4. நவஸுத்தம்

238. ஸாவத்தி²யம் விஹரதி. தேன கோ² பன ஸமயேன அஞ்ஞதரோ நவோ பி⁴க்கு² பச்சா²ப⁴த்தம் பிண்ட³பாதபடிக்கந்தோ விஹாரம் பவிஸித்வா அப்போஸ்ஸுக்கோ துண்ஹீபூ⁴தோ ஸங்கஸாயதி, ந பி⁴க்கூ²னம் வேய்யாவச்சம் கரோதி சீவரகாரஸமயே. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘‘இத⁴, ப⁴ந்தே, அஞ்ஞதரோ நவோ பி⁴க்கு² பச்சா²ப⁴த்தம் பிண்ட³பாதபடிக்கந்தோ விஹாரம் பவிஸித்வா அப்போஸ்ஸுக்கோ துண்ஹீபூ⁴தோ ஸங்கஸாயதி, ந பி⁴க்கூ²னம் வேய்யாவச்சம் கரோதி சீவரகாரஸமயே’’தி.

அத² கோ² ப⁴க³வா அஞ்ஞதரம் பி⁴க்கு²ம் ஆமந்தேஸி – ‘‘ஏஹி த்வம், பி⁴க்கு², மம வசனேன தம் பி⁴க்கு²ம் ஆமந்தேஹி ‘ஸத்தா² தம், ஆவுஸோ, ஆமந்தேதீ’’’தி. ‘‘ஏவம் ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேன ஸோ பி⁴க்கு² தேனுபஸங்கமி; உபஸங்கமித்வா தம் பி⁴க்கு²ம் ஏதத³வோச – ‘‘ஸத்தா² தம், ஆவுஸோ, ஆமந்தேதீ’’தி. ‘‘ஏவமாவுஸோ’’தி கோ² ஸோ பி⁴க்கு² தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² தம் பி⁴க்கு²ம் ப⁴க³வா ஏதத³வோச – ‘‘ஸச்சம் கிர த்வம், பி⁴க்கு², பச்சா²ப⁴த்தம் பிண்ட³பாதபடிக்கந்தோ விஹாரம் பவிஸித்வா அப்போஸ்ஸுக்கோ துண்ஹீபூ⁴தோ ஸங்கஸாயஸி, ந பி⁴க்கூ²னம் வேய்யாவச்சம் கரோஸி சீவரகாரஸமயே’’தி? ‘‘அஹம்பி கோ², ப⁴ந்தே, ஸகம் கிச்சம் கரோமீ’’தி.

அத² கோ² ப⁴க³வா தஸ்ஸ பி⁴க்கு²னோ சேதஸா சேதோபரிவிதக்கமஞ்ஞாய பி⁴க்கூ² ஆமந்தேஸி – ‘‘மா கோ² தும்ஹே, பி⁴க்க²வே, ஏதஸ்ஸ பி⁴க்கு²னோ உஜ்ஜா²யித்த². ஏஸோ கோ², பி⁴க்க²வே, பி⁴க்கு² சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ அகிச்ச²லாபீ⁴ அகஸிரலாபீ⁴, யஸ்ஸ சத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி, தத³னுத்தரம் ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி.

இத³மவோச ப⁴க³வா. இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘நயித³ம் ஸிதி²லமாரப்³ப⁴, நயித³ம் அப்பேன தா²மஸா;

நிப்³பா³னம் அதி⁴க³ந்தப்³ப³ம், ஸப்³ப³து³க்க²ப்பமோசனம்.

‘‘அயஞ்ச த³ஹரோ பி⁴க்கு², அயமுத்தமபுரிஸோ;

தா⁴ரேதி அந்திமம் தே³ஹம், ஜேத்வா மாரம் ஸவாஹினி’’ந்தி. சதுத்த²ம்;