஜதி – காயேன, வாசாய, மனஸா.

‘‘ஸேய்யதா²பி, பி⁴க்க²வே, புரிஸோ ஆதி³த்தம் திணுக்கம் ஸுக்கே² திணதா³யே நிக்கி²பேய்ய; நோ சே ஹத்தே²ஹி ச பாதே³ஹி ச கி²ப்பமேவ நிப்³பா³பேய்ய. ஏவஞ்ஹி, பி⁴க்க²வே, யே திணகட்ட²னிஸ்ஸிதா பாணா தே அனயப்³யஸனம் ஆபஜ்ஜேய்யும். ஏவமேவ கோ², பி⁴க்க²வே, யோ ஹி கோசி ஸமணோ வா ப்³ராஹ்மணோ வா உப்பன்னம் விஸமக³தம் ஸஞ்ஞம் ந கி²ப்பமேவ பஜஹதி வினோதே³தி ப்³யந்தீகரோதி அனபா⁴வம் க³மேதி, ஸோ தி³ட்டே² சேவ த⁴ம்மே து³க்க²ம் விஹரதி ஸவிகா⁴தம் ஸஉபாயாஸம் ஸபரிளாஹம்; காயஸ்ஸ ச பே⁴தா³ பரம் மரணா து³க்³க³தி பாடிகங்கா².

‘‘ஸனிதா³னம், பி⁴க்க²வே, உப்பஜ்ஜதி நேக்க²ம்மவிதக்கோ, நோ அனிதா³னம்; ஸனிதா³னம் உப்பஜ்ஜதி அப்³யாபாத³விதக்கோ, நோ அனிதா³னம்; ஸனிதா³னம் உப்பஜ்ஜதி அவிஹிம்ஸாவிதக்கோ, நோ அனிதா³னம்.

‘‘கத²ஞ்ச, பி⁴க்க²வே, ஸனிதா³னம் உப்பஜ்ஜதி நேக்க²ம்மவிதக்கோ, நோ அனிதா³னம்; ஸனிதா³னம் உப்பஜ்ஜதி அப்³யாபாத³விதக்கோ, நோ அனிதா³னம்; ஸனிதா³னம் உப்பஜ்ஜதி அவிஹிம்ஸாவிதக்கோ, நோ அனிதா³னம்? நேக்க²ம்மதா⁴தும், பி⁴க்க²வே, படிச்ச உப்பஜ்ஜதி நேக்க²ம்மஸஞ்ஞா, நேக்க²ம்மஸஞ்ஞம் படிச்ச உப்பஜ்ஜதி நேக்க²ம்மஸங்கப்போ, நேக்க²ம்மஸங்கப்பம் படிச்ச உப்பஜ்ஜதி நேக்க²ம்மச்ச²ந்தோ³, நேக்க²ம்மச்ச²ந்த³ம் படிச்ச உப்பஜ்ஜதி நேக்க²ம்மபரிளாஹோ, நேக்க²ம்மபரிளாஹம் படிச்ச உப்பஜ்ஜதி நேக்க²ம்மபரியேஸனா; நேக்க²ம்மபரியேஸனம், பி⁴க்க²வே, பரியேஸமானோ ஸுதவா அரியஸாவகோ தீஹி டா²னேஹி ஸம்மா படிபஜ்ஜதி – காயேன, வாசாய, மனஸா.

‘‘அப்³யாபாத³தா⁴தும், பி⁴க்க²வே, படிச்ச உப்பஜ்ஜதி அப்³யாபாத³ஸஞ்ஞா, அப்³யாபாத³ஸஞ்ஞம் படிச்ச உப்பஜ்ஜதி அப்³யாபாத³ஸங்கப்போ…பே… அப்³யாபாத³ச்ச²ந்தோ³… அப்³யாபாத³பரிளாஹோ… அப்³யாபாத³பரியேஸனா, அப்³யாபாத³பரியேஸனம், பி⁴க்க²வே, பரியேஸமானோ ஸுதவா அரியஸாவகோ தீஹி டா²னேஹி ஸம்மா படிபஜ்ஜதி – காயேன, வாசாய, மனஸா.

‘‘அவிஹிம்ஸாதா⁴தும், பி⁴க்க²வே, படிச்ச உப்பஜ்ஜதி அவிஹிம்ஸாஸஞ்ஞா, அவிஹிம்ஸாஸஞ்ஞம் படிச்ச உப்பஜ்ஜதி அவிஹிம்ஸாஸங்கப்போ, அவிஹிம்ஸாஸங்கப்பம் படிச்ச உப்பஜ்ஜதி அவிஹிம்ஸாச²ந்தோ³, அவிஹிம்ஸாச²ந்த³ம் படிச்ச உப்பஜ்ஜதி அவிஹிம்ஸாபரிளாஹோ, அவிஹிம்ஸாபரிளாஹம் படிச்ச உப்பஜ்ஜதி அவிஹிம்ஸாபரியேஸனா; அவிஹிம்ஸாபரியேஸனம், பி⁴க்க²வே, பரியேஸமானோ ஸுதவா அரியஸாவகோ தீஹி டா²னேஹி ஸம்மா படிபஜ்ஜதி – காயேன, வாசாய, மனஸா.

‘‘ஸேய்யதா²பி, பி⁴க்க²வே, புரிஸோ ஆதி³த்தம் திணுக்கம் ஸுக்கே² திணதா³யே நிக்கி²பேய்ய; தமேனம் ஹத்தே²ஹி ச பாதே³ஹி ச கி²ப்பமேவ நிப்³பா³பேய்ய. ஏவஞ்ஹி, பி⁴க்க²வே, யே திணகட்ட²னிஸ்ஸிதா பாணா தே ந அனயப்³யஸனம் ஆபஜ்ஜேய்யும். ஏவமேவ கோ², பி⁴க்க²வே, யோ ஹி கோசி ஸமணோ வா ப்³ராஹ்மணோ வா உப்பன்னம் விஸமக³தம் ஸஞ்ஞம் கி²ப்பமேவ பஜஹதி வினோதே³தி ப்³யந்தீகரோதி அனபா⁴வம் க³மேதி, ஸோ தி³ட்டே² சேவ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம்; காயஸ்ஸ ச பே⁴தா³ பரம் மரணா ஸுக³தி பாடிகங்கா²’’தி. து³தியம்.