3. கி³ஞ்ஜகாவஸத²ஸுத்தம்

97. ஏகம் ஸமயம் ப⁴க³வா ஞாதிகே விஹரதி கி³ஞ்ஜகாவஸதே². தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘தா⁴தும், பி⁴க்க²வே, படிச்ச உப்பஜ்ஜதி ஸஞ்ஞா, உப்பஜ்ஜதி தி³ட்டி², உப்பஜ்ஜதி விதக்கோ’’தி. ஏவம் வுத்தே, ஆயஸ்மா கச்சானோ [ஸத்³தோ⁴ கச்சானோ (க.)] ப⁴க³வந்தம் ஏதத³வோச – ‘‘யாயம், ப⁴ந்தே, தி³ட்டி² – ‘அஸம்மாஸம்பு³த்³தே⁴ஸு ஸம்மாஸம்பு³த்³தா⁴’தி, அயம் நு கோ², ப⁴ந்தே, தி³ட்டி² கிம் படிச்ச பஞ்ஞாயதீ’’தி?

‘‘மஹதி கோ² ஏஸா, கச்சான, தா⁴து யதி³த³ம் அவிஜ்ஜாதா⁴து. ஹீனம், கச்சான, தா⁴தும் படிச்ச உப்பஜ்ஜதி ஹீனா ஸஞ்ஞா, ஹீனா தி³ட்டி², ஹீனோ விதக்கோ, ஹீனா சேதனா, ஹீனா பத்த²னா, ஹீனோ பணிதி⁴, ஹீனோ புக்³க³லோ, ஹீனா வாசா; ஹீனம் ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி; ஹீனா தஸ்ஸ உபபத்தீதி வதா³மி.

‘‘மஜ்ஜி²மம், கச்சான, தா⁴தும் படிச்ச உப்பஜ்ஜதி மஜ்ஜி²மா ஸஞ்ஞா, மஜ்ஜி²மா தி³ட்டி², மஜ்ஜி²மோ விதக்கோ, மஜ்ஜி²மா சேதனா, மஜ்ஜி²மா பத்த²னா, மஜ்ஜி²மோ பணிதி⁴, மஜ்ஜி²மோ புக்³க³லோ, மஜ்ஜி²மா வாசா; மஜ்ஜி²மம் ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி; மஜ்ஜி²மா தஸ்ஸ உபபத்தீதி வதா³மி.

‘‘பணீதம், கச்சான, தா⁴தும் படிச்ச உப்பஜ்ஜதி பணீதா ஸஞ்ஞா, பணீதா தி³ட்டி², பணீதோ விதக்கோ, பணீதா சேதனா, பணீதா பத்த²னா, பணீதோ பணிதி⁴, பணீதோ புக்³க³லோ, பணீதா வாசா; பணீதம் ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதி; பணீதா தஸ்ஸ உபபத்தீதி வதா³மீ’’தி. ததியம்.