10. து³தியபப்³ப³தஸுத்தம்

83. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, ஹிமவா பப்³ப³தராஜா பரிக்க²யம் பரியாதா³னம் க³ச்சே²ய்ய, ட²பேத்வா ஸத்த ஸாஸபமத்தியோ பாஸாணஸக்க²ரா. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யம் வா ஹிமவதோ பப்³ப³தராஜஸ்ஸ பரிக்கீ²ணம் பரியாதி³ண்ணம் யா வா ஸத்த ஸாஸபமத்தியோ பாஸாணஸக்க²ரா அவஸிட்டா²’’தி?

‘‘ஏததே³வ, ப⁴ந்தே, ப³ஹுதரம் ஹிமவதோ பப்³ப³தராஜஸ்ஸ யதி³த³ம் பரிக்கீ²ணம் பரியாதி³ண்ணம்; அப்பமத்திகா ஸத்த ஸாஸபமத்தியோ பாஸாணஸக்க²ரா அவஸிட்டா². நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி ஹிமவதோ பப்³ப³தராஜஸ்ஸ பரிக்கீ²ணம் பரியாதி³ண்ணம் உபனிதா⁴ய ஸத்த ஸாஸபமத்தியோ பாஸாணஸக்க²ரா அவஸிட்டா²’’தி.

‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரம் து³க்க²ம் யதி³த³ம் பரிக்கீ²ணம் பரியாதி³ண்ணம்; அப்பமத்தகம் அவஸிட்ட²ம். நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி புரிமம் து³க்க²க்க²ந்த⁴ம் பரிக்கீ²ணம் பரியாதி³ண்ணம் உபனிதா⁴ய யதி³த³ம் ஸத்தக்க²த்தும்பரமதா. ஏவம் மஹத்தி²யோ கோ², பி⁴க்க²வே, த⁴ம்மாபி⁴ஸமயோ, ஏவம் மஹத்தி²யோ த⁴ம்மசக்கு²படிலாபோ⁴’’தி. த³ஸமம்.