1. கோலிதஸுத்தம்

235. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ஆயஸ்மா மஹாமோக்³க³ல்லானோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ மஹாமோக்³க³ல்லானஸ்ஸ பச்சஸ்ஸோஸும்.

ஆயஸ்மா மஹாமோக்³க³ல்லானோ ஏதத³வோச – ‘‘இத⁴ மய்ஹம், ஆவுஸோ, ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதி³ – ‘அரியோ துண்ஹீபா⁴வோ, அரியோ துண்ஹீபா⁴வோதி வுச்சதி. கதமோ நு கோ² அரியோ துண்ஹீபா⁴வோ’தி? தஸ்ஸ மய்ஹம் ஆவுஸோ, ஏதத³ஹோஸி – ‘இத⁴ பி⁴க்கு² விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. அயம் வுச்சதி அரியோ துண்ஹீபா⁴வோ’தி. ஸோ க்²வாஹம், ஆவுஸோ, விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரிம். தஸ்ஸ மய்ஹம், ஆவுஸோ, இமினா விஹாரேன விஹரதோ விதக்கஸஹக³தா ஸஞ்ஞா மனஸிகாரா ஸமுதா³சரந்தி’’.

‘‘அத² கோ² மம், ஆவுஸோ, ப⁴க³வா இத்³தி⁴யா உபஸங்கமித்வா ஏதத³வோச – ‘மோக்³க³ல்லான, மோக்³க³ல்லான, மா, ப்³ராஹ்மண, அரியம் துண்ஹீபா⁴வம் பமாதோ³, அரியே துண்ஹீபா⁴வே சித்தம் ஸண்ட²பேஹி, அரியே துண்ஹீபா⁴வே சித்தம் ஏகோதி³பா⁴வம் கரோஹி, அரியே துண்ஹீபா⁴வே சித்தம் ஸமாத³ஹா’தி. ஸோ க்²வாஹம், ஆவுஸோ, அபரேன ஸமயேன விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹராமி. யஞ்ஹி தம், ஆவுஸோ, ஸம்மா வத³மானோ வதே³ய்ய – ‘ஸத்தா²ரா அனுக்³க³ஹிதோ ஸாவகோ மஹாபி⁴ஞ்ஞதம் பத்தோ’தி, மமம் தம் ஸம்மா வத³மானோ வதே³ய்ய – ‘ஸத்தா²ரா அனுக்³க³ஹிதோ ஸாவகோ மஹாபி⁴ஞ்ஞதம் பத்தோ’’’தி. பட²மம்.