1. ஸத்ததா⁴துஸுத்தம்

95. ஸாவத்தி²யம் விஹரதி…பே… ‘‘ஸத்திமா, பி⁴க்க²வே, தா⁴துயோ. கதமா ஸத்த? ஆபா⁴தா⁴து, ஸுப⁴தா⁴து, ஆகாஸானஞ்சாயதனதா⁴து, விஞ்ஞாணஞ்சாயதனதா⁴து, ஆகிஞ்சஞ்ஞாயதனதா⁴து, நேவஸஞ்ஞானாஸஞ்ஞாயதனதா⁴து, ஸஞ்ஞாவேத³யிதனிரோத⁴தா⁴து – இமா கோ², பி⁴க்க²வே, ஸத்த தா⁴துயோ’’தி.

ஏவம் வுத்தே, அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘யா சாயம், ப⁴ந்தே, ஆபா⁴தா⁴து யா ச ஸுப⁴தா⁴து யா ச ஆகாஸானஞ்சாயதனதா⁴து யா ச விஞ்ஞாணஞ்சாயதனதா⁴து யா ச ஆகிஞ்சஞ்ஞாயதனதா⁴து யா ச நேவஸஞ்ஞானாஸஞ்ஞாயதனதா⁴து யா ச ஸஞ்ஞாவேத³யிதனிரோத⁴தா⁴து – இமா நு கோ², ப⁴ந்தே, தா⁴துயோ கிம் படிச்ச பஞ்ஞாயந்தீ’’தி?

‘‘யாயம், பி⁴க்கு², ஆபா⁴தா⁴து – அயம் தா⁴து அந்த⁴காரம் படிச்ச பஞ்ஞாயதி. யாயம், பி⁴க்கு², ஸுப⁴தா⁴து – அயம் தா⁴து அஸுப⁴ம் படிச்ச பஞ்ஞாயதி. யாயம், பி⁴க்கு², ஆகாஸானஞ்சாயதனதா⁴து – அயம் தா⁴து ரூபம் படிச்ச பஞ்ஞாயதி. யாயம், பி⁴க்கு², விஞ்ஞாணஞ்சாயதனதா⁴து – அயம் தா⁴து ஆகாஸானஞ்சாயதனம் படிச்ச பஞ்ஞாயதி. யாயம், பி⁴க்கு², ஆகிஞ்சஞ்ஞாயதனதா⁴து – அயம் தா⁴து விஞ்ஞாணஞ்சாயதனம் படிச்ச பஞ்ஞாயதி. யாயம், பி⁴க்கு², நேவஸஞ்ஞானாஸஞ்ஞாயதனதா⁴து – அயம் தா⁴து ஆகிஞ்சஞ்ஞாயதனம் படிச்ச பஞ்ஞாயதி. யாயம், பி⁴க்கு², ஸஞ்ஞாவேத³யிதனிரோத⁴தா⁴து – அயம் தா⁴து நிரோத⁴ம் படிச்ச பஞ்ஞாயதீ’’தி.

‘‘யா சாயம், ப⁴ந்தே, ஆபா⁴தா⁴து யா ச ஸுப⁴தா⁴து யா ச ஆகாஸானஞ்சாயதனதா⁴து யா ச விஞ்ஞாணஞ்சாயதனதா⁴து யா ச ஆகிஞ்சஞ்ஞாயதனதா⁴து யா ச நேவஸஞ்ஞானாஸஞ்ஞாயதனதா⁴து யா ச ஸஞ்ஞாவேத³யிதனிரோத⁴தா⁴து – இமா நு கோ², ப⁴ந்தே, தா⁴துயோ கத²ம் ஸமாபத்தி பத்தப்³பா³’’தி?

‘‘யா சாயம், பி⁴க்கு², ஆபா⁴தா⁴து யா ச ஸுப⁴தா⁴து யா ச ஆகாஸானஞ்சாயதனதா⁴து யா ச விஞ்ஞாணஞ்சாயதனதா⁴து யா ச ஆகிஞ்சஞ்ஞாயதனதா⁴து – இமா தா⁴துயோ ஸஞ்ஞாஸமாபத்தி பத்தப்³பா³. யாயம், பி⁴க்கு², நேவஸஞ்ஞானாஸஞ்ஞாயதனதா⁴து – அயம் தா⁴து ஸங்கா²ராவஸேஸஸமாபத்தி பத்தப்³பா³. யாயம், பி⁴க்கு², ஸஞ்ஞாவேத³யிதனிரோத⁴தா⁴து – அயம் தா⁴து நிரோத⁴ஸமாபத்தி பத்தப்³பா³’’தி. பட²மம்.