2. அபி⁴ஸமயஸம்யுத்தம்

1. நக²ஸிகா²ஸுத்தம்

74. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ப⁴க³வா பரித்தம் நக²ஸிகா²யம் பம்ஸும் ஆரோபேத்வா பி⁴க்கூ² ஆமந்தேஸி – ‘‘தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யோ வாயம் [யோ சாயம் (ஸப்³ப³த்த²) து³தியஸுத்தாதீ³ஸு பன வாஸத்³தோ³யேவ தி³ஸ்ஸதி] மயா பரித்தோ நக²ஸிகா²யம் பம்ஸு ஆரோபிதோ, அயம் வா மஹாபத²வீ’’தி?

‘‘ஏததே³வ, ப⁴ந்தே, ப³ஹுதரம், யதி³த³ம் மஹாபத²வீ. அப்பமத்தகோ ப⁴க³வதா பரித்தோ நக²ஸிகா²யம் பம்ஸு ஆரோபிதோ. நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி மஹாபத²விம் உபனிதா⁴ய ப⁴க³வதா பரித்தோ நக²ஸிகா²யம் பம்ஸு ஆரோபிதோ’’தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரம் து³க்க²ம் யதி³த³ம் பரிக்கீ²ணம் பரியாதி³ண்ணம்; அப்பமத்தகம் அவஸிட்ட²ம். நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி புரிமம் து³க்க²க்க²ந்த⁴ம் பரிக்கீ²ணம் பரியாதி³ண்ணம் உபனிதா⁴ய யதி³த³ம் ஸத்தக்க²த்தும்பரமதா. ஏவம் மஹத்தி²யோ கோ², பி⁴க்க²வே, த⁴ம்மாபி⁴ஸமயோ; ஏவம் மஹத்தி²யோ த⁴ம்மசக்கு²படிலாபோ⁴’’தி. பட²மம்.

2. போக்க²ரணீஸுத்தம்

75. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, போக்க²ரணீ பஞ்ஞாஸயோஜனானி ஆயாமேன பஞ்ஞாஸயோஜனானி வித்தா²ரேன பஞ்ஞாஸயோஜனானி உப்³பே³தே⁴ன, புண்ணா உத³கஸ்ஸ ஸமதித்திகா காகபேய்யா. ததோ புரிஸோ குஸக்³கே³ன உத³கம் உத்³த⁴ரேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யம் வா குஸக்³கே³ன உத³கம் உப்³ப⁴தம் யம் வா போக்க²ரணியா உத³க’’ந்தி?

‘‘ஏததே³வ, ப⁴ந்தே, ப³ஹுதரம், யதி³த³ம் போக்க²ரணியா உத³கம். அப்பமத்தகம் குஸக்³கே³ன உத³கம் உப்³ப⁴தம். நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி போக்க²ரணியா உத³கம் உபனிதா⁴ய குஸக்³கே³ன உத³கம் உப்³ப⁴த’’ந்தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரம் து³க்க²ம் யதி³த³ம் பரிக்கீ²ணம் பரியாதி³ண்ணம்; அப்பமத்தகம் அவஸிட்ட²ம். நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி புரிமம் து³க்க²க்க²ந்த⁴ம் பரிக்கீ²ணம் பரியாதி³ண்ணம் உபனிதா⁴ய, யதி³த³ம் ஸத்தக்க²த்தும்பரமதா. ஏவம் மஹத்தி²யோ கோ², பி⁴க்க²வே, த⁴ம்மாபி⁴ஸமயோ; ஏவம் மஹத்தி²யோ த⁴ம்மசக்கு²படிலாபோ⁴’’தி. து³தியம்.

3. ஸம்பே⁴ஜ்ஜஉத³கஸுத்தம்

76. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, யத்தி²மா மஹானதி³யோ ஸம்ஸந்த³ந்தி ஸமேந்தி, ஸேய்யதி²த³ம் – க³ங்கா³ யமுனா அசிரவதீ ஸரபூ⁴ மஹீ, ததோ புரிஸோ த்³வே வா தீணி வா உத³கபு²ஸிதானி உத்³த⁴ரேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யானி வா த்³வே வா தீணி வா உத³கபு²ஸிதானி உப்³ப⁴தானி யம் வா ஸம்பே⁴ஜ்ஜஉத³க’’ந்தி?

‘‘ஏததே³வ, ப⁴ந்தே, ப³ஹுதரம் யதி³த³ம் ஸம்பே⁴ஜ்ஜஉத³கம்; அப்பமத்தகானி த்³வே வா தீணி வா உத³கபு²ஸிதானி உப்³ப⁴தானி. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி ஸம்பே⁴ஜ்ஜஉத³கம் உபனிதா⁴ய த்³வே வா தீணி வா உத³கபு²ஸிதானி உப்³ப⁴தானீ’’தி. ‘‘ஏவமேவ கோ², பி⁴க்க²வே…பே… த⁴ம்மசக்கு²படிலாபோ⁴’’தி. ததியம்.

4. து³தியஸம்பே⁴ஜ்ஜஉத³கஸுத்தம்

77. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, யத்தி²மா மஹானதி³யோ ஸம்ஸந்த³ந்தி ஸமேந்தி, ஸேய்யதி²த³ம் – க³ங்கா³ யமுனா அசிரவதீ ஸரபூ⁴ மஹீ, தம் உத³கம் பரிக்க²யம் பரியாதா³னம் க³ச்சே²ய்ய ட²பேத்வா த்³வே வா தீணி வா உத³கபு²ஸிதானி. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யம் வா ஸம்பே⁴ஜ்ஜஉத³கம் பரிக்கீ²ணம் பரியாதி³ண்ணம் யானி வா த்³வே வா தீணி வா உத³கபு²ஸிதானி அவஸிட்டா²னீ’’தி?

‘‘ஏததே³வ, ப⁴ந்தே, ப³ஹுதரம் ஸம்பே⁴ஜ்ஜஉத³கம் யதி³த³ம் பரிக்கீ²ணம் பரியாதி³ண்ணம்; அப்பமத்தகானி த்³வே வா தீணி வா உத³கபு²ஸிதானி அவஸிட்டா²னி. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி ஸம்பே⁴ஜ்ஜஉத³கம் பரிக்கீ²ணம் பரியாதி³ண்ணம் உபனிதா⁴ய த்³வே வா தீணி வா உத³கபு²ஸிதானி அவஸிட்டா²னீ’’தி. ‘‘ஏவமேவ கோ², பி⁴க்க²வே…பே… த⁴ம்மசக்கு²படிலாபோ⁴’’தி. சதுத்த²ம்.

5. பத²வீஸுத்தம்

78. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, புரிஸோ மஹாபத²வியா ஸத்த கோலட்டி²மத்தியோ கு³ளிகா உபனிக்கி²பேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யா வா ஸத்த கோலட்டி²மத்தியோ கு³ளிகா உபனிக்கி²த்தா அயம் [யா (ஸ்யா. க.)] வா மஹாபத²வீ’’தி?

‘‘ஏததே³வ, ப⁴ந்தே, ப³ஹுதரம், யதி³த³ம் மஹாபத²வீ; அப்பமத்திகா ஸத்த கோலட்டி²மத்தியோ கு³ளிகா உபனிக்கி²த்தா. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி மஹாபத²விம் உபனிதா⁴ய ஸத்த கோலட்டி²மத்தியோ கு³ளிகா உபனிக்கி²த்தா’’தி. ‘‘ஏவமேவ கோ², பி⁴க்க²வே…பே… த⁴ம்மசக்கு²படிலாபோ⁴’’தி. பஞ்சமம்.

6. து³தியபத²வீஸுத்தம்

79. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, மஹாபத²வீ பரிக்க²யம் பரியாதா³னம் க³ச்சே²ய்ய, ட²பேத்வா ஸத்த கோலட்டி²மத்தியோ கு³ளிகா. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யம் வா மஹாபத²வியா பரிக்கீ²ணம் பரியாதி³ண்ணம் யா வா ஸத்த கோலட்டி²மத்தியோ கு³ளிகா அவஸிட்டா²’’தி?

‘‘ஏததே³வ ப⁴ந்தே, ப³ஹுதரம், மஹாபத²வியா, யதி³த³ம் பரிக்கீ²ணம் பரியாதி³ண்ணம்; அப்பமத்திகா ஸத்த கோலட்டி²மத்தியோ கு³ளிகா அவஸிட்டா². நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி மஹாபத²வியா பரிக்கீ²ணம் பரியாதி³ண்ணம் உபனிதா⁴ய ஸத்த கோலட்டி²மத்தியோ கு³ளிகா அவஸிட்டா²’’தி. ‘‘ஏவமேவ கோ², பி⁴க்க²வே…பே… த⁴ம்மசக்கு²படிலாபோ⁴’’தி. ச²ட்ட²ம்.

7. ஸமுத்³த³ஸுத்தம்

80. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, புரிஸோ மஹாஸமுத்³த³தோ த்³வே வா தீணி வா உத³கபு²ஸிதானி உத்³த⁴ரேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யானி வா த்³வே வா தீணி வா உத³கபு²ஸிதானி உப்³ப⁴தானி யம் வா மஹாஸமுத்³தே³ உத³க’’ந்தி?

‘‘ஏததே³வ, ப⁴ந்தே, ப³ஹுதரம், யதி³த³ம் மஹாஸமுத்³தே³ உத³கம்; அப்பமத்தகானி த்³வே வா தீணி வா உத³கபு²ஸிதானி உப்³ப⁴தானி. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி மஹாஸமுத்³தே³ உத³கம் உபனிதா⁴ய த்³வே வா தீணி வா உத³கபு²ஸிதானி உப்³ப⁴தானீ’’தி. ‘‘ஏவமேவ கோ², பி⁴க்க²வே…பே… த⁴ம்மசக்கு²படிலாபோ⁴’’தி. ஸத்தமம்.

8. து³தியஸமுத்³த³ஸுத்தம்

81. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, மஹாஸமுத்³தோ³ பரிக்க²யம் பரியாதா³னம் க³ச்சே²ய்ய, ட²பேத்வா த்³வே வா தீணி வா உத³கபு²ஸிதானி. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யம் வா மஹாஸமுத்³தே³ உத³கம் பரிக்கீ²ணம் பரியாதி³ன்னம் யானி வா த்³வே வா தீணி வா உத³கபு²ஸிதானி அவஸிட்டா²னீ’’தி?

‘‘ஏததே³வ, ப⁴ந்தே, ப³ஹுதரம் மஹாஸமுத்³தே³ உத³கம், யதி³த³ம் பரிக்கீ²ணம் பரியாதி³ண்ணம்; அப்பமத்தகானி த்³வே வா தீணி வா உத³கபு²ஸிதானி அவஸிட்டா²னி. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி மஹாஸமுத்³தே³ உத³கம் பரிக்கீ²ணம் பரியாதி³ண்ணம் உபனிதா⁴ய த்³வே வா தீணி வா உத³கபு²ஸிதானி அவஸிட்டா²னீ’’தி. ‘‘ஏவமேவ கோ² பி⁴க்க²வே…பே… த⁴ம்மசக்கு²படிலாபோ⁴’’தி. அட்ட²மம்.

9. பப்³ப³தஸுத்தம்

82. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, புரிஸோ ஹிமவதோ பப்³ப³தராஜஸ்ஸ ஸத்த ஸாஸபமத்தியோ பாஸாணஸக்க²ரா உபனிக்கி²பேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யா வா ஸத்த ஸாஸபமத்தியோ பாஸாணஸக்க²ரா உபனிக்கி²த்தா யோ வா ஹிமவா [உபனிக்கி²த்தா, ஹிமவா வா (ஸீ.)] பப்³ப³தராஜா’’தி?

‘‘ஏததே³வ, ப⁴ந்தே, ப³ஹுதரம் யதி³த³ம் ஹிமவா பப்³ப³தராஜா; அப்பமத்திகா ஸத்த ஸாஸபமத்தியோ பாஸாணஸக்க²ரா உபனிக்கி²த்தா. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி ஹிமவந்தம் பப்³ப³தராஜானம் உபனிதா⁴ய ஸத்த ஸாஸபமத்தியோ பாஸாணஸக்க²ரா உபனிக்கி²த்தா’’தி. ‘‘ஏவமேவ கோ²…பே… த⁴ம்மசக்கு²படிலாபோ⁴’’தி. நவமம்.

10. து³தியபப்³ப³தஸுத்தம்

83. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, ஹிமவா பப்³ப³தராஜா பரிக்க²யம் பரியாதா³னம் க³ச்சே²ய்ய, ட²பேத்வா ஸத்த ஸாஸபமத்தியோ பாஸாணஸக்க²ரா. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யம் வா ஹிமவதோ பப்³ப³தராஜஸ்ஸ பரிக்கீ²ணம் பரியாதி³ண்ணம் யா வா ஸத்த ஸாஸபமத்தியோ பாஸாணஸக்க²ரா அவஸிட்டா²’’தி?

‘‘ஏததே³வ, ப⁴ந்தே, ப³ஹுதரம் ஹிமவதோ பப்³ப³தராஜஸ்ஸ யதி³த³ம் பரிக்கீ²ணம் பரியாதி³ண்ணம்; அப்பமத்திகா ஸத்த ஸாஸபமத்தியோ பாஸாணஸக்க²ரா அவஸிட்டா². நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி ஹிமவதோ பப்³ப³தராஜஸ்ஸ பரிக்கீ²ணம் பரியாதி³ண்ணம் உபனிதா⁴ய ஸத்த ஸாஸபமத்தியோ பாஸாணஸக்க²ரா அவஸிட்டா²’’தி.

‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரம் து³க்க²ம் யதி³த³ம் பரிக்கீ²ணம் பரியாதி³ண்ணம்; அப்பமத்தகம் அவஸிட்ட²ம். நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி புரிமம் து³க்க²க்க²ந்த⁴ம் பரிக்கீ²ணம் பரியாதி³ண்ணம் உபனிதா⁴ய யதி³த³ம் ஸத்தக்க²த்தும்பரமதா. ஏவம் மஹத்தி²யோ கோ², பி⁴க்க²வே, த⁴ம்மாபி⁴ஸமயோ, ஏவம் மஹத்தி²யோ த⁴ம்மசக்கு²படிலாபோ⁴’’தி. த³ஸமம்.

11. ததியபப்³ப³தஸுத்தம்

84. ஸாவத்தி²யம் விஹரதி…பே… ‘‘ஸேய்யதா²பி, பி⁴க்க²வே, புரிஸோ ஸினேருஸ்ஸ பப்³ப³தராஜஸ்ஸ ஸத்த முக்³க³மத்தியோ பாஸாணஸக்க²ரா உபனிக்கி²பேய்ய. தம் கிம் மஞ்ஞத², பி⁴க்க²வே, கதமம் நு கோ² ப³ஹுதரம், யா வா ஸத்த முக்³க³மத்தியோ பாஸாணஸக்க²ரா உபனிக்கி²த்தா யோ வா ஸினேரு [உபனிக்கி²த்தா, ஸினேரு வா (ஸீ.)] பப்³ப³தராஜா’’தி?

‘‘ஏததே³வ, ப⁴ந்தே, ப³ஹுதரம் யதி³த³ம் ஸினேரு பப்³ப³தராஜா; அப்பமத்திகா ஸத்த முக்³க³மத்தியோ பாஸாணஸக்க²ரா உபனிக்கி²த்தா. நேவ ஸதிமம் கலம் உபேந்தி ந ஸஹஸ்ஸிமம் கலம் உபேந்தி ந ஸதஸஹஸ்ஸிமம் கலம் உபேந்தி ஸினேரும் பப்³ப³தராஜானம் உபனிதா⁴ய ஸத்த முக்³க³மத்தியோ பாஸாணஸக்க²ரா உபனிக்கி²த்தா’’தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அதி⁴க³மம் உபனிதா⁴ய அஞ்ஞதித்தி²யஸமணப்³ராஹ்மணபரிப்³பா³ஜகானம் அதி⁴க³மோ நேவ ஸதிமம் கலம் உபேதி ந ஸஹஸ்ஸிமம் கலம் உபேதி ந ஸதஸஹஸ்ஸிமம் கலம் உபேதி. ஏவம் மஹாதி⁴க³மோ, பி⁴க்க²வே, தி³ட்டி²ஸம்பன்னோ புக்³க³லோ, ஏவம் மஹாபி⁴ஞ்ஞோ’’தி. ஏகாத³ஸமம்.

அபி⁴ஸமயஸம்யுத்தம் ஸமத்தம்.